1. Ki pou arive dan lavenir, ek ki kitsoz nou kapav sir?

 NOU kapav atann ki bann dimounn pou persekit nou kan nou prese, ek sa pou ogmante dan lavenir. (Dan. 11:44; 2 Tim. 3:12; Rev. 16:21) Kanmem sa, nou kapav sir ki Zeova pou ed nou. Kifer? Parski Li’nn touletan ed so bann serviter pou fer so volonte, ninport ki kantite difisil travay-la ti ete. Anou get lexanp profet Ezekiel, ki ti pres ar bann Zwif ki ti an exil dan Babilonn. Nou pou get sertin levennman ki ti arive dan so lavi.

2. Ar ki kalite dimounn Ezekiel ti prese, ek ki nou pou examine dan sa lartik-la? (Ezekiel 2:3-6)

² Ar ki kalite dimounn Ezekiel ti bizin prese? Zeova ti dir ki zot “latet dir,” zot “leker ros,” ek ki zot bann “rebel.” Zot ti danzere kouma bann pikan ek bann skorpion. Akoz sa, plizir fwa Zeova ti dir Ezekiel: “Pa per”! (Lir Ezekiel 2:3-6.) Ezekiel ti reisi kontign prese parski (1) Zeova ti avoy li, (2) lespri Bondie ti donn li lafors ki li bizin, ek (3) Parol Bondie ti fer so lafwa vinn pli for. Kouma sa trwa kitsoz-la ti ed Ezekiel? Ek kouma zot kapav ed nou osi azordi?

3. Ki parol inn donn Ezekiel lafors, ek kouma Zeova inn rasir li ki Li pe soutenir li?

³ Zeova ti dir Ezekiel: “Mo pe avoy twa.” (Eze. 2:3, 4) Sirman sa bann parol-la ti donn Ezekiel lafors. Kifer? Parski kitfwa Ezekiel ti rapel ki Zeova ti dir sa bann parol-la ar Moiz ek Izai, kan Li ti fer zot vinn So bann profet. (Ex. 3:10; Iza. 6:8) Ezekiel ti kone osi kouma Zeova ti ed sa de profet-la pou fer seki Li ti dir zot, mem si sa ti difisil. Alor, kan de fwa Zeova ti dir Ezekiel: “Mo pe avoy  twa,” sa ti rasir Ezekiel ki Zeova ti pe soutenir li. Anplis, dan liv Ezekiel, nou trouv sa fraz-la plizir fwa: “Zeova ti koz ar mwa.” (Eze. 3:16) Ena enn lot fraz osi ki nou trouv plizir fwa dan so liv: “Zeova ti rekoz ar mwa ankor.” (Eze. 6:1) Alor, Ezekiel ti vremem sir ki Zeova ti avoy li. Ezekiel ti osi garson enn pret, ek sirman so papa ti ansegn li ki Zeova inn touletan dir So bann profet ki Li pou ed zot. Par exanp, Zeova ti dir Izaak, Zakob, ek Zeremi: “Mo avek twa.”​—Zen. 26:24; 28:15; Zer. 1:8.

4. Ki parol ti ankouraz Ezekiel ek ti donn li lafors?

⁴ Kouma bann Izraelit ti reazir ar seki Ezekiel ti pe anonse? Zeova ti dir: “Pep Izrael pa pou anvi ekout twa, parski zot pa anvi ekout mwa.” (Eze. 3:7) Kan zot ti rezet Ezekiel, se koumadir zot ti pe rezet Zeova. Sa bann parol-la ti rasir Ezekiel ki, mem si bann-la ti rezet li, sa pa vedir ki li ti mal fer so travay. Zeova ti osi rasir Ezekiel ki bann dimounn ti pou “kone ki ti ena enn profet parmi zot” kan mesaz ki li ti anonse ti pou realize. (Eze. 2:5; 33:33) Nou kapav sir ki sa bann parol-la ti ankouraz Ezekiel ek ti donn li lafors ki li ti bizin pou li kontign prese.

5. Dapre Izai 44:8, ki kitsoz donn nou kouraz?

⁵ Nou osi nou gagn kouraz pou prese parski nou kone ki se Zeova ki’nn avoy nou. Anplis, Zeova dir nou ki nou so “bann temwin.” (Iza. 43:10) Se vremem enn gran loner! Parey kouma Zeova ti dir Ezekiel: “Pa per,” Li dir nou: “Pa bizin tranble ar laper.” Kifer fode pa nou per bann dimounn ki persekit nou? Parski parey kouma Ezekiel, se Zeova  ki’nn avoy nou, ek Li pe soutenir nou.​—Lir Izai 44:8.

