1. Ki kitsoz Zeova les nou fer?

ZEOVA les nou deside kouma nou anvi viv nou lavi. Li ansegn nou kouma pran bann bon desizion, ek kan nou pran bann desizion ki fer Li plezir, Li ed nou pou ki nou reisi. (Ps. 119:173) Plis nou aplik sazes ki ena dan Parol Bondie, plis nou pou kapav pran bann bon desizion.​—Ebre 5:14.

2. Apre ki nou’nn pran enn desizion, ki difikilte nou kapav gagne?

² Me mem kan nou pran enn bon desizion, kitfwa nou kapav gagn bann difikilte pou terminn seki nou finn koumanse. Anou get de-trwa lexanp. Enn zenn frer desid pou lir Labib an-antie. Pandan de-trwa semenn, li reisi fer so lektir, me apre li arete. Enn ser desid pou fer pionie permanan me sak fwa li repous dat ki li bizin koumanse. Enn komite ansien tom dakor pou fer pli boukou vizit pastoral, me apre plizir mwa zot pankor koumanse. Tou sa bann sitiasion-la bien diferan, me zot ena enn kitsoz an komin: Sa bann dimounn-la inn pran bann desizion, me zot pa finn reisi fer seki zot finn deside. Dan premie siek, bann Kretien dan lavil Korint ti fer fas ar mem difikilte. Anou gete seki nou kapav aprann ar zot lexanp.

3. Ki desizion bann Korintien ti pran, me ki ti arive?

³ Ver lane 55 Nou Lepok, bann Kretien dan Korint ti pran enn desizion bien inportan. Zot ti aprann ki zot bann frer dan Zerizalem ek Zide ti pe gagn bann difikilte ek ki zot ti bien mizer. Zot ti aprann osi ki bann lezot lasanble ti pe ramas kas pou ed zot. Bann Korintien ti bien zanti ek zenere, ek zot ti desid pou ed zot bann frer zot osi. Alor, zot ti demann  lapot Pol kouma zot kapav ede. Pol ti avoy zot bann instriksion ek li ti demann Tit pou ramas larzan ki zot ti pou kontribie. (1 Kor. 16:1, NW; 2 Kor. 8:6) Me de-trwa mwa plitar, Pol ti aprann ki bann Korintien pa ti fer donasion ki zot ti dir zot ti pou fer. Akoz sa, kitfwa zot donasion pa ti pou’nn pare atan pou ki bann frer amenn sa Zerizalem ansam ar donasion bann lezot lasanble.​—2 Kor. 9:4, 5, NW.

4. Dapre 2 Korintien 8:7, 10, 11, ki kitsoz Pol ti ankouraz bann Korintien pou fer?

⁴ Bann Korintien ti pran enn bon desizion, ek Pol ti felisit zot pou zot gran lafwa ek zot dezir pou montre zot zenere. Me li ti bizin osi ankouraz zot pou terminn seki zot ti koumanse. (Lir 2 Korintien 8:7, 10, 11.) Seki ti ariv bann Korintien montre nou ki mem bann Kretien ki fidel kapav gagn bann difikilte pou fer seki zot inn deside.

5. Ki bann kestion nou pou reponn dan sa lartik-la?

⁵ Parey kouma bann Korintien, kitfwa nou gagn bann difikilte pou fer seki nou’nn deside. Kifer? Nou inparfe, alor kitfwa nou finn pran labitid pou repous pou plitar sertin kitsoz ki nou’nn desid pou fer. Ouswa bann sitiasion ki nou pa atann kitfwa anpes nou fer seki nou’nn deside. (Ekle. 9:11; Rom. 7:18) Kouma nou pou kone si nou bizin re-examinn enn desizion, ek kouma nou kapav fer sa? Ek kouma nou kapav fer sir ki nou terminn seki nou’nn koumanse?

6. Kan eski kitfwa nou bizin sanz nou desizion?

⁶ Ena sertin desizion inportan ki zame nou pa pou sanze. Par exanp, nou respekte desizion ki nou’nn pran pou servi Zeova ek pou res fidel ar nou konzwin. (Mat. 16:24, NW; 19:6) Me ena lezot desizion ki kitfwa nou pou bizin sanze. Kifer? Parski nou sitiasion sanze. Ki bann letap nou kapav swiv pou nou pran bann pli bon desizion?

