1-2. (a) Kifer bann koup ki fek marye bizin ena konfians an Zeova? (Psom 37:3, 4) (b) Ki nou pou examine dan sa lartik-la?

ESKI to pou marye biento, ouswa eski to’nn fek marye? Si wi, sirman to anvi ena enn zoli lavi avek sa dimounn ki to kontan la! Me selman, lavi maryaz li pa touletan fasil, ek bann koup ki fek marye ena bann desizion inportan pou pran. Bann desizion ki zot pran ek fason ki zot regle bann difikilte ki zot gagne, pou ena enn lefe lor zot lavi maryaz. Si zot kont lor Zeova, zot pou pran bann bon desizion. Sa pou ranforsi zot koup ek zot pou pli ere. Me si zot pa swiv bann konsey Zeova, zot pou gagn bann difikilte ek zot pa pou ere dan zot maryaz.​—Lir Psom 37:3, 4.

² Mem si sa lartik-la pou bann koup ki fek marye, li pou koz lor bann difikilte ki tou bann koup gagne. Nou pou gete seki nou kapav aprann ar lexanp bann fidel serviter Zeova dan lepase. Sa bann lexanp-la pou ansegn nou bann leson inportan ki kapav ed nou dan nou lavi toulezour ek osi dan nou lavi maryaz. Nou pou get osi lexanp sertin koup dan nou lepok, ek nou pou gete seki nou kapav aprann ar zot lexanp.

3-4. Ki difikilte bann nouvo marye kapav gagne?

³ Sertin dimounn kapav ankouraz bann koup ki fek marye pou viv parey kouma laplipar dimounn. Par exanp, bann paran ouswa bann lezot fami pros kapav met presion lor enn koup pou zot gagn bann zanfan pli vit posib. Ouswa bann manb lafami ek bann kamarad kapav ankouraz bann nouvo marye pou aste enn lakaz ek lezot kitsoz, pou ki zot ena enn lavi konfortab.

⁴ Si zot pa fer atansion, enn koup kapav pran bann desizion ki kapav fer zot ena boukou det. Lerla, mari ek fam toulede kitfwa pou bizin travay plis pou zot kapav pey zot det. Akoz zot travay, kitfwa zot pou nepli ena letan pou zot letid personel, zot ladorasion an fami, ek predikasion. Sa koup-la kitfwa pou bizin koumans fer overtime pou gagn plis kas ouswa pou zot pa perdi zot travay, ek lerla, kitfwa zot pou koumans rat bann renion. Akoz tousala, ena boukou kitsoz dan zot servis pou Zeova ki sa koup-la pa pou kapav fer, ek zot pa pou konn sa lazwa-la.

5. Ki nou kapav aprann ar lexanp Klaus ek Marisa?

⁵ Ena boukou lexanp ki montre ki nou pa pou vremem ere si bann kitsoz materyel enn priorite dan nou lavi. Anou get lexanp Klaus ek Marisa. * Kan zot ti fek marye, toulede ti pe travay aplintan pou ki zot kapav ena enn lavi ki konfortab. Selman, zot pa ti vremem ere. Klaus dir: “Lor plan materyel, nou ti ena plis ki seki nou ti bizin, me lor plan spiritiel, nou pa ti ena okenn lobzektif. An realite, nou lavi ti bien konplike ek nou ti bien strese.” Kitfwa twa osi to’nn remarke ki to pa vremem ere parski bann kitsoz materyel enn priorite dan to lavi. Si to dan sa sitiasion-la, fode pa to dekouraze. Kan to reflesi lor lexanp lezot, sa kapav ed twa pou fer bann sanzman ki bizin. Pou koumanse, anou gete seki bann mari kapav aprann ar lexanp Lerwa Zozafat.

