1-2. (a) Ki kestion nou pou examine dan sa lartik-la? (b) Ki kitsoz montre nou ki Zeova vremem anvi ed nou?

 ZEOVA kapav ed nou pou andir nou bann problem ek pou gard nou lazwa kan nou pe servi Li. Kouma Li ed nou? Ek kouma nou kapav fer nou maximum pou profit led ki Zeova pe donn nou? Nou pou reponn sa bann kestion-la dan sa lartik-la. Pou koumanse, anou reponn sa kestion-la: Eski Zeova vremem anvi ed nou?

² Dan let ki lapot Pol ti avoy bann Ebre, li ti servi enn mo ki kapav ed nou pou gagn repons sa kestion-la. Pol ti ekrir: “Lesegner, limem mo sekour, mo pa pou per nanye. Ki dimoun kapav fer kont mwa?” (Ebre 13:6) Bann liv referans pou Labib dir ki mo “sekour,” ki’nn servi dan sa verse-la, pe fer referans ar enn dimounn ki pe galoupe pou al ed enn kikenn ki bizin led. Sey mazinn Zeova pe galoupe pou al sap enn kikenn ki dan problem! Sirman to pou dakor ki sa montre ki Zeova vremem anvi ed nou! Kan Zeova avek nou, nou kapav andir ninport ki leprev avek lazwa.

3. Sit trwa fason kouma Zeova ed nou pou andir nou bann difikilte avek lazwa.

³ Dan ki fason Zeova ed nou pou andir nou bann difikilte avek lazwa? Pou reponn sa kestion-la, anou get de-trwa verse dan liv Izai. Kifer? Parski boukou profesi ki Izai ti ekrir konsern bann serviter Bondie azordi. Anplis, Izai souvan ti servi bann mo ki fasil pou konpran  pou koz lor Zeova. Par exanp, anou get Izai sapit 30. Dan sa sapit-la, Izai servi enn zoli zimaz pou explik nou kouma Zeova ed so pep. Li ti dir ki Zeova ed nou (1) kan Li ekout nou bien ek Li reponn nou bann lapriyer, (2) kan Li gid nou, ek (3) kan Li donn nou bann benediksion aster-la ek dan lavenir. Anou examinn sa trwa fason ki Zeova ed nou la.

4. (a) Dan lepok Izai, ki Zeova ti dir lor bann Zwif, ek ki kitsoz Li ti permet? (b) Ki lespwar Zeova ti donn bann Zwif ki ti fidel? (Izai 30:18, 19)

⁴ Dan koumansman Izai sapit 30, Zeova dir ki bann Zwif zot enn “bann piti ki zot latet dir,” ek ki zot “azout pese enn lor lot.” Li ti dir osi: “Zot enn pep rebel, . . . ki pa anvi ekout lalwa Zeova.” (Iza. 30:1, 9) Izai ti predir ki Zeova ti pou permet ki bann Zwif gagn bann maler parski zot pa ti anvi ekout Zeova. (Iza. 30:5, 17; Zer. 25:8-11) Ek se samem ki ti arive kan bann Babilonien ti amenn zot dan Babilonn kouma bann prizonie. Selman, ti ena sertin Zwif ki ti fidel, ek Izai ti ena enn mesaz lespwar pou zot. Li ti dir zot ki enn zour Zeova ti pou fer zot retourn Zerizalem. (Lir Izai 30:18, 19.) Ek samem ki ti arive. Zeova ti liber zot ek zot ti nepli bann prizonie dan Babilonn. Selman, boukou lane ti pase avan ki Zeova ti liber zot. Kan Izai dir: “Zeova pe atann avek pasians pou montre twa so faver,” sa montre ki inpe letan ti pou pase avan ki Zeova liber sa bann Zwif ki ti fidel la. Ofet, bann Izraelit ti pas 70 an dan Babilonn avan ki sertin parmi zot retourn Zerizalem. (Iza. 10:21; Zer. 29:10) Kan bann Izraelit ti prizonie dan Babilonn, zot ti plore parski zot ti sagrin. Me kan zot ti retourn dan zot pei, zot ti plore parski zot ti extra kontan.

