Mo’nn ne an 1948 dan Oland ek lane apre, mo fami ti al viv Sao Paulo dan Brezil. Mo bann paran ti al legliz regilierman ek mo fami souvan ti lir Labib apre dine. An 1959, nou ti kit Brezil ek nou ti al res Massachusetts dan Letazini.

Nou ti a sis zanfan, ek mo papa ti travay bien dir pou okip so fami. Mo papa ti fer plizir travay. Li ti travay kouma salesman, li ti aranz bann semin, ek li ti osi travay pou enn konpagni avion. Tou dimounn dan lafami ti bien kontan kan li ti pe travay pou sa konpagni avion-la, parski sa ti permet nou vwayaz boukou.

Kan mo ti kolez, souvan mo ti pe demann momem seki mo ti pou fer plitar. Sertin parmi mo bann kamarad ti anvi al liniversite ek lezot ti anvi fer servis militer. Me mo pa ti anvi fer servis militer, parski mo pa ti kontan diskite ek lager. Alor, mo ti desid pou al liniversite pou mo pa fer servis militer. Me an realite, seki mo ti plis anvi se ed bann dimounn, parski mo ti panse ki sa ti pou donn mo lavi enn sans.

Dan liniversite, mo ti anvi etidie lor anthropologie parski mo ti anvi konn plis lor lorizinn lavi. Bann profeser ti ansegn nou lor levolision ek zot ti anvi ki nou krwar ladan. Me pou mwa, sertin parmi zot bann lansegnman pa ti lozik, ek mo ti sipoze krwar ladan, mem si pa ti ena okenn prev.

Dan mo bann kour, nou bann profeser pa ti ansegn nou nanye lor bann prinsip moral. Olie sa, zot ti ansegn nou ki nou ti bizin fer tou seki nou kapav pou gagn bann bon rezilta dan liniversite. Mo ti ere kan mo ti pas letan avek mo bann kamarad dan bann fet ek kan mo ti pran ladrog, me mo ti ere zis pou enn tigit letan mem. Akoz sa, mo ti demann momem, ‘Eski samem enn lavi ki ena enn sans?’

Mo ti al res dan lavil Boston ek mo ti al dan enn liniversite laba. Pandan vakans lekol, mo ti al travay ek se dan mo travay ki mo ti zwenn enn Temwin Zeova pou premie fwa. Enn koleg travay ti explik mwa profesi bann “set tan,” ki trouv dan Daniel sapit 4, ek li ti osi explik mwa ki nou ti pe viv lepok lafin. (Dan. 4:13-17) Mo ti konpran bien vit ki, si mo ti kontign koz lor Labib avek li ek si mo ti koumans krwar dan seki mo ti pe aprann, mo ti pou bizin fer bann sanzman dan mo lavi. Akoz sa, mo ti fer tou seki mo kapav pou evit sa koleg travay la.

Dan liniversite, mo ti swiv bann kour ki ti pou prepar mwa pou fer bann travay sosial dan Lamerik Disid. Mo ti panse ki mo lavi ti pou ena enn sans si mo ti al ed bann dimounn ki ti bizin led. Me apre, mo ti realize ki sa osi pa ti donn mo lavi enn sans. Mo ti bien dekouraze ek akoz sa mo ti kit liniversite.

An Me 1970, mo ti al res Amsterdam, dan Oland, ek mo ti travay pou mem konpagni avion ki mo papa. Gras-a sa travay-la, mo ti kapav vwayaz boukou ek mo ti vizit bann pei dan Lafrik, Lamerik, Lerop, ek Lazi. Bien vit, mo ti konpran ki dan ninport ki pei mo ti ale, zot tou ti ena bann gro problem, ek personn pa ti kapav rezoud zot bann problem. Mo ti ankor anvi fer enn kitsoz inportan dan mo lavi. Alor, mo ti desid pou retourn Letazini ek mo ti retourn liniversite dan Boston.

