1-2. Ki bann linzistis nou kapav gagne azordi?

 ZEZI ti servi lexanp enn vev ki ti kontign rod led ar enn ziz pou ki li gagn lazistis. Bann disip Zezi ti konpran bien seki sa vev-la ti resanti parski boukou dimounn sa lepok-la ti konn bann linzistis. (Lik 18:1-5) Nou osi, nou kapav konpran seki sa vev-la ti resanti parski nou tou nou’nn pas par bann linzistis.

² Dan lemond azordi, boukou dimounn fer diskriminasion, fer dominer ar lezot, ek tret lezot dan enn fason inzis. Se akoz sa ki sa pa etonn nou kan lezot tret nou dan enn fason inzis. (Ekle. 5:8) Selman, sa kapav bien dekouraz nou kan se enn frer ouswa enn ser ki tret nou dan sa fason-la. Biensir, nou bann frer ek ser pa bann move dimounn, me zot zis inparfe. Nou kapav aprann boukou ar fason ki Zezi ti reazir kan li ti pas par bann linzistis akoz bann move dimounn. Si nou ena pasians ar bann ki tret nou dan enn move fason, nou bizin ena plis pasians ar nou bann frer ek ser, pa vre! Me ki Zeova resanti kan lezot tret nou dan enn move fason, ki li dan lasanble ouswa andeor lasanble? Eski Li gagn nou traka?

3. Kouma nou kone ki Zeova gagn traka so bann serviter ki pe soufer akoz bann linzistis?

³ Labib dir ki “Zeova kontan lazistis.” (Ps. 37:28) Akoz sa, Li anvi ki bann dimounn tret nou bien, ek Li trouve kan lezot tret nou dan enn fason inzis. Zezi rasir nou ki Zeova pou “fer [nou] gagn lazistis bien vit” dan ler ki bizin. (Lik 18:7, 8) Ek biento, Li pou tir tou bann kitsoz ki fer nou soufer ek tou bann linzistis ki ena lor later.—Ps. 72:1, 2.

4. Kouma Zeova ed nou pou andir bann linzistis azordi?

⁴ Pandan ki nou pe atann ki Zeova amenn lazistis partou lor later, Li ed nou pou andir bann linzistis.  (2 Pier 3:13) Par exanp, Li ansegn nou kouma nou bizin reazir kan lezot tret nou dan enn fason inzis, pou ki nou pa fer sitiasion-la vinn pli pir. Enn fason ki Li fer sa, se kan Li montre nou atraver Labib kouma so Garson ti reazir kan lezot ti tret li dan enn fason inzis. Anplis, Li osi donn nou bann bon konsey ki nou kapav met an pratik kan lezot tret nou dan enn move fason.

KOUMA TO BIZIN REAZIR KAN TO PE PAS PAR BANN LINZISTIS?

5. Kifer nou bizin fer bien atansion ar fason ki nou reazir kan nou pe pas par enn linzistis?

⁵ Kan nou pas par enn linzistis, sa kapav bien dekouraz nou ek bien bles nou. (Ekle. 7:7) Bann serviter fidel kouma Zob ek Abakouk ti ena sa bann santiman-la. (Zob 6:2, 3; Abak. 1:1-3) Kan nou pe pas par enn linzistis, li normal ki nou ena sa bann santiman-la. Selman, nou bizin fer bien atansion ar fason ki nou reazir, tansion nou fer enn kitsoz bet.

6. Ki nou aprann ar lexanp Absalon? (Get zimaz osi.)

⁶ Kan enn kikenn tret nou ouswa enn kikenn ki nou kontan dan enn move fason, nou kapav esey rod fer lazistis par nou-mem. Selman, si nou reazir dan sa fason-la, nou kapav kree plis problem. Anou gete kouma Absalon, garson Lerwa David, ti reazir kan li ti fer fas ar enn linzistis. Kan so demi-frer Amnonn ti viol so ser Tamar, Absalon ti extra ankoler. Dapre Lalwa Moiz, Amnonn ti merit lamor. (Lev. 20:17) Alor, li normal ki Absalon ti ankoler. Selman, li pa ti gagn drwa touy Amnonn.—2 Sam. 13:20-23, 28, 29.

7. Kouma enn ekrivin psom ti reazir kan li ti trouv linzistis?

⁷ Kan enn kikenn azir dan enn fason inzis ek si li pa pe gagn okenn pinision, nou kapav demann nou-mem si li vo lapenn ki nou kontign fer seki bon. Kan enn ekrivin psom ti trouv bann move dimounn pe maltret bann bon dimounn, ek ki li ti ena linpresion ki sa bann move dimounn-la ti pe profit lavi, li ti dir: “Ala kouma bann move dimounn ete, zot lavi touletan fasil.” (Ps. 73:12) Sa ekrivin psom la ti bien dekouraze akoz bann linzistis ki li ti trouve, ek li ti panse  ki sa pa ti vo lapenn ki li servi Zeova. Li ti dir: “Kan mo ti esey konpran sa, sa ti fatig mwa.” (Ps. 73:14, 16) Li ti mem dir: “Mo lipie ti’nn preske pran enn lot direksion, ninport ki ti zafer ti kapav fer mwa tonbe.” (Ps. 73:2) Se seki ti ariv enn frer ki apel Alberto.

