1. Kifer Zeova merit ki nou ador zis Li tousel?

ZEOVA merit ki nou ador zis Li tousel parski se Limem ki’nn kree nou ek ki’nn donn nou lavi. (Rev. 4:11) Me selman, ena enn danze. Mem si nou kontan Zeova ek nou ena respe pou Li, sertin kitsoz kapav vinn telman inportan pou nou ki zot anpes nou kontan Zeova ek res atase zis ar Li tousel. Nou bizin kone kouma sa kapav arive. Me avan, anou gete ki savedir res atase zis ar Zeova tousel.

2. Dapre Exod 34:14, ki nou pou fer si nou res atase zis ar Zeova tousel?

² Dan Labib, res atase zis ar Zeova vedir ena enn lamour profon pou Li. Kan nou res atase zis ar Zeova, nou pou ador zis Li tousel. Nou pa pou les nanye ni personn pran plas ki Li ena dan nou leker.​—Lir Exod 34:14. *

3. Kifer nou ena bann bon rezon pou res atase ar Zeova?

³ Nou ena bann bon rezon pou res atase ar Zeova. Kifer nou dir sa? Parski nou ladorasion baze lor bann kitsoz ki nou’nn aprann lor Zeova. Nou’nn aprann kontan so bann zoli kalite. Nou konn seki Zeova kontan ek seki Li pa kontan, ek nou pans parey kouma Li. Nou konpran proze ki Li ena pou bann dimounn ek nou soutenir sa proze-la. Pou nou se enn gran privilez ki Li donn nou posibilite pou vinn so kamarad. (Ps. 25:14) Tou seki nou aprann lor nou Kreater fer nou vinn pli pros ar Li.​—Zak 4:8.

4. (a) Ki kitsoz Lediab servi pou diminie nou lamour pou Zeova? (b) Ki nou pou examine dan sa lartik-la?

 ⁴ Se Lediab ki pe diriz sa lemond-la. Alor, li servi sa lemond-la pou pous nou pou satisfer nou bann dezir natirel ek fer nou gagn plis difikilte pou reziste kont nou bann febles. (Efe. 2:1-3, NW; 1 Zan 5:19) Pou ki nou pa res atase zis ar Zeova, Satan anvi ki nou kontan bann lezot kitsoz osi. Anou get de fason ki Lediab servi pou fer sa. Premierman, li esey fer nou kontan larzan, ek deziemman li esey fer nou fer bann move swa konsernan nou bann divertisman.

5. Kifer nou bizin fer bien atansion pou pa devlop lamour pou larzan?

⁵ Nou tou nou anvi ena ase manze pou manze, bann bon linz pou mete, ek enn bon plas pou reste, ek sa li normal. Selman, nou bizin fer bien atansion pou pa devlop lamour pou larzan. Azordi, boukou dimounn ki form parti dan lemond Satan “kontan kas” ek zot kontan bann kitsoz ki larzan kapav aste. (2 Tim. 3:2, NW) Zezi ti kone ki so bann disip ti kapav les zot tante pou devlop sa lamour-la. Li ti dir: “Personn pa kapav travay kouma enn esklav pou de met; parski swa li pou ena laenn pou enn, ek li pou kontan lot-la, swa li pou atas li ar enn ek li pou mepriz lot-la. Zot pa kapav travay kouma bann esklav pou Bondie ek pou Larzan toulede.” (Mat. 6:24, NW) Enn dimounn ki pe ador Zeova ek ki anmemtan pe fer tou pou vinn ris, se koumadir li pe esey servi de met. Li pa pe res atase zis ar Zeova tousel.

6. Ki leson nou aprann ar seki Zezi ti dir bann Kretien dan Laodise?

⁶ Ver lafin premie siek Nou Lepok, sertin Kretien dan lavil Laodise ti fer vantar ek ti dir: “Mo ris ek mo’nn gagn boukou  rises ek mo pa bizin nanye.” Me Zeova ek Zezi ti trouv zot kouma bann dimounn ki ‘mizerab, fer pitie, mizer, aveg ek touni.’ Zezi ti donn zot bann konsey, pa parski zot ti ris, me parski zot ti telman kontan larzan ki sa ti pe gat zot relasion avek Zeova. (Rev. 3:14-17, NW) Si nou remarke ki nou pe koumans kontan larzan, nou bizin pa tarde pou koriz nou fason panse. (1 Tim. 6:7, 8) Si nou pa fer sa, nou pa pou servi Zeova avek enn leker konple ek Zeova pa pou aksepte nou ladorasion. Zeova “demann enn latasman zis pou Li tousel.” (Det. 4:24) Alor, kouma li kapav arive ki nou donn larzan enn tro gran linportans?

7-9. Ki nou kapav aprann ar lexanp enn ansien ki apel David?

⁷ Anou get lexanp David, enn ansien ki res l’États-Unis. Li dir ki li ti travay dir dan so travay. Li ti gagn promosion dan konpagni kot li ti pe travay ek bann dimounn ti kone ki dan so domenn, li ti enn parmi bann pli bon travayer ki ti ena dan so pei. David dir: “Sa lepok-la, mo ti panse ki si mo ti pe reisi koumsa se parski Zeova ti pe beni mwa.” Me eski sa ti vre?

