Sa lane-la, nou lorganizasion ti fer bann sanzman pou ranforsi linite bann Etidian Labib. Latour Degard ti koumans pibliye bann komanter ki ti explik bann verse Labib, ek zot ti examinn sa sak semenn dan Renion Lapriyer ek Louanz. Bann Etidian Labib ti osi inprim enn kalandriye kot ti ena bann verse ki zot ti pou examine dan renion sak semenn. Lor sa kalandriye-la, ti osi ena bann kantik ki zot ti kapav sante sak zour pandan zot letid personel, ouswa zot ladorasion an fami.

Dan zot bann renion, bann Etidian Labib ti fer bann “temwaniaz.” Dan sa bann temwaniaz-la, zot ti kapav rakont enn kitsoz ki ti ariv zot dan predikasion, zot ti kapav loue Zeova, sant enn kantik, ouswa mem fer enn lapriyer. Eva Barney, ti ena 15 an kan li ti pran batem an 1923. Li dir: “Si to ti anvi fer enn temwaniaz, to ti pou bizin deboute ek koumans dir enn kitsoz kouma, ‘Mo anvi remersie Lesegner pou tou bann bon kitsoz ki li’nn fer pou mwa.’” Sertin frer ti kontan rann temwaniaz. Ser Barney dir: “Frer Godwin ti enn vie frer ek li ti ena boukou kitsoz pou remersie Lesegner. Selman, kan li ti pe koumans koz tro boukou ek ki so madam ti trouve ki sa ti pe koumans agas prezidan renion-la, so madam ti ris-ris so palto pou ki li asize.”

Enn fwa par mwa, sak lasanble ti fer enn Renion Lapriyer ek Louanz spesial. Latour Degard 1^e Avril 1923 dekrir sa renion-la. Li dir: “Lamwatie sa renion-la bizin fer bann temwaniaz lor predikasion ek ankouraz bann travayer. . . . Nou sir ki sa dispozision-la pou fer bann frer ek ser vinn pli pros.”

Charles Martin, enn travayer (proklamater) ki ti ena 19 an ek ki ti res Vancouver, Kanada, ti gagn boukou bienfe gras-a sa bann renion-la. Li dir: “Se gras-a sa bann renion-la ki mo’nn aprann kouma pou prese devan laport bann dimounn. Souvan, bann frer ek ser ti partaz bann lexperyans ki zot ti gagne kan zot ti prese lakaz-lakaz. Sa ti donn mwa bann lide lor seki mo ti kapav dir ek lor kouma mo ti kapav sirmont bann lobzeksion.”

“Bann sorti predikasion” ti osi ranforsi linite bann frer ek ser. Dan Latour Degard  1^e Avril 1923, ti ena sa lanons-la: “Pou ki nou tou nou travay ansam dan linite . . . , Mardi le 1^e Me 1923, pou ena enn sorti predikasion zeneral. Apre sa, sak premie mardi dan sak mwa . . . Tou bann manb lasanble bizin partisip dan sa travay-la.”

Mem bann zenn Etidian Labib ti partisip dan sa travay-la. Hazel Burford, ki ti ena 16 an sa lepok-la, dir: “Dan Bulletin, ti ena bann model konversasion ki nou ti bizin aprann par-ker. a Mo granper ek mwa souvan nou ti sorti predikasion.” Selman, enn frer pa ti tro dakor ki Ser Burford prese. Ser Burford dir: “Enn vie frer pa ti dakor ditou ki mo koz ar bann dimounn. Sa lepok-la, sertin pa ti konpran ki tou bann Etidian Labib, mem ‘bann zennfi ek bann zennzan,’ ti bizin sorti predikasion pou loue nou Gran Kreater.” (Ps. 148:​12, 13) Selman, Ser Burford ti kontign prese. Plitar, li ti asiste deziem klas Lekol Galaad, ek li ti al servi kouma misioner dan Panama. Avek letan, sa bann frer-la ti sanz zot fason panse konsernan bann zenn ek predikasion.

Bann lasanble osi ti ranforsi linite bann frer ek ser. Dan boukou sa bann lasanble-la, ti ena enn zour kot zot ti sorti predikasion. Par exanp, dan lasanble ki ti ena dan Winnipeg, dan Kanada, tou bann ki ti asiste sa lasanble-la ti invite pou al prese dan sa lavil-la le 31 Mars. Bann frer ek ser ti zwenn boukou dimounn pandan sa sorti predikasion-la, ek zot ti gagn bann bon rezilta. Le 5 Out, anviron 7,000 dimounn ti asiste enn lot lasanble dan Winnipeg. Sa lepok-la, premie fwa gagn sa kantite dimounn-la pou enn lasanble dan Kanada.

Pli gran lasanble bann Temwin Zeova pou lane 1923, ti fer dan Los Angeles, Californie, le 18-26 Out. De-trwa semenn avan sa lasanble-la, ti fer met bann lanons dan lagazet pou sa levennman-la, ek bann Etidian Labib ti distribie plis ki 500,000 linvitasion.  Ti osi met bann lafis lor bann transpor piblik ek bann loto.

Samdi le 25 Out, Frer Rutherford ti fer diskour “Bann Mouton ek Bann Kabri.” Dan sa diskour-la, li ti explike ki “bann mouton” se bann dimounn ki pou viv lor later kan li pou vinn enn paradi. Li ti osi prezant enn trak ki ti apel “Enn Lavertisman.” Sa trak-la ti dir laverite lor bann swadizan Kretien ek li ti ankouraz bann dimounn ki sinser pou kit “Gran Babilonn.” (Rev. 18:​2, 4) Apre sa, partou lor later, bann Etidian ki ti bien devwe ti distribie plizir milyon kopi sa trak-la.

