LARTIK LETID 44
Gard To Lesperans Bien For
“Segner, tomem mo lespwar.”—PS. 71:5.
KANTIK 144 Fixe To Lizie lor Pri-La!
REZIME *
1. Ki lesperans Zeova inn donn nou?
ZEOVA inn donn nou enn lesperans extraordiner: posibilite pou viv pou touletan. Sertin ena lespwar pou viv pou touletan dan lesiel kouma bann lespri ki imortel. (1 Kor. 15:50, 53) Me laplipar ena lespwar pou viv ere pou touletan lor later, ek zot pou ena enn bon lasante. (Rev. 21:3, 4) Me ninport ki lesperans nou ena, sa lesperans-la ena boukou valer pou nou.
2. Kifer nou lespwar se enn kitsoz ki sir?
2 Dan Labib, mo “lespwar” vedir “atann ki bann bon kitsoz arive.” Nou lespwar pou lavenir li sir, parski se Zeova ki donn nou sa lespwar-la. (Rom. 15:13) Nou konn bann promes ki Li’nn fer nou, ek nou kone ki Li touletan tini so bann promes. (Nonb 23:19) Nou sir ki Zeova ena dezir ek kapasite pou realiz tou seki Li dir. Alor, nou lesperans se pa enn kitsoz ki sorti dan nou limazinasion; se enn kitsoz ki nou sir li vre.
3. Ki nou pou examine dan sa lartik-la? (Psom 71:5)
3 Nou Papa Zeova bien kontan nou, ek Li anvi ki nou fer Li konfians. (Lir Psom 71:5.) Kan nou lespwar an Zeova bien for, nou pou reisi andir nou bann leprev. Nou pou osi ena kouraz ek lazwa, ninport ki arive. Anou gete kouma nou lesperans kapav protez nou. Pou nou fer sa, nou pou gete kouma nou lesperans li kouma enn lank ek enn elmet. Apre sa, nou pou gete kouma nou kapav fer nou lesperans vinn pli for.
NOU LESPERANS LI KOUMA ENN LANK
4. Kifer nou lesperans li kouma enn lank? (Ebre 6:19)
4 Dan let ki li ti ekrir bann Ebre, lapot Pol ti konpar nou lesperans ar enn lank. (Lir Ebre 6:19.) Pol souvan ti vwayaz lor lamer, alor li ti kone ki enn lank kapav anpes enn bato derive. Enn fwa, li ti lor enn bato kan ti ena enn gro tanpet. Pandan sa tanpet-la, li ti trouv bann marin zet bann lank dan delo pou ki bato-la pa al kraz lor ros. (Zist. 27:29, 39-41) Parey kouma enn lank fer enn bato res stab, nou lesperans fer nou res stab, pou ki nou pa derive ek al lwin ar Zeova kan nou gagn bann difikilte. Kan nou gagn bann leprev, nou lesperans ed nou pou res kalm, parski nou kone ki bann kitsoz pou ameliore apre. Selman, pa bliye ki Zezi ti dir ki nou ti pou gagn bann persekision. (Zan 15:20) Alor, kan nou reflesi lor bann promes Zeova konsernan lavenir, sa pou ed nou pou kontign nou lekours Kretien.
5. Kouma lespwar ti ed Zezi pou res kalm, mem si li ti kone ki li ti pou bizin soufer ek mor?
5 Anou gete kouma lesperans ti ed Zezi pou res fidel ar Zeova, mem si li ti kone ki li ti pou bizin soufer ek mor. Dan tou so bann leprev, Zezi ti res kalm ek li ti ena lape. Lapantkot lane 33 Nou Lepok, lapot Pier ti mansionn enn profesi liv Psom pou explike seki Zezi ti resanti: “Mo lekor pou repoz dan lesperans parski to pa pou abandonn mwa dan landrwa kot bann mor ale to pa pou les to serviter pouri dan tonbo. . . . To prezans ranpli mwa ar lazwa.” (Zist. 2:25-28; Ps. 16:8-11) Mem si Zezi ti kone ki li ti pou mor, li ti ena lespwar ki Bondie ti pou resisit li, ek ki li ti pou kapav retrouv so Papa ki dan lesiel.—Ebre 12:2, 3, NW.
