1-2. (a) Ki kitsoz bann dirizan sa lemond-la pou anonse biento? (b) Ki bann kestion nou pou reponn dan sa lartik-la?

FER koumadir bann dirizan sa lemond-la inn fek anonse ki ena “lape ek sekirite” parey kouma Labib ti predir. Kitfwa avek boukou fierte zot pe dir ki zame lemond pa finn konn enn lape koumsa. Sa bann dirizan-la pou rod fer nou krwar ki zot pe kapav regle tou bann problem ki ena lor later. Me zot pa pou kapav anpes seki pou arive zis apre! Kifer? Enn profesi Labib dir: “Lerlamem maler [“destriksion,” NW] pou fini zot enn sel kou . . . Zot pa pou kapav sove.”​—1 Tes. 5:3.

² Akoz sa, nou bizin gagn repons sa bann kestion bien inportan la: Ki pou arive pandan “gran detres”? Ki Zeova pou anvi nou fer dan sa moman-la? Ek kouma nou kapav prepar nou depi asterla mem pou res fidel pandan gran detres?​—Mat. 24:21, NW.

3. Dapre Revelasion 17:5, 15-18, kouma Bondie pou detrir “Gran Babilonn”?

³ Lir Revelasion 17:5, 15-18. Pena dout ki “Gran Babilonn” pou detrir! Kouma nou finn trouve dan bann paragraf avan, bann dirizan sa lemond-la pa pou ena okenn kontrol lor seki pou arive dan sa moman-la. Kifer? Parski “Bondie [pou] met dan zot leker proze pou realiz so plan.” Ki plan Bondie ena? Detrir lanpir fos relizion, parmi ena bann relizion  ki swadizan Kretien. * Bondie pou met sa plan-la dan leker bann “dis korn” enn “bebet rouz.” Sa dis korn-la reprezant tou bann gouvernman ki soutenir “bebet” sovaz, setadir, l’Organisation des Nations Unies. (Rev. 17:3, 11-13; 18:8) Kan sa bann gouvernman-la pou atak fos relizion, lerla mem gran detres pou koumanse. Sa levennman-la pou koumanse enn sel kout, li pou fer per, ek li pou afekte tou dimounn lor later.

4. (a) Ki bann rezon kitfwa bann dirizan sa lemond-la pou done pou explike kifer zot finn atak fos relizion? (b) Kouma bann dimounn ki avan ti dan sa bann relizion-la kitfwa pou reazir?

⁴ Nou pa kone ki bann rezon bann dirizan sa lemond-la pou done pou explike kifer zot finn atak Gran Babilonn. Kitfwa zot pou dir ki bann nasion pa pe reisi fer lape ant zot akoz bann relizion ek ki larelizion touletan esey inflians desizion ki bann gouvernman pran. Ouswa zot kapav dir ki sa bann relizion-la inn gagn tro boukou rises. (Rev. 18:3, 7) Kan bann gouvernman pou atak fos relizion sa pa vedir ki zot pou detrir tou bann dimounn ki form parti dan sa bann relizion-la. Li paret ki se bann lorganizasion relizie ki zot pou detrir. Kan pou nepli ena sa bann lorganizasion relizie la, bann dimounn ki ti form parti dan sa bann relizion-la pou rann zot kont ki zot bann sef relizie pa finn tini zot bann promes. Lerla, sirman zot pou dir ki zot pa ti dan sa bann relizion-la.

5. Ki Zeova finn promet konsernan gran detres, ek kifer?

⁵ Labib pa dir komie letan sa pou pran pou ki Gran Babilonn detrir, me selman nou kone ki sa pa pou pran boukou letan. (Rev. 18:10, 21) Zeova finn promet ki Li pou ‘rakoursi bann zour’ gran detres pou ki “bann dimoun ki li finn swazir” ek vre relizion pa detrir. (Mark 13:19, 20) Me ki Zeova pou anvi nou fer ant moman kot gran detres pou koumanse ek lager Armagedon?

6. Kifer li pa ase ki nou zis separ nou ar fos relizion?

⁶ Parey kouma nou finn trouve dan lartik avan, Zeova anvi ki so bann adorater separ zot ar Gran Babilonn. Selman, li pa ase ki nou zis separ nou ar fos relizion. Nou bizin osi fer tou pou pratik vre relizion, setadir nou bizin bien deside pou servi Zeova. Anou get de fason kouma nou kapav fer sa.