7. Pou ki kitsoz nou bizin priye, ek kifer?

⁷ Priye pou gagn sazes. Zeova ti inspir Zak pou ekrir: “Si kikenn parmi zot mank lasazes, ki li demande, Bondie pou donn li. Bondie zenere e li donn tou dimoun avek enn gran leker.” (Zak 1:5) Dan sertin domenn nou tou nou “mank lasazes.” Alor, demann Zeova pou ed twa kan to pran enn desizion ek kan to bizin sanz enn desizion ki to’nn pran. Lerla, Zeova pou ed twa pran bann bon desizion.

8. Ki nou bizin fer avan ki nou pran enn desizion?

⁸ Fer bann resers aprofondi. Examinn Parol Bondie, lir bann piblikasion ki lorganizasion Zeova pibliye, ek koz ar bann dimounn ki pou donn twa bann bon konsey. (Prov. 20:18) Li bien inportan ki to fer bann resers avan ki to pran bann desizion kouma sanz enn travay, demenaze, ouswa swiv enn formasion ki pou permet twa kontign servi Zeova.

9. Kifer li inportan ki nou analiz nou bann mobil kan nou pran bann desizion?

⁹ Analiz to bann mobil. Nou bann mobil bien inportan pou Zeova. (Prov. 16:2) Zeova anvi ki nou onet dan tou kitsoz. Alor, kan nou ena bann desizion pou pran ek kan nou analiz nou bann mobil, nou anvi onet avek noumem ek osi avek lezot. Si nou pa vremem onet, nou pou gagn difikilte pou respekte nou desizion. Par exanp, fer koumadir enn zenn frer inn desid pou fer pionie permanan. Selman, apre inpe letan, li gagn difikilte pou gagn so ler ek li koumans perdi so lazwa dan so servis. Kitfwa li ti pe panse ki rezon prinsipal kifer li ti pe fer pionie se parski li ti anvi fer Zeova plezir. Me an realite, kitfwa li ti pe  fer pionie parski li ti anvi fer so paran ouswa enn lot dimounn plezir.

10. Ki kitsoz kapav ed enn kikenn pou sanze?

¹⁰ Anou pran lexanp enn etidian Labib ki’nn desid pou aret fime. O-koumansman, mem si li ti trouv sa difisil, li ti reisi aret fime pandan enn-a-de semenn. Me apre, li ti rekoumans fime. Alafin, li ti reisi aret fime net! Sa etidian-la ti kontan Zeova ek ti anvi fer Li plezir, ek sa inn ed li pou aret fime.​—Kol. 1:10; 3:23.

11. Kifer to bizin fixe bann lobzektif bien presi?

¹¹ Fixe bann lobzektif bien presi. Si to bann lobzektif bien presi, li pou pli fasil pou to realiz zot. Par exanp, kitfwa to’nn desid pou lir Labib pli regilierman. Me si to pena enn program bien presi, kitfwa to pa pou reisi realiz to lobzektif. * Ouswa kitfwa bann ansien inn pran desizion pou fer pli boukou vizit pastoral, me letan inn pase ek zot pa finn reisi fer sa. Pou ed zot respekte zot desizion, zot ti kapav demann zotmem: “Eski nou’nn fer enn lalis bann frer ek ser ki bizin enn vizit pastoral? Eski nou finn fixe enn moman presi pou vizit zot?”

12. Ki kitsoz kitfwa nou pou bizin fer, ek kifer?

¹² To bizin realist. Personn pena ase letan, larzan, ouswa lafors pou fer tou seki li anvi. Alor, to bizin realist ek rezonab. Si to trouve ki to pa pe reisi respekte enn desizion ki to’nn pran, kitfwa to pou bizin sanz to desizion. (Ekle. 3:6) Me fer koumadir to finn re-examinn to desizion, to finn fer bann sanzman ki bizin, ek to panse ki to pou reisi fer seki to’nn deside. Asterla, anou examinn sink letap ki kapav ed twa pou terminn seki to finn koumanse.

13. Kouma to kapav gagn lafors ki bizin pou respekte enn desizion ki to’nn pran?

¹³ Demann Zeova lafors pou azir. Bondie kapav donn twa “kapasite pou azir” pou respekte enn desizion ki to’nn pran. (Fil. 2:13, NW) Alor, demann Zeova so lespri sin pou ki to gagn lafors ki to bizin. Kontign priye mem si to ena linpresion ki to pankor gagn enn repons pou to lapriyer. Parey kouma Zezi ti dir konsernan lespri sin: “Kontign demande, ek zot pou gagne.”​—Lik 11:9, 13, NW.

