LARTIK LETID 45
KANTIK 138 Seve Blan, Li enn Bote
Aprann ar Bann Dernie Parol ki Bann Zom Fidel Inn Dir
“Eski se pa bann ki aze ki ena sazes, ek eski se pa bann dimounn ki ena enn long lavi ki ena lintelizans?”—ZOB 12:12.
PWIN PRINSIPAL
Kan nou obeir Zeova, sa fer nou gagn bann benediksion azordi ek lavi eternel dan lavenir.
1. Kifer konsey bann Kretien ki aze bien itil pou nou?
NOU tou nou bizin bann konsey pou pran bann bon desizion. Nou kapav gagn boukou parmi sa bann konsey-la ar bann ansien ek bann Kretien ki ena lexperyans. Si zot pli vie ki nou, fode pa nou panse ki zot bann konsey nepli itil pou nou azordi. Zeova anvi ki nou aprann ar bann frer ek ser aze. Zot inn viv pli lontan ki nou, zot konpran lavi pli bien ki nou, ek zot ena sazes.—Zob 12:12.
2. Ki nou pou examine dan sa lartik-la?
2 Dan lepase, Zeova ti servi bann serviter fidel ki aze pou ankouraz ek pou gid so pep. Anou get lexanp Moiz, David, ek lapot Zan. Zot ti viv dan diferan lepok, ek zot sitiasion ti bien diferan. Kan zot ti pre pou mor, zot ti donn bann zenn bann bon konsey. Toule trwa ti montre bien linportans pou obeir Bondie. Zeova inn fer ekrir zot bann parol ki ranpli ar sazes dan Labib pou nou azordi. Ki nou zenn ouswa vie, nou kapav gagn bann bienfe kan nou swiv zot bann konsey. (Rom. 15:4; 2 Tim. 3:16) Dan sa lartik-la, nou pou examinn bann dernie parol ki sa trwa zom-la ti dir, ek nou pou get bann leson ki nou kapav aprann ar seki zot ti dir.
“TO POU RES LONTAN”
3. Dan ki fason Moiz ti servi Zeova ek bann Izraelit?
3 Toutlong so lavi, Moiz ti travay bien dir pou Zeova. Li ti enn profet, enn ziz, enn sef, ek enn istorien. Moiz ti gagn boukou lexperyans gras-a bann kitsoz ki li ti viv. Par exanp, li ti liber bann Izraelit ki ti bann esklav dan Lezip, ek li ti trouv boukou mirak ki Zeova ti fer. Zeova ti servi li pou ekrir sink premie liv Labib, Psom 90, ek kitfwa Psom 91 osi. Li ti osi fer Moiz ekrir liv Zob.
4. Kisann-la Moiz ti ankouraze, ek kifer?
4 Zis avan so lamor, kan li ti ena 120 an, Moiz ti rasanble tou bann Izraelit pou rapel zot tou bann kitsoz ki zot ti trouv Zeova fer pou zot. Boukou lane avan, sertin Izraelit ti trouv bann mirak ki Zeova ti fer ek zot ti trouve kouma Li ti pini bann Ezipsien. (Ex. 7:3, 4) Zot ti trouv Zeova ouver Lamer Rouz pou ki zot traverse. Ek apre, zot ti trouv Zeova detrir larme Faraon. (Ex. 14:29-31) Dan dezer, zot ti trouve kouma Zeova ti protez zot ek pran zot swin. (Det. 8:3, 4) Me aster ki bann Izraelit ti pre pou rant dan Later Promiz, Moiz ti profit sa dernie lokazion-la pou ankouraz zot. a
5. Kan Moiz ti dir so bann dernie parol dan Deteronom 30:19, 20, kouma li ti rasir bann Izraelit?
5 Ki Moiz ti dir? (Lir Deteronom 30:19, 20.) Moiz ti rapel bann Izraelit ki enn zoli lavenir ti pe atann zot. Gras-a benediksion Zeova, bann Izraelit ti pou kapav viv lontan dan sa pei ki Zeova ti promet zot la. Anplis, sa pei-la ti bien zoli ek so later ti bien fertil! Kan Moiz ti dekrir sa pei-la, li ti dir: “Bann gran ek bann zoli lavil ki to pa finn konstrir, bann lakaz ki plin ar bann bon kitsoz ek ki to pa finn ranpli, ek bann rezervwar ki’nn fouye me ki to pa finn fouye, bann pie rezin ek bann pie zoliv ki to pa finn plante.”—Det. 6:10, 11.
