1. Kifer nou bizin direksion Bondie pou ki nou ere?

 KAN enn kikenn vremem ere, li pa zis resanti enn lazwa ki tanporer. Li resanti sa lazwa-la toutlong so lavi. Kouma enn kikenn kapav vremem ere? Zezi ti explike dan so Sermon lor Montagn: “Ere bann ki rekonet ki zot bizin direksion Bondie.” (Mat. 5:3, NW) Zezi ti kone ki bann imin inn kree avek enn gran dezir pou aprann konn zot Kreater, Zeova, ek pou ador Li. Ek parski Zeova Li enn “Bondie ere,” bann ki ador Li, zot osi zot kapav ere.​—1 Tim. 1:11, NW.

2-3. (a) Dapre Zezi, kisann-la ankor kapav ere? (b) Ki nou pou examine dan sa lartik-la, ek kifer nou bizin fer sa?

² Me eski tou kitsoz bizin pas bien dan nou lavi pou ki nou ere? Non. Dan so Sermon lor Montagn, Zezi inn dir enn kitsoz ki kapav etonn nou. Li ti dir ki mem bann “ki andey,” ouswa ki tris akoz bann pese ki zot inn fer, ouswa akoz bann sitiasion difisil ki zot ena dan zot lavi, zot osi zot kapav ere. Zezi ti dir mem kitsoz pou bann dimounn ki lezot ti “pe persekite akoz zot fer dibien.” Li ti dir sa osi pou bann dimounn ki lezot ti pe “insilte” parski zot so bann disip. (Mat. 5:4, 10, 11) Me kouma eski nou kapav vremem ere dan bann sitiasion koumsa?

³ Zezi ti ansegn so bann disip ki enn kikenn kapav vremem ere, pa parski tou pe pas bien dan so lavi, me parski li pe rod direksion Bondie ek ki li pe fer zefor pou vinn pros ar Li. (Zak 4:8) Kouma nou kapav fer sa? Dan sa lartik-la, nou pou examinn trwa kitsoz ki pou ed nou pou nou vremem ere.

4. Ki premie kitsoz nou bizin fer pou nou vremem ere? (Psom 1:1-3)

⁴ 1. Pou nou vremem ere, nou bizin lir ek etidie Parol Bondie. Zezi ti konpar Parol Bondie ar manze. Bann imin ek bann zanimo toulede bizin manze pou viv. Me se zis bann imin ki kapav lir Parol Bondie, ek zot bizin fer sa. Se pou sa rezon-la ki Zezi ti dir: “Dimoun pa viv zis ar dipin me ar tou bann parol ki sorti dan labous Bondie.” (Mat. 4:4) Akoz sa, nou bizin pa les enn sel zour pase san ki nou lir ek etidie Parol Bondie, setadir Labib. Enn ekrivin Psom ti dir: “Bienere sa dimounn ki . . . gagn plezir dan lalwa LESEGNER, e lanwit-lizour li medit lor so lansegnman.”​—Lir Psom 1:1-3.

5-6. (a) Ki nou kapav aprann dan Labib? (b) Kan nou lir Labib, kouma sa kapav ed nou?

⁵ Dan Labib, Zeova inn donn nou bann linformasion ki inportan pou ki nou ere. Li montre nou ki proze Li ena pou nou. Li montre nou kouma nou kapav vinn pros ar Li, ek kouma nou kapav gagn pardon nou bann pese. Ek Li montre nou ki nou ena enn zoli lesperans pou lavenir. (Zer. 29:11) Nou aprann sa bann verite-la kan nou etidie Labib, ek sa rann nou zwaye!

⁶ Dan Labib, nou gagn osi bann konsey bien pratik pou nou lavi toulezour. Kan nou swiv sa bann konsey-la, nou kapav vremem ere. Kan to santi twa dekouraze akoz bann problem ki  to ena, pas plis letan pou lir Labib ek pou reflesi lor la. Zezi ti dir: ‘Bienere seki ekout laparol Bondie e obeir li!’​—Lik 11:28.

7. Kan to lir Labib, ki to kapav fer pou to gagn plis bienfe?

⁷ Kan to lir Labib, pran letan pou apresie seki to lir. Anou pran enn lexanp. Fer koumadir enn kikenn inn kwi enn manze ki to bien kontan manze. Me parski to prese, ouswa parski to pe konsantre lor enn lot kitsoz, to manze vit-vit ek to pa vremem apresie sak bouse. Apre ki to’nn fini manze, to rann twa kont ki to’nn manz tro vit, ek to sagrin parski to pa’nn pran letan pou apresie sak bouse. Eski to’nn deza lir Labib telman vit, ki to pa’nn apresie mesaz ki ena ladan? Pran letan pou apresie to lektir Labib; esey trouv bann zimaz ek tann lavwa bann dimounn-la, ek reflesi lor seki to’nn lir. Kan to fer sa, to pou plis ere.

