Kestion Bann Lekter
Kan bann Izraelit ti dan dezer, eski zot ti ena lezot kitsoz pou manze apart lamann ek kay?
Pandan 40 an ki bann Izraelit ti dan dezer, lamann ti zot manze prinsipal. (Ex. 16:35) Zeova de fwa ti donn zot bann kay osi pou manze. (Ex. 16:12, 13; Nonb 11:31) Selman, ti ena osi lezot kitsoz ki bann Izraelit ti kapav manze.
Zeova parfwa ti diriz so pep dan bann “plas kot zot kapav repoze,” ek laba ti ena delo pou bwar ek lezot kitsoz pou manze. (Nonb 10:33) Enn parmi sa bann plas-la ti apel Elim. Laba, ti ena “12 lasours delo ek 70 palmie,” sirman bann pie dat. (Ex. 15:27) Liv Plants of the Bible dir ki bann pie dat pouse dan diferan rezion ek ki li lasours prinsipal manze dan bann dezer. Gras-a bann pie dat, bann milyon dimounn gagn manze, delwil, ek enn plas pou reste.
Bann Izraelit kitfwa ti aret osi kot enn oazis ki azordi apel Feiran, ek ki form parti dan vale Feiran. a Liv Discovering the World of the Bible dir ki sa vale-la “fer 130 kilomet longer ek li enn parmi bann vale dan Sinai ki pli long, ki pli zoli, ek ki bann dimounn plis kone.” Liv-la dir osi ki, si enn kikenn pran depi lamer ek li remont sa vale-la, lor 45 kilomet li pou ariv kot Oazis Feiran. Sa oazis-la li 610 met pli ot ki nivo lamer ek li 4.8 kilomet longer. Ena boukou palmie laba, ek sa landrwa-la telman zoli ki bann dimounn inn konpar li ar zardin Eden. Depi plizir milye lane, bann dimounn vinn dan sa landrwa-la akoz bann milye pie dat ki ena laba.”
Bann pie dat dan Oazis Feiran
Kan zot ti kit Lezip, bann Izraelit ti amenn ar zot zot lapat dipin, zot bol pou lapat dipin, ek kitfwa inpe lagrin ek inpe delwil. Biensir, sa bann kitsoz-la ti pou fini bien vit. Zot ti osi amenn avek zot “bann mouton, bann bef, ek enn gran kantite zanimo.” (Ex. 12:34-39) Selman, parski lavi bien dir dan dezer, sirman boukou parmi sa bann zanimo-la ti mor. Kitfwa bann Izraelit ti osi manz sertin parmi sa bann zanimo-la, ek zot ti osi ofer sertin kouma sakrifis, mem pou bann fos bondie. b (Zist. 7:39-43) Kanmem sa, bann Izraelit ti fer lelvaz sertin zanimo. Nou konpran sa dan seki Zeova ti dir so pep kan zot ti dezobeir Li. Li ti dir zot: “To bann garson pou vinn bann berze dan dezer pandan 40 an.” (Nonb 14:33) Alor, li posib ki zot ti pe gagn dile ek laviann ar zot bann zanimo. Selman, zot bann zanimo pa ti ase pou nouri apepre 3 milyon dimounn pandan 40 an. c
Kotsa bann Izraelit ti gagn manze ek delo pou zot bann zanimo? d Sa lepok-la, kitfwa lapli ti pe tonbe pli souvan dan dezer, alor kitfwa ti ena pli boukou verdir. Liv Étude perspicace des Écritures explike ki 3,500 an avan, “ti ena plis delo dan landrwa kot bann Izraelit ti ete, konpare ar azordi. Nou konn sa parski ena boukou gran vale ki sek azordi. Lontan sa bann vale-la ti bann larivier.” Me kanmem sa, bann dezer ti bann plas bien izole ek bien difisil pou viv. (Det. 8:14-16) Si Zeova pa ti fer bann mirak pou ki bann Izraelit gagn delo, kitfwa zot ek zot zanimo ti pou fini mor.—Ex. 15:22-25; 17:1-6; Nonb 20:2, 11.
Moiz ti dir bann Izraelit ki Zeova ti donn zot lamann “pou [zot] kone ki enn dimounn pa viv zis avek dipin, me avek tou parol ki sorti dan labous Zeova.”—Det. 8:3.
a Get Latour Degard 1e Me 1992 p. 24-25, an Franse.
b Labib montre ki bann Izraelit de fwa ti sakrifie bann zanimo pou Zeova dan dezer. Sa ti arive de-z-an apre ki bann Izraelit ti kit Lezip, setadir lane 1512 Avan Nou Lepok. Premie fwa la ti kan Zeova ti etabli bann pret, ek deziem fwa la ti pou fet Pak.—Lev. 8:14–9:24; Nonb 9:1-5.
c Ver lafin sa 40 lane ki zot inn pase dan dezer la, bann Izraelit ti pran plizir milye zanimo ar bann nasion lor ki zot ti gagn laviktwar. (Nonb 31:32-34) Me kanmem sa, zot ti kontign manz lamann ziska ki zot rant dan Later Promiz.—Zozwe 5:10-12.
d Pena okenn plas ki dir ki bann zanimo ti manz lamann. Zeova ti dir ki sak Izraelit ti bizin ramas kantite lamann ki li ti kapav manze ek Li pa ti koz lor bann zanimo.—Ex. 16:15, 16.
