PANDAN Deziem Lager Mondial, enn ofisie Nazi ti dir enn group Temwin Zeova: “Si zot pa al lager kont bann Franse ouswa bann Angle, nou pou touy zot tou!” Mem si sa bann solda Nazi la ti bien arme, nou bann frer ti res fidel ar Zeova. Zot ti ena boukou kouraz, pa vre! Sa lexanp-la montre nou seki bann Temwin Zeova panse lor lager: Nou pa partisip dan bann lager. Mem si akoz sa bann dimounn menas pou touy nou, nou pa pran par personn kan ena bann lager.

1. BANN SERVITER BONDIE TI FORM PARTI ENN SEL PEP

Dan lepase, Zeova ti swazir enn sel pep pou vinn So bann serviter: nasion Izrael. Li ti dir ki bann Izraelit ti so “dibien spesial parmi tou bann pep.” (Ex. 19:5) Bondie ti osi donn zot enn landrwa pou reste. Alor, kan Bondie ti donn zot lord pou al lager kont bann lezot pep, zot pa ti pe lager ek touy bann lezot serviter Zeova. *

Azordi, bann serviter Bondie sorti dan tou “bann nasion, tou bann tribi, bann pep ek langaz.” (Rev. 7:9) Si bann serviter Bondie ti partisip dan bann lager, zot ti pou bizin lager, ek mem touy bann lezot serviter Zeova.

 2. SE ZEOVA KI TI DONN BANN IZRAELIT LORD POU AL LAGER

Dan lepase, se Zeova ki ti deside kan ek kifer bann Izraelit ti bizin al lager. Par exanp, Bondie ti donn bann Izraelit lord pou detrir bann Kananeen, parski bann-la ti pe ador bann demon, zot ti bien imoral, ek zot ti sakrifie bann zanfan. Zeova ti dir zot detrir sa pep-la parski bann-la ti pe res dan Later Promiz, ek zot ti kapav inflians bann Izraelit pou fer bann move kitsoz. (Lev. 18:24, 25) Kan bann Izraelit ti res dan Later Promiz, parfwa Zeova ti permet ki zot al lager kont bann lennmi ki ti pe atak zot. (2 Sam. 5:17-25) Selman, Zeova zame pa ti les bann Izraelit deside par zotmem kan zot ti bizin al lager. Ek kan zot ti fer sa, souvan zot ti gagn bann maler.​—Nonb 14:41-45; 2 Kro. 35:20-24.

Azordi, Zeova pa dir personn al lager. Kan bann pei al lager, se pou zot prop lintere, pa pou Bondie. Zot koumans bann lager parski zot anvi agrandi zot teritwar, gagn pli boukou larzan, ouswa pou bann rezon politik. Me ki nou kapav dir lor bann dimounn ki dir ki zot pe lager pou Bondie ek pou defann zot bann krwayans, ouswa pou touy bann lennmi Bondie? Zeova pou protez so bann vre serviter ek detrir so bann lennmi dan enn lager ki pou ena dan lavenir: lager Armagedon. (Rev. 16:14, 16) Dan sa lager-la, se zis bann kreatir spiritiel ki pou form parti dan larme Zeova. Pa pou ena okenn imin ki pou form parti dan larme Zeova.​—Rev. 19:11-15.

3. BANN IZRAELIT PA TI TOUY BANN DIMOUNN KI TI ENA LAFWA AN ZEOVA

Dan lepase, bann Izraelit souvan ti montre mizerikord anver bann dimounn ki ti ena lafwa an Zeova ek zot ti touy zis bann dimounn ki Zeova ti demann zot pou touye. Anou get de lexanp. Mem si Zeova ti donn zot lord pou detrir Zeriko, bann Izraelit pa ti touy Raab ek so fami parski zot  ti ena lafwa an Zeova. (Zozwe 2:9-16; 6:16, 17) Apre sa, bann Izraelit pa ti touy bann Gabaonit parski zot ti ena respe pou Bondie.​—Zozwe 9:3-9, 17-19.

Azordi, dan bann lager, bann solda pa ezite pou touy bann dimounn ki ena lafwa. Ek parfwa, zot mem touy bann dimounn ki pa bann solda.

4. KAN BANN IZRAELIT TI AL LAGER, ZOT TI BIZIN SWIV BANN INSTRIKSION ZEOVA

Dan lepase, Zeova ti donn bann Izraelit bann instriksion kan zot ti al lager. Par exanp, Bondie parfwa ti demann bann Izraelit pou explik bann lezot pep ‘bann kondision pou ki ena lape.’ (Det. 20:10) Zeova ti osi dir bann solda Izraelit ki zot ti bizin res prop ek ki zot ti bizin swiv So bann prinsip moral. (Det. 23:9-14) Souvan, kan bann lezot pep ti atak enn landrwa, zot ti viol bann madam ki ti res laba. Me Zeova ti interdi bann Izraelit pou fer sa. Okontrer, si zot ti anvi marye ar enn madam ki zot ti amene kouma prizonie, zot ti bizin atann enn mwa pou ki zot kapav fer sa.​—Det. 21:10-13.

Azordi, boukou pei finn sign bann lakor pou ki pena lager. Me mem si zot anvi protez zot bann sitwayen, bien souvan zot pa respekte sa bann lakor-la.

5. BONDIE TI LAGER POU SO PEP

Dan lepase, Zeova ti lager pou bann Izraelit, ek souvan Li ti fer bann mirak pou zot gagn laviktwar. Par exanp, kouma Zeova ti ed bann Izraelit pou gagn laviktwar lor lavil Zeriko? Zeova ti dir bann Izraelit kriye bien for. Lerla, miray Zeriko ti grene ek zot ti kapav rant dan lavil pli fasilman. (Zozwe 6:20) Ek kouma zot ti gagn laviktwar kont bann Amorit? Zeova ti fer lagrel tom lor zot. An realite, mem si bann Izraelit ti touy boukou solda, lagrel ti touy pli boukou solda.​—Zozwe 10:6-11.

BANN VRE KRETIEN ESEY FER LAPE AR LEZOT

Kouma nou’nn trouve, bann Kretien bien diferan ar bann Izraelit. Selman, se pa zis pou sa bann rezon-la ki nou pa lager. Ena lezot rezon osi. Par exanp, Bondie ti predir ki dan bann dernie zour, so bann serviter ti pou “nepli aprann lager.” Alor, zot pa ti pou al lager. (Iza. 2:2-4) Anplis, Zezi ti dir ki so bann disip “pa fer parti dan lemond,” savedir ki zot pa pran par personn kan ena bann lager.​—Zan 15:19, NW.

Zezi ti osi ankouraz so bann disip pou fer plis ki sa. Li’nn donn zot lord pou rezet lakoler, rankinn, ek lager. (Mat. 5:21, 22) Li’nn osi dir zot ki zot bizin fer lape ek kontan zot bann lennmi.​—Mat. 5:9, 44.

Kouma nou kapav fer sa? Nou kone ki nou bizin pa lager, me eski parfwa nou konsider enn kikenn dan lasanble kouma nou lennmi? Anou kontign fer zefor pou rezet bann santiman koumsa.​—Zak 4:1, 11.

Nou pa pou partisip dan bann lager sa lemond-la. Okontrer, nou fer zefor pou ki ena lamour ek lape ant nou. (Zan 13:34, 35) Anou bien determine pou gard nou netralite, ek anou kontign atann zour kot Zeova pou tir tou bann lager.​—Ps. 46:9.