1. Ki kitsoz enn anz pe dir, ek ki sa vedir pou nou?

 SI ENN anz koz ar twa, eski to pou ekout li? Azordi, enn anz pe koz “ar tou bann nasion, tribi, lang, ek pep.” Ki li pe dir? “Ena enn gran respe pou Bondie ek donn li laglwar . . . Ador sa Kikenn ki’nn fer lesiel ek later.” (Rev. 14:​6, 7) Zeova Li sel vre Bondie ki tou dimounn bizin adore. Nou vremem rekonesan ki Li’nn donn nou posibilite pou ador Li dan so gran tanp spiritiel!

2. Ki ete tanp spiritiel Zeova? (Get lankadre “ Seki Li Pa Ete.”)

² Ki ete sa tanp spiritiel la, ek kotsa nou kapav aprann plis lor la? Sa tanp spiritiel la se pa enn batiman. Se dispozision ki Zeova inn pran gras-a sakrifis Zezi, pou ki nou ador Li dan enn fason ki Li aksepte. Lapot Pol ti koz lor sa dispozision-la dan let ki li ti ekrir bann Kretien Ebre ki ti res dan Zide. b

3-4. Kifer Pol ti ekrir enn let pou bann Kretien Ebre ki ti res dan Zide, ek kouma sa let-la ti ed zot?

³ Kifer Pol ti ekrir enn let pou bann Kretien Ebre ki ti res dan Zide? Sirman pou de rezon. Premierman, pou ankouraz zot. Avan ki zot vinn Kretien, laplipar parmi zot ti dan relizion Zwif. Bann sef relizie Zwif kitfwa ti boufonn zot kan zot ti vinn Kretien. Kifer? Parski bann Kretien pa ti ena enn tanp pou ador Bondie, zot pa ti ena bann lotel pou fer sakrifis pou Bondie, ek zot pa ti ena bann pret. Sa ti kapav dekouraz bann Kretien ek afebli zot lafwa. (Ebre 2:1; 3:​12, 14) Kitfwa sertin parmi zot ti mem pans pou retourn dan relizion Zwif.

 ⁴ Deziemman, Pol ti fer bann Kretien Ebre konpran ki zot pa ti pe fer ase zefor pou konpran bann nouvo lansegnman, ouswa bann lansegnman profon, setadir “manze solid” ki ena dan Parol Bondie. (Ebre 5:​11-14) Anplis, sertin parmi zot ti ankor pe swiv Lalwa Moiz. Me Pol ti explik zot ki bann sakrifis ki zot ti bizin fer dapre Lalwa, pa ti pou fer zot gagn vre pardon. Se pou sa rezon-la ki “finn anil” Lalwa Moiz. Lerla, Pol ti ansegn zot sertin parmi sa bann lansegnman profon la. Li ti rapel bann Kretien ki gras-a sakrifis Zezi, zot ti ena enn “pli bon lesperans” ek ki sa ti pou ed zot pou “vinn pros ar Bondie.”—Ebre 7:​18, 19.

5. Ki nou bizin konpran dan liv Ebre, ek kifer?

⁵ Pol ti explik bann Kretien Ebre kifer fason ki zot ti pe ador Bondie aster-la, ti boukou pli bon ki fason ki zot ti pe ador Bondie dan lepase. Fason ki zot ti ador Bondie dan relizion Zwif, ti zis “enn lonbraz bann kitsoz ki pou vini, me seki reel se Lekris.” (Kol. 2:17) Enn lonbraz, li donn zis form enn kitsoz, me li pa kitsoz-la an vre. Alor, fason ki bann Zwif ti ador Bondie dan lepase, ti zis enn lonbraz seki ti pou arive dan lavenir. Pou ki nou kapav ador Zeova dan enn fason ki Li aksepte, nou bizin konpran dispozision ki Li’nn pran pou nou gagn pardon nou bann pese. Anou servi liv Ebre pou konpar “lonbraz” (fason ki bann Zwif ti ador Bondie dan lepase) ar “seki reel” (fason ki bann Kretien ador Bondie). Kan nou pou fer sa, nou pou konpran pli bien gran tanp spiritiel Bondie, ek seki sa vedir pou nou.

