1. Kouma nou kone ki Zeova anvi vinn pros ar nou?

 ZEOVA invit nou pou vinn pros ar Li. (Zak 4:8) Li anvi vinn nou Bondie, nou Papa, ek nou Kamarad. Li reponn nou lapriyer, ek Li ed nou kan nou pas dan bann sitiasion difisil. Li osi servi so lorganizasion pou ansegn nou ek pou protez nou. Me ki nou bizin fer pou nou vinn pros ar Zeova?

2. Kouma nou kapav vinn pros ar Zeova?

² Nou kapav vinn pros ar Zeova kan nou priye Li, nou lir so Parol, ek nou medit lor la. Kan nou fer sa, nou lamour ek nou rekonesans pou Li pou ogmante. Lerla, sa pou pous nou pou obeir Li ek pou donn Li loner ki Li merite. (Rev. 4:11) Plis nou aprann konn Zeova, plis nou pou fer Li konfians, ek nou pou fer konfians lorganizasion ki Li’nn etabli pou ed nou.

3. Kouma Satan esey fer nou al lwin ar Zeova, me ki kitsoz pou ed nou pou nou pa abandonn nou Bondie ek so lorganizasion? (Psom 31:13, 14)

³ Selman, Satan anvi ki nou al lwin ar Zeova, sirtou kan nou gagn bann difikilte. Kouma li fer sa? Tigit-tigit, li esey diminie nou konfians an Zeova ek So lorganizasion. Me nou kapav reziste kont so bann taktik. Kan nou fer nou lafwa vinn for ek ki nou fer Zeova full konfians, nou pa pou abandonn nou Bondie ek so lorganizasion.​—Lir Psom 31:13, 14.

4. Ki nou pou examine dan sa lartik-la?

⁴ Dan sa lartik-la, nou pou koz lor trwa difikilte ki nou kapav gagne andeor lasanble, ek ki kapav diminie nou konfians an Zeova ek so lorganizasion. Kouma sa bann difikilte-la kapav fer nou al lwin ar Zeova? Ek ki nou kapav fer pou ki nou kontign res fidel ar Zeova ek so lorganizasion?

5. Kouma bann difikilte kapav diminie nou konfians an Zeova ek so lorganizasion?

⁵ Parfwa, nou kapav gagn bann difikilte, kouma par exanp, persekision dan lafami, ouswa nou kapav perdi nou travay. Kouma sa bann difikilte-la kapav diminie nou konfians dan lorganizasion Zeova ek fer nou al lwin ar Zeova? Kan nou gagn bann difikilte pandan enn bon bout letan, nou kapav perdi lespwar ek dekouraze. Ek Satan profit sa bann lokazion-la pou fer nou panse ki Zeova pa kontan nou. Li anvi ki nou koumans panse ki se Zeova ek So lorganizasion ki responsab nou bann soufrans. Se samem ki ti ariv bann Izraelit kan zot ti bann esklav dan Lezip. O-koumansman, zot ti panse ki Zeova ti swazir Moiz ek Aaron pou liber zot. (Ex. 4:29-31) Me plitar, kan Faraon ti rann zot lavi amer, zot ti met tor lor Moiz ek Aaron pou bann problem ki zot ti gagne. Zot ti dir: “Akoz zot, Faraon ek so bann serviter deteste nou ek zot inn met enn lepe dan bann-la zot lame pou touy nou.” (Ex. 5:19-21) Zot ti met tor lor bann serviter Zeova ki fidel. Sa bien tris! Si sa fer lontan ki twa osi to pe fer fas ar bann difikilte, kouma to kapav kontign fer Zeova ek so lorganizasion full konfians?