7. (a) Kouma nou kapav kontign obeir bann prinsip moral Zeova? (b) Kouma Ebre 10:24, 25 montre nou linportans pou kontign ador Zeova ansam avek nou bann frer ek ser, sirtou depi asterla mem?

⁷ Premierman, nou bizin kontign obeir bann prinsip moral Zeova. Fode zame nou aksepte bann kondwit imoral ki ena dan sa lemond-la. Par exanp, nou bizin rezet tou bann kondwit sexiel imoral kouma maryaz ant bann dimounn mem sex ek tou bann kitsoz ki ena enn lien avek lomosexialite. (Mat. 19:4, 5; Rom. 1:26, 27) Deziemman, nou bizin kontign ador Zeova ansam avek nou bann frer ek ser. Nou fer sa ninport kotsa nou kapav, ki li dan nou bann Lasal Renion, ouswa si bizin, dan lakaz enn Temwin, ouswa an kasiet. Ninport ki arive, zame nou pa pou aret al nou bann renion. Avredir, nou bizin asiste nou bann renion ankor plis kan nou trouve ki “zour Lesegner pe aprose.”​—Lir Ebre 10:24, 25.

8. Kifer nou kapav dir ki mesaz ki nou pe prese pou sanze dan lavenir?

⁸ Pandan gran detres, kitfwa nou pa pou pres mem mesaz ki nou pe prese azordi. Azordi, nou pe pres bon nouvel lor Rwayom Bondie ek nou pe esey fer bann disip. Me pandan gran detres, kitfwa nou pou pres enn mesaz bien direk ki pou fer dimal. Labib konpar sa mesaz-la ar bann gro lagrel. (Rev. 16:21) Kitfwa kan nou pou prese, nou pou dir bann dimounn ki pa res boukou letan avan ki lemond Satan detrir net. Kan sa moman-la pou arive, lerla nou pou kone exakteman ki mesaz nou pou prese ek kouma nou pou pres sa mesaz-la. Eski nou pou servi bann mem metod ki nou finn servi pandan plis ki san-t-an pou prese ek ansegne? Ouswa eski nou pou servi lezot metod? Nou pa kone. Ninport ki metod nou pou servi, li paret ki nou pou ena privilez pou pres avek boukou kouraz mesaz zizman Zeova!​—Eze. 2:3-5.

9. Kouma bann dimounn kitfwa pou reazir kan zot pou tann nou mesaz, me ki nou kapav sir?

⁹ Li posib ki nou mesaz pou pous bann dimounn pou esey aret nou predikasion. Me parey kouma nou kont lor Zeova pou soutenir nou dan nou minister azordi, dan sa bann moman-la osi nou pou bizin kont lor Zeova. Nou kapav sir ki nou Bondie pou donn nou lafors pou akonpli so volonte.​—Mish. 3:8.

10. Parey kouma ti anonse dan Lik 21:25-28, kouma laplipar dimounn pou reazir kan zot pou trouv seki pou arive pandan gran detres?

¹⁰ Lir Lik 21:25-28. Pandan gran detres, kan bann dimounn pou trouv bann kitsoz ki avan ti paret stab dan lemond koumans detrir, zot pou gagn enn sok. Zot pou dan “langwas” ek zot pou per tansion zot perdi lavi pandan moman pli pir ki zame finn ena dan listwar limanite. (Sof. 1:14, 15) Dan sa moman-la, li paret ki lavi pou vinn pli difisil mem pou bann serviter Zeova. Nou pou kontign res separe ar sa lemond-la, akoz sa kitfwa nou pou gagn sertin difikilte. Li posib ki nou pa pou gagn sertin kitsoz ki nou bizin pou viv.

11. (a) Kifer bann nasion ek zot bann dirizan pou konsantre tou zot latansion lor bann Temwin Zeova? (b) Kifer fode pa nou per gran detres?