5. Kouma Izai 30:19 rasir nou?

⁵ Azordi, sa bien ankouraz nou kan nou lir sa bann parol-la: “Kouma Li tann twa kriye pou rod led, Li pou montre twa so faver.” (Iza. 30:19) Izai rasir nou ki, kan nou rod led Zeova, Li ekout nou bien ek Li pa tarde pou reponn nou bann lapriyer. Izai ti dir osi: “Kouma Li tann twa, deswit Li pou reponn twa.” Sa bann parol-la rasir nou ki nou Papa vremem anvi ed bann ki demann Li so led. Kan nou konn sa, sa ed nou pou andire avek lazwa.

6. Kouma bann parol Izai montre ki Zeova ekout lapriyer sakenn parmi so bann serviter?

⁶ Ki kitsoz ankor sa verse-la aprann nou lor nou bann lapriyer? Kan nou priye Zeova, Li ekout sakenn parmi nou. Kifer nou kapav dir sa? Dan koumansman Izai sapit 30, servi mo “zot.” Sa montre ki Zeova pe koz ar so bann serviter antan ki enn group. Selman, dan verse 19, servi mo “twa.” Sa montre ki Zeova pe koz ar sak dimounn personelman. Izai ti dir: “To pou nepli plore”; “Li pou montre twa so faver”; “Li pou reponn twa.” Zeova, Li enn Papa ki kontan nou. Alor, Li pa pou dekouraz so garson ouswa so tifi kan Li dir zot: “To bizin vinn for parey kouma to frer ouswa to ser.” Okontrer, Li gagn traka sakenn parmi nou ek Li pran letan pou ekout sak dimounn ki priye Li.​—Ps. 116:1; Iza. 57:15.

7. Kouma Izai ek Zezi montre ki li inportan ki nou kontign priye?

 ⁷ Kan nou priye Zeova lor enn kitsoz ki fatig nou, premie kitsoz ki Zeova kapav fer, se donn nou lafors ki nou bizin pou andire. Ek si nou difikilte pa arete dan ler ki nou pe atann, kitfwa nou pou bizin kontign demann Zeova lafors pou andire. Anplis, Li invit nou pou fer sa. Samem ki nou trouve dan bann parol Izai, ki dir: “Pa donn [Zeova] okenn repo.” (Iza. 62:7) Me ki Izai ti pe rod dir? Kan nou priye Zeova, nou bizin pa arete; se koumadir nou pa pe les Zeova repoze. Sa rapel nou lexanp ki Zezi ti servi lor lapriyer dan Lik 11:8-10, 13. Dan sa bann verse-la, Zezi ankouraz nou pou ena ‘toupe pou insiste’ ek pou ‘kontign demann’ lespri sin kan nou priye. Nou kapav osi sipliy Zeova pou gid nou pou ki nou pran bann bon desizion.

8. Kouma bann parol Izai 30:20, 21 ti realize dan lepase?

⁸ Lir Izai 30:20, 21. Kan larme Babilonn ti anserkle Zerizalem pandan enn an edmi, lepep ti gagn telman boukou maler ki sa ti koumadir dipin ek delo pou zot. Me dapre verse 20 ek 21, Zeova ti promet bann Zwif ki, si zot repanti ek sanz fason ki zot ti pe azir, Li ti pou sap zot. Izai ti apel Zeova “Gran Instrikter,” ek li ti promet lepep ki Zeova ti pou ansegn zot kouma pou ador Li dan bon fason. Sa bann parol-la ti realize kan bann Zwif ti libere. Zeova ti montre ki Li zot Gran Instrikter, ek Li ti gid zot pou retabli vre ladorasion. Azordi, nou extra kontan ki Zeova Li nou Gran Instrikter!