6. Kouma lexanp profet Abakuk ed nou pou andir nou bann difikilte? (Abakuk 3:17-19)

⁶ Devid to leker ar Zeova dan lapriyer ek rod so soutien. Profet Abakuk ti gagn boukou difikilte. Enn moman, kitfwa li ti ena bann dout ki Zeova vremem gagn so traka. Alor, li ti devid so leker ar Zeova dan lapriyer. Li ti dir: “A! Zeova, ziska kan mo pou bizin kriye o-sekour san ki to tande? . . . Kifer to toler bann dimounn dominer?” (Abak. 1:2, 3) Zeova ti reponn lapriyer so serviter. (Abak. 2:2, 3) Apre sa, Abakuk ti reflesi kouma Zeova ti sap So pep. Lerla, li ti regagn so lazwa. Li ti sir ki Zeova ti gagn so traka, ek ki Li ti pou ed li pou andir ninport ki difikilte. (Lir Abakuk 3:17-19.) Ki leson nou aprann? Kan to gagn bann difikilte, priye Zeova ek dir Li seki to resanti. Apre sa, rod so soutien. Kan to fer sa, to kapav sir ki Zeova pou donn twa lafors ki to bizin pou andire. Ek kan to santi ki Li pe soutenir twa, to lafwa pou vinn pli for.

7. Ki kitsoz bann fami Shirley ti pe rod fer li krwar, ek ki kitsoz ti ed li pou li pa perdi konfians an Zeova?

⁷ Kontign fer bann kitsoz ki pou ed twa res pros ar Zeova. Anou gete seki ti ed Shirley, enn ser ki res dan Papwazi-Nouvel-Gine, kan li ti gagn bann difikilte. b Shirley so fami ti bien pov, ek parfwa zot ti gagn boukou difikilte pou gagn ase manze pou manze. Enn manb so fami ti esey diminie konfians ki Shirley ti ena dan Zeova. Li ti dir: “To dir ki lespri sin Bondie pe ed twa, me kot li pe ed twa? To fami ankor pov. To pe perdi to letan pou prese.” Shirley dir: “Mo ti demann momem: ‘Eski Bondie vremem gagn nou traka?’ Lerla, deswit mo ti priye Zeova ek mo ti dir Li tou seki ti ena dan mo leker. Mo ti kontign lir Labib ek bann piblikasion, ek mo ti kontign prese ek asiste bann renion.” Bien  vit, Shirley ti realize ki Zeova ti pe pran swin so fami. So fami pa ti mank manze ek zot ti ere. Shirley dir: “Mo ti santi ki Zeova ti pe reponn mo lapriyer.” (1 Tim. 6:6-8) Si twa osi to kontign gard bann bon labitid spiritiel, to pa pou les bann difikilte ouswa bann dout fer twa al lwin ar Zeova.

8. Ki kapav ariv bann frer ki ena bann responsabilite dan lorganizasion Zeova?

⁸ Nou bann lennmi souvan servi bann media ek bann rezo sosial pou koz manti ouswa pou fann bann fos linformasion lor bann frer ki ena bann responsabilite. (Ps. 31:13) Zot inn osi aret nou bann frer ek inn akiz zot kouma bann kriminel. Dan premie siek, bann Kretien osi ti konn sa sitiasion-la kan ti aret lapot Pol ek ti fer li pas pou enn kriminel. Kouma zot ti reazir?

9. Kouma sertin Kretien ti reazir kan lapot Pol ti al dan prizon?

⁹ Sertin Kretien dan premie siek ti aret soutenir lapot Pol kan li ti al dan prizon dan Rom. (2 Tim. 1:8, 15) Kifer? Eski zot ti gagn onte parski bann dimounn ti konsider Pol kouma enn kriminel? (2 Tim. 2:8, 9) Ouswa kitfwa zot ti gagn per ki bann dimounn persekit zot osi? Ninport ki rezon zot ti ena, esey mazine seki lapot Pol ti resanti! Li ti andir boukou difikilte ek li ti mem riske so lavi pou zot. (Zist. 20:18-21; 2 Kor. 1:8) Fode zame nou vinn kouma bann Kretien ki ti abandonn Pol kan li ti plis bizin zot! Ki kitsoz nou bizin rapel kan bann frer ki ena bann responsabilite gagn persekision?