 ¹¹ Pou ariv enn moman kot kitfwa bann dimounn pou ankoler parski bann Temwin Zeova pou kontign pratik zot relizion, alor ki zot zot relizion pou’nn detrir. Pena dout ki zot pou fer lezot dimounn kone ki kantite zot ankoler. Zot pou fer sa mem lor Internet. Bann nasion ek zot sef, Satan, pou deteste nou, parski zis nou relizion ki pa pou finn detrir. Zot pa pou reisi fer seki zot ti pe anvi, setadir eliminn tou bann relizion ki ena lor later. Alor zot pou konsantre tou zot latansion lor nou. Se lerla mem ki bann nasion pou vinn Gog ki sorti pei Magog. * Zot pou zwenn ansam, ek zot pou atak pep Zeova avek tou zot lafors. (Eze. 38:2, 14-16) Kan nou reflesi lor seki pou arive pandan gran detres, kitfwa nou kapav koumans trakase, sirtou parski nou pa kone ki pou arive an detay. Antouka, enn kitsoz ki nou kapav sir: Fode pa nou per gran detres. Zeova pou donn nou bann linstriksion ki pou protez nou. (Ps. 34:19) Nou pou kapav “drese, lev latet” parski nou kone ki nou “delivrans pe aprose.” *

12. Kouma eski “lesklav fidel ek saz” pe kontign prepar nou pou seki pou arive dan lavenir?

¹² “Lesklav fidel ek saz” pe kontign prepar nou pou res fidel pandan gran detres. (Mat. 24:45, NW) Li pe fer sa dan diferan fason. Anou get par exanp nou bann lasanble rezional 2016-2018. Bann diskour ki ti ena dan sa bann lasanble-la ti ankouraz nou pou ranforsi sertin kalite ki nou bizin ena amezir ki zour Zeova pe koste. Anou re-get pou enn ti moman sa bann kalite-la.

13. Kouma nou kapav ranforsi nou fidelite anver Zeova, ek kifer nou bizin fer sa depi asterla mem?

¹³ Fidelite: Tem pou lasanble rezional an 2016 ti “Res Fidel ar Zeova!” Sa lasanble-la ti montre nou ki si nou ena enn bon relasion avek Zeova, nou pou res fidel anver Li. Bann diskour sa lasanble-la ti osi rapel nou ki gras-a bann lapriyer sinser ek enn letid profon lor Parol Bondie nou pou kapav vinn pli pros ar Zeova. Kan nou fer sa, nou gagn lafors pou sirmont mem bann pli gro problem ki kapav ena. Amezir ki gran detres pe aprose, nou kapav atann ki nou fidelite anver Bondie ek anver so Rwayom pou pas par ankor pli boukou test. Kitfwa bann dimounn pou kontign boufonn nou. (2 Pier 3:3, 4) Enn bann rezon prinsipal kifer zot pou fer sa se parski nou pa pou soutenir okenn eleman ki ena dan lemond Satan. Alor, depi asterla mem nou bizin ranforsi nou fidelite pou ki nou reisi res fidel pandan gran detres.

14. (a) Ki sanzman pou ena konsernan bann frer ki diriz parti lorganizasion Zeova ki lor later? (b) Kifer nou pou bizin res fidel pandan sa moman-la?

¹⁴ Pandan gran detres, pou ena enn sanzman konsernan bann frer ki diriz parti lorganizasion Zeova ki lor later. Pou ariv enn moman kot tou bann Kretien ki ena lesperans pou al dan lesiel, me ki ankor lor later, pou mont dan lesiel pou partisip dan lager Armagedon. (Mat. 24:31; Rev. 2:26, 27) Savedir ki bann manb Komite Santral pou nepli avek nou lor later. Me selman, gran  lafoul pou res bien organize. Bann frer ki kalifie parmi bann lezot mouton, pou diriz travay ki pou fer lor later. Nou pou montre nou fidelite anver Zeova kan nou soutenir ek swiv bann linstriksion ki sa bann frer-la pou gagne ar Bondie. Pou gagn lavi sov nou pou bizin swiv zot bann linstriksion.

