1-2. Kifer nou bizin montre lamour fidel anver sakenn nou kamarad?

NOU ena bann bon rezon pou montre lamour fidel anver sakenn nou kamarad. Nou trouv sertin parmi sa bann rezon-la dan bann proverb ki ena dan Labib, kouma par exanp: “Pa les lamour fidel ek fidelite kit twa. . . . Lerla, to pou gagn enn bon repitasion ek faver devan lizie Bondie ek bann zom.” “Enn dimounn ki ena lamour fidel fer limem dibien.” “Seki pe rod lazistis ek lamour fidel pou trouv lavi, lazistis ek laglwar.”​—Prov. 3:3, 4; 11:17, not; 21:21.

² Sa bann proverb-la koz lor trwa rezon kifer nou bizin montre lamour fidel. Premierman, kan nou montre lamour fidel, nou ena valer devan lizie Zeova. Deziemman, kan nou montre lamour fidel, nou gagn bann bienfe depi asterla-mem. Par exanp, nou kree bann bon lamitie ki pou dire pou touletan. Trwaziemman, kan nou montre lamour fidel, nou pou gagn bann benediksion dan lavenir, parmi ena lavi eternel. Wi, nou ena bann bon rezon pou obeir seki Zeova dir nou: “Montre lamour fidel ek mizerikord sakenn anver [nou] kamarad.”​—Zaka. 7:9.

3. Ki kestion nou pou examine dan sa lartik-la?

³ Dan sa lartik-la, nou pou reponn kat kestion. Anver kisannla nou bizin montre lamour fidel? Ki nou kapav aprann lor lamour fidel ar lexanp Rut? Kouma nou kapav montre lamour fidel azordi? Ek ki bienfe nou gagne kan nou montre lamour fidel?

4. Kouma nou kapav imit lexanp Zeova konsernan lamour fidel? (Mark 10:29, 30)

⁴ Kouma nou ti trouve dan lartik avan, Zeova montre so lamour fidel zis anver bann ki kontan Li ek servi Li. (Dan. 9:4) Nou anvi “imit li,” parski nou so bann zanfan. (Efe. 5:1) Akoz sa, nou anvi montre lamour fidel anver nou bann frer ek ser dan lasanble.​—Lir Mark 10:29, 30.

5-6. Explike kouma bann dimounn an zeneral konpran mo “fidelite.”

⁵ Nou pou plis kapav montre lamour fidel anver nou bann frer ek ser, si nou konpran bien ki ete lamour fidel. Pou nou konpran pli bien ki ete lamour fidel, anou gete kouma bann dimounn an zeneral konpran mo “fidelite.” Anou pran enn lexanp.

 ⁶ Azordi, nou kapav dekrir enn kikenn ki travay pou enn konpagni depi plizir lane kouma enn anplwaye ki fidel. Selman, pandan tou sa bann lane ki li travay laba la, kitfwa sa dimounn-la zame pa’nn zwenn bann direkter konpagni-la. Kitfwa li pa touletan dakor avek bann desizion ki sa bann direkter-la pran. Ek kitfwa li pa kontan travay pou sa konpagni-la. Selman, li kontan ki li ena enn travay, parski li bizin larzan pou viv. Akoz sa, li pou kontign travay laba ziska ki li pran so retret, amwin ki li gagn enn pli bon travay enn lot plas.

7-8. (a) Ki kitsoz motiv enn dimounn pou montre lamour fidel? (b) Kifer nou pou examinn sertin verse dan liv Rut?

⁷ Dan  paragraf 6, nou’nn trouve kouma bann dimounn an zeneral konpran mo “fidelite.” Alor, diferans ki ena ant fidelite, ki mansione dan paragraf 6, ek lamour fidel se rezon ki pous enn dimounn pou montre lamour fidel. Dan lepok Biblik, pou ki rezon bann serviter Bondie ti montre lamour fidel? Zot ti montre lamour fidel, pa parski zot ti bizin fer li, me parski zot ti anvi fer li. Anou get lexanp Lerwa David. Mem si Zonatan so papa ti anvi touy David, David so leker ti motiv li pou montre lamour fidel anver so kamarad Zonatan. Plizir lane apre lamor Zonatan, David ti kontign montre lamour fidel anver Zonatan so garson, Mefiboshet.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Nou kapav aprann boukou kitsoz lor lamour fidel kan nou examinn sertin verse dan liv Rut. Ki bann leson nou kapav aprann lor lamour fidel ar bann personaz ki ena dan sa liv-la? Kouma nou kapav aplik sa bann leson-la dan nou lasanble? *

