Sa traité-la ti osi met an plas enn nouvo lorganizasion ki ti apel Société des Nations. Sa lorganizasion-la ti ena lobzektif “pou ankouraz bann pei pou korper ansam ek pou met lape ek sekirite lor later.” Boukou relizion ki swadizan Kretien ti soutenir sa lorganizasion-la. Conseil fédéral des Églises du Christ dan l’Amérique ti soutenir Société des Nations ek ti dir ki li “enn lorganizasion politik ki reprezant Rwayom Bondie lor later.” Sa Conseil-la ti soutenir sa lorganizasion-la kan li ti avoy bann reprezantan pou asiste konferans ki ti ena dan Paris lor lape. Enn parmi sa bann reprezantan-la ti dir ki sa konferans-la “ti koumansman enn nouvo lepok dan listwar lemond.”

Enn nouvo lepok ti pe koumanse, me sa pa ti pou arive akoz bann zom ki ti inplike dan sa konferans-la. An 1919, enn nouvo lepok ti koumanse pou travay predikasion kan Zeova ti donn so bann serviter lafors pou prese plis ki avan. Me avan ki sa arive, ti bizin ena enn gran sanzman pou bann Etidian Labib.

Eleksion bann direkter Watch Tower Bible and Tract Society ki fer toule lane, ti programe pou Samdi le 4 Zanvie 1919 ek sa lepok-la, se Frer Joseph Rutherford ki ti prezidan lasosiete. Me bann lotorite ti aret Frer Rutherford ek set lezot frer dan enn fason inzis ek ti met zot dan prizon dan Atlanta, Géorgie, l’États-Unis. Sertin parmi sa bann frer-la ti bann direkter lasosiete. Alor, bann frer ti bizin deside si zot ti pou re-elir sa bann frer ki ti dan prizon la kouma direkter ouswa ranplas zot.

Dan prizon, Frer Rutherford ti trakase pou lavenir lorganizasion. Li ti kone ki sertin frer ti panse ki li ti pou pli bon si enn lot dimounn vinn prezidan. Akoz sa, li ti ekrir enn let bann frer ki ti rasanble pou eleksion. Ladan, li ti rekomann Frer Evander Coward kouma prezidan. Frer Rutherford ti dekrir Frer Coward kouma enn kikenn ki “kalm,” “diskre,” ek “devwe pou Lesegner.” Selman, boukou  frer ti prefer enn lot solision. Zot ti propoz pou ranvway eleksion-la dan sis mwa. Bann avoka ki ti pe defann nou bann frer ki ti dan prizon ti dakor avek sa desizion-la. Me pandan ki bann frer ti pe deside ki pou fer, sertin frer ti bien agase.

Plitar, Frer Richard Barber ti rakonte kouma enn frer parmi bann ki ti rasanble ti regle sa sitiasion difisil la. Frer-la ti deboute ek ti dir: “Mo pa kone seki bizin fer dapre lalwa, me mo kone seki enn dimounn fidel bizin fer. Bondie kontan bann dimounn ki fidel. Meyer fason nou kapav montre Bondie nou fidelite se kan nou fer eleksion-la ek nou re-elir Frer Rutherford kouma prezidan.”​—Ps. 18:25.

Frer Macmillan ki ti dan prizon li osi, rapel seki ti arive landemin sa eleksion-la. Frer Rutherford ti tap miray so kaso ek ti donn li enn let ki bann frer ti avoye konsernan rezilta bann eleksion. Deswit Frer Macmillan ti konpran seki ti arive. Let-la ti explike ki ti re-elir tou bann direkter ek ki ti gard Joseph Rutherford, ek William Van Amburgh dan komite bann direkter, ki vedir ki Frer Rutherford ti pou res prezidan.

Pandan ki sa wit frer-la ti dan prizon, bann Etidian Labib ti fer sign enn petision pou ki liber bannla. Sa bann frer ek ser fidel la ti ena kouraz ek zot ti gagn plis ki 700,000 signatir. Merkredi le 26 Mars 1919, avan ki zot donn bann lotorite sa petision-la, Frer Rutherford ek bann lezot frer responsab ti libere.

Frer Rutherford ti fer enn diskour pou bann dimounn ki ti akeyir li kan li ti sorti dan prizon. Dan sa diskour-la, li ti dir: “Mo sir ki sa difikilte ki nou’nn gagne la li zis enn preparasion pou bann pli gran difikilte ki pe atann nou pli devan. . . . Zot pa finn zis lite pou ki zot bann frer sorti dan prizon. Sa pa ti lobzektif prinsipal sa lalit-la. . . . Rezon prinsipal pou kifer zot finn lite se pou donn laglwar Zeova, ek tou bann ki finn lite finn gagn enn gran benediksion.”