10. Ki nou bizin rapel kan bann frer gagn persekision, ek kifer?

¹⁰ Rapel kifer nou gagn persekision ek kisann-la ki deryer sa. 2 Timote 3:12 dir: “Tou dimoun ki vremem oule viv dan Lekris pou gagn persekision dan  zot lavi.” Alor, fode pa nou etone kan Satan atak bann frer ki ena bann responsabilite. Li anvi ki sa bann frer-la nepli res fidel ar Zeova, ek li anvi fer nou gagn per.​—1 Pier 5:8.

11. Ki nou aprann ar lexanp Onesifor? (2 Timote 1:16-18)

¹¹ Kontign soutenir to bann frer ar fidelite. (Lir 2 Timote 1:16-18.) Enn Kretien dan premie siek, ki apel Onesifor, ti azir dan enn lot fason kan Pol ti dan prizon. “Zame li finn ignor [Pol] ki enn prizonie.” Okontrer, Onesifor ti rod Pol, ek kan li ti trouv li, li ti rod bann fason pou ed li. Onesifor ti riske so lavi pou fer sa. Ki leson nou aprann? Fode pa nou per bann dimounn ek les sa anpes nou soutenir nou bann frer ki pe gagn persekision. Okontrer, anou defann zot ek ed zot. (Prov. 17:17) Zot bien bizin nou lamour ek nou soutien.

12. Ki nou aprann ar lexanp nou bann frer ek ser dan Larisi?

¹² Anou gete kouma nou bann frer ek ser dan Larisi inn ed zot bann frer ek ser ki ti dan prizon. Kan sertin pas devan lakour, boukou frer ek ser al lakour pou soutenir zot. Ki leson nou aprann? Kan bann dimounn aret bann frer ki ena bann responsabilite, gat zot repitasion, ouswa persekit zot, fode pa nou per. Nou bizin priye pou zot, ed bann manb zot fami, ek rod bann fason pou montre ki nou pe soutenir zot.​—Zist. 12:5; 2 Kor. 1:10, 11.

13. Kan lezot boufonn nou, kouma sa kapav diminie nou konfians an Zeova ek so lorganizasion?

¹³ Bann fami ki pa Temwin, bann koleg travay, ouswa bann kamarad lekol kapav boufonn nou parski nou prese ouswa parski nou swiv bann prinsip Zeova. (1 Pier 4:4) Kitfwa zot kapav dir: “To enn bon dimounn, me to relizion tro strikt ek zot bann ti lespri.” Kitfwa sertin kapav mem kritik nou akoz fason ki nou azir anver bann exkli. Zot kapav dir: “Kouma to kapav dir ki to ena lamour?” Bann koze koumsa kapav kree bann dout dan nou lespri. Lerla, kitfwa nou kapav demann noumem: ‘Seki Zeova pe demann mwa pou fer, eski li tro difisil? Eski so lorganizasion tro strikt?’ Si to dan sa sitiasion-la, kouma to kapav res pros ar Zeova ek so lorganizasion?

14. Kouma nou bizin reazir kan bann dimounn boufonn nou parski nou pe swiv bann prinsip Zeova? (Psom 119:50-52)

¹⁴ Anou bien deside pou kontign swiv bann prinsip Zeova. Zob ti kontign swiv bann prinsip Zeova mem si lezot ti boufonn li akoz sa. Enn parmi so bann fos kamarad ti mem esey fer li krwar ki Bondie pa ti kas latet si li ti pe obeir Bondie ouswa non. (Zob 4:17, 18; 22:3) Me Zob pa ti krwar sa bann foste-la. Li ti kone ki bann prinsip Zeova lor seki bon ek seki pa bon, zot bann bon prinsip, ek li ti bien deside pou swiv sa bann prinsip-la. Li ti res fidel ar Zeova mem si lezot ti boufonn li. (Zob 27:5, 6) Ki leson nou aprann? Kan bann dimounn boufonn nou, fode pa nou koumans dout bann prinsip Zeova. Reflesi lor to prop lexperyans. Kitfwa plizir fwa tomem to’nn trouve ki, kan to’nn swiv bann prinsip Zeova, to lavi inn vinn pli bon. Alor, anou bien deside pou soutenir lorganizasion Zeova, ki pe swiv sa  bann prinsip-la. Mem si bann dimounn boufonn nou, zame nou pa pou aret servi Zeova.​—Lir Psom 119:50-52.

