1. Ki Zeova ankouraz nou pou fer?

LAMOUR fidel, se enn kalite bien inportan pou Zeova. (Oze 6:6) Ek Li anvi ki sa kalite-la inportan pou nou osi. Atraver profet Mishe, Zeova ankouraz nou pou “kontan lamour fidel.” (Mish. 6:8, not.) Me pou ki nou reisi fer sa, nou bizin kone ki ete lamour fidel.

2. Ki ete lamour fidel?

² Nou trouv lexpresion “lamour fidel” apepre 230 fwa dan La Bible. Traduction du monde nouveau. Sertin tradiksion Labib servi lexpresion “lamour infini” dan plas “lamour fidel.” Alor, kan bann verse sa lartik-la ek prosin lartik koz lor “lamour infini,” zot pe koz lor lamour fidel. Ki ete lamour fidel? Si enn kikenn ena lamour fidel pou so kamarad, li pou kontign kontan sa dimounn-la ek li pou res fidel anver li. Souvan servi sa lexpresion-la pou dekrir lamour ki Bondie ena pou bann imin, me kapav osi servi sa lexpresion-la pou dekrir lamour ki bann dimounn ena pou zot kamarad. Zeova Limem pli gran lexanp konsernan lamour fidel. Dan sa lartik-la, nou pou trouve kouma Zeova montre lamour fidel anver bann dimounn. Dan prosin lartik, nou pou gete kouma bann serviter Bondie kapav imit lexanp Zeova kan zot montre lamour fidel anver sakenn zot kamarad.

3. Kan Zeova ti dekrir Limem, ki Li ti dir Moiz?

³ Inpe apre ki bann Izraelit ti kit Lezip, Zeova ti koz lor so nom ek lor so bann kalite avek Moiz. Li ti dir: “Zeova, Zeova, enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans, ki montre lamour fidel anver bann milye dimounn, ki pardonn bann erer, bann fot, ek bann pese.” (Ex. 34:6, 7)  Atraver sa bann zoli parol-la, Zeova ti dir Moiz enn kitsoz bien inportan konsernan So lamour fidel. Ki sa kitsoz bien inportan la?

4-5. (a) Kouma Zeova dekrir Limem? (b) Ki kestion nou pou reponn dan sa lartik-la?

⁴ Kan Zeova dekrir Limem, Li pa zis dir ki Li ena lamour fidel. Li dir ki Li ena “lamour fidel an-abondans.” Nou trouv sa deskripsion-la ankor sis fwa dan Labib. (Nonb 14:18; Ne. 9:17; Ps. 86:15; 103:8; Zoel 2:13; Zonas 4:2) Ek sak fwa, sa bann verse-la koz zis lor Zeova, pa lor bann dimounn. Li vremem extraordiner ki Zeova dekrir Limem dan sa fason-la, pa vre! Alor, nou konpran ki lamour fidel bien inportan pou Zeova. * Se pou sa rezon-la ki Lerwa David ti dir: “SEGNER, to lamour infini al tous lesiel. . . . Bondie, to lamour infini samem nou pli gran trezor; anba to lezel tou dimoun santi zot ansekirite.” (Ps. 36:5, 7) Parey kouma David, eski Zeova so lamour fidel ena valer pou twa?

⁵ Pou nou konpran pli bien ki ete lamour fidel, anou reponn sa de kestion-la: Anver kisannla Zeova montre lamour fidel? Ek ki bienfe nou gagne kan Zeova montre so lamour fidel anver nou?

6. Anver kisannla Zeova montre so lamour fidel?

⁶ Anver kisannla Zeova montre so lamour fidel? Labib dir ki nou kapav kontan boukou kitsoz, kouma par exanp, ‘lagrikiltir,’ ‘divin ek delwil,’ ‘disiplinn,’ ‘konesans,’ ek ‘sazes.’ (2 Kro. 26:10; Prov. 12:1; 21:17; 29:3) Selman, kan Labib koz lor lamour fidel, li touletan ena enn lien avek bann dimounn, pa avek bann kitsoz. Anplis, Zeova pa montre so lamour fidel anver tou dimounn. Li montre so lamour fidel zis anver bann dimounn ki ena enn bon lamitie avek Li. Zeova fidel anver so bann kamarad. Li ena enn zoli proze pou zot, ek zame Li pa pou abandonn zot.