6. Kouma Zozafat ti swiv prinsip ki ena dan Proverb 3:5, 6 kan enn gran larme ti atak so pep?

⁶ Mari, eski parfwa to santi twa strese akoz to bann responsabilite? Si to dan sa sitiasion-la, lexanp Lerwa Zozafat kapav ed twa. Antan ki lerwa, Zozafat ti ena enn responsabilite bien inportan. Li ti bizin fer sir ki lepep res an sekirite. Ki li ti fer pou asim bien so responsabilite? Zozafat ti fer tou seki li kapav pou protez lepep. Li ti fortifie bann lavil Zida ek li ti rasanble enn gran larme, plis ki 1,160,000 solda. (2 Kro. 17:12-19) Me plitar, Zozafat ti fer fas ar enn gran  difikilte. Enn gran larme, bann Amonit, bann Moabit, ek bann zom ki res dan rezion montagn Seir ti menas Zozafat, so fami, ek so pep. (2 Kro. 20:1, 2) Ki Zozafat ti fer? Li ti rod led Zeova. Li ti swiv prinsip bien saz ki ena dan Proverb 3:5, 6. (Lir. *) Dan 2 Kronik 20:5-12, nou trouve ki Zozafat ti fer enn lapriyer ki ranpli ar limilite ek ki montre ki li ti ena konfians an Zeova. Kouma Zeova ti reponn lapriyer Zozafat?

7. Kouma Zeova ti reponn lapriyer Zozafat?

⁷ Zeova ti servi enn Levit, ki ti apel Zaaziel, pou koz avek Zozafat. Zeova ti dir li: “Pran zot pozision, debout anplas, ek gete kouma Zeova pou sap zot.” (2 Kro. 20:13-17) An prinsip, se pa koumsa ki fer enn lager! Selman, sa bann instriksion-la pa ti sorti kot enn imin. Se Zeova ki ti donn sa bann instriksion-la. Zozafat ti ena konfians an Zeova ek li ti fer seki Zeova ti demann li. Kan Zozafat ek lepep ti sorti pou al devan zot bann lennmi, Zozafat pa ti met bann solda ki ena lexperyans devan dan so larme. Li ti met bann santer ki pa ti ena okenn zarm avek zot. Zeova ti tini promes ki Li ti fer Zozafat; Li ti gagn laviktwar lor so bann lennmi.​—2 Kro. 20:18-23.

8. Ki leson bann mari kapav aprann ar lexanp Zozafat?

⁸ Mari, to kapav tir bann leson ar lexanp Zozafat. To ena responsabilite pou pran swin to fami, alor to fer boukou zefor pou soutenir ek protez to fami. Kan to gagn bann difikilte, kitfwa to panse ki to kapav rezoud zot par tomem. Selman, pa kont lor to prop lafors. Okontrer, kan to tousel, priye Zeova pou gagn so led. Priye Zeova kan to avek to madam osi. Rod direksion Zeova kan to etidie Labib ek bann piblikasion, ek met an pratik bann konsey ki to gagne. Kan to pran bann desizion ki baze lor Labib, kitfwa sertin dimounn pa pou dakor avek twa, ek zot kapav mem dir twa ki to bien bet. Kitfwa zot pou dir twa ki, meyer fason ki to kapav pran swin to fami, se kan to travay pou gagn plis kas. Selman, pa bliye lexanp Zozafat. Li ti fer Zeova konfians ek li ti montre sa par so bann aksion. Zeova pa ti abandonn so serviter fidel, ek Li pa pou abandonn twa osi. (Ps. 37:28; Ebre 13:5) Ki kitsoz ankor bann koup kapav fer pou ki zot ere?

9. Ki nou kapav dir lor profet Izai ek so madam?

⁹ Izai ek so madam ti res konsantre lor zot servis pou Zeova. Izai ti enn profet, ek kitfwa so madam osi ti ena bann responsabilite kouma profet, parski Labib dir ki li ti enn “profetes.” (Iza. 8:1-4) Izai ek so madam ti fer zot servis pou Zeova vinn enn priorite dan zot lavi. Zot enn bon lexanp pou bann koup azordi!

10. Kan bann koup etidie bann profesi Labib, kouma sa kapav ed zot pou fer plis pou Zeova?

¹⁰ Azordi, bann koup kapav swiv lexanp Izai ek so madam kan zot fer tou seki zot kapav pou servi Zeova. Zot pou ena plis konfians an Zeova kan zot etidie bann profesi Biblik ansam ek kan zot  trouve ki bann profesi Zeova touletan realize. * (Tit 1:2) Zot kapav osi reflesi lor kouma zot kapav ede pou realiz sertin profesi Biblik. Par exanp, zot kapav ede pou realiz profesi Zezi konsernan bonn nouvel ki bizin prese lor later antie avan ki lafin vini. (Mat. 24:14) Kan mari ek fam sir ki bann profesi Labib pe realize, zot pou plis determine pou fer zot maximum pou Zeova.

