Avan ki mo rakont zot seki’nn arive apre, les mo dir zot kouma mo’nn rant dan servis aplintan.

Mo’nn ne an 1942 lor enn zoli zil dan bann Karaib ki apel Kirasao. Mo papa inn ne dan Surinam, me apre, li’nn al res lor sa zil-la pou travay. Plizir lane avan ki mo’nn ne, mo papa ti enn parmi bann premie Temwin Zeova ki ti pran batem dan Kirasao. a Nou ti a sink zanfan, ek toule semenn, mo papa ti etidie Labib avek nou, mem si nou pa ti touletan anvi etidie. Kan mo ti ena 14 an, nou ti al res Surinam ansam avek mo papa, pou ki li kapav okip so mama ki ti vie.

Kan mo ti dan Surinam, mo ti koumans frekant bann zenn dan lasanble ki ti bien kontan servi Zeova. Zot ti inpe pli gran ki mwa ek zot ti bann pionie permanan. Kan zot ti rakont bann lexperyans ki zot ti fer dan zot servis, mo ti trouve ki zot ti vremem ere. Apre renion, mwa ek mo bann kamarad nou ti gagn bann konversasion lor Labib, ek parfwa nou ti fer sa kan nou ti pe get bann zetwal. Mo bann kamarad ti ed mwa pou konpran seki mo ti anvi fer ar mo lavi; mo ti anvi travay pou Zeova. Alor, mo ti pran batem kan mo ti ena 16 an. Ek plitar, kan mo ti ena 18 an, mo ti vinn pionie permanan.

Kan mo ti pionie, mo’nn aprann boukou leson, ek sa inn ed mwa toutlong mo lavi dan servis aplintan. Par exanp, enn parmi bann premie kitsoz ki mo’nn aprann, se linportans pou form lezot. Kan mo ti koumans fer pionie, ti ena enn misioner ki apel Willem van Seijl ki ti koumans form mwa. b Li ti montre mwa kouma mo kapav asim mo bann responsabilite dan lasanble. Dan sa ler-la, mo pa ti kone ki mo ti bien bizin  enn formasion. Lane apre, mo ti vinn pionie spesial, ek mo ti koumans ed enn ti group frer ek ser ki ti res dan lafore Surinam, ki ti bien lwin ar bann lezot lasanble. Mo extra rekonesan ki bann frer, parey kouma Willem, inn form mwa dan moman ki mo ti bizin! Mwa osi mo fer zefor pou swiv zot lexanp kan mo pran letan pou form lezot.

Enn deziem kitsoz ki mo ti aprann, se lavantaz pou ena enn lavi sinp ki bien organize. Dan koumansman sak mwa, mwa ek mo kamarad, ki ti enn pionie spesial li osi, nou ti esey organize pou ki nou kapav aste tou bann zafer ki nou ti pou bizin pou de-trwa semenn. Lerla, enn parmi nou ti fer sa long vwayaz-la pou al dan kapital, pou aste seki nou ti bizin. Nou ti fer bien atansion fason ki nou ti depans ti kas ki nou ti gagne toule mwa. Nou ti organiz nou manze pou ki li kapav tini pou enn mwa. Si nou ti mank kitsoz kan nou ti dan lafore, kitfwa pa ti pou ena personn ki ti pou kapav ed nou. Depi bien zenn, mo’nn aprann pou ena enn lavi sinp ki bien organize. Alor, sa inn ed mwa pou mo kapav res konsantre lor mo servis pou Zeova toutlong mo lavi.

Enn trwaziem kitsoz ki mo’nn aprann, se lavantaz pou ansegn bann dimounn dan zot lang. Depi tipti, mo koz Olande, Angle, Papiamanto, ek Sranan tongo (apel sa osi Sranan), bann lang ki koze dan Surinam. Me dan lafore Surinam, mo’nn remarke ki bann dimounn plis aksepte bon nouvel kan nou pres ar zot dan zot lang. Mo ti gagn difikilte pou koz sertin parmi sa bann lang-la, kouma Saramaka, ki servi bann ton ot ek ba. Me sa ti vo lapenn ki mo fer sa bann zefor-la. Pandan boukou lane, mo’nn kapav ed boukou dimounn pou konn laverite parski mo ti koz zot lang.