14. Kouma prinsip ki ena dan Proverb 21:5 kapav ed twa pou respekte to desizion?

¹⁴ Fer enn plan. (Lir Proverb 21:5. *) Pou to reisi terminn ninport ki proze ki to’nn koumanse, to bizin fer enn plan ek respekte sa plan-la. Dan mem fason, kan to pran enn desizion, fer enn lalis bann letap bien presi ki to bizin swiv pou ki to reisi respekte to desizion. Kan to diviz enn gro travay an plizir ti parti, li pou pli fasil pou to trouv to bann progre. Konsernan donasion ki bann Korintien ti pou fer, Pol ti ankouraz zot pou met inpe kas dekote sak “premie zour lasemenn” olie ki zot atann li vini pou ramas kas-la. (1 Kor. 16:2) Kan to diviz enn gro travay an plizir ti parti, to pa pou santi enn gran presion lor twa.

15. Apre ki to’nn fer enn plan, ki to kapav fer?

¹⁵ Li pou pli fasil pou to respekte to plan si to ekrir seki to bizin fer. (1 Kor. 14:40) Par exanp, dan komite bann ansien, ena enn ansien ki ena responsabilite pou ekrir sak desizion ki komite-la pran. Sa ansien-la pou osi ekrir kisannla ki’nn gagn  responsabilite pou fer enn kitsoz ek ki dat li bizin fini fer sa. Kan bann ansien fer koumsa, li pli fasil pou zot fer seki zot finn deside. (1 Kor. 9:26, NW) Twa osi to kapav esey fer parey dan to lavi toulezour. Par exanp, to kapav fer enn lalis bann kitsoz ki to bizin fer sak zour, ek ekrir zot dan lord ki to pou fer zot. Si to fer sa, li pou pli fasil pou to terminn seki to finn koumanse ek to pou kapav fer plis ankor.

16. Pou respekte desizion ki to pran, ki kitsoz li inportan to fer, ek kouma Romin 12:11 montre sa?

¹⁶ Fer bann zefor. To bizin fer zefor pou respekte to plan ek pou terminn seki to finn koumanse. (Lir Romin 12:11, NW. *) Pol ti konsey Timote pou “kontign fer zefor” ek pou “persevere” pou ki li vinn enn pli bon ansegnan. Nou kapav aplik sa konsey-la ar ninport ki kitsoz nou anvi fer pou Zeova.​—1 Tim. 4:13, 16, NW.

17. Kouma Efezien 5:15, 16 kapav ed twa pou respekte to desizion?

¹⁷ Servi bien to letan. (Lir Efezien 5:15, 16, NW. *) Swazir enn ler pou fer seki to’nn deside ek respekte li. Pa atann bon moman pou ki to koumanse, parski kitfwa zame pa pou ena enn bon moman. (Ekle. 11:4) Pa les bann kitsoz ki mwin inportan pran letan ek lenerzi ki to bizin pou fer bann kitsoz pli inportan. (Fil. 1:10, NW) Si posib, swazir enn moman kot lezot pa pou tro deranz twa. Fer lezot kone ki to bizin konsantre. To kapav mem tengn to portab ek check to bann e-mail ouswa to rezo sosial dan enn lot moman. *

18-19. Kan to pran enn bon desizion, ki kitsoz kapav ed twa pou pa dekouraze mem kan to gagn bann difikilte?

¹⁸ Reflesi lor bann bon rezilta ki to pou gagne. Nou kapav konpar rezilta enn desizion ar destinasion enn vwayaz. Si to vremem anvi ariv to destinasion, to bizin kontign ale, mem si enn sime devan twa ferme ek ki to bizin pran enn lot sime. Dan mem fason, si to konsantre twa lor rezilta to bann desizion, to pa pou dekouraze vit-vit mem si to gagn bann difikilte.​—Gal. 6:9.

¹⁹ Li difisil pou pran bann bon desizion ek pou respekte zot. Me avek led Zeova, to kapav gagn sazes ek lafors ki bizin pou terminn seki to finn koumanse.