11. Ki kitsoz Prisil ek Akila ti fer, ek kifer?

¹¹ Bann nouvo marye kapav aprann boukou kitsoz ar lexanp Prisil ek Akila, enn koup Zwif ki ti res dan lavil Rom. Prisil ek Akila ti tann bonn nouvel lor Zezi Kris ek zot ti vinn Kretien. Sirman zot ti bien kontan zot lavi. Selman, zot lavi ti sanze enn sel kout kan Lanperer Klod ti donn lord bann Zwif pou kit Rom. Reflesi lor seki sa ti pou inplike pou Prisil ek Akila! Zot ti pou bizin kit enn landrwa ki zot ti kone pou al res dan enn lot landrwa, dan enn lot lakaz, ek zot ti bizin rekoumans zot biznes latant dan sa landrwa-la. Eski sa sitiasion-la ti anpes zot fer zot maximum pou Zeova? Non. Dan lavil Korint, kot zot ti al reste, Prisil ek Akila ti fer zot maximum dan zot lasanble. Zot ti travay ansam avek lapot Pol ek zot ti ranforsi lafwa zot bann frer ek ser. Apre sa, zot ti osi al servi dan bann lezot lavil kot ti bizin plis proklamater. (Zist. 18:18-21; Rom. 16:3-5) Prisil ek Akila ti ena enn zoli lavi ek zot ti vremem ere!

12. Kifer bann koup bizin ena bann lobzektif spiritiel?

¹² Azordi, bann koup kapav swiv lexanp Prisil ek Akila kan zot fer zot maximum pou servi Zeova. Meyer moman pou koz lor bann lobzektif spiritiel se pandan frekantasion. Kan enn koup fixe bann lobzektif spiritiel ansam ek zot fer zot maximum pou realiz sa bann lobzektif-la, zot pou ena plis  lokazion pou trouv Zeova ed zot dan zot lavi. (Ekle. 4:9, 12) Anou get lexanp Russell ek Elizabeth. Russell dir: “Kan nou ti pe frekante, souvan nou ti koz lor nou bann lobzektif spiritiel.” Elizabeth dir: “Nou ti fer sa parski nou pa ti anvi ki bann desizion ki nou pran plitar anpes nou realiz nou bann lobzektif.” Gras-a sa, Russell ek Elizabeth inn reisi al servi dan Micronésie, kot ti bizin plis proklamater.

13. Dapre Psom 28:7, ki pou arive si nou fer Zeova konfians?

¹³ Parey kouma Russell ek Elizabeth, boukou koup inn desid pou ena enn lavi sinp pou zot kapav pas plis letan pou prese ek ansegn bann dimounn. Kan enn koup fixe lobzektif pou fer tou seki zot kapav pou servi Zeova ek ki zot travay ansam pou realiz sa lobzektif-la, zot gagn boukou benediksion. Zot pou trouve kouma Zeova pran zot swin, zot konfians an Zeova pou grandi, ek zot pou vremem ere.​—Lir Psom 28:7, NW. *

14. Kouma lapot Pier ek so madam ti montre ki zot ti ena konfians dan promes ki trouv dan Matie 6:25, 31-34?

¹⁴ Bann koup kapav aprann boukou kitsoz ar lexanp lapot Pier ek so madam. Inpe letan apre ki li ti zwenn Zezi pou premie fwa, lapot Pier ti bizin pran enn desizion bien inportan. Pier ti ena enn biznes lapes. Alor, kan Zezi ti invit Pier pou swiv li aplintan, Pier ti bizin reflesi lor lefe ki so desizion ti pou ena lor so fami. (Lik 5:1-11) Pier ti desid pou akonpagn Zezi dan so minister, ek li ti pran enn bon desizion. Pena dout ki Pier so madam ti soutenir desizion ki Pier ti pran, parski Labib dir ki, apre rezireksion Zezi, li ti akonpagn Pier pandan enn sertenn letan. (1 Kor. 9:5) Gras-a bon lexanp so madam, Pier ti kapav donn bann konsey bann koup Kretien. (1 Pier 3:1-7) Pier ek so madam ti sir ki Zeova ti pou pran zot swin si zot ti met Rwayom Bondie an premie dan zot lavi.​—Lir Matie 6:25, 31-34.