6. Kifer Bondie ti les lezot nasion gagn laviktwar lor Izrael?
6 Moiz ti osi averti bann Izraelit. Pou ki zot kontign viv dan sa zoli pei-la, zot ti bizin obeir bann komannman Zeova. Moiz ti ankouraz zot pou “swazir lavi.” Kouma zot ti pou fer sa? Zot ti bizin ekout Zeova ek “res atase ar Li.” Selman, bann Izraelit ti abandonn Zeova. Se akoz sa ki Zeova ti les bann Asirien, ek plitar bann Babilonien osi, gagn laviktwar lor zot ek amenn zot kouma bann prizonie.—2 Ler. 17:6-8, 13, 14; 2 Kro. 36:15-17, 20.
7. Ki leson nou aprann ar bann parol ki Moiz ti dir? (Get zimaz osi.)
7 Ki leson nou aprann? Lobeisans fer nou gagn lavi. Parey kouma bann Izraelit ki ti pre pou rant dan Later Promiz, nou osi nou pre pou rant dan nouvo lemond ki Zeova promet nou. (Iza. 35:1; Lik 23:43) Biento, Satan ek so bann demon pou disparet. (Rev. 20:2, 3) Pou nepli ena bann fos relizion ki fer bann dimounn al lwin ar Zeova. (Rev. 17:16) Bann gouvernman pou nepli fer dominer ar bann dimounn. (Rev. 19:19, 20) Ek pa pou ena okenn rebel dan Paradi. (Ps. 37:10, 11) Partou lor later, bann dimounn pou obeir bann lalwa Zeova ek sa pou amenn lape ek linite. Sa lepok-la, sakenn pou kontan so kamarad ek pou fer li konfians. (Iza. 11:9) Nou pe atann sa moman-la avek inpasians, pa vre! Anplis, si nou obeir Zeova, nou pou viv lor later ki pou vinn enn paradi, pa zis pou enn tigit letan, me pou leternite!—Ps. 37:29; Zan 3:16.
Si nou obeir Zeova, nou pou viv lor later ki pou vinn enn paradi, pa zis pou enn tigit letan, me pou leternite (Get paragraf 7)
8. Kouma promes pou viv pou touletan ti ed enn misioner? (Zid 20, 21)
8 Kan nou kontign reflesi lor promes ki Zeova inn fer nou, setadir promes pou viv pou touletan, sa ed nou pou obeir Li mem kan nou gagn bann difikilte. (Lir Zid 20, 21.) Sa promes-la kapav osi donn nou lafors pou lit kont nou bann febles. Enn frer, ki ti misioner dan Lafrik pandan boukou lane, explike ki li ti ena enn febles ek ki souvan li ti bizin lit kont sa. Li dir: “Mo ti rann mwa kont ki, si mo ti dezobeir Zeova, mo pa ti pou kapav viv dan Paradi. Sa ti ed mwa pou kontign lit kont sa febles-la ek pou priye Zeova ankor plis lor la.”
“TO POU REISI”
9. Ki bann difikilte David ti gagne?
9 David ti enn gran lerwa. Li ti osi enn mizisien, enn poet, enn gerye, ek enn profet. Li’nn pas par boukou difikilte dan so lavi. Pandan boukou lane, li ti bizin kasiet parski Lerwa Sail ti pe rod touy li. Mem kan li ti vinn lerwa, David ankor enn fwa ti bizin sove pou sap so lavi parski so garson Absalon ti rod vinn lerwa ek ti rod touy li. Selman, malgre so bann difikilte ek so bann febles, David ti kontign res fidel ar Zeova ziska so lamor. Se akoz sa ki, kan Zeova koz lor David, Li dir ki li ti “enn zom ki fer [so] leker plezir.” Alor, li vo lapenn ki nou ekout bann konsey ki David ti done, pa vre!—Zist. 13:22; 1 Ler. 15:5.
10. Kifer David ti donn Salomon bann konsey?
10 Anou get konsey ki David ti donn so garson Salomon, ki ti pou vinn lerwa apre li. Zeova ti swazir Salomon pou aranz enn tanp pou ki So pep kapav ador Li. (1 Kro. 22:5) Salomon ti pou ena boukou travay pou fer ek li ti bizin led Zeova pou kapav diriz nasion Izrael. Ki David ti dir Salomon? Anou gete.
11. Dapre 1 Lerwa 2:2, 3, ki konsey David ti donn Salomon, ek ki ti pou arive si Salomon ti obeir sa konsey-la? (Get zimaz osi.)
11 Ki David ti dir? (Lir 1 Lerwa 2:2, 3.) David ti dir so garson ki si li obeir Zeova, li pou reisi so lavi. Ek pandan boukou lane, Zeova ti donn Salomon boukou bon kitsoz ek Li ti ed li dan plizir fason. (1 Kro. 29:23-25) Gras-a sa, Salomon ti aranz enn zoli tanp. Li ti osi ekrir sertin liv Labib, ek nou kapav trouv sertin parmi so bann parol osi dan bann lezot liv Labib. Bann dimounn ti konn Salomon pou so sazes ek so rises. (1 Ler. 4:34) Ek parey kouma David ti dir, Salomon ti pou reisi so lavi si li ti kontign obeir Zeova. Malerezman, kan Salomon ti vinn vie, li ti koumans ador bann lezot Bondie. Akoz sa, li ti perdi faver Zeova, ek li ti nepli ena sazes pou diriz avek lazistis.—1 Ler. 11:9, 10; 12:4.