6. Ki kitsoz enn frer ti dir konsernan lespwar?
6 Nou lesperans inn ed boukou parmi nou bann frer ek ser pou andire. Anou get lexanp Leonard Chinn, enn frer ki res Langleter. Pandan Premie Lager Mondial, li ti res fidel ar Zeova ek li ti refiz fer servis militer. Akoz sa, li ti al dan prizon. Pandan de mwa, li ti res an izolman, ek apre sa, bann-la ti fors li pou fer bann travay bien dir. Frer Chinn dir: “Seki mo’nn viv, inn ed mwa pou konpran ki nou bien bizin ena lespwar pou ki nou reisi andire. Nou ena lexanp Zezi, bann zapot, bann profet, ek nou ena bann promes ki ena dan Labib. Tousala donn nou enn gran lespwar pou lavenir ek donn nou lafors pou andire.” Lespwar ti kouma enn lank pou Leonard, ek li kapav enn lank pou nou osi.
7. Kouma bann leprev fer nou lesperans vinn pli for? (Romin 5:3-5; Zak 1:12)
7 Kan nou andir bann leprev ek nou trouve kouma Zeova ed nou, sa montre nou ki nou ena so faver. Lerla, nou lesperans vinn pli for. (Lir Romin 5:3-5, NW; * Zak 1:12.) Savedir ki aster-la, nou lesperans bizin pli for ki kan nou ti fek konn laverite. Satan anvi ki nou dekouraze akoz nou bann problem. Me avek led Zeova, nou kapav sirmont tou nou bann problem.
NOU LESPERANS LI KOUMA ENN ELMET
8. Kifer nou lesperans li kouma enn elmet? (1 Tesalonisien 5:8)
8 Labib konpar nou lesperans ar enn elmet osi. (Lir 1 Tesalonisien 5:8.) Enn solda met enn elmet pou protez so latet kont latak so bann lennmi. Dan nou lager kont Satan, nou bizin protez nou lespri kont bann latak Satan. Satan servi diferan kitsoz pou esey tant nou ek sali nou lespri. Parey kouma enn elmet protez latet enn solda, nou lesperans protez nou lespri pou ki nou kapav res fidel ar Zeova.
9. Ki arive kan bann dimounn pena okenn lespwar?
9 Kan nou gard nou lesperans bien for, setadir kan nou ena konfians dan bann promes Zeova, sa kapav ed nou pou pran bann bon desizion. Parkont, si nou konfians dan bann promes Zeova diminie, bann move panse kapav rant dan nou lespri, ek akoz sa, kitfwa nou kapav perdi posibilite pou viv pou touletan. Anou get lexanp bann Kretien ki ti res dan lavil Korint. Sertin parmi zot ti nepli ena lafwa dan lesperans rezireksion. (1 Kor. 15:12) Pol ti dir zot ki bann dimounn ki pa krwar dan rezireksion, zot viv zis pou satisfer zot prop dezir. (1 Kor. 15:32) Azordi, boukou dimounn ki pa krwar dan bann promes Bondie, zot fer tou seki zot kapav pou satisfer zot bann dezir pou ki zot ere aster-la mem. Parkont, nou nou ena konfians dan bann promes Bondie. Nou lesperans li kouma enn elmet ki protez nou lespri, ek li ed nou pou pa pans zis noumem, parski sa kapav gat nou lamitie ar Zeova.—1 Kor. 15:33, 34.