7. Kouma Zeova inn montre so lamour anver tou dimounn?

⁷ Zeova inn montre so lamour anver tou dimounn. Zezi ti dir Nikodem: “Bondie finn telman kontan lemonn [bann dimounn], ki li finn donn so Sel Garson pouki tou dimoun ki krwar dan Li, pa mor me gagn lavi eternel.”​—Zan 3:1, 16; Mat. 5:44, 45.

8-9. (a) Kifer Zeova montre lamour fidel anver so bann serviter? (b) Ki nou pou examine asterla?

 ⁸ Kouma nou’nn trouve talerla, Zeova montre so lamour fidel zis anver bann dimounn ki ena enn bon lamitie avek Li, setadir so bann serviter. Nou kapav trouv sa dan bann parol ki Lerwa David ek profet Daniel ti dir. Par exanp, David ti dir: “Donn to lamour dimoun ki rekonet to grander.” “Depi touzour ziska touzour LESEGNER ena enn lamour infini pou bann ki onor li.” Ek Daniel ti dir: “O! Zeova, vre Bondie, ki montre lamour fidel pou bann ki kontan Li ek pou bann ki gard so bann komannman.” (Ps. 36:10; 103:17; Dan. 9:4) Dapre sa bann verse-la, Zeova montre so lamour fidel anver so bann serviter parski zot rekonet Li, zot onor Li, zot kontan Li, ek zot gard so bann komannman. Alor, Zeova montre so lamour fidel zis anver bann dimounn ki servi Li dan fason ki bizin.

⁹ Avan ki nou koumans servi Zeova, Zeova ti kontan nou parey kouma Li kontan tou dimounn. (Ps. 104:14) Selman, depi ki nou’nn koumans servi Li, Zeova inn montre so lamour fidel anver nou. An realite, Zeova rasir so bann serviter, kan Li dir zot: “Mo lamour fidel pou res avek [zot].” (Iza. 54:10) Lerwa David ti fer sa lexperyans-la. Li ti dir: “Zeova pou tret sa dimounn ki fidel la dan enn fason spesial.” (Ps. 4:3, NW) Ki sa bizin pous nou pou fer? Enn ekrivin Psom ti dir: “Tou bann dimoun saz, zame bliye sa! Zame bliye lamour infini nou SEGNER!” (Ps. 107:43) Se Zeova ki donn nou sa bon konsey-la! Alor, anou get trwa fason kouma Zeova montre so lamour fidel anver so bann serviter, ek anou gete ki bienfe nou gagne gras-a sa.

10. Kouma sa ed nou kan nou kone ki lamour fidel Bondie li eternel? (Psom 31:7)

¹⁰ Lamour fidel Bondie li eternel. Nou trouv sa lexpresion-la 26 fwa dan Psom 136. Premie verse sa Psom-la dir: “Nou remersie LESEGNER parski li bon; so lamour infini li eternel.” (Ps. 136:1)  Dan sak verse, depi verse 2 ziska verse 26, ena lexpresion “so lamour infini li eternel.” Kan nou lir sa Psom-la, nou inpresione kan nou trouve kouma Zeova montre so lamour fidel touletan, ek Li fer sa dan plizir fason. Sa refrin “so lamour infini li eternel” la, donn nou lasirans ki lamour ki Bondie ena pou so pep zame pa pou sanze. Sa rekonfort nou kan nou kone ki Zeova zame pa pou aret kontan so bann serviter, amwin ki Li ena enn bon rezon pou fer sa. Kan Zeova koumans kontan enn kikenn ki pe servi Li, Li pa pou abandonn sa dimounn-la, sirtou si li pe pas par bann sitiasion difisil. Ki bienfe nou gagne: Kan nou kone ki Zeova zame pa pou abandonn nou, sa donn nou lazwa ek lafors ki nou bizin pou nou kontign fer fas ar nou bann difikilte ek nou kontign servi Li.​—Lir Psom 31:7.