6. (a) Kouma nou kone ki Zeova pou ed nou? (b) Ki kitsoz ankouraz nou ek donn nou lafors?

⁶ Zeova promet nou ki Li pou ed nou. Par exanp, zis avan ki Li dir: “Zot mo bann temwin,” Li ti dir: “Kan to travers delo, mo pou avek twa, ek kan to travers bann larivier, zot pa pou kouver twa. Kan to mars atraver dife, to pa pou griye, ni bann laflam pa pou bril twa.” (Iza. 43:2) Kan nou prese, parfwa nou kapav gagn telman boukou problem ki se koumadir nou pe nwaye dan enn larivier. Ek parfwa nou gagn bann leprev ki telman difisil ki nou kapav konpar zot ar dife. Me kanmem sa, avek led Zeova, nou kontign prese. (Iza. 41:13) Parey kouma dan lepok Ezekiel, laplipar bann dimounn azordi pa aksepte mesaz ki nou prese. Selman, sa pa vedir ki nou pa konn prese. Sa ankouraz nou ek donn nou lafors kan nou kone ki, si nou kontign prese ar fidelite, sa pou fer Zeova plezir. Lapot Pol ti dir: “Bondie pou rekonpans sakenn dapre so travay.” (1 Kor. 3:8; 4:1, 2) Enn ser ki pionie depi lontan dir: “Mo zwaye parski mo kone ki Zeova rekonpans nou bann zefor.”

7. Sak fwa ki Ezekiel ti mazinn vizion ki li ti gagne, ki lefe kitfwa sa ti ena lor li? (Get zimaz lor kouvertir.)

⁷ Ezekiel ti trouve kouma lespri sin Bondie li pwisan. Seki Ezekiel ti trouve dan enn vizion ti ed li pou konpran ki lespri sin ti pe ed bann anz ki bien pwisan. Lespri sin ti pe osi bouz bann gro larou enn kales ki dan lesiel. (Eze. 1:20, 21) Kouma Ezekiel ti reazir kan li ti trouv sa? Li dir: “Kan mo ti trouv sa, mo ti zet mo lekor anba ek mo fron ti tous later.” Ezekiel ti telman inpresione ki li ti zet so lekor anba. (Eze. 1:28) Depi sa zour-la, sak fwa ki Ezekiel ti mazinn sa vizion extraordiner la, sirman sa ti rasir li ki lespri sin Bondie ti pou ed li pou kontign prese.

8-9. (a) Ki lord Zeova ti donn Ezekiel? (b) Kouma Zeova ti donn Ezekiel plis lafors pou li prese?

⁸ Zeova ti donn Ezekiel sa lord-la: “Garson enn zom, debout pou ki mo kapav koz ar twa.” Kan Zeova ti dir li fer sa ek ti donn li so lespri sin, sa ti donn Ezekiel lafors ki li ti bizin pou deboute. Ezekiel ti dir: “Bondie . . . so lespri ti rant dan mwa ek ti fer mwa debout.” (Eze. 2:1, 2) Depi sa zour-la, sak fwa ki Ezekiel ti al prese, “lame” Bondie, setadir lespri sin Bondie, ti gid li. (Eze. 3:22; 8:1; 33:22; 37:1; 40:1) Lespri sin ti donn Ezekiel lafors pou fer travay ki Bondie ti donn li, setadir pou pres ar bann dimounn ki “zot latet dir ek zot leker ros.” (Eze. 3:7) Zeova ti dir Ezekiel: “Mo’nn fer to figir vinn dir kouma zot figir, ek mo’nn fer to fron vinn dir kouma zot fron. Mo’nn fer to fron vinn parey kouma enn diaman, pli dir ki ros silex. Pa per zot ek pa tranble ar laper akoz zot regar.” (Eze. 3:8, 9) Se koumadir Zeova ti pe dir Ezekiel: ‘Pa les sa bann dimounn teti la dekouraz twa. Mo pou donn twa lafors.’