9. Kifer Noemi ti panse ki Zeova ti vir so ledo ar li?

⁹ Dan liv Rut, nou trouv zistwar Noemi, so belfi Rut, ek enn zom ki ti apel Boaz. Boaz ti kontan Zeova ek li ti tom fami ar Noemi so mari. Akoz lafaminn ki ti ena dan Izrael, Noemi, so mari, ek zot de zanfan ti al res Moab. Kan zot ti laba, Noemi so mari ti mor. So de garson ti marye, me apre zot osi zot ti mor. (Rut 1:3-5; 2:1) Sa bann maler-la ti bien dekouraz Noemi. Li ti telman dekouraze ki li ti panse ki Zeova  ti pe opoz ar li. Kan li ti exprim so santiman lor Bondie, Noemi ti dir: “Zeova inn vir so ledo ar mwa.” “Tou-Pwisan inn rann mo lavi bien amer.” Li ti dir osi: “Se Zeova ki finn imilie mwa ek se Tou-Pwisan ki finn fer mwa gagn maler.”​—Rut 1:13, 20, 21.

10. Kouma Zeova ti reazir kan Noemi ti dir sa bann parol-la?

¹⁰ Kouma Zeova ti reazir kan Noemi ti dir sa bann parol-la? Zeova pa ti abandonn so serviter. Okontrer, Li ti konpran so lapenn. Zeova konpran ki “presion ki ena lor enn dimounn saz kapav fer li azir kouma enn fou.” (Ekle. 7:7) Noemi ti bizin led pou trouve ki Zeova pa ti abandonn li. Kouma Zeova ti ed li? (1 Sam. 2:8) Li ti motiv Rut pou ed Noemi ek pou montre lamour fidel anver li. Rut ti anvi montre lamour anver Noemi. Avek bonte, li ti ed Noemi pou li pa dekouraze, ek li ti fer li kone ki Zeova ankor kontan li. Ki nou kapav aprann ar lexanp Rut?

11. Kifer boukou frer ek ser fer zefor pou ed bann ki tris ek dekouraze?

¹¹ Lamour fidel motiv nou pou ed bann ki tris ek dekouraze. Parey kouma Rut ki ti res avek Noemi, azordi, avek boukou lamour, bann frer ek ser kontign fer zefor pou ed bann ki tris ek dekouraze. Zot bien kontan zot bann frer ek ser, ek zot anvi fer tou seki zot kapav pou ed zot. (Prov. 12:25; 24:10) Se seki lapot Pol ti ankouraz nou pou fer, kan li ti dir: “Koz dan enn fason ki pou ankouraz bann ki deprime, soutenir bann ki feb, ena pasians avek tou dimounn.”​—1 Tes. 5:14, NW.

12. Bien souvan, ki pli bon fason nou kapav ed enn frer ouswa enn ser ki dekouraze?

¹² Bien souvan, pli bon fason ki nou kapav ed enn frer ouswa enn ser ki dekouraze se kan nou ekout zot ek nou fer zot kone ki nou kontan zot. Zeova bien kontan kan to ed enn parmi so bann serviter ki dekouraze. (Ps. 41:1) Proverb 19:17 dir: “Seki ed enn ti dimounn pe pret Zeova, ek seki li fer, Bondie pou rann li.”

