1. Ki kestion nou kapav poz noumem?

ESKI parfwa to trakase kan to mazinn bann kitsoz ki pou arive dan lavenir, kouma par exanp, destriksion fos relizion, latak Gog ki sorti pei Magog, ek lager Armagedon? Eski to’nn deza demann tomem, ‘Eski mo pou reisi res fidel kan sa bann kitsoz-la pou arive?’ Si to’nn reflesi lor sa bann kestion-la, seki Zezi inn dir dan text tem sa lartik-la kapav ed twa. Zezi ti dir so bann disip: “Pa les zot leker trakase. Ena lafwa.” (Zan 14:1, NW) Si nou lafwa for, nou pou kapav andir bann kitsoz ki pou arive dan lavenir.

2. Kouma nou kapav ranforsi nou lafwa, ek ki nou pou examine dan sa lartik-la?

² Kouma nou kapav ranforsi nou lafwa pou bann leprev ki nou pou gagne dan lavenir? Nou pou reisi fer sa si nou reflesi lor kouma nou reazir kan nou gagn bann leprev azordi. Kan nou reflesi lor-la, sa pou ed nou pou kone dan ki domenn nou bizin ranforsi nou lafwa. Sak fwa ki nou andir enn leprev, nou lafwa vinn pli for, ek sa pou ed nou pou andir bann leprev ki nou pou gagne dan lavenir. Dan sa lartik-la, nou pou get kat sitiasion kot bann disip Zezi ti bizin ena plis lafwa. Apre sa, nou pou gete kouma nou kapav andir sa bann sitiasion-la azordi, ek kouma zot kapav prepar nou pou bann kitsoz ki pou arive dan lavenir.

3. Dan Matie 6:30, 33, ki kitsoz Zezi anvi ki nou konpran konsernan lafwa?

³ Li normal ki enn sef fami anvi donn so fami seki zot bizin pou viv, kouma par exanp, manze, linz, ek enn plas pou reste. Me dan sa lepok difisil ki nou pe viv la, li kapav gagn difikilte pou fer sa. Sertin frer ek ser inn perdi zot  travay, ek mem si zot inn fer boukou zefor pou gagn enn lot travay, zot pa’nn reisi. Lezot Kretien finn refiz fer enn travay ki kapav met an danze zot spiritialite. Dan bann sitiasion koumsa, nou bizin ena enn lafwa bien for an Zeova ek ena konfians ki Li pou donn nou seki nou bizin pou nou kapav pran swin nou fami. Zezi ti explik sa so bann disip dan so Sermon lor Montagn. (Lir Matie 6:30, 33.) Kan nou sir ki Zeova pa pou abandonn nou, nou pou kapav res konsantre lor nou servis pou Li. Kan nou trouve kouma Zeova pran nou swin, Li pou vinn pli reel pou nou ek nou lafwa pou vinn pli for.

4-5. Ki kitsoz ti ed enn fami kan zot ti gagn bann difikilte lor plan materyel?

⁴ Anou get lexanp enn fami ki res Veneziela. Sa fami-la inn trouve kouma Zeova inn ed zot kan zot ti pe gagn bann difikilte lor plan materyel. Dan lepase, lafami Castro ti ena enn laferm ek zot ti pe viv bien. Me apre, enn gang ti pran zot later ek ti fors zot pou kit zot laferm. Papa-la, ki apel Miguel, dir: “Asterla, nou pe bizin travay lor enn ti-bout later ki nou’nn lwe. Sak zour, kouma mo leve, mo demann Zeova pou donn mwa seki mo bizin pou zordi.” Mem si lavi sa fami-la bien difisil, zot ena full konfians ki nou Papa, Zeova, pou pran zot swin, ek zot montre sa kan zot asiste renion ek prese regilierman. Zot met Rwayom Bondie an-premie dan zot lavi ek Zeova donn zot seki zot bizin.

⁵ Dan sa moman difisil la, Miguel ek so madam, Yurai, ti trouve kouma Zeova ti pran zot swin. Ena fwa, Zeova ti servi bann frer ek ser pou donn zot sertin kitsoz ki zot ti bizin, ouswa pou ed Miguel pou trouv enn travay. Lezot fwa, Zeova ti servi Biro Nasional pou donn zot seki zot ti bizin. Zeova zame pa’nn abandonn zot. Ki lefe sa finn ena lor lafami Castro? Zot lafwa inn vinn pli for. Apre ki zot ti koz lor enn sitiasion presi kot Zeova ti ed zot, Yoselin, zot pli gran tifi, ti dir: “Sa finn bien ankouraz mwa kan mo’nn trouve kouma Zeova inn ed nou. Li mo kamarad ek mo sir ki Li pou touletan ed mwa.” Yoselin dir osi: “Bann difikilte ki mo fami finn andire finn prepar nou pou bann pli gran difikilte ki nou pou gagne dan lavenir.”