6. Kifer tabernak ti inportan pou bann Izraelit?

⁶ Fason ki bann Zwif ti ador Bondie. Pol ti koz lor tabernak ki Moiz ti aranze an 1512 Avan Nou Lepok. (Get lankadre “Fason ki Bann Zwif Ti Ador Bondie—Fason ki Bann Kretien Ador Bondie.”) Sa tabernak-la ti kouma enn latant ki bann Izraelit ti sarye ar zot sak fwa ki zot ti sanz landrwa. Zot ti servi sa pandan apepre 500 an, ziska ki aranz enn tanp dan Zerizalem. (Ex. 25:​8, 9; Nonb 9:22) Bann Izraelit ti rasanble  kot sa tabernak-la pou ador Bondie ek pou ofer bann sakrifis. (Ex. 29:​43-46) Selman, sa tabernak-la ti pou osi reprezant enn kitsoz ki pli bon pou bann Kretien.

7. Kan eski tanp spiritiel Bondie inn etabli?

⁷ Fason ki bann Kretien ador Bondie. Tabernak ti “enn lonbraz bann kitsoz ki dan lesiel,” ek li reprezant gran tanp spiritiel Zeova. Pol ti dir ki “sa latant-la [ouswa tabernak] li enn sinbol pou lepok aster.” (Ebre 8:5; 9:9) Alor, lepok ki Pol ti ekrir bann Kretien Ebre, sa tanp spiritiel la ti deza existe. Li’nn etabli lane 29 Nou Lepok. Sa lane-la, Zezi ti pran batem, lespri sin ti vinn lor li, ek li ti koumans servi kouma “gran pret” dan tanp spiritiel Bondie. c—Ebre 4:14; Zist. 10:​37, 38.

8-9. Dapre Ebre 7:​23-27, ki gran diferans ena ant bann gran pret dan Izrael ek Gran Pret ki pli siperyer, setadir Zezi Kris?

⁸ Fason ki bann Zwif ti ador Bondie. Gran pret ti ena responsabilite pou reprezant lepep devan Bondie. Aaron ti premie gran pret ki Zeova ti etabli kan ti koumans servi tabernak. Me apre sa, kouma Pol explike, “boukou inn bizin vinn pret enn deryer lot parski lamor finn anpes zot kontign servi kouma pret.” d (Lir Ebre 7:​23-27.) Anplis, akoz zot ti inparfe, sa bann gran pret la ti bizin ofer bann sakrifis pou zot prop pese. Ena enn gran diferans ant sa bann gran pret la ek Gran Pret ki pli siperyer, setadir Zezi Kris.

⁹ Fason ki bann Kretien ador Bondie. Zezi Kris, nou Gran Pret, li ‘enn serviter dan vre latant, ki Zeova inn monte, pa bann zom.’ (Ebre 8:​1, 2) Pol explike ki, “parski [Zezi] li kontign viv pou touletan, li pa bizin ki personn ranplas li antan-ki pret.” Pol dir osi ki Zezi li “pa inpir” ek ki li “separe ar bann ki fer pese.” Zezi diferan ar bann gran pret dan Izrael parski li “pa bizin ofer bann sakrifis toulezour” pou so bann pese. Aster-la, anou get enn lot diferans ki ena ant fason ki bann Zwif ti ador Bondie dan lepase ek fason ki bann Kretien ador Bondie; nou pou examinn bann lotel ek bann sakrifis.

10. Bann sakrifis zanimo ki ti fer lor lotel, ki zot ti reprezante?

¹⁰ Fason ki bann Zwif ti ador Bondie. Pa tro lwin ar lantre tabernak ti ena enn lotel an kwiv, ek ti fer bann sakrifis zanimo lor la pou Zeova. (Ex. 27:​1, 2; 40:29) Selman, sa bann sakrifis-la pa ti kapav fer bann Izraelit gagn vre pardon pou zot pese. (Ebre 10:​1-4) Bann sakrifis zanimo ki ti fer regilierman dan tabernak, ti reprezant enn pli gran sakrifis ki ti pou kapav fer bann dimounn gagn vre pardon pou zot pese.