⁹ Apre sa, lespri Zeova ti fer Ezekiel al dan teritwar kot li ti bizin prese. Ezekiel ti dir: “Mo ti santi pwisans Zeova pe travay dan mwa dan enn fason extraordiner.” Ezekiel ti pran enn semenn pou  aprann ek konpran bien mesaz ki li ti bizin anonse, pou ki li kapav anons mesaz-la ar konviksion. (Eze. 3:14, 15) Apre sa, Zeova ti fer Ezekiel al dan enn vale, ek laba “lespri Bondie ti rant dan [li].” (Eze. 3:23, 24) Ezekiel ti pare pou koumans prese.

10. Ki led nou bizin pou nou kapav prese, ek kifer?

¹⁰ Ki led nou bizin pou nou kapav prese? Pou reponn sa kestion-la, mazinn seki ti ariv Ezekiel. Avan ki li koumans prese, lespri Bondie ti donn li lafors ki li ti bizin. Azordi, parey kouma Ezekiel, si nou pe kapav prese se zis parski lespri sin pe ed nou. Kifer nou dir sa? Parski Satan pe lager kont nou pou ki nou aret prese. (Rev. 12:17) Boukou dimounn panse ki Satan telman for ki nou pa kapav gagn laviktwar lor li. Me kan nou prese, nou gagn laviktwar lor li! (Rev. 12:9-11) Kifer nou dir sa? Kan nou prese, nou montre Satan ki nou pa per li, ek sak fwa ki nou prese, se koumadir Satan pe fer enn defet. Alor, kan nou kontign prese mem si nou bann lennmi persekit nou, ki sa montre nou? Sa montre nou ki lespri Bondie pe donn nou lafors ek ki Zeova pe soutenir nou.​—Mat. 5:10-12; 1 Pier 4:14.

11. Ki kitsoz lespri sin Bondie pou fer pou nou, ek kouma nou kapav kontign gagn lespri sin?

¹¹ Ki kitsoz ankor nou aprann ar fason ki Zeova ti donn Ezekiel lafors ki li bizin pou prese? Lespri sin Bondie kapav donn nou lafors ki nou bizin pou sirmont ninport ki difikilte ki nou kapav gagne kan nou prese. (2 Kor. 4:7-9) Me ki nou bizin fer pou ki nou kontign gagn lespri sin Bondie? Nou bizin kontign priye Zeova pou Li donn nou so lespri sin, ek nou kapav sir ki Li pou ekout nou lapriyer. Zezi ti dir so bann disip: “Dimande, . . . rode, . . . tape.” Lerla, Zeova  “pou fer kado Lespri Sin seki dimann li.”​—Lik 11:9, 13; Zist. 1:14; 2:4.

12. Dapre Ezekiel 2:9–3:3, kotsa sa roulo-la ti sorti, ek ki ti ena ladan?

¹² Lespri Bondie ti donn Ezekiel kouraz ki li ti bizin pou prese. Me pa zis sa! Parol Bondie ti fer lafwa Ezekiel vinn pli for. Dan enn vizion, Ezekiel ti trouv enn lame pe tini enn roulo. (Lir Ezekiel 2:9–3:3.) Kotsa sa roulo-la ti sorti? Ki ti ena ladan? Kouma li ti nouri Ezekiel? Anou reponn sa bann kestion-la. Sa roulo-la ti sorti depi kot tronn Bondie. Kitfwa Zeova ti servi enn parmi sa kat anz ki Ezekiel ti trouve la, pou donn li roulo-la. (Eze. 1:8; 10:7, 20) Dan sa roulo-la ti ena bann parol Bondie, setadir enn long mesaz zizman ki Ezekiel ti bizin anons bann rebel ki ti an exil. (Eze. 2:7) Sa mesaz-la ti ekrir par devan ek par deryer roulo-la.

13. Ki kitsoz Zeova ti demann Ezekiel pou fer ar sa roulo-la, ek kifer roulo-la ti dou?

¹³ Zeova ti dir so profet manz roulo-la ek “ranpli [so] vant ar sa.” Ezekiel ti obeir Zeova ek li ti manz roulo-la net. Ki sa vizion-la ti pe rod dir? Ezekiel ti bizin bien konpran mesaz ki li ti bizin anonse. Li ti bizin krwar ladan, pou ki sa motiv li pou al prese. Apre sa, enn kitsoz extraordiner ti arive. Ezekiel ti trouve ki roulo-la “ti dou . . . parey kouma dimiel.” (Eze. 3:3) Kifer? Parski pou Ezekiel, loner ki li ti gagne pou reprezant Zeova ti enn kitsoz ki dou, ki ti fer li gagn lazwa. (Ps. 19:8-11) Li ti ena rekonesans ki Zeova ti swazir li pou vinn so profet.