8. Kouma enn frer ti viktim enn linzistis, ek ki lefe sa finn ena lor li?

⁸ Alberto ti viktim enn linzistis; sertin frer ti akiz li ek ti dir ki li ti kokin kas dan bwat kontribision. Akoz sa, Alberto ti nepli kapav servi kouma ansien, ek bann ki ti aprann sa dan lasanble, ti nepli ena respe pou li. Alberto dir: “Mo ti bien ankoler ek dekouraze.” Alberto ti les so bann santiman afekte so lamitie avek Zeova, ek li ti mem vinn inaktif pandan sink an. Sa lexanp-la montre nou seki kapav arive si nou pa kontrol nou koler kan enn kikenn tret nou dan enn fason inzis.

IMIT FASON KI ZEZI TI ANDIR BANN LINZISTIS

9. Ki bann linzistis Zezi ti andire? (Get zimaz osi.)

⁹ Zezi inn donn nou pli bon lexanp lor kouma nou kapav andir bann linzistis. Boukou dimounn, mem bann manb so fami, ti tret li dan enn fason inzis. Par exanp, so bann fami ti dir ki li ti vinn fou,  bann sef relizie ti dir ki li ti gagn so pouvwar ar bann demon, ek bann solda Romin ti boufonn li, ti bat li, ek alafin ti touy li. (Mark 3:21, 22; 14:55; 15:16-20, 35-37) Selman, mem si li ti pas par tou sa linzistis-la, zame Zezi ti reazir dan enn move fason. Ki nou kapav aprann ar so lexanp?

10. Kouma eski Zezi ti reisi andir bann linzistis? (1 Pier 2:21-23)

¹⁰ Lir 1 Pier 2:21-23. a Par so zoli lexanp, Zezi inn montre nou kouma nou bizin reazir kan lezot tret nou dan enn fason inzis. Li ti kone kan li ti bizin res trankil ek kan li ti bizin koze. (Mat. 26:62-64) Parfwa, kan lezot ti koz manti lor li, li pa ti dir nanye. (Mat. 11:19) Ek kan li ti koze, li pa ti insilte bann ki ti pe persekit li ek menas li. Zezi ti reisi kontrol limem parski li ti les sa bann sitiasion-la “dan lame sa Kikenn ki ziz avek zistis la.” Zezi ti kone ki Zeova ti trouv bann linzistis ki li ti pe pase, ek li ti ena konfians ki Zeova ti pou regle sa bann linzistis-la dan moman ki bizin.

11. Sit bann fason kouma nou kapav kontrol seki nou dir. (Get zimaz osi.)

¹¹ Kan enn kikenn tret nou dan enn fason inzis, nou kapav imit Zezi ek kontrol nou-mem. Si enn kikenn inn fer nou enn kitsoz ki pa tro grav, nou kapav swazir pou pas lor la. Nou kapav osi swazir pou pa dir nanye, parski si nou dir kitsoz, sitiasion-la kapav vinn pli pir. (Ekle. 3:7; Zak 1:19, 20) Selman, si nou trouv enn kikenn ki pe pas par enn linzistis, ouswa si nou bizin defann nou krwayans, dan  bann sitiasion koumsa kitfwa nou pou bizin dir kitsoz. (Zist. 6:1, 2) Ek si nou deside pou dir kitsoz, nou bizin res kalm ek koz avek respe.—1 Pier 3:15. b

12. Kouma nou kapav fer konfians “sa Kikenn ki ziz avek zistis la”?

¹² Nou kapav osi imit Zezi kan nou fer konfians “sa Kikenn ki ziz avek zistis la.” Kan lezot ziz nou ouswa tret nou dan enn move fason, nou sir ki Zeova kone seki’nn arive. Ek parski nou kone ki Zeova pou tir tou sa bann linzistis-la biento, sa kapav ed nou pou andire. Kan nou fer Zeova konfians ek nou atann ki Li regle tou nou bann problem, nou pa pou res ankoler ek nou pa pou ena laenn pou lezot. Anplis, kan nou res ankoler ar lezot, sa kapav fer nou sap lor kal, nou kapav perdi nou lazwa, ek gat nou lamitie ar Zeova.—Ps. 37:8.