Me bien vit, mo ti realize ki mo bann kour dan liniversite pa ti pou ed mwa pou gagn bann repons pou mo bann kestion lor lavi. Mo pa ti kone ki pou fer, alor mo ti al rod konsey avek enn parmi mo bann profeser. Mo ti bien etone kan li ti dir mwa: “Kifer to pe kontigne? Kifer to pa kit liniversite?” Mo ti bien kontan kan li ti dir mwa sa. Mo ti kit liniversite ek zame mo pa ti retourne ankor.

Mo ti santi ki mo lavi pa ti ena sans. Akoz sa, mo ti rant dan enn group ki ti viv dan enn fason diferan ar bann dimounn an zeneral. Sa group-la ti osi ankouraz bann dimounn pou viv dan lamour ek lape. Avek enn group kamarad, nou ti vwayaz partou dan Letazini ek nou ti al ziska Acapulco, dan Mexik. Nou ti res ansam avek bann hippie, ki ti paret ena enn lavi san okenn problem ek traka. Me kan mo ti res avek zot, mo ti trouve ki sa lavi-la pa ti ena sans ek sa lavi-la pa ti ere. Okontrer, mo ti trouve ki zot ti pe amenn enn lavi malonet.

Sa lepok-la, mo ti pe mazinn enn kitsoz ki mo ti anvi fer depi ki mo tipti. Mo ti anvi viv lor lamer, pa kouma enn marin, me kouma kapitenn mo prop bato. Mo ti pou kapav viv koumsa zis si mo ti ena mo prop bato. Mo ti ena enn kamarad ki ti apel Tom, ek li osi li ti ena mem proze. Alor, nou ti desid pou fer letour lemond dan bato ansam. Mo ti anvi trouv enn ti lil ki resanble enn paradi, pou mo kapav viv kouma mo anvi.

Tom ek mwa, nou ti al dan Arenys de Mar, ki trouv pre ar Barcelone, dan Lespagn. Laba, nou ti aste enn bato 31-pie (9.4 m) ki ti apel Llygra. Nou ti retap li inpe, pou ki nou kapav vwayaz lor la an sekirite. Nou pa ti prese pou ariv kot nou ti bizin ale, alor nou ti tir moter bato-la ek nou ti servi sa lespas-la pou stok delo. Pou ki nou kapav rant dan bann ti lepor, nou ti aste de ram 16-pie (5 m). Finalman, nou ti pran lamer ek nou ti desid pou al Sesel dan Losean Indien. Nou ti desid pou pas pre ar lakot lwes Lafrik ek pou tourn ver Cape de Bonne Esperance, dan Lafrik Disid. Nou ti get bann zetwal ek nou ti servi bann map, bann liv, ek bann zouti bien sinp pou nou al dan bon direksion. Avek sa metod-la, nou ti kapav kone exakteman kotsa nou ti ete. Sa ti touletan inpresionn mwa.

Bien vit, nou ti realize ki nou vie bato pa ti kapav vwayaz lontan lor lamer. Apepre sis galon (22 lit) delo ti pe rant dan bato-la sak lertan! Kouma mo ti dir dan koumansman, mo ti gagn bien per pandan enn tanpet ek mo ti priye Bondie pou premie fwa depi bien-bien lontan. Mo ti promet Bondie ki, si nou pa perdi lavi, mo ti pou fer zefor pou aprann konn Li. Tanpet-la ti kalme ek mo ti tini mo promes.

Mo ti koumans lir Labib kan nou ti lor lamer. Mazine kouma sa ti zoli kan mo ti lor mo bato omilie lamer Mediterane. Mo ti trouv tou kalite pwason ek devan mwa ti ena lorizon. Aswar, mo ti inpresione par sa kantite zetwal ki ti ena dan lesiel-la. Ek sa ti konvink mwa ankor plis ki ena enn Bondie ki interese ar bann imin.

