Sa fer plis ki enn an ki bann frer Betel ti pe konstrir stasion radio WBBR lor Staten Island, dan lavil New York. Pou koumanse zot ti netway terin-la. Apre sa, zot ti aranz enn gran lakaz pou bann travayer ek enn lot batiman pou zot gard bann lekipman. Kan sa travay-la ti fini, bann frer ti koumans instal zot bann lekipman pou ki zot kapav pas lor radio. Selman, zot ti pou bizin sirmont boukou problem.

Bann frer ti trouv sa bien difisil pou instal lantenn prinsipal stasion-la. Lantenn-la ti fer 91 met oter ek ti bizin met li ant de bout dibwa ki fer 61 met sakenn. Premie kout ki zot ti instal li, zot pa ti reisi. Me bann frer ti kont lor Zeova ek zot ti reisi. Calvin Prosser, ki ti travay lor sa proze-la, ti dir: “Si premie kout mem nou ti reisi, nou ti pou tap nou lestoma ek nou ti pou dir, ‘Nou’nn reisi fer sa!’” Selman, bann frer ti donn Zeova laglwar pou seki zot ti reisi fer. Me zot ti gagn enn lot problem ankor.

Fer bann emision lor radio ti ankor bien nouvo, ek li pa ti fasil pou gagn bann lekipman ki bizin. Selman, bann frer ti reisi gagn enn emeter 500 wat segonnme, ki enn kikenn dan landrwa ti fabrike. Olie ki zot ti aste enn mikro, zot ti servi enn telefonn. Enn aswar dan mwa Fevriye, zot ti teste tou sa bann lekipman-la. Zot ti bizin fer enn emision lor radio, alor bann frer ti sant bann kantik. Enn parmi sa bann frer-la, Ernest Lowe, ti rakont enn kitsoz komik ki ti arive sa zour-la. Li dir ki pandan ki zot ti pe  sante, Ziz Rutherford, b ki ti dan Brooklyn apepre 25 kilomet pli lwin, ti telefonn zot parski li ti tann zot pe sante lor radio.

Frer Rutherford ti dir: “Aret sa! Zot lavwa koumadir kanar!” Bann frer-la ti gagn onte, ek deswit zot ti aret emision-la. Selman, sa ti permet zot kone ki radio-la ti marse ek ki zot ti pre pou fer zot premie emision.

Le 24 Fevriye 1924, pandan premie emision radio, Frer Rutherford ti dir ki ti pou servi sa stasion radio la pou fer travay ki Lerwa Zezi Kris inn donn zot. Li ti dir ki lobzektif sa stasion radio la se “pou ed tou dimounn pou konpran Labib ek lepok ki nou pe viv.”

Premie emision-la ti gagn enn gran sikse. Zot ti servi sa stasion radio la pandan 33 an pou ansegn bann serviter Zeova.

An Ziliet 1924, bann Etidian Labib ti asiste enn lasanble dan Columbus, Ohio. Pandan sa lasanble-la, bann delege ki ti sorti dan diferan pei ti kapav ekout bann diskour an Arab, Angle, Franse, Alman, Grek, Ongrwa, Italien, Litianien, Polone, Ris, Ikrenien, ek bann lang Skandinav. Bann dimounn ti kapav ekout sertin parmi sa bann diskour-la lor radio, ek bann frer ti demann Ohio State Journal pou ekrir sak zour bann lartik lor program lasanble.

Zedi 24 Ziliet, plis ki 5,000 frer ek ser ti al prese dan lavil kot ti fer sa lasanble-la. Sa zour-la, zot ti plas anviron 30,000 liv ek zot ti koumans bann milye letid Labib. Latour Degard ti apel sa zour-la “moman pli zwaye sa lasanble-la.”

Vandredi 25 Ziliet, dan enn so bann diskour, avek kouraz Frer Rutherford ti lir enn dokiman ki ti kondann bann sef relizie. Li ti dir ki bann dirizan relizie, politik, ek komersial ti pe anpes bann dimounn konn laverite lor Rwayom ki Bondie pou servi pou beni bann dimounn. Li ti osi dir ki sa bann zom-la ti dan lerer parski zot ti pe soutenir Société des Nations, ek zot ti fer krwar ki Bondie ti pe servi sa lorganizasion-la pou diriz later. Alor, bann Etidian Labib ti  bizin ena kouraz pou anons bann dimounn sa mesaz-la.

Plitar, enn lartik dan Latour Degard ti dir ki sa lasanble dan Columbus la ti ranforsi lafwa bann frer ek ser. Sa ti donn zot kouraz pou prese malgre lopozision. Leo Claus, ki ti asiste sa lasanble-la, ti dir: “Apre sa lasanble-la, nou ti inpasian pou partaz sa mesaz-la dan nou teritwar.”

An Oktob, bann Etidian Labib ti koumans partaz bann milyon trak ki ti apel Ecclesiastics Indicted. Dan sa trak-la, ti ena mesaz ki Frer Rutherford ti lir kont bann sef relizie la. Dan enn ti lavil dan Oklahoma, dan Letazini, Frank Johnson ti partaz bann trak ki li ti ena, ek li ti bizin atann 20 minit avan ki bann lezot frer ek ser vinn zwenn li. Selman, li pa ti kapav atann dan enn plas kot bann dimounn sa lavil-la ti pou trouv li. Bann-la ti bien ankoler akoz mesaz ki ti ena lor sa trak-la, ek zot ti pe rod li pou bat li. Alor, Frer Johnson ti al kasiet dan enn legliz ki pa ti tro lwin. Pa ti ena personn dan legliz-la, alor li ti profite pou met enn trak dan pret-la so Labib ek lor sak sez. Li’nn fer sa vit-vit, ek parski ti ankor ena letan, li ti al dan de lezot legliz ek li’nn fer parey laba osi.

