1. Ki savedir gard nou lespri kler? (2 Timote 4:5)

 KAN nou gagn bann problem, sa kapav difisil pou nou res fidel ar Zeova ek so lorganizasion. Kouma nou kapav sirmont sa bann difikilte-la? Nou bizin gard nou lespri kler, res lor nou gard, ek res ferm dan lafwa. (Lir 2 Timote 4:5.) Nou gard nou lespri kler kan nou res kalm, kan nou reflesi bien, ek kan nou fer zefor pou trouv bann kitsoz parey kouma Zeova. Kan nou fer sa, nou pa pou les nou bann santiman kontrol seki nou panse.

2. Ki nou pou gete dan sa lartik-la?

² Dan lartik avan, nou ti get trwa difikilte ki nou kapav gagne andeor lasanble. Dan sa lartik-la, nou pou get trwa difikilte ki nou kapav gagne dan lasanble, ki kapav teste nou fidelite anver Zeova: (1) Kan nou panse ki enn Kretien inn tret nou dan enn move fason, (2) kan nou gagn enn disiplinn, ek (3) kan nou gagn difikilte pou adapte ar bann sanzman ki ena dan lorganizasion. Kouma nou kapav gard nou lespri kler ek res fidel ar Zeova ek so lorganizasion kan nou gagn sa bann difikilte-la?

3. Si nou panse ki enn Kretien inn tret nou dan enn move fason, kouma sa kapav fer nou reazir?

³ Eski to’nn deza gagn linpresion ki enn Kretien, kitfwa enn kikenn ki ena bann responsabilite, kouma par exanp enn ansien, inn tret twa dan enn move fason? Nou sir ki sa frer-la pa ti ena okenn lintansion pou bles twa. (Rom. 3:23; Zak 3:2) Me kanmem sa, seki li’nn fer inn bles twa. Kitfwa to pa pe kapav dormi ek to pe kontign reflesi lor  la. Kitfwa to’nn mem panse: ‘Si enn frer pe azir koumsa, eski se vremem lorganizasion Zeova?’ Se samem ki Satan anvi ki nou panse! (2 Kor. 2:11) Si nou reflesi koumsa, sa kapav fer nou aret servi Zeova ek kit so lorganizasion. Alor, si nou panse ki enn frer ouswa enn ser inn tret nou dan enn move fason, kouma nou kapav gard nou lespri kler ek aret ena bann move panse?

4. Kouma Zozef inn gard so lespri kler kan lezot ti tret li dan enn move fason, ek ki leson nou aprann ar so lexanp? (Zenez 50:19-21)

⁴ Pa ankoler ek pa gard dan leker. Kan Zozef ti enn adolesan, so bann gran frer ti tret li dan enn move fason. Zot ti ena laenn pou li, ek zot ti mem anvi touy li. (Zen. 37:4, 18-22) Apre sa, zot ti mem vann li kouma enn esklav. Akoz sa, Zozef ti gagn plizir leprev pandan apepre 13 an. Zozef ti kapav demann limem si Zeova ti vremem kontan li. Ek kitfwa li ti kapav mem panse ki Zeova inn abandonn li dan ler kot li ti plis bizin Li. Me Zozef pa ti ankoler ek li pa ti gard dan leker. Okontrer, li ti gard so lespri kler kan li ti res kalm. Kan li ti gagn lokazion pou tir vanzans kont so bann frer, li pa ti fer sa. Okontrer, li ti montre lamour anver zot ek li ti pardonn zot. (Zen. 45:4, 5) Zozef ti azir koumsa parski li ti fer zefor pou reflesi bien. Olie ki li ti res konsantre lor so bann problem, li ti reflesi lor seki Zeova ti anvi. (Lir Zenez 50:19-21.) Ki leson nou aprann? Si enn kikenn inn tret twa dan enn move fason, pa ankoler ar Zeova, ouswa pa panse ki Li’nn abandonn twa. Olie sa, reflesi kouma Li’nn ed twa pou andir sa leprev-la. Anplis, kan lezot tret twa dan enn move fason, pardonn zot ek rapel ki “lamour pou fer [twa] pardonn boukou pese lezot.”​—1 Pier 4:8.