⁸ David ti koumans remarke ki so travay ti ena enn move lefe lor so relasion avek Zeova. Li dir: “Dan renion ek mem dan predikasion, mo ti pe pans mo bann problem travay. Mo ti pe gagn boukou larzan, me mo ti pe deplizanpli strese, ek sa ti pe afekte mo maryaz.”

⁹ David ti konpran ki li ti bizin reget so bann priorite. Li dir: “Mo ti bien deside pou sanz mo sitiasion.” David ti anvi sanz so bann ler travay, ek li ti al koz sa avek so patron. Ki ti arive? David ti perdi so travay! Kouma li ti reazir? Li dir: “So landemin mem, mo ti ranpli enn form pou fer pionie tanporer sak mwa.” Pou ki David ek  so madam kapav gagn seki zot bizin pou viv, zot ti koumans fer bann travay netwayaz. Apre inpe letan, David ti koumans fer pionie permanan, ek plitar, so madam osi ti vinn pionie permanan. Sa koup-la ti desid pou fer enn travay ki boukou dimounn denigre. Me se pa travay ki zot pe fer ki pli inportan pou zot. Mem si zot pe gagn bien tigit larzan konpare ar seki zot ti pe gagne avan, sak mwa zot pe gagn exakteman seki zot bizin pou pey tou zot bann depans. Zot anvi fer Zeova pas an premie dan zot lavi, ek zot inn trouve par zotmem ki Zeova pran swin bann ki met Rwayom Bondie an premie.​—Mat. 6:31-33, NW.

10. Kouma to kapav protez to leker?

¹⁰ Ki to ena boukou ouswa tigit larzan, to bizin protez to leker. Kouma to kapav fer sa? Se kan to pa devlop lamour pou larzan ek to pa les to travay vinn pli inportan ki to servis pou Zeova. Kouma to pou kone si to pe tom dan sa bann piez-la? To kapav demann tomem: ‘Eski souvan mo pans mo travay kan mo dan renion ouswa dan predikasion? Eski souvan mo trakase si mo pou ena ase larzan dan lavenir? Eski larzan ek bann kitsoz materyel pe kree bann problem dan mo maryaz? Eski mo pou dispoze fer enn travay ki lezot denigre si sa permet mwa gagn plis letan pou servi Zeova?’ (1 Tim. 6:9-12) Kan to reflesi lor sa bann kestion-la, pa bliye ki Zeova kontan twa ek ki Li’nn fer sa promes-la ar tou bann ki res atase ar Li: “Zame mo pa pou kit twa, ni abandonn twa.” Akoz samem ki lapot Pol ti ekrir: “Ki lamour pou larzan pa determinn zot lavi.”​—Ebre 13:5, 6.

11. Ki lefe bann divertisman kapav ena lor enn dimounn?

¹¹ Zeova anvi ki nou profit lavi, ek bann divertisman kapav ed nou pou fer sa. Avredir, Parol Bondie dir ki “pena nanye ki pli bon pou enn zom ki li manze, ki li bwar ek ki li gagn lazwa ar travay dir ki li’nn fer.” (Ekle. 2:24) Selman, boukou divertisman sa lemond-la kapav ena enn move lefe lor nou. Sa bann divertisman-la fer bann dimounn donn mwins linportans bann prinsip moral Bondie ek ankouraz zot pou aksepte ouswa mem pou kontan bann kitsoz ki Parol Bondie kondane.

12. Dapre 1 Korintien 10:21, 22, kifer nou bizin swazir bien nou bann divertisman?

¹² Nou anvi ador zis Zeova tousel, alor nou pa kapav manz lor “latab Zeova” ek lor “latab bann demon” toulede. (Lir 1 Korintien  10:21, 22, NW. *) Souvan kan nou pran enn repa avek enn kikenn se parski nou kamarad ar sa dimounn-la. Si nou swazir bann divertisman ki ankouraz laviolans, spiritis, limoralite sexiel, ouswa bann lezot move dezir ek latitid, se koumadir nou pe manz avek bann lennmi Bondie ek nou pe manz enn manze ki zot inn prepare. Ki rezilta sa pou ena? Nou pa pou zis fer noumem ditor, me nou pou osi gat nou relasion avek Zeova.

13-14. Dapre Zak 1:14, 15, kifer nou bizin vey bien nou bann divertisman? Donn enn lexanp.

¹³ Dan ki sans eski nou kapav konpar bann divertisman ar manze? Kan nou manze, nou kapav swazir ki nou pou met dan nou labous. Me kan nou fini aval sa manze-la, nou pa kapav swazir ki lefe sa manze-la pou ena lor nou lekor. Bann manze ki bon pou nou lasante kapav fer nou res an bonn sante, me bann manze ki pa bon pou fer nou gagn enn move lasante. Kitfwa nou pa pou trouv so rezilta deswit, me avek letan nou pou trouve ki lefe sa ena lor nou.