14. Ki kitsoz ti ed Ezekiel pou aksepte travay ki Zeova ti donn li?

¹⁴ Plitar, Zeova ti dir Ezekiel: “Ekout tou seki mo pe dir twa ek reflesi bien lor la.” (Eze. 3:10) Kan Zeova ti donn Ezekiel sa bann instriksion-la, Li ti pe dir Ezekiel rapel bann parol ki ti ena dan sa roulo-la ek reflesi bien lor la. Kan Ezekiel ti fer sa, so lafwa ti vinn pli for. Dan sa roulo-la, ti ena osi enn mesaz bien pwisan ki li ti bizin anons lepep. (Eze. 3:11) Apre ki Ezekiel ti bien konpran ek krwar dan mesaz Bondie, li ti pare pou koumans prese ek pou kontigne ziska ki li fini so travay.​—Konpar avek Psom 19:14.

15. Pou ki nou andire, lor ki kitsoz nou bizin “reflesi bien”?

¹⁵ Pou ki nou kapav andire malgre bann difikilte ek kontign prese parey kouma Ezekiel, nou bizin les Parol Bondie kontign fer nou lafwa vinn pli for. Nou bizin “reflesi bien” lor tou seki Zeova dir nou. Azordi, Zeova koz ar nou par so Parol, Labib. Ki nou bizin fer pou ki Parol Bondie kontign ena enn lefe lor nou bann panse, nou bann santiman, ek nou bann lintansion?

16. Ki nou bizin fer ar Parol Bondie, ek kouma nou kapav fer li desann dan nou leker?

¹⁶ Kan nou manze ek ki nou dizer nou manze, nou lekor vinn pli for. Dan mem fason, kan nou etidie Parol Bondie ek ki nou reflesi lor la, nou lafwa vinn pli for. Samem leson ki nou aprann ar sa roulo-la. Zeova anvi ki nou “ranpli [nou] vant” ar so Parol, setadir ki nou konpran bien so Parol. Kouma nou kapav fer sa? Nou kapav  fer sa kan nou priye, kan nou lir Labib, ek kan nou medit lor seki nou lir. Premierman, nou priye Zeova pou prepar nou leker, pou ki seki Li pou dir nou desann dan nou leker. Deziemman, nou lir de-trwa verse dan Labib. Ek trwaziemman, nou fer enn poz pou ki nou kapav medite, setadir reflesi bien lor seki nou’nn lir. Ki lefe sa pou ena? Plis nou pou medite, plis nou pou konpran Parol Bondie, ek sa pou fer nou lafwa vinn pli for.

17. Kifer li bien inportan ki nou medit lor seki nou lir dan Labib?

¹⁷ Kifer li bien inportan ki nou lir Labib ek ki nou medit lor la? Kan nou fer sa, nou gagn lafors ki nou bizin aster-la pou pres mesaz Rwayom Bondie. Ek nou pou osi gagn lafors pou pres mesaz zizman ki kitfwa nou pou anonse biento. Anplis, kan nou medit lor bann zoli kalite ki Zeova ena, nou pou vinn pli pros ar Li. Lerla, nou pou ena enn kitsoz ki dou, ouswa enn kitsoz ki donn nou lazwa, setadir nou pou ena lape ek nou pou satisfe.​—Ps. 119:103.

18. Ki kitsoz bann dimounn dan nou teritwar pou bizin rekonet, ek kifer?

¹⁸ Ezekiel ti enn profet, me nou, nou pa bann profet. Kanmem sa, nou bien deside pou kontign anons mesaz Zeova, ziska ki Li dir nou aret prese. Kan ler zizman pou arive, bann dimounn dan nou teritwar pa pou kapav dir ki zot pa’nn gagn okenn lavertisman ouswa ki Bondie inn met zot enn kote. (Eze. 3:19; 18:23) Okontrer, zot pou bizin rekonet ki mesaz ki nou ti pe prese sorti kot Bondie.

19. Ki kitsoz pou donn nou lafors pou nou kontign prese?

¹⁹ Ki kitsoz pou donn nou lafors pou nou kontign prese? Se sa trwa kitsoz ki ti donn Ezekiel lafors la. Nou kontign prese parski nou kone ki Zeova inn avoy nou, parski lespri sin donn nou lafors, ek parski Parol Bondie fer nou lafwa vinn pli for. Avek led Zeova, nou bien deside pou kontign prese ek pou andire “ziska lafin.”​—Mat. 24:13.