6. Kouma to kapav ranforsi to lafwa kan to pe gagn bann problem finans?

⁶ Eski to pe gagn bann problem finans? Si to dan sa sitiasion-la, sirman sa bien difisil! Selman, to kapav servi sa moman-la pou ranforsi to lafwa. Priye Zeova. Lir Matie 6:25-34 ek medit lor la. Reflesi lor lexanp bann frer ek ser dan nou lepok, ki’nn fer Zeova konfians pou donn zot seki zot bizin ek ki’nn res bien okipe dan zot minister. (1 Kor. 15:58) Si to fer sa, to  pou ena lafwa ki Zeova pou ed twa, parey kouma Li’nn ed bann dimounn ki ti ena mem problem ki twa. Zeova kone seki to bizin, ek Li kone kouma Li pou fer twa gagn sa. Kan to trouve kouma Zeova ed twa, to lafwa pou vinn pli for ek to pou kapav andir bann pli gran difikilte ki pou ena dan lavenir.​—Abak. 3:17, 18.

7. Dapre Matie 8:23-26, kouma enn gro tanpet ti teste lafwa bann disip Zezi?

⁷ Kan Zezi ek so bann disip ti lor enn bato, ti ena enn gro tanpet lor lamer. Zezi ti servi sa sitiasion-la pou fer so bann disip konpran ki zot ti bizin ranforsi zot lafwa. (Lir Matie 8:23-26.) Sa tanpet-la ti telman for ki delo ti pe koumans rant dan bato. Me dan sa ler-la, Zezi ti pe dormi. Bann disip ti telman per ki zot ti lev Zezi pou ki li sov zot. Zezi ti dir zot: “Kifer zot per? Ala zot lafwa feb la?” Bann disip ti bizin rapel ki Zeova ena kapasite pou protez Zezi ek bann dimounn ki avek li. Ki leson nou aprann? Si nou lafwa for, nou pou kapav fer fas ar ninport ki gro problem nou gagne.

8-9. Ki sitiasion ti teste lafwa Anel, ek ki kitsoz ti ed li?

⁸ Anou get lexanp Anel, enn ser selibater ki res Porto Riko. Anel so lafwa ti vinn pli for parski li ti andir enn gran leprev. Anel ti koumans gagn bann difikilte depi ki siklonn Maria ti kraz so lakaz an 2017. Anplis, akoz sa siklonn-la, li ti osi perdi so travay. Anel dir: “Dan sa moman difisil la, mo ti extra trakase. Me mo ti priye Zeova, mo ti aprann pou fer Li konfians, ek mo pa ti les mo bann traka anpes mwa fer mo bann aktivite.”

⁹ Anel explike ki, kan li ti obeir bann instriksion Zeova, sa ti osi ed li pou andir so bann problem. Li dir: “Kan mo ti swiv bann instriksion ki lorganizasion Zeova ti done, sa ti ed mwa pou res kalm. Zeova ti ed mwa gras-a mo bann frer ek ser. Zot ti ankouraz mwa ek zot ti donn mwa bann kitsoz ki mo ti bizin pou viv.” Anel dir osi: “Zeova ti donn mwa plis ki seki mo ti demann Li, ek mo lafwa ti vinn pli for.”

10. Ki to kapav fer kan to ena bann gro problem?

¹⁰ Eski to pe bizin sirmont enn gro problem? Kitfwa to pe soufer akoz enn katastrof natirel. Ouswa, kitfwa to ena enn maladi bien grav ek to santi twa dekouraze parski to pa kone ki to pou fer. Nou tou nou ena bann traka, me fode zame nou les nou bann traka anpes nou fer Zeova konfians. Okontrer, nou bizin priye Li ek vinn pli pros avek Li. Nou kapav ranforsi nou lafwa osi kan nou reflesi lor kouma Zeova inn ed nou dan lepase. (Ps. 77:11, 12) To kapav sir ki Zeova zame pa pou abandonn twa!