10. Kouma nou lesperans kapav protez nou kont bann fos rezonnman?
10 Nou lesperans kapav osi protez nou kont bann fos rezonnman, kouma par exanp si nou panse ki zame nou pa pou kapav fer Zeova plezir. Sertin kapav dir zotmem: ‘Zame mo pa pou form parti bann ki pou gagn lavi eternel. Mo pa ase bon. Zame mo pa pou kapav fer seki Zeova demann mwa pou fer.’ Kan Elifaz ti pe esey rekonfort Zob, li ti servi sa kalite rezonnman-la. Li ti dir Zob: “Eski enn zom kapav prop devan Bondie? . . . Gete! Bondie pena konfians dan so bann anz, ek mem lesiel pa prop devan so lizie.” (Zob 15:14, 15) Sa ti enn gro manti! Pa bliye ki se Satan ki deryer sa kalite rezonnman-la. Li kone ki si nou kontign pans koumsa, nou pou perdi konfians dan bann promes Zeova. Alor, anou rezet sa bann mansonz-la ek anou res konsantre lor bann promes Zeova. Fode zame to doute ki Zeova anvi ki to viv pou touletan ek ki Li pou ed twa pou fer sa!—1 Tim. 2:3, 4.
GARD TO LESPERANS BIEN FOR
11. Pandan ki nou pe atann ki Zeova realiz so bann promes, kifer nou bizin ena pasians?
11 Li pa touletan fasil pou nou gard nou lesperans bien for. Kifer? Parski parfwa, mem si nou kone ki Zeova pou realiz so bann promes, nou kapav perdi pasians. Selman, Zeova Li eternel, ek Li pa trouv letan parey kouma nou. Seki paret long pou nou, bien kourt pou Li. (2 Pier 3:8, 9) Nou sir ki Zeova pou realiz so bann promes, ek Li kone ki meyer moman pou fer sa. Selman, kitfwa Li pa pou fer sa dan ler ki nou nou anvi. Pandan ki nou pe atann ki Zeova realiz so bann promes, ki kitsoz kapav ed nou pou gard nou lesperans bien for?—Zak 5:7, 8.
12. Dapre Ebre 11:1, 6, kifer nou bizin ena lafwa pou ki nou ena lesperans?
12 Nou pou kapav gard nou lesperans bien for si nou res pros ar Zeova, sa Kikenn ki’nn donn nou sa lesperans-la. Ek pou ki nou ena sa lesperans-la, nou bizin ena lafwa ki Zeova existe ek ki Li “rekonpans dimoun ki rod li.” (Lir Ebre 11:1, 6.) Plis Zeova Li reel pou nou, plis nou pou ena konfians ki Li pou realiz so bann promes. Anou gete seki nou kapav fer pou ki nou vinn pli pros ar Zeova ek pou ki nou gard nou lesperans bien for.
Kan nou priye Zeova ek reflesi lor seki nou lir dan Labib, sa pou ed nou pou gard nou lesperans bien for (Get paragraf 13-15) *
13. Kouma nou kapav vinn pros ar Zeova?
13 Priye Zeova ek lir Labib. Mem si nou pa kapav trouv Zeova, nou kapav vinn pros ar Li. Nou kapav koz ar Zeova kan nou priye Li, ek nou sir ki Li pou ekout nou. (Zer. 29:11, 12) Nou kapav ekout Zeova kan nou lir so Parol ek kan nou reflesi lor la. Lerla, kan nou trouve kouma Zeova inn pran swin so bann fidel serviter dan lepase, nou lesperans pou vinn pli for. Tou seki’nn ekrir dan Labib, inn “ekrir pou nou linstriksion, pouki nou gagn lesperans par landirans ek rekonfor ki [Lekritir] donn nou.”—Rom. 15:4.
14. Kifer nou bizin reflesi lor seki Zeova inn fer pou lezot?
14 Reflesi kouma Zeova inn tini so bann promes. Anou get lexanp Abraam ek Sara. Zot ti tro vie pou gagn zanfan. Selman, Zeova ti promet zot ki zot ti pou gagn enn zanfan, ek vremem sa ti arive! (Zen. 18:10) Ki ti reaksion Abraam? Labib dir: “Li finn kontign ena lafwa e li finn vinn papa enn kantite nasion.” (Rom. 4:18) Mem si Abraam pa ti kone kouma Zeova ti pou realiz So promes, li ti sir ki Zeova ti pou fer li. Sa zom fidel la ti ena rezon pou fer Zeova konfians! (Rom. 4:19-21) Bann zistwar koumsa montre nou ki nou kapav sir ki Zeova touletan realiz so bann promes, mem si pou nou sa kapav paret inposib.