9. Sit enn fason kouma Zeova gid nou azordi.

⁹ Dan sa bann verse-la, Izai dir ki nou kouma bann zelev ki Zeova pe ansegne. Anou get de fason kouma Zeova fer sa. Premierman, Izai dir: “To pou trouv to Gran Instrikter avek to prop lizie.” Dan sa lexanp-la, Izai dir ki Instrikter-la pe debout devan so bann zelev. Azordi, se enn gran loner ki Zeova pe ansegn nou. Kouma Zeova ansegn nou? Li fer sa gras-a so lorganizasion. Nou vremem rekonesan ki lorganizasion Zeova donn nou bann instriksion bien kler! Nou gagn sa bann instriksion-la dan nou bann renion, bann lasanble, bann piblikasion, bann Program Televizion JW,  ek lezot mwayin ankor. Tousala ed nou pou andir nou bann difikilte avek lazwa.

10. Dan ki fason nou tann ‘enn parol deryer nou’?

¹⁰ Izai koz lor enn deziem fason ki Zeova ansegn nou. Li dir: “To zorey pou tann enn parol deryer twa.” Isi, Izai pe konpar Zeova ar enn profeser ki pe mars deryer so bann zelev. Li pe dir zot ki sime zot bizin swazir. Kouma nou tann lavwa Zeova azordi? Zeova inn fer ekrir so Parol Labib depi bien lontan. Alor, kan nou lir Labib, se koumadir nou pe tann lavwa Zeova deryer nou.​—Iza. 51:4.

11. Ki nou bizin fer pou ki nou reisi andire avek lazwa, ek kifer nou bizin fer sa?

¹¹ Zeova gid nou gras-a so lorganizasion ek so Parol. Kouma nou kapav profit bien led ki Zeova donn nou? Remarke ki Izai koz lor de kitsoz. Premierman, li dir: “Ala semin-la.” Ek deziemman, li dir: “Mars ladan.” (Iza. 30:21) Alor, li pa ase ki nou zis konn “semin-la.” Nou bizin osi “mars ladan.” Nou aprann seki Zeova demann nou pou fer gras-a so Parol ek gras-a lansegnman ki so lorganizasion donn nou. Nou aprann osi kouma pou met an pratik seki nou aprann. Alor, pou ki nou reisi andire dan nou servis pou Zeova, nou bizin fer sa de kitsoz-la. Lerla, nou kapav sir ki Zeova pou beni nou.

12. Dapre Izai 30:23-26, kouma Zeova ti pou beni so pep?

¹² Lir Izai 30:23-26. Kouma sa profesi-la ti realize kan bann Zwif ti retourn Izrael apre ki zot ti libere dan Babilonn? Zeova ti donn zot tou seki zot bizin pou viv, pou ki zot kapav kontign servi Li. Par exanp, Li ti donn zot boukou manze. Me pli inportan, Li ti donn zot tou seki zot bizin pou ki zot kapav vinn pros ar Li, pou ki zot kapav rekoumans servi Li dan enn bon fason. Zame Zeova ti beni so pep sa kantite-la avan. Kouma nou trouve dan verse 26, Zeova ti plis ekler zot, setadir Li ti ed zot pou konpran so Parol. (Iza. 60:2) Kan Zeova ti beni so bann serviter, zot ti kapav kontign servi Li avek lazwa ek kouraz “parski zot leker [ti] kontan.”​—Iza. 65:14.

13. Kouma profesi konsernan vre ladorasion inn realize dan nou lepok?

¹³ Profesi Izai ti anonse ki vre ladorasion ti pou retabli. Eski sa konsern  nou osi azordi? Biensir! Depi 1919, bann milyon dimounn inn libere ar Gran Babilonn, setadir lanpir mondial fos relizion. Zeova inn gid zot dan enn pli bon plas ki Later Promiz. Li’nn amenn zot dan enn paradi spiritiel. (Iza. 51:3; 66:8) Ki ete sa paradi spiritiel la?

14. Ki ete paradi spiritiel, ek kisann-la ki pe res ladan azordi? (Get Expresion Ki’nn Explike.)

¹⁴ Depi 1919, bann Kretien ki ena lesperans pou al viv dan lesiel pe viv dan enn paradi spiritiel. b Avek letan, bann ki ena lesperans pou viv lor later, setadir bann “lezot mouton,” zot osi zot inn rant dan sa paradi spiritiel la, ek zot pe profit bann benediksion Zeova an-abondans.​—Zan 10:16; Iza. 25:6; 65:13.