Apre de-trwa semenn lor lamer, nou ti rant dan lepor Alicante, dan Lespagn, ek nou ti esey vann nou bato pou ki nou kapav aste enn pli bon bato. Me nou ti gagn difikilte pou vann sa vie bato ki pa ti ena moter ek ki ti pe pran delo la! Selman, sa ti donn mwa letan pou mo kontign lir mo Labib.

Plis mo ti lir Labib, plis mo ti trouve ki li enn liv ki kapav rann bann dimounn ere. Mo ti etone kan mo ti trouve ki Labib koz lor bann prinsip moral ki kapav amelior lavi bann dimounn, ek mo ti demann momem kifer boukou dimounn, ki dir zot Kretien parey kouma mwa, zot pa swiv sa bann prinsip-la.

Mo ti bien deside pou fer bann sanzman dan mo lavi, alor mo ti aret droge. Mo ti panse ki ti bizin ena bann dimounn ki swiv bann prinsip Labib ek mo ti anvi zwenn zot. Alor, mo ti priye Bondie pou enn deziem fwa ek mo ti demann Li pou ed mwa pou trouv sa bann dimounn-la.

Mo ti desid pou examinn sak relizion enn par enn ziska ki mo trouv vre relizion. Pandan ki mo ti pe marse dan bann semin Alicante,  mo ti trouv boukou batiman relizie. Boukou parmi zot ti pe servi bann zimaz, alor mo ti kone ki zot pa ti vre relizion.

Enn dimans apremidi, mo ti lor enn ti kolinn ki trouv pre ar lepor ek mo ti pe lir Zak 2:1-5, ki dir ki fode pa nou ena preferans pou bann dimounn ris. Kan mo ti pe retourn kot mo bato, mo ti pas pre ar Lasal Renion bann Temwin Zeova.

Mo ti dir ar momem, ‘Mo pou teste sa bann dimounn-la ek mo pou gete kouma zot tret mwa.’ Alor, mem si mo ti pie-ni, mo ti ena labarb, ek ki mo jeans ti desire, mo ti rant dan Lasal Renion. Enn frer ti vinn get mwa ek li ti fer mwa asiz akote enn madam aze. Sa madam-la ti bien zanti ek li ti ed mwa pou trouv bann verse ki lorater ti pe mansione. Apre renion, mo ti inpresione par bonte ki sa bann dimounn-la ti montre anver mwa. Enn frer ti invit mwa kot li pou nou kontign koze. Me kouma mo pa ti ankor fini lir mo Labib net, mo ti dir li, “Mo pou fer twa kone kan mo pare.” Apartir sa zour-la, mo ti koumans asiste tou bann renion.

Plizir semenn apre, mo ti al get frer-la kot li ek li ti reponn bann kestion ki mo ti ena lor Labib. Enn semenn apre, li ti donn mwa enn sak ranpli ar zoli linz. Li ti dir mwa ki sa bann linz-la ti pou enn frer ki ti dan prizon. Sa frer-la ti dan prizon parski li ti pe obeir bann lalwa Bondie, setadir pou kontan sakenn so kamarad ek pou pa fer lager. (Iza. 2:4; Zan 13:34, 35) Mo ti sir ki mo ti trouv seki mo ti pe rode. Mo ti reisi trouv bann dimounn ki ti pe met an pratik bann prinsip moral ki ena dan Labib! Mo ti sanz mo lobzektif. Mo ti nepli anvi al viv lor enn lil ki resanble enn paradi, me mo ti anvi etidie Labib an profonder. Akoz sa, mo ti retourn Oland.

Mo ti pran kat zour pou al dan lavil Groningue, dan Oland. Laba, mo ti bizin trouv enn travay. Mo ti ranpli enn form pou travay kouma sarpantie dan enn magazin. Lor sa form-la, ti demann mwa ki relizion mo ti ete. Mo ti ekrir, “Temwin Zeova.” Kan proprieter magazin-la ti trouv sa, so figir ti sanze net. Li ti dir mwa, “Mo pou sonn twa.” Me zame li pa ti sonn mwa.