11. Dapre Psom 86:5, ki kitsoz motiv Zeova pou pardonn nou?

¹¹ Bondie so lamour fidel motiv Li pou pardonn nou. Kan Zeova trouve ki enn peser inn repanti ek ki li’nn rezet so move kondwit, Zeova so lamour fidel motiv Li pou pardonn sa dimounn-la. Konsernan Zeova, David ti dir: “Li pa tret nou dapre nou pese, li pa pini nou dapre nou bann fot.” (Ps. 103:8-11) David ti kone ki, kan enn kikenn so konsians fatig li, sa dimounn-la kapav santi li koupab ek tris. Me li ti osi kone ki Zeova ‘ranpli ar pardon.’ Ki kitsoz motiv Zeova pou pardonn nou? Nou trouv repons sa kestion-la dan Psom 86:5. (Lir.) Parey kouma David ti dir dan so lapriyer, Zeova montre so lamour fidel anver tou bann dimounn ki demann Li pardon.

12-13. Ki kitsoz kapav ed nou si nou santi nou konpab ek nou tris akoz bann pese ki nou’nn fer dan lepase?

¹² Kan nou’nn fer enn pese, li normal, ek li mem bon, ki nou regret seki nou’nn fer. Sa kapav motiv nou pou repanti ek sanze. Sertin serviter Zeova kitfwa kontign santi zot koupab pou bann pese ki zot inn fer dan lepase. Zot kontign panse ki Zeova zame pa pou pardonn zot, mem si zot inn repanti ek zot inn aret  fer seki move. Si to ena sa santiman-la, sa kapav ed twa kan to kone ki Zeova vremem anvi montre twa so lamour fidel.

¹³ Ki bienfe nou gagne: Mem si nou inparfe ek nou fer bann erer, nou kapav servi Zeova dan lazwa avek enn konsians kler. Kifer? Parski “disan . . . Zezi lav tou nou pese.” (1 Zan 1:7) Si nou dekouraze parski nou’nn fer enn pese, pa bliye ki Zeova vremem anvi pardonn nou si nou repanti. Remarke ki David fer enn lien ant lamour fidel ek pardon. Li ti dir: “So lamour infini pou dimoun ki onor li li osi ot ek gran ki lesiel ete konpare ar later. Li separ nou ar nou pese parey kouma distans ki ant soley leve ek soley kouse.” (Ps. 103:11, 12) Wi, Zeova “so pardon bien gran.”​—Iza. 55:7.

14. Kouma David ti dekrir fason ki lamour fidel Bondie protez nou?

¹⁴ Lamour fidel Bondie protez nou lor plan spiritiel. Dan enn lapriyer, David ti dir Zeova: “Tomem mo sanktyer; twa ki protez mwa ler siklonn pe tape, e bann sante lor to delivrans pou partou otour mwa. . . . Bann ki met zot konfians dan LESEGNER zot proteze par so lamour infini.” (Ps. 32:7, 10) Dan lepok Biblik, bann miray ki ti antour enn lavil ti protez bann abitan sa lavil-la kont zot bann lennmi. Dan mem fason, lamour fidel Zeova li kouma enn miray ki protez nou kont ninport ki kitsoz ki kapav gat nou lamitie avek Li. Anplis, se lamour fidel Zeova ki motiv Li pou atir nou ver Li.​—Zer. 31:3.