¹⁴ Li parey, kan nou swazir nou bann divertisman, nou kapav swazir ki kitsoz nou pou met dan nou lespri. Me apre sa, bann divertisman ki nou’nn swazir pou ena enn lefe lor nou fason panse ek nou bann santiman. Bann bon divertisman kapav fer nou dibien, me bann move divertisman pou fer nou ditor. (Lir Zak 1:14, 15.) Kitfwa deswit nou pa pou trouve ki lefe sa bann move divertisman-la ena lor nou, me avek letan nou pou trouve kouma sa afekte nou. Akoz samem Labib donn nou sa lavertisman-la: “Fodre pa fer erer, nou pa kapav mok Bondie. Enn dimoun li rekolte seki li finn seme. Si li sem dapre so natir imin, li pou rekolte koripsion.” (Gal. 6:7, 8) Alor, li vremem inportan ki nou rezet tou bann divertisman ki ankouraz bann kitsoz ki Zeova deteste!​—Ps. 97:10, NW.

15. Ki kado Zeova inn donn nou?

¹⁵ Boukou serviter Zeova kontan get Program Televizion JW, nou senn televizion lor Internet. Enn ser ki apel Marilyn dir: “Program Televizion JW inn ed mwa pou vinn pli pozitif, ek mo pa bizin swazir ki mo kapav gete ek ki mo pa kapav gete. Kan mo santi mwa tousel ouswa dekouraze, mo rod enn diskour ankourazan ouswa enn ladorasion dan gramatin pou gete. Sa fer mwa santi mwa pli pros ar Zeova ek ar so lorganizasion. Program Televizion JW inn sanz mo lavi net.” Eski to pe profit sa kado ki Zeova pe donn twa la? Lor Program Televizion JW, anplis bann emision ki sorti toule mwa, ena osi bann program odio ek video ek bann sante ankourazan ki to kapav gete ouswa ekoute ninport kan.

16-17. Kifer nou bizin kontrol kantite letan ki nou pase dan bann divertisman, ek kouma nou kapav fer sa?

¹⁶ Nou bizin pa zis vey lor ki kalite divertisman nou swazir, me osi lor kantite letan ki nou pase dan sa bann divertisman-la. Si nou pa fer sa, nou riske pas plis letan dan bann divertisman olie ki nou servi Zeova. Boukou frer ek ser trouv sa difisil pou kontrol kantite letan ki zot pase dan bann divertisman. Enn ser ki apel Abigail ek ki ena 18 an dir: “Kan mo get televizion apre enn lazourne bien ranpli, sa ed mwa pou rilax. Me si mo pa fer atansion, mo kapav pas plizir lertan devan televizion.” Enn zenn frer ki apel Samuel dir: “Parfwa, mo get boukou ti video lor Internet. Mo koumans par get zis enn sel, me apre san ki mo rann mwa kont, mo’nn pas trwa-a-kat-r-er tan pou get sa bann video-la.”

 ¹⁷ Kouma to kapav kontrol kantite letan ki to pase dan bann divertisman? Enn premie kitsoz ki to kapav fer se reflesi ki kantite letan to pe pase dan sa bann divertisman-la. Par exanp, lor enn kalandriye, ekrir kantite lertan ki to pase pou get televizion, get bann kitsoz lor Internet, ek zwe bann game lor to portab. Si to trouve ki to pe pas tro boukou letan dan sa bann kitsoz-la, esey fer enn program. An premie, rezerv letan pou fer bann kitsoz ki pli inportan, ek apre swazir ki kantite letan to pou pase dan bann divertisman. Apre sa, priye Zeova pou ki Li ed twa respekte to program. Si to fer sa, to pou ena ase letan ek lenerzi ki bizin pou fer to letid Labib personel, to ladorasion an fami, pou asiste renion ek pou prese. Anplis, to pa pou santi twa koupab kan to pou pas letan dan to bann divertisman parski to pe met Zeova an premie.

18-19. Kouma nou kapav montre ki nou res atase zis ar Zeova tousel?

¹⁸ Apre ki lapot Pier ti ekrir lor lafin lemond Satan ek lor nouvo lemond ki pe vini, li ti dir: “Mo bann bieneme, letan ki zot pe atann sa zour la, fer tou seki zot kapav pouki zot res san tas, san okenn pese e ki li trouv zot pe viv anpe avek li.” (2 Pier 3:14) Kan nou obeir sa konsey-la ek nou fer tou seki nou kapav pou viv ek ador Zeova dan fason ki Li anvi, nou montre ki nou atase zis ar Zeova tousel.

¹⁹ Satan ek so lemond pou kontign tant nou pou ki nou fer bann lezot kitsoz pas avan Zeova dan nou lavi. (Lik 4:13) Me malgre tou bann difikilte ki nou kapav gagne, nou pa pou les nanye ni personn pran plas ki Zeova ena dan nou leker. Nou bien determine pou donn Zeova seki zis Li tousel merite, setadir nou res atase zis ar Li tousel!