13. Ki kitsoz kapav ed nou pou kontign andir bann linzistis?

¹³ Biensir, nou pa kapav swiv lexanp Zezi dan enn fason parfe. Parfwa, nou dir ek nou fer bann kitsoz ki nou regrete apre. (Zak 3:2) Ek kan enn kikenn inn tret nou dan enn move fason, sa kapav fer nou soufer toutlong nou lavi. Si to dan sa sitiasion-la, to kapav sir ki Zeova konn to soufrans. Zezi osi konpran seki to resanti, parski li osi li’nn konn bann linzistis. (Ebre 4:15, 16) Zezi, li vremem enn zoli lexanp ki nou kapav swiv. Me Zeova inn osi donn nou bann konsey dan Labib ki kapav ed nou pou fer fas ar bann linzistis. Anou examinn de verse ki ena dan let ki lapot Pol ti ekrir bann Romin, ek anou gete kouma sa kapav ed nou.

“LES BONDIE MONTRE SO KOLER”

14. Ki savedir “les Bondie montre so koler”? (Romin 12:19)

¹⁴ Lir Romin 12:19. Lapot Pol ti ankouraz bann Kretien pou “les Bondie montre so koler.” Nou les Zeova montre so koler kan nou les Li amenn lazistis dan moman ek dan fason ki Li Li deside. Enn frer ki apel John ek ki ti pas par bann linzistis, dir: “Mo ti bizin kontrol mo koler pou ki mo pa fer enn move kitsoz. Me sa pa ti fasil! Romin 12:19 ti ed mwa pou ena pasians ek pou fer Zeova konfians.”

15. Kifer li pli bon ki nou atann ki Zeova regle enn problem?

¹⁵ Kan nou esey regle enn problem par nou-mem, nou kapav strese ek dekouraze. Me ki lavantaz nou ena kan nou les Zeova regle enn problem? Nou pa pou strese ek nou pa pou dekouraze. Anplis, Zeova anvi ed nou. Se koumadir Li pe dir nou: ‘Les sa problem-la pou mwa; se mwa ki pou regle sa.’ Si nou ena lafwa dan promes ki Zeova inn fer, setadir ki se Li ki “pou regle kont,” nou pa pou kontign res ankoler parski nou kone ki Zeova pou fer seki bizin. Se seki ti ed John, ki nou ti mansione avan. Li ti dir: “Si mo atann Zeova regle sa sitiasion-la, Li pou regle sa pli bien ki mwa.”

“KONTIGN GAGN LAVIKTWAR LOR LEMAL PAR SEKI BON”

16-17. Kouma lapriyer kapav ed nou pou “kontign gagn laviktwar lor lemal par seki bon”? (Romin 12:21)

¹⁶ Lir Romin 12:21. Pol ti osi ankouraz bann Kretien pou “kontign gagn laviktwar lor lemal par seki bon.” Dan so Sermon lor Montagn, Zezi ti dir:  “Kontign kontan zot bann lennmi ek priye pou bann ki persekit zot.” (Mat. 5:44) Se samem ki li ti fer! Sirman nou’nn deza reflesi lor bann soufrans ki Zezi ti andire kan bann solda Romin ti koulout li lor enn poto. Selman, nou pa kapav konpran net kantite ki li’nn soufer, kantite ki li’nn santi li imilie, ek kantite linzistis ki li’nn bizin andire.

¹⁷ Zezi pa ti les linzistis gagn laviktwar lor li, mem si li ti soufer. Olie ki li ti demann so Papa pou pini sa bann solda-la, li ti priye ek li ti dir: “Papa, pardonn zot, parski zot pa kone ki zot pe fer.” (Lik 23:34) Kan nou priye pou bann ki tret nou dan enn move fason, sa kapav ed nou pou res kalm ek pou pa res ankoler, ek sa kapav osi ed nou pou trouv zot dan enn lot fason.

18. Kouma lapriyer ti ed Alberto ek John pou andir bann linzistis?

¹⁸ Lapriyer ti ed sa de frer ki nou ti mansione dan sa lartik-la pou andir bann linzistis. Alberto dir: “Mo ti priye pou bann frer ki ti tret mwa dan enn fason inzis. Plizir fwa, mo ti demann Zeova ed mwa pou ki mo bliye seki zot inn fer.” Erezman, Alberto inn rekoumans servi Zeova avek fidelite. John dir: “Plizir fwa, mo ti priye pou sa frer ki ti bles mwa la. Sa bann lapriyer-la ti ed mwa pou trouv li dan enn fason pozitif ek pou pa ziz li. Sa ti osi ed mwa pou ena lape lespri.”

19. Tanki nou viv dan sa move lemond-la, ki nou pou bizin fer? (1 Pier 3:8, 9)

¹⁹ Tanki nou pou viv dan sa move lemond-la, nou pou kontign fer fas ar bann linzistis. Ek sak fwa ki nou fer fas ar linzistis, fode zame ki nou aret priye Zeova pou demann Li so led. Nou bizin osi imit fason ki Zezi ti azir kan lezot ti tret li dan enn move fason, ek nou bizin kontign swiv bann konsey ki ena dan Labib. Si nou fer tousala, nou kapav sir ki Zeova pou beni nou.—Lir 1 Pier 3:8, 9.