15. Kifer nou kapav konpar lamour fidel Zeova ar enn boukliye ek enn sitadel?

¹⁵ David ti servi enn lot konparezon pou montre kouma Zeova protez So bann serviter. Li ti dir: “Tomem mo Bondie, mo sitadel, ki ena lamour infini pou mwa.” Li ti osi dir: “Limem mo protekter ek mo boukliye, mo sitadel ek mo liberater, mo boukliye, mo abrit mwa deryer li.” (Ps. 59:17; 144:2) Kifer David ti kapav konpar lamour fidel Zeova ar enn boukliye ek enn sitadel? Parski Zeova touletan protez so bann serviter. Ninport kotsa nou reste, Zeova pou touletan protez nou lamitie avek Li. Nou trouv mem lide dan Psom 91. Konsernan Zeova, sa ekrivin Psom-la ti dir: “Tomem mo labri ek mo fortres.” (Ps. 91:1-3, 9, 14) Moiz osi koz lor proteksion ki Zeova done. (Ps. 90:1, ftn.) Anplis, pa tro lontan avan so lamor, Moiz ti fer enn zoli konparezon lor Zeova. Li ti dir: “Bondie ki la depi touletan, Li enn plas kot kapav al kasiet, ek so lebra eternel soutenir twa.” (Det. 33:27) Kan Labib dir “so lebra eternel soutenir twa,” ki sa aprann nou lor Zeova?

16. Sit de fason kouma Zeova beni nou. (Psom 136:23)

¹⁶ Kan Zeova Li nou sitadel, nou santi nou an sekirite. Me parfwa, nou kapav santi nou dekouraze ek nou pa reisi sirmont nou dekourazman. Dan sa bann moman-la, ki Zeova pou fer pou nou? (Lir Psom 136:23.) Li pou soutenir nou par “so lebra,” ek Li pou relev nou. (Ps. 28:9; 94:18) Ki bienfe nou gagne: Kan nou kone ki nou kapav touletan kont lor Zeova pou soutenir nou, sa ed nou pou rapel ki Li beni nou dan de fason. Premierman, ninport kotsa nou reste, nou kone ki Zeova pou touletan protez nou. Ek deziemman, nou kone ki nou Papa kontan nou ek ki Li gagn nou traka.

17. Gras-a lamour fidel Zeova, ki kitsoz nou kapav sir? (Psom 33:18-22)

¹⁷ Kouma nou’nn trouve, kan nou gagn bann difikilte, nou kapav sir ki Zeova pou ed nou pou gard enn bon lamitie avek Li. (2 Kor. 4:7-9) Profet Zeremi ti explike ki se gras-a lamour fidel Zeova “ki nou pa finn detrir net, parski so mizerikord zame pa pou disparet.” (Lam. 3:22) Nou kapav sir ki Zeova pou kontign montre so lamour fidel anver nou, parski Labib dir nou ki lizie Zeova “vey lor bann ki ena respe pou li; bann ki fer konfians so lamour infini.”​—Lir Psom 33:18-22.

18-19. (a) Ki kitsoz nou bizin touletan rapel? (b) Ki nou pou examine dan prosin lartik?

¹⁸ Ki kitsoz nou bizin touletan rapel? Avan ki nou koumans servi Zeova, Zeova ti kontan nou parey kouma Li kontan tou dimounn. Selman, antan ki so bann serviter, Zeova montre osi so lamour fidel anver nou. So lamour fidel motiv Li pou protez nou ek soutenir nou par so lebra. Li pou touletan res pros avek nou ek Li pou realiz bann zoli promes ki Li’nn fer nou. Li anvi ki nou res so kamarad pou touletan. (Ps. 46:1, 2, 7) Ninport ki difikilte nou gagne, Zeova pou donn nou lafors ki nou bizin pou nou res fidel anver Li.

¹⁹ Dan sa lartik-la, nou’nn trouve kouma Zeova montre so lamour fidel anver so bann serviter. Me asterla, Li anvi ki nou montre lamour fidel anver sakenn nou kamarad. Kouma nou kapav fer sa? Nou pou reponn sa kestion-la dan prosin lartik.