5. Kouma Miqueas ti gard so lespri kler kan li ti santi ki lezot ti tret li dan enn move fason?

⁵ Anou get lexanp enn ansien ki res dan Lamerik Disid ek ki apel Miqueas. b Li rapel seki li ti resanti kan sertin frer ki ena bann responsabilite ti tret li dan enn move fason. Li dir: “Zame mo’nn strese koumsa avan. Mo ti per. Mo pa ti pe kapav dormi aswar ek mo ti plore parski mo pa ti kapav fer nanye.” Kanmem sa, Miqueas ti gard so lespri kler ek li ti fer zefor pou kontrol so bann santiman. Li ti priye Zeova souvan pou demann Li so lespri sin ek lafors pou andire. Li ti osi fer bann resers dan bann piblikasion, pou gagn bann konsey ki kapav ed li. Ki leson nou aprann? Si enn frer ouswa enn ser inn tret twa dan enn move fason, res kalm ek esey kontrol bann panse negatif ki to kapav ena. To pa kone kifer sa dimounn-la inn koz koumsa ouswa inn azir koumsa. Alor, priye Zeova ek demann Li so led pou to kapav met twa dan plas sa dimounn-la. Si to fer sa, to pa pou panse ki to frer ouswa to ser inn fer enn kitsoz par expre pou bles twa, ek lerla to pou kapav pardonn li. (Prov. 19:11) Pa bliye ki Zeova konn to sitiasion ek ki Li pou donn twa lafors ki to bizin pou andire.​—2 Kro. 16:9; Ekle. 5:8.

6. Kifer li inportan ki nou konpran ki Zeova disiplinn nou parski Li kontan nou? (Ebre 12:5, 6, 11)

⁶ Kan Zeova disiplinn nou, sa kapav afekte nou moralman. Me si nou res konsantre lor sa soufrans-la, nou pou kapav koumans panse ki disiplinn-la li  inzis, ki nou pa merit sa, ouswa ki li tro sever. Lerla, sa kapav anpes nou pou konpran enn kitsoz bien inportan, setadir ki Zeova disiplinn nou parski Li kontan nou. (Lir Ebre 12:5, 6, 11.) Ek si nou les nou bann santiman kontrol nou, nou pe donn Satan lokazion pou atak nou. Satan anvi ki nou rezet disiplinn Zeova. Pli pir ankor, li anvi ki nou aret servi Zeova ek ki nou kit lasanble. Si Zeova inn disiplinn twa, kouma to kapav gard to lespri kler?

7. (a) Dapre zimaz pou sa paragraf-la, kouma Zeova ti servi Pier apre ki li ti aksepte disiplinn ki li ti gagne? (b) Ki to kapav aprann ar lexanp Pier?

⁷ Aksepte disiplinn ek fer bann sanzman ki bizin. Zezi plizir fwa ti koriz Pier devan bann lezot zapot. (Mark 8:33; Lik 22:31-34) Kitfwa sa ti fer Pier gagn onte! Me kanmem sa, Pier ti res fidel ar Zezi. Li ti aksepte disiplinn ki li ti gagne, ek li ti aprann ar so bann erer. Lerla, Zeova ti rekonpans Pier pou so fidelite ek Li ti donn Pier bann pli gran responsabilite dan lasanble. (Zan 21:15-17; Zist. 10:24-33; 1 Pier 1:1) Ki nou kapav aprann ar lexanp Pier? Kan nou gagn enn disiplinn, fode pa nou konsantre nou lor laont ki nou gagne. Nou bizin aksepte disiplinn-la ek fer bann sanzman ki bizin. Lerla, nou pou gagn bann bienfe ek lezot osi pou gagn bann bienfe. Kan nou fer sa, Zeova pou plis kapav servi nou, ek nou pou plis kapav ed nou bann frer ek ser.

8-9. Apre ki li ti gagn enn disiplinn, ki Bernardo ti resanti, me ki kitsoz inn ed li pou sanz so fason panse?

⁸ Anou gete seki ti ariv Bernardo, enn frer ki res Mozanbik. Li ti perdi so privilez pou servi kouma ansien. Ki Bernardo ti resanti o-koumansman? Li dir: “Mo ti ankoler parski mo pa ti dakor ar disiplinn ki mo ti gagne.” Bernardo ti gagn traka seki lezot dan lasanble ti pou panse lor li. Li dir: “Sa ti pran mwa plizir mwa pou mo aksepte disiplinn-la ek pou mo refer Zeova ek so lorganizasion konfians.” Ki kitsoz ti ed Bernardo pou ena enn bon latitid?