Fason ki bann kitsoz ti deroule pandan zizman nou bann frer montre ki koumadir Zeova ti pe diriz sa sitiasion-la. Le 14 Me 1919, la cour d’appel ti rann sa zizman-la: “Dan sa case-la, bann akize pa finn gagn . . . enn zizman ki baze lor lazistis, kouma zot ti bizin gagne, ek akoz sa inn kennsel sa case-la.” Sa ti enn bon desizion. Kifer? Parski ti ena bann lakizasion bien grav lor nou bann frer ek si lakour ti zis grasie nou bann frer ouswa diminie zot santans, sa bann lakizasion-la ti pou res dan zot kazie zidisier. Me parski lakour ti kennsel sa case-la ek pa ti azout okenn lezot sarz lor zot, zot ti pou nepli ena enn kazie zidisier. Gras-a sa, Frer Rutherford ti gard so bann fonksion ziz ek avoka. Li ti kontign defann pep Zeova devan Lakour Siprem l’États-Unis, ek li’nn fer sa plizir fwa apre so liberasion.

Frer Macmillan ti dir: “Nou pa ti pou nek asize, tourn nou pous, ek atann ki Lesegner pran nou pou al dan lesiel. Nou ti rann nou kont ki nou ti bizin fer kitsoz pou kone ki volonte Lesegner ete vremem.”

Me bann frer dan biro mondial pa ti kapav kontign travay ki zot ti pe fer depi plizir lane. Kifer? Parski kan zot ti dan prizon, tou bann plak ki zot ti servi pou inprim bann piblikasion ti’nn detrir. Sa ti bien dekourazan, ek sertin frer ti pe demann zotmem si ti pou nepli ena travay predikasion.

Eski bann dimounn ti ankor interese ar mesaz Rwayom Bondie ki bann Etidian Labib ti pe prese? Pou reponn sa kestion-la, Frer Rutherford ti desid pou fer enn diskour. Tou dimounn ti invite pou sa diskour-la. Frer Macmillan ti dir: “Si personn pa ti vini pou sa diskour-la, nou ti pou aret prese.”

Alor, Dimans le 4 Me 1919, mem si li ti bien malad, Frer Rutherford ti fer so diskour dan Los Angeles, Californie. Tem sa diskour-la ti « Un espoir pour l’humanité affligée ». Anviron 3,500 dimounn ti vinn asiste sa diskour-la, ek plizir santenn dimounn ki ti vini pa ti reisi asiste diskour-la parski pa ti ena ase plas. Landemin, anviron 1,500 dimounn ti vini. Bann frer ti gagn zot repons: bann dimounn ti interese!

Seki bann frer ti fer apre sa finn ena enn gran linflians lor predikasion bann Temwin Zeova ziska zordi.

Latour Degard 1^e Out 1919 (an angle) ti anonse ki dan koumansman mwa Septam ti pou ena enn lasanble zeneral dan Cedar Point, Ohio. Frer Clarence Beaty, ki ti enn zenn Etidian Labib ki ti res dan Missouri, rapel: “Sa ti kler dan lespri tou dimounn ki  zot ti bizin asiste sa lasanble-la.” Plis ki 6,000 frer ek ser ti asiste sa lasanble-la, ek bann frer pa ti atann ki ti pou ena sa kantite dimounn-la. Pli extraordiner ankor, plis ki 200 dimounn ti pran batem pou sa lokazion-la. Zot ti fer sa dan lak Érié ki ti zis akote.

Le 5 Septam 1919, pandan sinkiem zour lasanble, dan « Discours aux collaborateurs », Frer Rutherford ti anons piblikasion enn nouvo magazinn ki ti apel L’Âge d’Or. * Ki ti lobzektif sa magazinn-la? Li ti pou “koz lor bann gran levennman ki pe arive ek servi Labib pou explike kifer zot pe arive.”

Bann frer ti ankouraz tou bann Etidian Labib pou pres avek sa nouvo magazinn-la. Dan enn let ki ti explike kouma pou organiz travay predikasion, bann frer ti ekrir: “Ki sak Kretien konsakre [batize] rapel ki se enn gran privilez pou servi Zeova, ki li sezi sa lokazion-la depi asterla mem, ek ki li partisip dan sa gran travay predikasion ki pe fer dan lemond antie la.” Reaksion bann Etidian Labib ti extraordiner! Sa bann proklamater-la ti telman zele ki an Desam, plis ki 50,000 dimounn ti ena enn labonnman ar sa nouvo magazinn-la.

Ver lafin 1919, bann serviter Zeova ti re-organiz zot laktivite ek ti repran lafors. Anplis, plizir profesi inportan konsernan bann dernie zour ti’nn realize. Profesi Malaki 3:1-4 ki ti predir ki pep Bondie ti bizin pirifie ek pas par enn peryod test, ti akonpli. Zeova ti liber so pep, ki dan enn fason sinbolik ti an esklavaz dan “Gran Babilonn,” ek Zezi ti etabli “lesklav fidel ek saz.” * (Rev. 18:2, 4; Mat. 24:45, NW) Asterla, bann Etidian Labib ti’nn pare pou travay ki Zeova ti ena pou zot.