8. Kouma “lesklav fidel ek saz” pe asim bien so responsabilite? (Get not.)

⁸ Zezi inn etabli “lesklav fidel ek saz” pou donn nou nou manze spiritiel dan ler ki bizin, ek zot vremem donn nou tou seki nou bizin. * (Mat. 24:45, NW) Labib se ingredian prinsipal ki lesklav fidel ek saz servi pou prepar manze spiritiel. (1 Tes. 2:13) Sa manze-la ed nou pou konn fason panse Zeova ki ena dan Labib. Se pou sa rezon-la ki nou lir bann magazinn Latour Degard ek Leve! ek bann lartik ki ena lor jw.org. Nou prepar osi nou bann renion lasemenn ek nou bann renion wikenn, ek nou get Program Televizion JW ki sorti sak mwa. Kan nou fer nou maximum pou nouri nou bien lor plan spiritiel, lerla nou pou kapav fer deziem kitsoz ki pou fer nou ere.

9. Ki deziem kitsoz nou bizin fer pou nou vremem ere?

⁹ 2. Pou nou vremem ere, nou bizin obeir bann prinsip Zeova. Enn ekrivin Psom ti dir: “Bienere tou dimounn ki ena respe pou LESEGNER, bann ki swiv sime li finn trase.” (Ps. 128:1) Kan nou ena respe pou Zeova, nou pa pou fer nanye ki pou kas so leker. (Prov. 16:6) Nou pou kontign fer zefor pou obeir bann prinsip Zeova ki ena dan Labib, konsernan seki bon ek seki pa bon. (2 Kor. 7:1) Nou pou ere si nou fer bann kitsoz ki Zeova kontan, ek si nou rezet bann kitsoz ki Li deteste.​—Ps. 37:27; 97:10; Rom. 12:9.

10. Dapre Romin 12:2, ki responsabilite nou ena?

¹⁰ Lir Romin 12:2. Enn kikenn kapav kone ki Zeova ena drwa pou etabli bann prinsip konsernan seki bon ek seki pa bon, me li bizin osi obeir sa bann prinsip-la. Par exanp, enn kikenn kapav kone ki gouvernman ena drwa pou fixe bann limit vites lor larout. Me kitfwa li pa pou dakor pou obeir sa bann limit-la. Lerla, li pou roul pli vit ki li sipoze roule. Alor, nou konpran ki se par nou kondwit ki nou montre ki meyer fason viv, se kan nou obeir bann prinsip Zeova. (Prov. 12:28) David ti pans koumsa. Se akoz sa ki li ti dir Zeova: “To toultan montre mwa bon sime lavi; kan to la, mo lavi ranpli ar lazwa;  dan to prezans ena boner pou touzour.”​—Ps. 16:11.

11-12. (a) Kan nou trakase ouswa dekouraze, ar ki kitsoz nou bizin fer bien atansion? (b) Kouma Filipien 4:8 kapav ed nou pou swazir nou bann divertisman?

¹¹ Kan nou trakase ouswa dekouraze, kitfwa nou pou rod enn sime sorti. Sa li normal! Selman, nou bizin fer bien atansion ki nou pa fer bann kitsoz ki Zeova deteste.​—Efe. 5:10-12, 15-17.

¹² Dan let ki li ti ekrir bann Filipien, lapot Pol ti ankouraz bann Kretien pou kontign fer “tou seki vre, onorab, zis, [ek] pir.” (Lir Filipien 4:8.) Mem si Pol pa ti pe koz lor bann divertisman, nou bizin reflesi lor seki li’nn ekrir kan nou swazir nou bann divertisman. Esey fer sa: Dan sa verse-la, ant mo “tou” ek “seki,” azout bann mo kouma “sante,” “fim,” “liv,” ouswa “video game.” Lerla, sa pou ed twa pou kone ki kitsoz Bondie aksepte, ek ki kitsoz Li pa aksepte. Nou anvi fer nou maximum pou obeir tou bann prinsip Zeova. (Ps. 119:1-3) Lerla, avek enn bon konsians, nou pou kapav fer trwaziem kitsoz ki pou fer nou vremem ere.​—Zist. 23:1.

13. Ki trwaziem kitsoz nou bizin fer pou nou vremem ere? (Zan 4:23, 24)

¹³ 3. Nou bizin fer nou maximum pou ki nou ladorasion pou Zeova pas an premie dan nou lavi. Zeova Li nou Kreater, alor Li merite ki nou ador Li. (Rev. 4:11; 14:6, 7) Kitsoz pli inportan dan nou lavi, se ki nou ador Zeova dan fason ki Li anvi nou ador Li, setadir “dan Lespri ek dan laverite.” (Lir Zan 4:23, 24.) Kan nou ador Zeova, nou anvi ki so lespri sin diriz nou, pou ki nou kapav ador Li an-akor ar bann verite ki ena dan Labib. Nou ladorasion pou Zeova bizin pas an premie dan nou lavi, mem si nou viv dan enn pei kot nou laktivite lor restriksion ouswa interdi. Azordi, ena plis ki 100 frer ek ser ki dan prizon zis parski zot bann Temwin Zeova. * Kanmem sa, zot ere ek zot fer zot maximum pou priye Zeova, pou etidie Labib, ek pou koz lor nou Bondie ek so Rwayom ar lezot. Kan bann dimounn kritik nou ouswa persekit nou, nou ere parski nou kone ki Zeova ar nou ek ki Li pou rekonpans nou.​—Zak 1:12; 1 Pier 4:14.