11. Kifer nou bizin bien determine pou obeir bann frer ki pran latet dan lorganizasion?

 ¹¹ Ki kitsoz ankor kapav ed nou pou andir bann leprev? Se lobeisans, parey kouma nou’nn trouve dan lexanp Anel. To bizin aprann pou ena konfians an bann dimounn ki Zeova ek Zezi fer konfians. Parfwa, bann frer ki pran latet dan lorganizasion kapav pran bann desizion ki nou pa konpran. Selman, Zeova pou beni nou si nou obeir zot. Gras-a Labib ek lexanp bann fidel serviter Zeova, nou kone ki, kan nou obeir bann instriksion ki nou gagne, nou kapav gagn lavi sov. (Ex. 14:1-4; 2 Kro. 20:17) Nou bizin medit lor sa bann lexanp-la. Kan nou fer sa, nou pou plis determine pou swiv bann instriksion ki lorganizasion Zeova donn nou azordi, ek sa pou osi ed nou pou swiv bann instriksion ki nou pou gagne dan lavenir. (Ebre 13:17, NW) Lerla, nou pa pou ena okenn rezon pou per kan gran detres pou arive.​—Prov. 3:25.

12. Dapre Lik 18:1-8, ki lien nou kapav fer ant ena lafwa ek andir bann linzistis?

¹² Zezi ti kone ki bann linzistis ti pou teste lafwa so bann disip. Pou ed zot andir sa bann linzistis-la, Zezi ti donn zot enn lexanp ki nou kapav trouve dan Levanzil Lik. Zezi ti koz lor enn vev ki ti kontign sipliy enn ziz ki malonet, pou li gagn lazistis. Sa vev-la ti sir ki sa ziz-la ti pou ed li si li ti kontign sipliy li. Ek alafin, ziz-la ti ed vev-la. Ki leson nou aprann? Zeova pa enn Bondie ki inzis. Akoz sa, Zezi ti dir: “Eski Bondie pa pou rann lazistis bann ki li finn swazir e ki pe sipliy li lanwit-lizour?” (Lir Lik 18:1-8.) Me apre sa, li ti osi dir: “Kan Garson Limanite vini, eski li pou trouv lafwa lor later?” Kan nou pe soufer akoz bann linzistis, nou montre ki nou ena lafwa, parey kouma sa vev-la, kan nou ena pasians ek nou kontign persevere. Kan nou ena sa kalite lafwa-la, nou kapav sir ki Zeova pou ed nou. Nou bizin osi ena lafwa dan pouvwar ki lapriyer ena. Ek parfwa, Zeova kapav reponn nou lapriyer dan enn fason ki nou pa atann.

13. Kouma lapriyer ti ed enn fami ki ti pe pas par enn sitiasion difisil?

¹³ Anou get lexanp enn ser ki apel Vero ek ki res dan Repiblik Demokratik Kongo. Kan enn group militer ti atak zot vilaz, Vero, so mari ki pa Temwin, ek zot tifi ki ena 15 an, ti bizin sove. Kan zot ti pe sove, enn group solda ti aret zot ek ti menas pou touy zot. Kan Vero ti koumans plore, so tifi ti fer enn lapriyer bien for pou esey kalme li. Dan so lapriyer, plizir fwa li ti servi nom Zeova. Kan Vero so tifi ti fini priye, komandan sa group militer la ti demann li: “Fi, kisannla finn montre twa priye?” Li ti reponn: “Mo  mama inn montre mwa, ek li’nn servi lexanp ki ena dan Matie 6:9-13 pou fer sa.” Lerla, komandan-la ti dir li: “Fi, al anpe twa ek to fami, ek ki Zeova zot Bondie protez zot!”

14. Ki kitsoz kapav teste nou lafwa, ek ki pou ed nou pou andire?

¹⁴ Bann lexanp koumsa montre nou ki fode zame nou bliye pouvwar ki lapriyer ena. Me ki nou bizin fer si Zeova pa reponn nou lapriyer deswit? Parey kouma sa vev dan lexanp Zezi la, nou bizin kontign priye, ek nou bizin ena konfians ki nou Bondie pa pou abandonn nou ek ki Li pou reponn nou lapriyer dan moman ki bizin. Nou bizin kontign sipliy Zeova pou ki Li donn nou so lespri sin. (Fil. 4:13, NW) Pa bliye ki biento, Zeova pou telman beni nou ki nou pou nepli rapel nou bann soufrans. Kan to andir bann leprev avek led Zeova, to vinn pli for, ek to pou kapav andir bann leprev ki to pou gagne dan lavenir.​—1 Pier 1:6, 7.

