Eski To Ti Kone?
Ki ti ariv Lavil Niniv apre lepok Zonas?
DAN bann lane 670 Avan Nou Lepok, Lasiri ti vinn pli gran lanpir dan lemond. Enn sit Internet British Museum dir: “So lanpir ti pran depi Sip dan lwes ziska Liran dan les, ek pandan inpe letan, mem Lezip ti form parti dan so lanpir.” Kapital Lasiri, setadir Niniv, ti pli gran lavil dan lemond. Li ti ena boukou zoli zardin, bann gran pale, ek bann gran libreri. Bann lekritir ki ena lor miray dan ansien lavil Niniv montre ki Lerwa Asourbanipal, parey kouma bann lezot lerwa Lasiri, ti konsider limem “kouma Lerwa lor later antie.” Pandan regn Lerwa Asourbanipal, li paret ki okenn lennmi pa ti kapav gagn laviktwar lor Lasiri ek Niniv.
Lanpir Lasiri ti pli gran lanpir lor later sa lepok-la
Me kan Lasiri ti vinn bien-bien for, Zeova ti predir atraver profet Sofoni: “[Zeova] pou . . . detrir Lasiri. Li pou fer Niniv vinn vid, vinn sek parey kouma enn dezer.” Anplis, profet Naum ti predir: “Pran so larzan, pran so lor! . . . Lavil-la vid, li parey kouma enn dezer, tou inn kraze! . . . Tou dimounn ki pou trouv twa pou sove ek zot pou dir, ‘Niniv finn detrir!’” (Sof. 2:13; Na. 2:9, 10; 3:7) Kan bann dimounn ti tann sa profesi-la, kitfwa zot ti demann zotmem: ‘Eski sa pou vremem arive? Eski Lasiri, sa gran pwisans-la, pou vremem tonbe?’ Kitfwa sa ti paret inposib!
Niniv ti vinn vid ek sek parey kouma enn dezer!
Me vremem Lasiri ti tonbe! Inpe avan 600 Avan Nou Lepok, bann Babilonien ek bann Med ti gagn laviktwar lor Lasiri. Avek letan, bann dimounn ti nepli res dan Niniv, ek finalman, tou dimounn ti bliye sa lavil-la net! Dapre enn piblikasion pibliye par The Metropolitan Museum of Art, sa lavil-la ti detrir net ek bann dimounn ti konn Niniv zis atraver Labib.” The Biblical Archaeology Society dir ki “personn pa ti mem kone si Niniv, kapital sa gran pwisans la, ti vremem existe.” Me an 1845, arkeolog Austen Henry Layard ti koumans fouy bann rwinn lavil Niniv. Seki arkeolog-la ti dekouver ti prouve ki Niniv ti enn lavil extraordiner.
Bann profesi konsernan Niniv inn vremem realize dan enn fason exakt. Sa ranforsi nou konfians ki bann profesi Labib konsernan lafin bann pwisans politik nou lepok pou realize zot osi.—Dan. 2:44; Rev. 19:15, 19-21.