13. Ki diferans ti ena ant Rut ek Orpa, ek kouma Rut ti montre lamour fidel? (Get zimaz lor kouvertir.)

¹³ Nou pou konpran pli bien ki ete lamour fidel kan nou reflesi lor seki ti ariv Noemi apre lamor so misie ek so de garson. Kan Noemi ti aprann ki “Zeova ti pran swin so pep kan Li ti donn zot manze,” Noemi ti desid pou retourn kot li. (Rut 1:6) So de belfi ti al ansam avek li. Selman, kan zot ti pe ale, trwa fwa Noemi ti ankouraz so bann belfi pou retourn Moab. Ki ti arive? Labib dir: “Orpa ti anbras so belmer ek li ti ale. Me Rut li, li ti res avek Noemi.” (Rut 1:7-14) Orpa ti ekout seki Noemi ti dir li ek li ti retourn  Moab. Me Rut ti fer plis ki seki Noemi ti dir li. Rut ti kapav retourn kot li li osi. Selman, parski li ti kontan Noemi, Rut ti desid pou res avek li. (Rut 1:16, 17) Rut ti swazir pou res avek Noemi, pa parski li ti oblize, me parski li ti anvi fer li. Rut ti montre lamour fidel anver Noemi. Ki nou kapav aprann ar seki Rut ti fer?

14. (a) Azordi, kouma boukou frer ek ser imit Rut? (b) Dapre Ebre 13:16, ki sakrifis fer plezir Bondie?

¹⁴ Lamour fidel motiv nou pou fer bann gran zefor pou ed lezot. Azordi, parey kouma dan lepase, boukou frer ek ser swazir pou montre lamour fidel anver zot bann konpagnon Kretien, mem anver bann frer ek ser ki zot pa kone. Par exanp, kan ena enn katastrof natirel, deswit zot anvi kone kouma zot kapav ede. Kan enn kikenn dan lasanble gagn bann problem finans, zot pa ezite pou ed sa dimounn-la. Parey kouma bann Masedonien dan premie siek, zot fer bann gran zefor pou ed lezot. Zot fer bann sakrifis kan zot donn “plis ki zot kapav” pou ed bann frer ek ser ki dan difikilte. (2 Kor. 8:3) Zeova bien kontan kan Li trouv nou montre lamour fidel!​—Lir Ebre 13:16.

15-16. Kouma Rut ti montre ki li pa ti abandonn Noemi?

¹⁵ Nou kapav aprann bann zoli leson kan nou examinn zistwar Rut ek Noemi. Anou get sertin parmi zot.

¹⁶ Pa abandone, me kontign ede. Kan Rut ti propoz so belmer pou akonpagn li dan Zida, o-koumansman Noemi ti refize. Me Rut ti persiste. Ki ti arive? Rut ti telman persiste ki Noemi ti les li vinn avek li.​—Rut 1:15-18.

17. Ki kitsoz pou ed nou pou nou pa abandonn nou bann frer ek ser fasilman?

¹⁷ Leson: Kitfwa nou pou bizin ena boukou pasians pou ed enn kikenn ki deprime, me fode pa nou abandonn li. Enn ser ki bizin led, kapav refiz nou led o-koumansman. * Me lamour fidel pou motiv nou pou fer nou best pou kontign ed li. (Gal. 6:2) Nou gard lespwar ki li pou aksepte nou led, ek ki li pou les nou ed li ek rekonfort li.

18. Ki kitsoz ti bles Rut?

¹⁸ Pa ofanse vit. Kan Noemi ek Rut ti ariv Betleem, Noemi ti zwenn so bann ansien vwazin. Li ti dir zot: “Mo lame ti ranpli kan mo ti ale, me Zeova inn fer mwa retourne lame vid.” (Rut 1:21) Mazine ki Rut ti resanti kan li ti tann Noemi dir sa bann parol-la! Rut ti fer tou seki li kapav pou ed Noemi. Rut ti plor avek li, ti rekonfort li, ek ti mars avek li pandan plizir zour. Me malgre sa, Noemi ti dir: “Zeova inn fer mwa retourne lame vid.” Rut ti akote Noemi dan sa ler-la, ek bann parol Noemi ti kapav donn Rut linpresion ki tou seki li ti fer pa ti ena okenn valer. Sirman sa ti bien bles Rut! Me kanmem sa, Rut pa ti abandonn Noemi.

19. Ki kitsoz kapav ed nou pou pa abandonn enn kikenn ki deprime?

¹⁹ Leson: Malgre tou seki nou fer pou ed enn ser ki deprime, kitfwa li kapav dir nou enn kitsoz ki bles nou. Me fode pa nou ofanse vit. Fode pa nou abandonn nou ser ki bizin led. Okontrer, anou demann Zeova pou ed nou pou trouv enn fason pou nou kapav rekonfort li.​—Prov. 17:17.