15. Dapre Matie 17:19, 20, ki difikilte bann disip Zezi ti gagne?

¹⁵ Zezi ti ansegn so bann disip ki lafwa ti pou ed zot sirmont bann difikilte. (Lir Matie 17:19, 20.) Enn zour, bann disip Zezi pa ti reisi expilse enn demon, mem si zot ti reisi fer sa plizir fwa avan. Kifer zot pa ti reisi? Zezi ti dir zot ki zot ti bizin ena plis lafwa. Li ti dir zot ki, si zot ti ena ase lafwa, zot ti pou kapav sirmont bann difikilte ki koumadir bann montagn! Azordi, kitfwa nou osi nou bizin fer fas ar bann difikilte ki koumadir bann montagn.

16. Kouma lafwa inn ed Geydi pou andire apre lamor so mari?

¹⁶ Anou get lexanp Geydi, enn ser ki res Gwatemala. Enn zour, kan li ek so mari, Edi, ti pe retourn lakaz apre renion, bann dimounn ti touy so mari. Geydi ti bien sagrin ek li ti bien soufer. Kouma lafwa ti ed li pou andire? Li dir: “Lapriyer inn ed mwa pou zet mo fardo lor Zeova ek lerla mo’nn santi mwa anpe. Zeova inn servi mo fami ek mo bann kamarad dan lasanble pou pran mwa swin. Kan mo res bien okipe dan mo servis pou Zeova, sa diminie mo lapenn. Sa ed mwa pou mo pa trakase plis ki bizin, ek pou mo kontign andire sak zour. Tousala inn fer mwa konpran ki, ninport ki difikilte mo gagne dan lavenir, avek led Zezi, Zeova, ek So lorganizasion, mo pou kapav sirmont sa difikilte-la.”

17. Ki nou kapav fer kan nou pe fer fas ar enn problem ki koumadir enn montagn?

¹⁷ Eski to bien sagrin parski enn kikenn ki to kontan inn mor? Pran letan pou ranforsi to lafwa dan lesperans rezireksion. To kapav fer sa kan to lir bann zistwar Biblik ki koz lor rezireksion.  Eski to bien sagrin parski enn manb to fami inn exkli? Etidie bann kitsoz ki pou ed twa konpran ki disiplinn Zeova, li touletan bon. Ninport ki leprev to gagne, servi sa sitiasion-la pou ranforsi to lafwa. Devid to leker ar Zeova. Pa res dan to kwin. Okontrer, res pros ar bann frer ek ser. (Prov. 18:1) Sertin laktivite kapav fer twa pans sa dimounn ki to kontan la ek lerla to santi twa tris kan to fer sa bann laktivite-la. (Ps. 126:5, 6) Me kontign fer sa bann laktivite-la, parski sa pou ed twa pou andire. Kontign gard bann bon labitid spiritiel, kouma par exanp, prese, asiste bann renion, ek lir Labib toulezour. Ek res konsantre lor bann zoli benediksion ki Zeova pou donn twa dan lavenir. Kan to trouve kouma Zeova pe ed twa toulezour, to lafwa pou vinn pli for.

18. Si to remarke ki to lafwa pa ase for, ki to bizin fer?

¹⁸ Si bann leprev inn fer twa remarke ki to lafwa pa ase for, fode pa to dekouraze. Trouv sa sitiasion-la kouma enn lokazion pou ranforsi to lafwa. Parey kouma bann zapot Zezi, to kapav demann Zeova pou ‘ogmant to lafwa.’ (Lik 17:5) To kapav osi reflesi lor bann lexanp ki nou’nn examine dan sa lartik-la. Parey kouma Miguel ek Yurai, rapel tou bann moman kot Zeova inn ed twa. Parey kouma Vero so tifi ek Anel, kontign sipliy Zeova dan lapriyer, sirtou kan to ena bann gro problem. Ek parey kouma Geydi, pa bliye ki Zeova kapav servi nou fami ek nou bann kamarad pou ed nou. Kan to les Zeova ed twa pou andir bann difikilte ki to gagne asterla, to pou ena plis konfians ki Li pou ed twa pou andir ninport ki difikilte ki to pou gagne dan lavenir.

19. Ki kitsoz Zezi ti sir, ek ki kitsoz nou osi nou kapav sir?

¹⁹ Zezi ti ed so bann disip pou trouve dan ki domenn zot ti bizin ena plis lafwa, me li ti sir ki Zeova ti pou ed zot pou andir ninport ki leprev ki zot ti pou gagne dan lavenir. (Zan 14:1; 16:33) Zezi ti sir ki enn gran lafoul, ki ena enn lafwa for, ti pou sirviv pandan gran detres. (Rev. 7:9, 14) Eski to pou parmi sa lafoul-la? Avek led Zeova, to pou kapav form parti sa gran lafoul-la si to fer tou seki to kapav depi asterla-mem pou ranforsi to lafwa!​—Ebre 10:39.