Biensir, mo’nn pas par bann sitiasion bien anbarasan. Par exanp, ti ena enn etidian Labib ki ti koz Saramaka. Mo ti anvi demann li so nouvel parski li ti pe gagn bann douler vant. Me olie sa, mo ti demann li si li ti ansint. Pa bizin dir zot, ki sa kestion-la ti bien anbaras li! Mem si mo ti fer bann erer koumsa, mo’nn touletan fer zefor pou koz lang ki bann dimounn ti koze, dan ninport ki lafektasion mo ti gagne.

An 1970, mo ti vinn responsab sirkonskripsion. Sa lane-la, mo ti prezant diapozitif “Vizit Biro Mondial Bann Temwin Zeova” ar boukou ti group dimounn dan lafore Surinam. Pou nou al zwenn sa bann dimounn-la, mwa ek enn group frer, nou ti pran enn long bato ek nou ti pas par bann larivier dan bann lafore Surinam. Dan nou bato ti ena enn zenerater, enn ti tink lesans, bann lalanp petrol, ek enn lekipman prozeksion pou diapozitif. Kan nou ti ariv laba, nou ti sarye tou nou bann lekipman dan plas kot nou ti pou fer prozeksion. Seki mo plis rapel dan sa bann vwayaz-la, se ki kantite bann dimounn ti kontan sa bann prozeksion-la. Nou ti vremem kontan ed lezot pou aprann konn Zeova ek so lorganizasion. Kan mo ti trouv lezot vinn pros ar Zeova, mo ti extra kontan ki mo’nn fer sa bann zefor-la.

Mem si mo ti trouve ki lavi selibater ti enn lavantaz pou mo servis, kanmem sa mo ti anvi marye. Alor, mo ti fer bann lapriyer bien presi pou mo gagn enn madam ki kapav andir bann difikilte ki gagne kan servi dan lafore Surinam. Apepre enn an apre, mo ti koumans frekante ar enn ser ki apel Ethel. Li ti enn pionie spesial ki ti ena lespri sakrifis. Depi bien zenn, Ethel ti kontan lexanp Pol, ek li ti anvi fer tou seki li kapav dan so servis parey kouma Pol. Nou ti marye an Septam 1971, ek nou ti koumans servi dan sirkonskripsion.

Ethel inn grandi dan enn fami ki pa ti ena boukou kitsoz materyel. Alor, sa ti fasil pou li adapte ar servis sirkonskripsion dan lafore. Par exanp, kan nou ti prepar nou pou al vizit bann lasanble dan lafore, nou ti amenn bien tigit kitsoz. Nou ti lav nou bann linz ek nou ti bengne dan larivier. Anplis, nou ti abitie manz seki nou bann frer ek ser ti donn nou manze, kouma bann igwann, bann pirana, ek ninport ki kitsoz ki zot ti lasas dan lafore ouswa ki zot ti lapes dan larivier. Kan pa ti ena okenn lasiet, nou ti manz lor fey banann. Kan pa ti ena kouyer ouswa fourset, nou ti manz ar nou lame. Mwa ek Ethel nou’nn remarke ki, kan nou’nn fer bann sakrifis dan nou servis pou Zeova, sa inn fer nou vinn pli pros ar nou kamarad ek ar Zeova. Nou ti vremem koumadir enn lakord trwa brin. (Ekle. 4:12) Nou pena okenn regre ki nou’nn swazir sa kalite lavi-la!

Enn zour, apre ki nou ti vizit bann frer dan lafore ek ki nou ti pe retourne, nou ti viv sa sitiasion ki mo’nn rakonte dan koumansman la. Kan nou bato ti pas dan bann plas kot ti ena boukou kouran, li ti pik-tet dan delo, me apre, bien vit li ti remont lao. Enn sans ki nou ti met nou zile sovtaz ek ki nou pa ti tom andeor bato. Selman, nou bato ti ranpli ar delo. Alor, nou ti devid nou  bann bol manze dan larivier ek nou ti servi sa bann bol-la pou tir delo dan bato.

Nou ti nepli ena manze, alor nou ti bizin lapes. Me nou pa ti pe gagn nanye. Alor nou ti priye Zeova pou ki Li donn nou manze ki nou ti bizin sa zour-la. Deswit apre ki nou ti priye, enn frer ti zet enn lalinn, ek li ti gagn enn pwason ki ase gro pou nouri nou sink. Nou ti bien manze ek nou vant ti plin.

Apre ki nou ti servi sink an dan sirkonskripsion, mwa ek Ethel, nou ti gagn enn benediksion ki nou pa ti atann. Mo madam ti ansint. Mo ti bien kontan pou tann sa nouvel-la, mem si mo pa ti kone kouma nou lavi ti pou ete apre. Selman, nou ti bien anvi res dan servis aplintan tanki posib. An 1976, nou ti gagn nou garson Ethniël. De-z-an edmi apre, nou ti gagn nou deziem garson Giovanni.