20. Ki kitsoz ti donn Rut lafors pou li kontign ed Noemi?

 ²⁰ Donn lankourazman dan ler ki bizin. Rut ti montre lamour fidel anver Noemi, me asterla Rut limem ti bizin lankourazman. Zeova ti servi Boaz pou ankouraz li. Boaz ti dir Rut: “Mo swete ki Zeova rekonpans twa pou seki to’nn fer, ek ki to gagn enn lapey parfe ar Zeova, Bondie Izrael, parski to finn rod proteksion anba so lezel.” Sa bann zoli parol-la ti vremem rekonfort Rut. Lerla, Rut ti dir Boaz: “To finn konsol mwa ek to finn koz dan enn fason ankourazan ar mwa, to servant.” (Rut 2:12, 13) Boaz ti ankouraz Rut dan ler ki bizin, ek sa ti donn Rut lafors pou li kontign ed Noemi.

21. Dapre Izai 32:1, 2, kouma bann ansien kapav ankouraz bann ki pe ed lezot?

²¹ Leson: Bann frer ek ser ki montre lamour fidel anver lezot, parfwa zotmem zot bizin lankourazman. Boaz ti felisit Rut kan li ti remarke kouma Rut ti bon anver Noemi. Azordi osi, kan bann ansien remarke kouma bann frer ek ser ed lezot, zot felisit sa bann frer ek ser-la. Bann felisitasion sinser, ki done dan ler ki bizin, pou donn bann frer ek ser lafors pou zot kontign ed lezot.​—Lir Izai 32:1, 2. *

22-23. Kouma latitid Noemi ti sanze, ek kifer? (Psom 136:23, 26)

²² Apre inpe letan, Boaz ti zenere anver Rut ek Noemi ek li ti donn zot manze. (Rut 2:14-18) Kouma Noemi ti reazir kan Boaz ti montre li zenere? Noemi  ti dir: “Ki sa misie-la gagn benediksion Zeova, ki pa’nn aret montre so lamour fidel anver bann vivan ek bann mor toulede.” (Rut 2:20a) Noemi so latitid ti bien sanze! Inpe letan avan, li ti pe plore ek li ti dir: “Zeova . . . inn vir so ledo ar mwa,” me asterla, avek lazwa li dir: “Zeova . . . pa’nn aret montre so lamour fidel.” Kifer Noemi so latitid ti sanze?

²³ Finalman, Noemi ti koumans konpran ki Zeova zame pa ti abandonn li. Zeova ti servi Rut pou soutenir Noemi kan zot ti pe vinn Zida. (Rut 1:16) Noemi ti osi konpran ki Zeova ti pe servi Boaz pou ed li ek Rut toulede. * (Rut 2:19, 20b) Sirman Noemi ti pe dir ar limem, ‘Asterla mo konpran ki Zeova zame pa ti abandonn mwa. Li ti touletan avek mwa!’ (Lir Psom 136:23, 26.) Sirman Noemi ti bien rekonesan anver Rut ek Boaz parski zot pa ti abandonn li! Toule trwa ti bien kontan ki Noemi ti regagn so lazwa ek lafors pou servi Zeova.

24. Kifer nou anvi kontign montre lamour fidel anver nou bann frer ek ser?

²⁴ Ki nou’nn aprann lor lamour fidel dan liv Rut? Lamour fidel motiv nou pou pa abandonn nou bann frer ek ser kan zot deprime. Li motiv nou osi pou fer bann gran zefor pou ed zot. Bann ansien bizin ankouraz ek felisit bann frer ek ser ki montre lamour fidel anver lezot, ek zot bizin fer sa dan ler ki bizin. Kan nou trouve kouma bann frer ek ser ki bizin led, regagn zot lazwa ek lafors pou kontign servi Zeova, sa rann nou ere. (Zist. 20:35) Me pou ki rezon prinsipal nou bizin kontign montre lamour fidel? Se parski nou anvi imit Zeova, “ki ena lamour fidel . . . an-abondans.”​—Ex. 34:6; Ps. 33:22.