Apre sa, Frank ti retourn dan plas kot li ti bizin zwenn bann lezot frer. Li ti kasiet deryer enn filing ek li ti pe louk bann dimounn ki ti pe rod li. Bann dimounn-la ti pase, me personn pa ti trouv li. Deswit kouma bann-la ti ale, bann frer ek ser ki ti pe prese pa tro lwin, ti vinn rod Frank ek zot ti ale.

Enn parmi sa bann frer-la ti dir: “Kan nou ti kit sa landrwa-la, nou ti pas devan sa trwa legliz-la. Ti ena anviron 50 dimounn devan sak legliz. Sertin parmi zot ti pe lir trak-la ek lezot ti pe montre zot pret trak-la. Antouka, nou ti sap dan lamor! Nou remersie Zeova parski Li’nn protez nou ek Li’nn donn nou sazes ki nou bizin pou nou reisi sap dan lame nou bann lennmi.”

Bann Etidian Labib dan lezot pei osi ti prese avek kouraz. Dan lenor Lafrans, Józef Krett ti pres ar bann imigran Polone ki ti pe travay dan bann laminn. Li ti bizin fer enn diskour ki ti ena tit, “Biento Bann Mor Pou Resisite.” Dan enn lavil, kan bann frer ek ser ti invit bann dimounn sa landrwa-la, enn pret ti dir bann dimounn dan so legliz pou pa asiste sa diskour-la. Me bann-la pa ti ekout li. Plis ki 5,000 dimounn ti vinn ekout sa diskour-la, ek pret-la osi ti vini! Frer Krett ti ankouraz pret-la pou defann so bann krwayans, me li ti refize. Apre so diskour, Frer Krett ti donn bann dimounn tou bann piblikasion ki li ti ena, parski li ti trouve ki bann-la ti vremem anvi konn plis lor Parol Bondie.—Amos 8:11.

Dan Lafrik, Claude Brown ti al dan enn pei ki apel Ghana pou pres bon nouvel. Boukou dimounn ti tann koz lor laverite gras-a bann diskour ki li ti fer ek bann piblikasion ki li ti plase. John Blankson, ki ti pe etidie pou vinn enn farmasien, ti asiste enn bann diskour Frer Brown. Bien vit, li ti rann li kont ki li ti trouv laverite. John ti dir: “Kan mo ti gagn laverite, mo ti extra  kontan, ek mo ti koz lor la ar maximum dimounn dan mo lekol.”

John ti aprann ki Labib pa koz lor Trinite. Alor, enn zour li ti al dan enn legliz Anglikan pou poz pret-la bann kestion lor la. Pret-la ti ankoler ek ti kriye: “To pa enn Kretien! To enn diab! Sorti la ale!”

Kan li ti retourn kot li, John ti ekrir pret-la enn let. Ladan, li ti demann pret-la pou zwenn li an piblik pou koz lor Trinite. Lerla, pret-la ti dir John al dan biro so profeser, ek so profeser ti demann li si li ti avoy enn let sa pret-la.

John ti reponn: “Wi misie.”

Profeser-la ti dir John ekrir enn let pou demann pret-la exkiz. Alor, John ti ekrir:

“Misie, mo profeser inn dir mwa ekrir ou enn let pou demann ou exkiz. Me pou mo demann ou pardon, ou bizin aksepte ki ou ansegn bann fos lansegnman.”

Profeser-la ti gagn sok, ek li ti dir John: “Blankson, sa ki to pou ekrir la?”

“Wi misie. Samem tou mo kapav ekrir.”

“Sa pret-la form parti enn relizion ki gouvernman soutenir, alor si to kontign koz kont li, to pa pou kapav res dan sa lekol-la.”

“Me misie, . . . eski nou pa gagn drwa poz ou bann kestion kan nou pa konpran enn zafer dan klas?”

“Wi to ena drwa.”

“Me misie, samem ki’nn arive. Pret-la ti pe ansegn nou lor Labib ek mo’nn poz li enn kestion. Me si li pa kapav reponn kestion-la, kifer mo bizin ekrir enn let pou demann li exkiz?”

Blankson ti reisi res dan lekol, ek li ti nepli bizin ekrir pret-la enn let pou demann li exkiz.

Kan li koz lor bann laktivite ki ti ena pandan sa lane-la, Latour Degard dir: “Parey kouma David, nou osi nou kapav dir: ‘To pou donn mwa lafors pou lager.’ (Psom 18:39) Sa lane-la ti bien ankourazan, parski nou’nn trouve kouma Zeova inn ed nou pou fer so travay. . . . So bann serviter ki fidel . . . inn pres bon nouvel avek boukou lazwa.”

Ver lafin sa lane-la, bann frer ti desid pou konstrir enn lot stasion radio, dan Chicago, Letazini. Sa nouvo stasion-la ti apel PAROL. Sann fwa-la, zot ti servi enn lekipman pli pwisan; enn emeter 5,000 wat. Gras-a sa, mem bann dimounn ki ti lwin, kouma par exanp dan lenor Kanada, ti reisi tann koz lor bon nouvel Rwayom Bondie.

Pandan lane 1925, Zeova ti ed bann frer pou konpran pli bien Revelasion sapit 12. Sertin ti aret servi Zeova akoz sa nouvo lexplikasion-la. Parkont, boukou frer ek ser ti bien kontan kan zot ti konpran pli bien bann levennman ki ti pase dan lesiel ek kouma sa ti ena enn lefe lor bann serviter Zeova lor later.