Bann dernie parol ki David ti dir Salomon ed nou trouve ki si nou obeir Zeova, Li pou donn nou sazes ki bizin pou nou pran bann bon desizion (Get paragraf 11-12) b
12. Ki leson nou aprann ar bann parol ki David ti dir?
12 Ki leson nou aprann? Kan nou obeir Zeova, Li beni nou. (Ps. 1:1-3) Biensir, Zeova pa promet nou ki Li pou fer nou vinn ris ouswa gagn laglwar parey kouma Salomon. Me si nou obeir Li, Li pou donn nou sazes ki bizin pou pran bann bon desizion. (Prov. 2:6, 7; Zak 1:5) Bann konsey Zeova kapav ed nou pou pran bann desizion konsernan nou travay, lekol, kas, ek nou bann divertisman. Si nou obeir ek nou met an pratik so bann konsey, nou pou protez nou lamitie avek Li ek nou pou kapav viv pou touletan. (Prov. 2:10, 11) Nou pou osi ena bann bon kamarad ek enn zoli lavi fami.
13. Ki kitsoz inn ed Carmen pou reisi so lavi?
13 Carmen, ki res Mozanbik, ti panse ki si li al liniversite, sa ti pou fer li gagn enn pli bon lavi. Alor, li ti al etidie liniversite pou li vinn enn arsitek. Carmen dir: “Mo ti bien kontan seki mo ti pe aprann. Me sa ti pran boukou mo letan ek mo lenerzi. Toulezour, mo bann kour ti koumanse 7h30 gramatin ek ti fini 6h00 tanto. Mo ti gagn difikilte pou asiste bann renion, ek mo lamitie avek Zeova ti afebli. Avek letan, mo ti rann mwa kont ki mo ti pe esey servi de met anmemtan.” (Mat. 6:24) Carmen ti priye Zeova lor la ek li ti fer bann resers dan nou bann piblikasion. Li dir: “Apre ki mo mama ek bann ansien ti donn mwa bann bon konsey, mo ti deside pou kit liniversite ek pou servi Zeova aplintan. Gras-a sa, mo’nn pran bann bon desizion dan mo lavi, ek azordi mo pena okenn regre.”
14. Dan zot bann dernie parol, ki kitsoz inportan Moiz ek David ti dir?
14 Moiz ek David ti kontan Zeova, ek zot ti kone ki li bien inportan ki zot obeir Li. Dan bann dernie parol ki zot ti dir, zot ti ankouraz bann ki ti pe ekout zot pou swiv zot lexanp ek pou res atase ar Zeova, zot Bondie. Toule-de ti osi averti lezot ki si zot kit Zeova, zot pou perdi so faver, zot pou nepli so kamarad, ek Li pa pou rekonpans zot. Zot bann konsey ena boukou valer pou nou azordi. Aster-la, anou al gete seki enn lot serviter Zeova ti dir lor kifer li inportan ki nou res fidel ar Bondie.
“NANYE PA KAPAV FER MWA PLIS KONTAN”
15. Sit bann levennman ki lapot Zan inn viv dan so lavi.
15 Zan ti enn bon kamarad Zezi. Li ti osi enn so bann zapot. (Mat. 10:2; Zan 19:26) Zan ti pas boukou letan pou prese ansam ar Zezi ek li ti trouv li fer bann mirak. Li ti res fidel ar Zezi pandan bann moman difisil. Li ti la kan Zezi ti mor, ek li ti trouv Zezi apre so rezireksion. Li ti osi trouv lasanble Kretien grandi ek li ti viv ase lontan pou trouv bon nouvel “prese dan tou kreasion anba lesiel.”—Kol. 1:23.
16. Kisann-la ki’nn gagn bann bienfe gras-a Zan so bann let?
16 Kan li ti pre pou mor, Zan ti gagn privilez pou ekrir sertin liv Labib. Par exanp, li ti ekrir liv Revelasion, parski li ti gagn “enn revelasion par Zezi Kris.” (Rev. 1:1) Zan ti osi ekrir enn parmi bann Levanzil, ek trwa let ki apel 1 Zan, 2 Zan, ek 3 Zan. Li ti ekrir so trwaziem let pou Gayis, enn Kretien fidel ki li ti kontan kouma so prop zanfan. (3 Zan 1) Me kitfwa ti ena lezot Kretien osi ki Zan ti kontan kouma so prop zanfan. Anplis, seki Zan inn ekrir pe kontign ankouraz bann disip Zezi ziska azordi.