15. Ki nou kapav aprann ar lexanp Tiago ek Esther?

¹⁵ Si sa fer inpe letan ki to marye asterla, kouma to kapav kontign kiltiv dezir pou fer plis pou Zeova? Enn fason ki to kapav fer sa se kan to aprann ar lexanp bann lezot koup. Par exanp, to kapav lir bann seri lartik “Zot Ti Port Zot Volonter pou Servi.” Sa bann lartik-la ti ed Tiago ek Esther, enn koup ki res Brezil, pou kiltiv dezir pou al servi kot bizin plis proklamater. Tiago dir: “Kan nou ti lir lexperyans bann serviter Zeova dan nou lepok, nou osi nou ti anvi trouv lame Zeova diriz nou ek pran nou swin.” Avek letan, Tiago ek Esther inn al Paragwe, ek depi 2014, zot pe ed bann dimounn ki koz Portige pou aprann konn Zeova. Esther dir: “Enn verse ki nou toulede nou bien kontan se Efezien 3:20. Nou’nn trouv bann parol sa verse-la realize plizir fwa dan nou servis pou Zeova.” Dan let ki Pol ti ekrir bann Efezien, Pol dir ki Zeova donn plis ki seki nou demann Li. Wi, Zeova vremem donn nou seki nou bizin!

16. Kan zot reflesi lor bann lobzektif ki zot kapav fixe, ar kisannla bann nouvo marye kapav rod konsey?

 ¹⁶ Bann nouvo marye kapav profit lexperyans bann koup ki’nn aprann kont lor Zeova. Sertin parmi sa bann koup-la kitfwa inn pas plizir lane dan servis aplintan. To kapav rod konsey avek zot kan to pe pans pou fixe bann lobzektif spiritiel. Se enn lot fason ki to montre ki to ena konfians an Zeova. (Prov. 22:17, 19) Bann ansien osi kapav ed bann ki’nn fek marye pou fixe ek realiz bann lobzektif spiritiel.

17. Ki ti ariv Klaus ek Marisa, ek ki nou kapav aprann ar zot lexanp?

¹⁷ Selman, li kapav arive ki nou anvi servi Zeova dan enn sertenn fason, me ki Zeova avoy nou dan enn lot direksion. Se seki ti ariv Klaus ek Marisa, ki nou ti mansione talerla. Apre trwa-z-an maryaz, zot ti kit zot lakaz pou al servi kouma volonter lor konstriksion dan Betel Finland. Selman, zot ti aprann ki zot pa ti pou kapav fer plis ki sis mwa laba. O-koumansman, sa ti dekouraz zot. Me apre, zot ti gagn linvitasion pou asiste enn kour lang Arab, ek asterla, zot pe servi dan enn teritwar lang Arab. Marisa dir: “Mo ti gagn per pou fer enn kitsoz ki zame mo pa ti fer avan, ek mo ti bizin aprann fer Zeova full konfians. Me mo’nn trouve kouma Zeova inn touletan ed nou dan bann fason ki nou pa ti atann. Azordi, mo ena plis konfians an Li.” Parey kouma sa lexanp-la montre, to kapav sir ki Zeova pou rekonpans twa si to fer Li full konfians.

18. Ki kitsoz bann koup bizin fer pou montre ki zot ena konfians an Zeova?

¹⁸ Maryaz se enn kado Zeova. (Mat. 19:5, 6) Ek Li anvi ki bann koup profit sa kado-la. (Prov. 5:18) Si to fek marye, reflesi lor seki to pe fer ar to lavi. Eski to pe fer to maximum pou montre Zeova ki to rekonesan pou sa zoli kado ki Li’nn donn twa la? Priye Zeova. Rod bann prinsip Biblik ki kapav ed twa. Ek met an pratik bann konsey ki Zeova donn twa. To kapav sir ki to pou ere dan to maryaz si to fer to maximum pou servi Zeova!