15. Kotsa paradi spiritiel ete?

¹⁵ Kotsa paradi spiritiel ete azordi? Bann serviter Zeova res partou lor later, savedir ki paradi spiritiel li partou lor later. Alor, ninport kotsa nou reste azordi, nou kapav form parti dan paradi spiritiel, tanki nou soutenir vre ladorasion.

16. Ki nou bizin fer pou ki nou kontign apresie nou paradi spiritiel?

¹⁶ Pou nou res dan paradi spiritiel, ena boukou kitsoz ki nou bizin fer. Par exanp, nou bizin kontign montre nou rekonesans pou nou fami internasional. Kouma nou kapav fer sa? Nou fer sa kan nou konsantre nou lor bann zoli kalite ki nou bann frer ek ser ena, pa lor zot bann defo. (Zan 17:20, 21) Kifer sa li inportan? Reflesi lor sa lexanp-la. Dan enn zoli zardin, nou kapav trouv diferan kalite pie. Dan mem fason, dan nou bann lasanble azordi, ena tou sort kalite dimounn ki kouma bann pie. (Iza. 44:4; 61:3) Nou bizin kontign fer zefor pou konsantre nou lor ki kantite sa “lafore-la” li zoli, pa lor defo ki sak  “pie” ena. Fode pa ki nou les nou bann defo ouswa defo lezot anpes nou apresie bann zoli kalite nou fami internasional, ki pe viv dan linite.

17. Kouma sakenn parmi nou kapav fer so par pou ki ena linite dan lasanble?

¹⁷ Ki kitsoz sakenn parmi nou bizin fer pou ki kontign ena linite dan lasanble? Nou bizin fer lape ar lezot. (Mat. 5:9; Rom. 12:18) Sak fwa ki nou fer zefor pou viv dan lape avek lezot dan lasanble, nou pe ede pou ki nou paradi spiritiel vinn pli zoli. Nou bizin rapel ki Zeova inn atir sak dimounn dan paradi spiritiel pou ki zot ador Li. (Zan 6:44) Reflesi ki kantite Zeova kontan kan Li trouv nou pe fer zefor pou ranforsi lape ek linite ki ena parmi so pep!​—Iza. 26:3; Aze 2:7.

18. Lor ki kitsoz nou bizin kontign medite, ek kifer?

¹⁸ Zeova donn so bann serviter plizir bon kitsoz. Kouma nou kapav profit bien sa bann bon kitsoz-la? Nou bizin pran letan pou reflesi lor seki nou etidie dan Parol Bondie ek nou bann piblikasion. Kan nou fer sa, sa pou ed nou pou devlop bann kalite Kretien ki pou fer nou ena “lafeksion pou [nou] kamarad” dan lasanble. (Rom. 12:10) Kan nou medit lor bann benediksion ki nou pe gagne aster-la, sa pou fer nou lamitie avek Zeova vinn pli for. Ek kan nou medit lor bann benediksion ki Zeova pou donn nou dan lavenir, sa pou fer nou lespwar vinn pli for. Tousala pou ed nou pou nou kontign servi Zeova dan lazwa.

19. (a) Dapre Izai 30:18, ki kitsoz nou kapav sir? (b) Ki kitsoz pou ed nou pou andire avek lazwa?

¹⁹ Zeova “pou leve” pou defann nou kan Li pou detrir sa move lemond-la. (Iza. 30:18) Nou sir ki Zeova Li “Bondie lazistis,” ek ki Li pa pou les lemond Satan res pli lontan ki bizin. (Iza. 25:9) Parey kouma Zeova, nou atann avek pasians zour kot nou pou libere. Me an-atandan, anou kontign montre nou rekonesans pou privilez ki nou ena pou priye Zeova. Anou kontign etidie ek met an pratik seki nou aprann dan Parol Bondie, ek anou kontign medit lor bann benediksion ki nou gagne. Kan nou fer sa, Zeova pou ed nou pou andire avek lazwa.