⁹ Bernardo ti sanz so fason panse. Li dir: “Kan mo ti enn ansien, mo ti servi Ebre 12:7 pou ed lezot pou ena enn bon  fason panse lor disiplinn Zeova. Alor, mo ti demann momem, ‘Kisann-la ki bizin met an pratik sa verse-la?’ Tou bann serviter Zeova, ek mo’si mo ladan.” Apre sa, Bernardo ti fer bann lezot sanzman pou ki li kapav refer Zeova ek So lorganizasion konfians. Li ti lir Labib pli souvan ek li ti pran plis letan pou reflesi bien lor seki li ti lir. Mem si li ti trakase konsernan seki so bann frer ek ser ti panse lor li, li ti pres ansam ar zot ek li ti partisipe dan renion. Avek letan, Bernardo ti revinn ansien. Si parey kouma Bernardo to’nn gagn enn disiplinn, esey pa res konsantre lor laont ki to’nn gagne, aksepte bann konsey, ek fer bann sanzman ki bizin. c (Prov. 8:33; 22:4) Si to fer sa, to kapav sir ki Zeova pou beni twa parski to pe res fidel ar Li ek so lorganizasion.

10. Ki sanzman ti teste fidelite sertin Izraelit?

¹⁰ Bann sanzman dan lorganizasion kapav teste nou fidelite. Si nou pa fer atansion, sa kapav mem fer nou al lwin ar Zeova. Par exanp, Lalwa Moiz ti amenn bann sanzman pou bann Izraelit. Anou gete ki lefe sa ti ena lor zot. Avan ki Zeova ti donn zot Lalwa, bann sef fami ti fer travay bann pret. Zot ti pe aranz bann lotel ek zot ti pe ofer bann sakrifis pou zot fami. (Zen. 8:20, 21; 12:7; 26:25; 35:1, 6, 7; Zob 1:5) Me kan Zeova ti donn zot Lalwa, bann sef fami ti nepli gagn drwa fer sa bann kitsoz-la. Zeova ti swazir bann pret dan fami Aaron pou ofer bann sakrifis. Apre sa sanzman-la, si enn sef fami ki pa ti enn desandan Aaron, ti koumans fer travay enn pret, ti pou bizin touy li. d (Lev. 17:3-6, 8, 9) Eski se akoz sa sanzman-la ki Kore, Datan, Abiram, ek 250 sef ti rebel kont Moiz ek Aaron? (Nonb 16:1-3) Nou pa kone. Me nou kone ki Kore ek bann lezot dimounn ki ti avek li pa ti res fidel ar Zeova. Si bann sanzman ki ena dan lorganizasion teste to fidelite, ki to kapav fer?

11. Ki nou kapav aprann ar lexanp bann Keatit?

¹¹ Soutenir bann sanzman ki ena dan lorganizasion. Kan bann Izraelit ti dan dezer, bann Keatit ti ena enn travay bien spesial. Sak fwa ki bann Izraelit ti sanz landrwa, sertin parmi bann Keatit ti sarye lars lalians devan lepep. (Nonb 3:29, 31; 10:33; Zozwe 3:2-4) Sa ti enn gran privilez! Parkont, bann kitsoz ti sanze kan bann Izraelit ti rant dan Later Promiz. Bann Keatit ti nepli bizin bouz lars lalians souvan. Alor, zot travay ti sanze. Dan lepok Salomon, sertin Keatit ti travay kouma santer, gardien, ek okip bann stor. (1 Kro. 6:31-33; 26:1, 24) Pena okenn plas dan Labib ki dir ki bann Keatit ti plengne ouswa ki zot ti rod enn travay pli inportan parski avan zot ti pe fer enn travay spesial. Ki leson nou aprann? Ninport ki sanzman ena dan lorganizasion, soutenir li avek tou to leker, mem si sa ena enn lefe lor travay ki to ena dan lorganizasion. Ninport ki travay ki’nn donn twa pou fer, fer li avek lazwa. Rapel ki se pa travay ki to fer ki fer twa ena valer pou Zeova.  Pou Zeova, to lobeisans ena boukou plis valer ki travay ki to fer.​—1 Sam. 15:22.

12. Ki Zaina ti resanti kan so lafektasion ti sanze?

¹² Anou get lexanp Zaina. Lorganizasion ti sanz so lafektasion, enn lafektasion ki li ti bien kontan. Apre ki li ti servi dan Betel pandan plis ki 23 an, lorganizasion ti avoy li dan teritwar. Li dir: “Sa sanzman-la ti enn gran sok pou mwa. Mo ti santi mwa initil ek mo ti kontign demann momem, ‘Ki erer mo’nn fer?’” Malerezman, sertin frer ek ser dan lasanble ti fer li plis soufer kan zot ti dir li: “Si to ti ase bon, lorganizasion pa ti pou met twa deor dan Betel.” Pandan inpe letan, Zaina ti telman dekouraze ki li ti plore toule aswar. Selman, li ti dir: “Zame mo’nn dout lorganizasion ouswa lamour ki Zeova ena pou mwa.” Kouma Zaina inn kapav gard so lespri kler?