Dernier zour lasanble, ti ena plis ki 30,000 dimounn ki ti ekout diskour Frer Rutherford, ki ena tem “Tou Bann Pep Pe Al Ver Armagedon, Me Bann Milyon Dimounn Ki Pe Viv Aster-la Zame Pa Pou Mor.” Bann Etidian Labib ti kone ki ti pou ena boukou dimounn ki ti pou asiste sa dernier zour lasanble la. Akoz sa, zot ti lwe nouvo stad ki ti fek ranze dan Los Angeles. Pou ki tou dimounn tann bien bann diskour sa lasanble-la, bann frer ti servi bann bafoul sa stad-la, ek sa ti enn nouvo teknolozi sa lepok-la. Anplis, boukou dimounn ti osi swiv sa lasanble-la lor radio.

An 1923, bann frer ek ser inn ogmant zot laktivite predikasion dan Lafrik, Lerop, Lenn, ek Lamerik Disid. Par exanp, dan Lenn, alor ki li ti bizin okip so madam ek so sis zanfan, A. J. Joseph inn osi prodir bann piblikasion an Hindi, Tamil, Telegou, ek Ourdou.

Dan Siera Leonn, Frer Alfred Joseph ek Leonard Blackman ti ekrir biro mondial dan Brooklyn, New York. Zot ti pe rod led. Le 14 Avril 1923, zot ti gagn zot repons. Alfred dir: “Enn samdi aswar, bien tar, mo’nn gagn enn korl telefonn.” Enn gro lavwa ti demann li, “Se tomem ki’nn ekrir Sosiete Watchtower pou demann plis proklamater?” Alfred ti reponn, “Wi.” Dimounn-la ti dir li: “Zot inn avoy mwa.” Sa dimounn-la ti apel William R. Brown. Li, so madam Antonia, ek zot de tifi, Louise ek Lucy, ti kit Karaib ek zot ti ariv Siera Leonn sa zour-la. Bann frer ti bien kontan pou akeyir Frer Brown ek so fami.

Alfred dir: “Landemin gramatin, Leonard ek mwa nou ti pe fer nou Letid-de-Liv, parey kouma nou abitie fer toule semenn.  Enn kout, enn bel zom ti vinn devan nou. Sa ti Frer Brown. Li ti telman devwe ki li ti anvi fer enn diskour landemin mem.” Dan mwins ki enn mwa, Frer Brown ti plas tou bann piblikasion ki li ti amenn ar li. Inpe apre, li ti gagn 5,000 lezot liv, ek sa osi li ti plas zot bien vit. Selman, bann dimounn pa ti konn Frer Brown kouma enn marsan liv. Toutlong so lavi, li ti enn kikenn ki ti bien devwe dan so servis pou Zeova, ek li ti pe servi boukou verse dan so bann diskour. Akoz sa, bann dimounn ti apel li Bible Brown.

Dan Lalmagn, bann frer ti desid pou demenaz biro nasional ki ti dan Barmen, parski li ti vinn tro tipti. Zot ti osi tann dir ki larme Franse ti pre pou pran kontrol sa lavil-la. Bann Etidian Labib ti trouv bann batiman dan Magdeburg ki ti ase gran pou zot linprimri. Le 19 Zin, bann frer ti ramas tou zot materyel linprimri ek zot bann lezot meb, ek zot ti al dan zot nouvo Betel dan Magdeburg. Zour ki biro mondial ti aprann ki bann frer dan Lalmagn ti fini demenaze, bann lagazet ti anonse ki Lafrans ti pran kontrol lavil Barmen. Bann frer ti trouv sa kouma enn prev ki Zeova ti pe beni zot ek protez zot.

George Young, ki ti vwayaz dan boukou pei pou pres bon nouvel, ti ouver enn nouvo Betel dan Brezil, ek li ti koumans pibliye Latour Degard an Portige. Dan zis de-trwa mwa, li ti plas plis ki 7,000 piblikasion. Sarah Ferguson ti bien kontan kan Frer Young ti vizit so fami. Li ti pe lir Latour Degard depi 1899, li ti fini donn so lavi Zeova, me zame li pa ti pran batem. De-trwa mwa apre ki Frer Young ti ariv dan Brezil, Ser Ferguson ek so kat zanfan ti reisi pran batem.

Ver lafin sa lane-la, Latour Degard 15 Desam 1923 ti explike kouma bann sanzman dan nou bann renion, nou predikasion, ek nou bann lasanble ti ena enn bon lefe lor bann Etidian Labib. Li ti dir: ‘Nou trouve ki bann frer ek ser dan nou bann lasanble ena enn lafwa for. Anou kontign servi Zeova avek lazwa ek anou prepar nou pou fer ankor plis travay pandan lane 1924.’

Lane 1924 osi ti enn lane extraordiner pou bann Etidian Labib. Depi plizir mwa, bann frer Betel ti pe travay lor enn santie konstriksion dan Staten Island, ki pa ti tro lwin ar biro mondial dan Brooklyn. Dan koumansman lane 1924, zot ti terminn konstriksion sa bann batiman-la. Sa proze-la ti ede pou ki bon nouvel fane plis ki avan ek pou ki ena linite parmi bann frer ek ser.