11. Lor ki lotel Zezi ti ofer limem kouma enn sakrifis? (Ebre 10:​5-7, 10)

¹¹ Fason ki bann Kretien ador Bondie. Zezi ti kone ki Zeova ti avoy li lor later pou ki li donn so lavi kouma enn ranson pou bann dimounn. (Mat. 20:28) Kan Zezi ti pran batem, li ti aksepte  pou fer seki Zeova ti anvi. (Zan 6:38; Gal. 1:4) Se koumadir Zezi ti ofer limem lor enn lotel ki reprezant “volonte” Bondie. So volonte se ki Zezi donn so lavi parfe kouma enn sakrifis. Zezi ti donn so lavi “enn fwa pou tou,” pou ki tou dimounn ki ena lafwa an li gagn pardon pou zot pese. (Lir Ebre 10:​5-7, 10.) Aster-la, anou get bann kitsoz ki ti ena dan tabernak, ek nou pou gete seki zot reprezante.

12. Kisann-la ti kapav rant dan sa de pies ki ti ena dan tabernak la?

¹² Fason ki bann Zwif ti ador Bondie. Tabernak, ek tanp ki ti konstrir apre dan Zerizalem, ti preske parey andan. Toule-de ti ena de pies, “Plas ki Sin” ek “Plas ki Pli Sin,” ek ti ena enn rido ki ti separ sa de pies-la. (Ebre 9:​2-5; Ex. 26:​31-33) Dan Plas ki Sin, ti ena enn stenn lalanp an or, enn lotel pou bril lansan, ek enn latab avek dipin prezantasion. Se zis “bann pret ki Bondie ti swazir” ki ti gagn drwa rant dan Plas ki Sin pou fer bann travay ki sakre. (Nonb 3:​3, 7, 10) Dan Plas ki Pli Sin, ti ena lars lalians an or ki ti reprezant prezans Zeova. (Ex. 25:​21, 22) Se zis gran pret ki ti gagn drwa travers rido pou rant dan Plas ki Pli Sin. Li ti fer sa enn sel zour dan lane, pandan Zour Rekonsiliasion. (Lev. 16:​2, 17) Toule lane, li ti rant dan Plas ki Pli Sin avek disan bann zanimo pou li gagn pardon so bann pese ek  pardon pese nasion Izrael. Avek letan, gras-a so lespri sin, Zeova ti explike seki sa de pies dan tabernak la ti reprezante.—Ebre 9:​6-8.

13. Plas ki Sin ek Plas ki Pli Sin, ki zot reprezante pou bann Kretien?

¹³ Fason ki bann Kretien ador Bondie. Gras-a so lespri sin, Zeova inn swazir enn ti group Kretien pou ki zot ena enn relasion spesial avek Li. Sa 144,000 Kretien la pou servi kouma pret dan lesiel ansam ar Zezi. (Rev. 1:6; 14:1) Plas ki Sin dan tabernak reprezant zot kondision kouma bann garson spiritiel Bondie; Zeova inn adopte zot alor ki zot ankor lor later. (Rom. 8:​15-17) Plas ki Pli Sin dan tabernak reprezant lesiel, plas kot Zeova ete. “Rido” ki ti ena ant Plas ki sin ek Plas ki Pli Sin reprezant lekor imin Zezi. So lekor ti anpes li rant dan lesiel pou li vinn Gran Pret dan tanp spiritiel Bondie. Kan li’nn sakrifie so lekor imin pou bann dimounn, Zezi inn ouver enn sime pou ki bann Kretien ki ena lesperans pou al dan lesiel kapav gagn zot rekonpans. Selman, zot osi zot bizin abandonn zot lekor imin pou ki zot kapav al dan lesiel. (Ebre 10:​19, 20; 1 Kor. 15:50) Apre so rezireksion, Zezi inn rant dan Plas ki Pli Sin dan tanp spiritiel Bondie, ek avek letan, tou bann Kretien ki ena lesperans pou al dan lesiel pou zwenn li laba.