13. Ki Zaina ti fer pou lit kont so bann santiman negatif?

¹³ Zaina ti reisi sirmont bann santiman negatif ki li ti ena. Kouma li ti fer sa? Li ti lir bann lartik dan nou bann piblikasion ki koz lor bann difikilte ki li ti ena. Lartik « Vous pouvez vaincre le découragement ! » dan Latour Degard 1^e Fevriye 2001 ti bien ed li. Sa lartik-la explike kouma Mark, enn ekrivin Labib, ti ena bann mem santiman kan so lafektasion ti sanze. Zaina dir: “Lexanp Mark se samem ki mo ti bizin pou mo aret santi mwa dekouraze.” Zaina ti osi res pros ar so bann kamarad. Li pa ti res dan so kwin ek li pa ti res konsantre lor so bann santiman. Li’nn konpran ki se lespri sin ki gid lorganizasion Zeova pou pran bann desizion, ek ki bann frer responsab ti vremem gagn so traka. Me li’nn konpran osi ki lorganizasion Zeova bizin fer seki pli bon pou ki travay Zeova avanse.

14. Ar ki sanzman Vlado ti gagn difikilte pou adapte, ek ki kitsoz ti ed li?

¹⁴ Vlado, enn ansien ki ena 73 an ek ki res Sloveni, ti trouv sa difisil kan so lasanble ek enn lot lasanble ti vinn enn sel lasanble, ek ki Lasal Renion kot li ti asiste renion ti ferme. Li dir: “Mo pa ti konpran kifer enn zoli lasal koumsa ti ferme. Sa ti bien bles mwa, parski nou ti fek fer  renovasion dan sa lasal-la. Mo enn menizie, ek mo ti fek aranz bann nouvo meb pou sa lasal-la. Sa sanzman-la pa ti fasil ditou pou nou, bann proklamater ki pli aze.” Ki kitsoz ti ed Vlado pou soutenir sa instriksion-la? Li dir: “Nou touletan gagn bann benediksion kan nou adapte ar bann sanzman ki lorganizasion Zeova fer. Sa bann sanzman-la pe prepar nou pou bann pli gran sanzman ki pou ena dan lavenir.” Eski twa osi to pe gagn difikilte pou adapte ar bann sanzman? Kitfwa to lasanble ek enn lot lasanble inn vinn enn sel lasanble, ouswa kitfwa to lafektasion inn sanze. To kapav sir ki Zeova konpran to bann santiman. Kan to soutenir sa bann sanzman-la ek to res fidel ar Zeova ek so lorganizasion, to pou gagn bann benediksion.​—Ps. 18:25.

15. Kouma nou kapav gard nou lespri kler kan nou gagn bann difikilte dan lasanble?

¹⁵ Plis nou koste ar lafin sa lemond-la, plis nou pou gagn bann difikilte dan lasanble. Sa bann difikilte-la kapav teste nou fidelite anver Zeova. Alor, nou bizin gard nou lespri kler. Si to panse ki enn Kretien inn tret twa dan enn move fason, fode pa to vinn amer. Si to gagn enn disiplinn, pa res konsantre lor laont ki to gagne, aksepte bann konsey, ek fer bann sanzman ki bizin. Ek kan lorganizasion fer bann sanzman ki afekte twa, aksepte sanzman-la ar tou to leker ek obeir bann instriksion ki to gagne.

16. Kouma to kapav kontign fer Zeova ek so lorganizasion konfians?

¹⁶ To bizin kontign fer Zeova ek so lorganizasion konfians kan enn kitsoz teste to fidelite. Me pou to fer sa, to bizin kontign gard to lespri kler, setadir res kalm, reflesi bien, ek fer zefor pou trouv bann kitsoz parey kouma Zeova. Kontign etidie lor bann personaz dan Labib ki’nn reisi sirmont bann difikilte koumsa ek medit lor zot lexanp. Priye Zeova pou ki Li ed twa. Ek zame pa elwagn twa ar to bann frer ek ser. Lerla, ninport ki arive, Satan pa pou reisi fer twa al lwin ar Zeova ek So lorganizasion.​—Zak 4:7.