17. Dapre 3 Zan 4, kifer Zan ti kontan?
17 Ki Zan ti ekrir? (Lir 3 Zan 4.) Dan so trwaziem let, Zan ti dir ki li kontan kan li trouv so bann frer ek ser obeir Bondie. Sa lepok-la, sertin dimounn ti pe ansegn bann fos lansegnman ek ti pe kree divizion dan lasanble. Selman, lezot ti “kontign mars dan laverite.” Zot ti obeir Zeova ek zot ti “kontign mars dapre so bann komannman.” (2 Zan 4, 6) Sa bann Kretien fidel la ti fer Zan ek Zeova osi bien kontan.—Prov. 27:11.
18. Ki leson nou aprann ar bann parol ki Zan ti dir?
18 Ki leson nou aprann? Kan nou res fidel ar Zeova, sa rann nou zwaye. (1 Zan 5:3) Par exanp, nou gagn boukou lazwa kan nou kone ki nou fer leker Zeova kontan. Li kontan kan Li trouv nou rezet bann tantasion sa lemond-la ek obeir so bann lalwa. (Prov. 23:15) Bann anz osi bien kontan kan zot trouv nou fer sa. (Lik 15:10) Nou osi, nou bien kontan kan nou trouv nou bann frer ek ser res fidel, sirtou kan zot pe gagn bann persekision ouswa kan zot pe gagn bann tantasion. (2 Tes. 1:4) Ek biento, kan lemond Satan pou detrir, nou pou bien kontan ki nou’nn reisi res fidel ar Zeova.
19. Ki Rachel resanti kan li ansegn lezot lor Zeova? (Get zimaz osi.)
19 Nou vremem kontan kan nou ansegn lezot lor Zeova. Rachel, ki res Repiblik Dominikenn, dir ki se enn gran loner kan nou ansegn lezot lor nou Bondie Zeova, ki enn Bondie extraordiner. Rachel ti ed plizir dimounn pou koumans ador Zeova. Li dir: “Mo pa kapav explik lazwa ki mo gagne kan mo trouv bann ki pe etidie Labib avek mwa koumans kontan Zeova, zot fer Li konfians, ek zot fer bann sanzman dan zot lavi pou fer Li plezir. Sa lazwa ki mo resanti la, li pli gran ki tou sa bann sakrifis ki mo’nn fer pou ansegn zot la.”
Nou gagn lazwa kan nou ansegn lezot pou kontan ek pou obeir Zeova (Get paragraf 19)
BANN BIENFE KI NOU GAGNE AR BANN DERNIE PAROL KI BANN ZOM FIDEL TI DIR
20. Ki kitsoz nou fer parey kouma Moiz, David, ek Zan?
20 Moiz, David, ek Zan ti viv dan diferan lepok, ek zot sitiasion ti bien diferan ar nou. Me ena boukou kitsoz ki nou fer parey kouma zot. Zot ti servi vre Bondie. Nou osi parey! Zot ti priye Zeova, zot ti kont lor Li, ek zot ti rod so bann konsey. Nou osi parey! Ek parey kouma sa bann zom-la, nou ena konfians ki Zeova beni bann ki obeir Li.
21. Ki benediksion nou pou gagne si nou swiv bann konsey ki Moiz, David, ek Zan ti done?
21 Alor, anou swiv konsey sa bann zom-la ek obeir bann komannman Zeova. Lerla, nou pou vremem reisi tou seki nou fer. Nou pou gagn lavi ek nou “pou res lontan” lor sa later-la; nou pou res pou touletan! (Det. 30:20) Anplis, nou pou ena lazwa pou fer plezir nou Papa ki dan lesiel, ki kontan nou, ek ki pou rekonpans nou dan bann fason ki nou pa atann!—Efe. 3:20.
KANTIK 129 Anou Kontign Andire
a Laplipar bann Izraelit ki ti trouv Zeova ouver Lamer Rouz pa ti rant dan Later Promiz. (Nonb 14:22, 23) Zeova ti dir ki tou bann zom ki ti ena 20 an ouswa plis, ti pou mor dan dezer. (Nonb 14:29) Selman, Zozwe, Kaleb, ek boukou ki ti form parti dan prosin zenerasion ek dan tribi Levi, ti reisi trouv Zeova realiz so promes kan bann Izraelit ti travers Larivier Zourdin ek zot ti rant dan pei Kanaan.—Det. 1:24-40.
b DESKRIPSION ZIMAZ: Gos: David pe dir so garson Salomon bann dernie parol ki ranpli ar sazes. Drwat: Bann zelev pe profit lansegnman spiritiel dan enn Lekol Pionie.