15. Kifer nou bizin reflesi lor seki Zeova inn fer pou nou?
15 Reflesi lor seki Zeova inn fer pou twa. Reflesi lor bann bienfe ki to pe gagne gras-a bann promes ki ena dan Parol Bondie. Par exanp, Zezi inn promet ki Zeova pou donn twa seki to bizin pou viv. (Mat. 6:32, 33) Li’nn promet osi ki Zeova pou donn twa So lespri sin kan to demann Li. (Lik 11:13) Zeova inn tini sa bann promes-la. To kapav osi reflesi lor bann promes ki pe realize pou twa personelman. Par exanp, Zeova inn promet twa ki Li pou pardonn twa ek rekonfort twa. Li’nn promet twa osi ki Li pou donn twa seki to bizin pou ki to res pros ar Li. (Mat. 6:14; 24:45; 2 Kor. 1:3) Kan to reflesi lor bann kitsoz ki Zeova inn fini fer pou twa, sa pou fer twa ena plis konfians dan bann promes ki Li’nn fer twa konsernan lavenir.
MONTRE LAZWA DAN LESPERANS
16. Kifer nou lesperans se enn zoli kado?
16 Lespwar pou viv pou touletan se enn zoli kado ki Zeova inn donn nou. Nou atann avek inpasians ki sa promes-la realize, ek nou kapav sir ki li pou realize! Nou lesperans li kouma enn lank, parski li ed nou pou res kalm kan nou bizin andir bann leprev ek bann persekision, mem si nou lavi an danze. Nou lesperans li kouma enn elmet, parski li protez nou lespri pou ki nou rezet seki pa bon ek ki nou kontign fer seki bon. Nou lesperans ed nou pou vinn pli pros ar Zeova ek li montre nou ki kantite Li kontan nou. Wi, nou gagn bann bienfe kan nou kontign gard nou lesperans bien for!
17. Kifer nou lesperans rann nou zwaye?
17 Dan let ki li ti ekrir bann Romin, lapot Pol ankouraz nou pou “montre lazwa dan lesperans.” (Rom. 12:12) Pol ti zwaye parski li ti sir ki, si li ti res fidel, li ti pou gagn lavi eternel dan lesiel. Nou osi nou kapav zwaye dan nou lesperans parski nou sir ki Zeova pou tini so bann promes. Enn ekrivin Psom ti dir: “Bienere dimounn ki . . . met tou lespwar dan LESEGNER so Bondie, . . . ki gard so promes avek fidelite.”—Ps. 146:5, 6.
KANTIK 139 Mazinn Twa dan Lemond Nouvo
^ Zeova inn donn nou enn zoli lespwar pou lavenir. Sa lespwar-la ankouraz nou ek li ed nou pou pa res konsantre lor bann problem ki nou ena. Li donn nou lafors pou res fidel ar Zeova ek pou fer fas ar ninport ki difikilte. Ek li kapav protez nou kont bann fos lide ki kapav sali nou lespri. Kouma nou pou trouve dan sa lartik-la, tousala se bann bon rezon pou ki nou gard nou lesperans bien for.
^ Romin 5:3-5: “3 Ek pa zis sa, me nou bizin zwaye kan nou pe pas dan bann leprev, parski nou kone ki leprev fer gagn landirans, 4 ek landirans fer gagn faver Bondie, ek faver Bondie fer gagn lesperans, 5 ek lesperans pa pou fer nou gagn desepsion; parski finn ranpli nou leker avek lamour Bondie atraver lespri sin ki nou’nn gagne.”
^ DESKRIPSION ZIMAZ: Parey kouma enn elmet protez latet enn solda ek parey kouma enn lank gard enn bato stab, nou lesperans protez nou lespri ek ed nou pou res kalm kan nou gagn bann leprev. Enn ser pe priye Zeova. Enn frer pe reflesi lor promes ki Zeova ti fer Abraam. Enn lot frer pe reflesi lor bann benediksion ki Zeova inn donn li.