14. Ki ti ariv enn zenn frer dan Tajikistan, ek kifer?

¹⁴ Sertin parmi nou bann frer ek ser pe pas par bann sitiasion bien difisil. Me kanmem sa, zot vremem ere, parski zot inn fer sa trwa kitsoz ki mansione dan sa lartik-la. Anou pran lexanp Jovidon Bobojonov, ki ena 19 an ek ki res Tajikistan. Li ti refiz fer servis militer. Le 4 Oktob 2019, bann dimounn ti tir li dan so lakaz, zot ti tret li kouma enn kriminel, ek zot ti met li dan prizon pandan plizir mwa. Bann media plizir pei ti koz lor sa linzistis-la. Zot ti dir ki bann-la ti bat li pou met presion lor li, pou ki li fer serman pou servi so pei kouma solda ek pou ki li met enn iniform lor li. Apre sa, lakour ti kondann li ek ti avoy li dan enn kan travay, ziska ki prezidan sa  pei-la pardonn li ek donn lord pou larg li. Malgre tou sa leprev-la, Jovidon ti res fidel ar Zeova ek li ti gard so lazwa. Kouma li’nn reisi fer sa? Li’nn reisi fer sa parski li’nn kontign rod direksion Bondie.

15. Kan li ti dan prizon, kouma Jovidon ti lir ek etidie Labib?

¹⁵ Kan li ti dan prizon, Jovidon ti kontign lir ek etidie Labib, mem si li pa ti ena Labib ek okenn piblikasion ar li. Kouma li ti fer sa? Kan bann frer ek ser ti amenn manze pou li, zot ti ekrir text sak zour lor bann sak manze. Se koumsa ki li ti reisi lir Labib ek reflesi lor la toulezour. Kan li ti sorti dan prizon, Jovidon ti donn enn zoli konsey bann ki pa ti ankor gagn bann leprev. Li ti dir zot: “Tanki zot lib, li bien inportan ki zot fer zot maximum pou ogmant zot konesans lor Zeova. Pou fer sa, lir Labib ek bann piblikasion.”

16. Lor ki kitsoz Jovidon ti res konsantre?

¹⁶ Nou frer ti obeir bann prinsip Zeova. Olie ki li ena bann move panse ek ki li fer bann move kitsoz, Jovidon ti res konsantre lor Zeova ek lor bann kitsoz ki ena valer pou Li. Jovidon ti pran letan  pou reflesi lor bann kitsoz ki Zeova ti kree. Toule gramatin, kan li ti leve, li ti tann bann zwazo sante. Ek aswar, li ti admir lalinn ek bann zetwal. Jovidon dir: “Sa bann kado Zeova la, ti ankouraz mwa ek ti rann mwa ere.” Kan nou rekonesan anver Zeova pou tou bann kitsoz fizik ek spiritiel ki Li donn nou, sa rann nou ere. Anplis, sa lazwa-la kapav ed nou pou andire.

17. Kouma 1 Pier 1:6, 7 kapav ed enn kikenn ki dan mem sitiasion ki Jovidon?

¹⁷ Jovidon ti osi fer so ladorasion pou Zeova pas an premie. Li ti kone ki li bien inportan ki li res fidel ar Zeova. Zezi ti dir: “To pou prostern twa devan Lesegner to Bondie, e to pou ador li tousel.” (Lik 4:8) Bann solda ti anvi ki Jovidon abandonn so relizion. Me olie sa, Jovidon ti sipliy Zeova toulezour ek toule aswar, pou ki Zeova ed li pou pa bes lebra, pou ki li kapav kontign res fidel. Mem si bann solda ti maltret Jovidon ek ti bat li, li ti res fidel ar Zeova. Azordi, Jovidon ere parski tou sa bann leprev-la inn fer so lafwa vinn pli for.​—Lir 1 Pier 1:6, 7.

18. Kouma nou kapav gard nou lazwa?

¹⁸ Zeova kone seki nou bizin pou ki nou vremem ere. Si nou fer sa trwa kitsoz ki nou’nn gete dan sa lartik-la, nou pou gard nou lazwa mem kan nou gagn bann difikilte. Lerla, nou osi nou pou kapav dir: “Bienere pep ki ena LESEGNER [“Zeova,” NW] pou Bondie.”​—Ps. 144:15.