15. Kifer Brizit so bann fami ti boufonn li?

¹⁵ Anou get lexanp Brizit, enn ser ki res Lenn. So bann fami ti boufonn li akoz so lafwa. Inpe letan apre so batem, an 1997, so mari ti perdi so travay. Alor, so mari ti deside ki li, Brizit, ek zot bann tifi, ti pou al res kot so bann paran ki ti res dan enn lot lavil. Me Brizit ti pou gagn bann pli gran leprev ankor. Parski so mari pa ti ena travay, Brizit ti bizin travay full-time pou soutenir so fami. Anplis, Lasal Renion ki ti pli pre, ti trouv 350 kilomet ar zot. Malerezman, bann fami so misie ti persekit Brizit akoz so lafwa. Brizit ti pe gagn telman persekision, ki li ek so fami ti bizin demenaze ankor enn fwa. Apre sa, san ki li atann, so misie ti mor. Plitar, enn parmi so bann tifi ki ti ena 12 an, ti mor ar kanser. Anplis, bann fami Brizit ti dir ki tousala ti arive akoz li. Zot ti mem dir ki, si li pa ti vinn enn Temwin Zeova, pa ti pou ariv li tou sa bann maler-la. Malgre tousala, Brizit inn kontign fer Zeova konfians ek li’nn res pros ar So lorganizasion.

16. Ki benediksion Brizit inn gagne kan li’nn res pros ar Zeova ek So lorganizasion?

¹⁶ Brizit ti res lwin ar Lasal Renion. Akoz sa, enn responsab sirkonskripsion ti ankouraz li pou pres dan so landrwa ek pou fer bann renion kot li. O-koumansman, li ti trouv sa tro difisil. Me apre, li ti swiv bann konsey ki sa frer-la ti donn li. Li ti pres bon nouvel ar lezot, li ti fer bann renion kot li, ek li ti trouv letan pou fer so ladorasion an fami avek so bann tifi. Ki rezilta li ti gagne? Brizit ti reisi koumans boukou letid Labib, ek plizir parmi zot ti pran batem. An 2005, li ti vinn pionie permanan. Brizit ti gagn bann benediksion parski li ti res fidel ar Zeova ek li ti soutenir  So lorganizasion. Azordi, so bann tifi pe servi Zeova ar fidelite, ek ena osi de lasanble dan so landrwa! Brizit sir ki se Zeova ki’nn donn li lafors pou fer fas ar so bann difikilte ek pou kontign andire kan so fami ti pe boufonn li.

17. Ki nou bizin bien deside pou fer?

¹⁷ Satan anvi fer nou krwar ki Zeova pou abandonn nou kan nou gagn bann difikilte. Li anvi osi fer nou krwar ki, si nou res dan lorganizasion Zeova, nou lavi pou vinn pli difisil. Satan anvi ki nou per kan bann dimounn gat repitasion bann frer ki ena bann responsabilite, persekit zot, ouswa met zot dan prizon. Ek kan bann dimounn boufonn nou, Satan anvi ki sa diminie nou konfians dan bann prinsip Zeova ek dan So lorganizasion. Selman, nou konn bien bann taktik Satan, ek nou pa pou les li anbet nou. (2 Kor. 2:11) Anou bien deside pou rezet bann fos linformasion ki Satan pe fane ek pou res fidel ar Zeova ek So lorganizasion. Pa bliye ki Zeova zame pa pou abandonn twa. (Ps. 28:7) Alor, pa les nanye fer twa al lwin ar Zeova!​—Rom. 8:35-39.

18. Ki nou pou examine dan prosin lartik?

¹⁸ Dan sa lartik-la, nou’nn koz lor bann difikilte ki nou kapav gagne andeor lasanble. Me nou kapav osi gagn bann difikilte dan lasanble, ek sa kapav teste nou konfians an Zeova ek so lorganizasion. Kouma nou kapav sirmont sa bann difikilte-la? Nou pou koz lor la dan prosin lartik.