14. Dapre Ebre 9:​12, 24-26, kifer tanp spiritiel Zeova li boukou pli siperyer?

¹⁴ Li kler ki bann dispozision ki Zeova inn pran pou ki nou ador Li gras-a la ranson ek gras-a Zezi kouma nou Gran Pret, li boukou pli siperyer ki fason ki bann Zwif ti ador Bondie. Dan Izrael, gran pret ti rant dan Plas ki Pli Sin pou li ofer disan bann zanimo. Selman, sa plas-la se bann dimounn ki ti aranz sa. Parkont Zezi li, li ti rant “dan lesiel mem,” plas ki pli sin dan liniver, pou vinn devan Zeova. Laba, li’nn prezant Zeova valer so sakrifis antan ki imin parfe, setadir li’nn sakrifie so drwa pou viv kouma enn imin parfe lor later. “Gras-a sakrifis so lekor,” Zezi inn efas nou bann pese. (Lir Ebre 9:​12, 24-26.) Se gras-a so sakrifis ki nou kapav gagn vre pardon pou nou bann pese. Aster-la, nou pou al gete ki, mem si nou ena lesperans pou viv dan lesiel ouswa lor later, nou tou nou kapav ador Zeova dan so tanp spiritiel.

15. Kisann-la ti travay dan lakour tabernak?

¹⁵ Fason ki bann Zwif ti ador Bondie. Otour tabernak, ti ena enn gran lakour ki ti antoure ar enn baraz. Se dan sa lakour-la ki bann pret ti fer zot travay. Dan lakour-la, ti ena enn gran lotel an kwiv pou bann sakrifis ki bril net, ek osi enn gran basin an kwiv. Bann pret ti servi sa basin delo la pou zot lav zot avan ki zot fer zot bann travay sakre. (Ex. 30:​17-20; 40:​6-8) Selman, dan bann tanp ki ti aranze apre, ti ena osi enn lakour andeor, kot bann dimounn ki pa ti pret ti kapav ador Zeova.

16. Kisann-la pe servi dan bann lakour tanp spiritiel Bondie?

¹⁶ Fason ki bann Kretien ador Bondie. Avan ki zot al dan lesiel pou servi kouma pret ansam ar Zezi, bann Kretien  ki ena lesperans pou al dan lesiel servi Zeova avek fidelite dan lakour andan, ki dan tanp spiritiel Bondie. Sa gran basin delo la rapel zot, ek tou bann Kretien osi, linportans pou res prop lor plan moral ek spiritiel. Me kotsa “gran lafoul,” ki pe soutenir bann frer Zezi Kris, pe ador Zeova? Dan vizion ki lapot Zan ti gagne, li ti trouv zot pe “debout devan tronn” ek “zot pe donn [Bondie] enn servis sakre lanwit-lizour dan so tanp.” (Rev. 7:​9, 13-15) Sa servis sakre la, zot pe fer sa lor later, dan lakour andeor tanp spiritiel Bondie. Nou bien rekonesan ki Zeova inn donn nou posibilite pou ador Li dan so gran tanp spiritiel!

17. Ki bann sakrifis nou kapav ofer Zeova?

¹⁷ Azordi, tou bann Kretien ena privilez pou ofer Zeova bann sakrifis. Nou fer sa kan nou servi nou letan, nou lenerzi, ek nou bann dibien pou servi Zeova. Ek kouma lapot Pol ti dir bann Kretien Ebre, nou kapav “touletan ofer Bondie enn sakrifis louanz, setadir frwi nou lalev, kan nou fer deklarasion piblik pou so nom.” (Ebre 13:15) Nou montre ki nou apresie loner ki nou ena pou servi Zeova kan nou kontign fer nou best pou servi Li.

18. Dapre Ebre 10:​22-25, ki kitsoz nou bizin touletan fer, ek ki kitsoz fode zame nou bliye?

¹⁸ Lir Ebre 10:​22-25. Alafin so let pou bann Ebre, Pol ti koz lor bann kitsoz ki nou bizin touletan fer pou ador Zeova. Parmi sa bann kitsoz-la ena lapriyer, predikasion, asiste bann renion, ek ankouraz sakenn nou kamarad “ankor plis kan [nou] trouv zour [Zeova] pe koste.” Ver lafin liv Revelasion, anz Zeova ti dir: “Ador Bondie!” (Rev. 19:10; 22:9) Li ti dir sa de fwa pou montre ki se vremem enn kitsoz bien inportan. Alor, fode zame nou bliye bann kitsoz profon ki nou’nn aprann konsernan gran tanp spiritiel Zeova, ek anou kontign apresie loner ki nou ena pou ador Zeova dan so tanp!