Mo ti al rod travay dan enn lot magazin sarpantie, ek proprieter-la ti demann mwa ki diplom ek ki lexperyans mo ti ena. Mo ti explik li ki mo ti deza repar enn bato an dibwa. Mo ti  bien etone kan li ti dir mwa, “To kapav koumans travay tanto me mo ena zis enn sel kondision. Mo pa’le to fer mwa gagn okenn problem parski mo enn Temwin Zeova ek mo swiv bann prinsip Labib.” Mo ti etone ek mo ti dir li, “Mwa osi mo enn Temwin Zeova!” Me akoz mo labarb ek mo long seve, li ti kone ki mo pa ti enn Temwin Zeova. Kanmem sa, li ti dir mwa, “Mo pou etidie Labib avek twa!” Mo ti bien kontan ek mo ti aksepte. Asterla, mo ti konpran kifer lot proprieter magazin-la zame pa ti sonn mwa. Se Zeova ki ti pe reponn mo bann lapriyer. (Ps. 37:4) Mo ti travay dan magazin sa frer-la pandan enn-an ek mo ti etidie Labib avek li. Apre sa, mo ti pran batem an Zanvie 1974.

Enn mwa plitar, mo ti koumans fer pionie ek sa ti rann mwa ere. Enn mwa apre, mo ti al Amsterdam pou soutenir enn nouvo group lang Espagnol. Mo ti extra kontan fer bann letid Labib an Espagnol ek an Portige! An Me 1975, mo ti gagn privilez pou servi kouma pionie spesial.

Enn zour, enn ser ki apel Ineke ek ki ti pionie spesial, ti vinn Lasal avek so etidian Labib ki ti sorti Bolivi. Li ti anvi ki so etidian Labib zwenn bann frer ek ser ki koz Espagnol. Ineke ek mwa, nou ti desid pou ekrir nou kamarad parski nou ti anvi konn nou kamarad pli bien. Lerla, nou ti trouve ki nou ti ena bann mem lobzektif. Nou’nn marye an 1976 ek nou ti kontign servi kouma pionie spesial ziska 1982. Apre sa, nou ti gagn linvitasion pou asiste 73^em klas Lekol Galaad. Nou ti bien kontan pou al servi dan Les Lafrik. Nou ti servi sink an dan Mombasa, dan Kenya! An 1987, nou ti al servi dan Tanzani, kot nou laktivite ti interdi avan. Nou ti res laba pandan 26 an, ek apre sa, nou ti retourn Kenya.

Nou ti trouve ki nou lavi ti ena enn sans kan nou ti ed bann dimounn ki ena limilite pou aprann konn bann verite ki ena dan Labib. Par exanp, mo premie etidian Labib dan Mombasa, ti enn misie ki mo ti zwenn kan mo ti pe prese. Mo ti donn li de magazinn ek li ti dir mwa, “Kan mo fini lir zot, ki mo bizin fer apre?” So semenn apre, nou ti koumans etidie Labib dan liv Vous pouvez vivre éternellement sur une terre qui deviendra un paradis, ki ti fek sorti dan lang Swaili. Enn-an apre, sa misie-la ti pran batem ek li ti koumans servi kouma pionie permanan. Sa misie-la ek so madam inn ed apepre 100 dimounn pou progrese ziska batem.

Kan mo ti fek konpran kouma mo kapav donn mo lavi enn sans, mo ti koumadir sa marsan ki ti dekouver enn perl ki ena boukou valer la. Sa marsan-la pa ti anvi perdi sa perl-la. (Mat. 13:45, 46) Touletan mo ti anvi ed bann dimounn pou ki zot lavi ena enn sans. Azordi, mo madam ek mwa nou’nn trouve ki Zeova ed so bann serviter pou ena enn lavi ki ena sans.