Sa lepok-la, ti bizin led dan Surinam. Alor, biro nasional Surinam ti pran bann dispozision pou ki mo kontign servi kouma responsab sirkonskripsion ek ki anmemtan, nou elve nou bann zanfan. Kan nou bann garson ti tipti, mo ti ena mwins lasanble pou al vizite. An zeneral, sak mwa, mo ti servi de-trwa semenn kouma responsab sirkonskripsion, ek leres zour, mo ti servi kouma pionie dan lasanble kot nou ti pe servi. Kan mo ti bizin al vizit bann lasanble ki pa ti lwin ar nou lakaz, Ethel ek bann garson ti akonpagn mwa. Me selman, kan mo ti al dan lafore pou vizit bann lasanble ek pou bann lasanble rezional ek sirkonskripsion, mo ti al tousel.

Mo ti bizin bien organiz mwa pou mo kapav asim tou mo bann responsabilite. Mo ti fer sir ki nou fer nou ladorasion an fami toule semenn. Ek kan mo ti al vizit bann lasanble dan lafore, Ethel ti fer ladorasion an fami avek bann garson. Me selman, tanki posib, nou ti fer bann kitsoz ansam. Bien souvan, mwa ek Ethel, nou ti pas bann ti moman avek bann garson. Par exanp, nou ti zwe ar zot ouswa nou ti fer enn ti sorti. Souvan, mo ti al dormi bien tar parski mo ti ena boukou kitsoz pou prepare pou mo servis. Ek Ethel ti lev boner toule gramatin parey kouma sa bon madam ki mansione dan Proverb 31:15. Li ti fer sir ki tou kitsoz fini pare pou ki nou kapav lir text gramatin ek pran ti-dezene ansam avan ki  nou bann garson al lekol. Mo vremem rekonesan ki mo ena enn madam ki pa egois ek ki’nn touletan ed mwa pou mo kapav asim mo bann responsabilite!

Nou’nn fer boukou zefor pou ed nou bann zanfan pou kontan Zeova ek predikasion. Nou ti anvi ki nou bann garson rant dan servis aplintan, pa parski zot ti anvi fer nou plezir, me parski zot, zot ti anvi fer sa. Nou’nn touletan koz lor lazwa ki gagne dan servis aplintan. Nou’nn osi rakont zot bann difikilte ki nou’nn gagne, me sirtou kouma Zeova inn ed nou ek beni nou. Nou’nn osi organize pou ki nou bann garson fer kamarad ar bann Temwin ki met Zeova an premie dan zot lavi.

Zeova inn touletan donn nou seki nou bizin. Ek biensir, mwa osi mo’nn fer mo par pou pran swin mo fami. Kan mo ti selibater ek ki mo ti pionie spesial dan lafore Surinam, mo ti aprann pou fer lekonomi. Me mem si mwa ek Ethel nou ti fer nou best, nou pa ti touletan gagn seki nou bizin. Se lerla mem ki Zeova inn ed nou. Par exanp, dan lafin bann lane 1980 ek koumansman bann lane 1990, ti ena enn lager sivil dan Surinam. Ek pandan sa bann lane-la, sa ti bien difisil pou nou gagn bann kitsoz ki nou ti vremem bizin. Me kanmem sa, Zeova inn touletan donn nou seki nou bizin.​—Mat. 6:32.

Toutlong nou lavi, Zeova inn touletan pran nou swin, ek Li’nn ed nou pou ki nou ere ek satisfe. Nou bann zanfan ti enn gran benediksion pou nou, ek nou extra kontan ki nou’nn kapav elve zot pou ki zot servi Zeova. Nou bien kontan osi ki zot inn swazir pou rant dan servis aplintan. Ethniël ek Giovanni inn fer plizir lekol teokratik. Ek aster-la, zot pe servi dan biro nasional Surinam ansam avek zot madam.

Azordi, mwa ek Ethel, nou’nn vie, me nou ankor pe servi Zeova kouma pionie spesial. Ofet, nou telman okipe ki mo pankor trouv letan pou aprann naze. Me mo pena okenn regre! Kan mo reflesi lor mo lavi, meyer desizion ki mo’nn kapav pran, se rant dan servis aplintan kan mo ti ankor zenn.