15. Kouma nou kapav ena plis landirans, ek kifer li inportan ki nou ena plis landirans depi asterla mem?

¹⁵ Landirans: Tem pou lasanble rezional an 2017 ti “Pa Bes Lebra!” Bann diskour ki ti ena pandan sa lasanble-la ti donn nou lafors ki nou bizin pou ki nou kapav andir bann leprev. Pou ki nou kapav andire, sa pa depann lor nou sitiasion. Okontrer, sa bann diskour-la ti montre nou ki nou bizin kont lor Zeova pou ki nou gagn landirans. (Rom. 12:12, NW) Fode zame nou bliye seki Zezi ti promet: “Dimoun ki persevere [“andire,” NW] ziska lafin pou sove.” (Mat. 24:13) Sa promes-la montre ki nou bizin res fidel malgre ninport ki leprev ki nou gagne. Sak difikilte ki nou andire azordi, ed nou pou vinn pli for avan ki gran detres koumanse.

16. Ki nou bizin fer pou ena kouraz, ek kouma nou kapav ena plis kouraz depi asterla mem?

¹⁶ Kouraz: Tem pou lasanble rezional an 2018 ti “Pran Kouraz!” Bann diskour ki ti ena dan sa lasanble-la ti ed nou pou rapel ki se pa par nou prop kapasite ki nou ena kouraz. Parey kouma nou bizin kont lor Zeova pou gagn landirans, nou bizin osi kont lor Zeova pou gagn vre kouraz. Kouma nou kapav aprann pou kont plis lor Zeova? Se kan nou lir so Parol toulezour ek kan nou reflesi kouma Zeova ti sap so pep dan lepase. (Ps. 68:20; 2 Pier 2:9) Kan bann nasion pou atak nou pandan gran detres, nou pou bizin ena kouraz ek fer Zeova konfians plis ki avan. (Ps. 112:7, 8; Ebre 13:6) Si azordi nou kont lor Zeova, nou pou ena kouraz ki nou bizin kan nou pou fer fas ar latak Gog. *

17. Kifer fode pa nou per Armagedon? (Get zimaz lor kouvertir.)

¹⁷ Parey kouma lartik avan finn montre, laplipar parmi nou finn viv pandan bann  dernie zour sa lemond-la. Me selman, nou ena osi posibilite pou travers gran detres. Lager Armagedon pou dernie kitsoz extraordiner ki pou ena avan lafin sa sistem-la. Selman, nou pena pou per. Kifer? Parski sa lager-la se lager Zeova. Nou, nou pa pou partisip dan sa lager-la. (Prov. 1:33; Eze. 38:18-20; Zaka. 14:3) Kan Zeova pou donn lord, Zezi Kris pou diriz sa lager-la. Avek li pou ena tou bann Kretien ki ena lesperans pou al dan lesiel ek plizir milye anz. Zot tou ansam, zot pou lager kont Satan, so bann demon, ek bann ki pe soutenir Satan lor later.​—Dan. 12:1; Rev. 6:2; 17:14.

18. (a) Ki promes Zeova inn fer? (b) Kouma Revelasion 7:9, 13-17 donn twa bann rezon pou ena konfians konsernan lavenir?

¹⁸ Zeova inn fer sa promes-la: “Okenn zarm ki forme kont twa pa pou reisi.” (Iza. 54:17) “Enn gran lafoul” bann fidel serviter Zeova “pou travers dan enn gran persekision [“gran detres,” NW]” vivan. Lerla zot pou kontign servi Zeova. (Lir Revelasion 7:9, 13-17.) Labib donn nou plizir rezon pou ena konfians konsernan lavenir. Nou kone ki “Zeova protez bann dimounn ki fidel.” (Ps. 31:23, NW) Tou bann ki kontan Zeova ek ki loue Li pou kontan kan Li pou tir tou foste ki’nn fane lor so nom ki sin.​—Eze. 38:23.

19. Ki zoli lesperans nou pe atann pou realize dan lavenir?

¹⁹ Reflesi lor seki ti pou ena dan 2 Timote 3:2-5 si li ti pe dekrir bann dimounn ki dan lemond nouvo. Enn lemond ki pa inflianse par Satan. (Get lankadre “ Lerla Bann Dimounn Pou . . . ”) Frer George Gangas, * ki ti enn manb Komite Santral, ti dir: “Lemond pou vremem extraordiner kan tou bann dimounn pou ador Zeova! Biento zot pou ena privilez pou viv dan lemond nouvo. Zot pou viv osi lontan ki Zeova. Nou pou viv pou touletan.” Nou vremem ena enn zoli lesperans!