1-2. Ki ti arive kan de disip Zezi ti pe al Emais?

 NOU le 16 Nizan lane 33 Nou Lepok. Bann disip Zezi bien sagrin ek zot trakase. De parmi zot kit Zerizalem pou al Emais, enn vilaz ki trouv apepre 11 kilomet ar Zerizalem. Sa de zom-la bien dekouraze parski zot met, Zezi, fek mor. Zot ti pe atann ki Lemesi fer bann kitsoz extraordiner pou bann Zwif, me zot lespwar ti tom dan dilo. Selman, enn kitsoz ki zot pa ti atann ti arive.

² Enn zom ki zot pa kone, zwenn zot ek fer enn bout sime ansam ar zot. Bann disip rakont li bann kitsoz bien tris ki’nn ariv Zezi. Lerla, zom-la koumans dir zot bann kitsoz ki zame zot pa’nn bliye. Zom-la “pran apartir Moiz ek tou bann Profet,” ek li explik zot kifer Lemesi ti bizin soufer ek mor. Kan zot ariv Emais, zom-la fer zot kone kisann-la li ete—limem Zezi ki’nn resisite! Sey mazinn lazwa sa de disip-la kan zot aprann ki zot met vivan!—Lik 24:13-35.

3-4. Ki ti ariv bann disip Zezi, ek ki nou pou trouve dan sa lartik-la? (Zistwar Bann Zapot 1:3)

³ Zezi inn pas 40 zour lor later avan ki li retourn dan lesiel, ek pandan sa letan-la, li’nn aparet plizir fwa ar so bann disip. (Lir Zistwar Bann Zapot 1:3.) Li ti ankouraz so bann disip parski zot ti tris ek zot ti pe trakase. Gras-a sa, zot ti regagn zot lazwa ek zot ti regagn kouraz pou  al prese ek pou al ansegn bon nouvel lor Rwayom Bondie. a

⁴ Nou kapav tir bann zoli leson kan nou etidie lor sa 40 dernie zour ki Zezi ti lor later la. Dan sa lartik-la, nou pou trouve kouma Zezi inn servi sa letan-la (1) pou ankouraz so bann disip, (2) pou ed zot pou konpran pli bien bann Lekritir, ek (3) pou form zot pou asim plis responsabilite. Nou pou trouve osi kouma nou kapav swiv lexanp Zezi.

ANKOURAZ LEZOT

5. Kifer bann disip Zezi ti bien bizin lankourazman?

⁵ Bann disip Zezi ti bien bizin lankourazman. Kifer? Parski sertin parmi zot ti kit zot lakaz, zot fami, ek zot travay pou swiv Zezi aplintan. (Mat. 19:27) Ena lezot ki ti gagn maltrete parski zot ti vinn so disip. (Zan 9:22) Zot ti fer sa bann sakrifis-la parski zot ti sir ki Zezi li Lemesi. (Mat. 16:16) Me aster-la ki Zezi inn mor, zot ti perdi lespwar, zot ti tris, ek zot ti bien dekouraze.

6. Ki Zezi ti fer premie zour ki li ti resisite?

⁶ Zezi ti konpran santiman so bann disip. Li ti kone ki bann-la ti tris ek dekouraze, pa parski zot ti mank lafwa, me parski so lamor ti bien afekte zot. Se akoz sa ki, premie zour mem ki li ti resisite, li ti ankouraz so bann kamarad. Par exanp, kan Mari Magdalenn ti pe plore lor so tom, li ti aparet ar li. (Zan 20:11, 16) Li ti osi aparet ar sa de disip ki nou’nn mansione dan koumansman sa lartik-la. Li ti aparet ar lapot Pier osi. (Lik 24:34) Ki leson nou kapav aprann ar lexanp Zezi? Anou gete seki ti arive kan li ti aparet ar Mari Magdalenn.

7. Ki Mari ti pe fer kot tom Zezi, ek ki Zezi ti fer pou li? (Zan 20:11-16) (Get zimaz osi.)

⁷ Lir Zan 20:11-16. Le 16 Nizan, boner gramatin, enn ti group madam ti al kot tom kot ti met lekor Zezi. (Lik 24:1, 10) Mari Magdalenn ti enn parmi sa bann madam-la. Kan Mari ti ariv kot tom-la, li ti trouve ki tom-la ti vid. Alor, li ti galoupe ek li ti al dir sa Pier ek Zan. Ek kan Pier ek Zan ti galoupe pou al kot tom  Zezi, Mari ti swiv zot. Kan Pier ek Zan ti trouve ki tom-la ti vid, zot ti retourn kot zot. Parkont, Mari ti res kot tom-la ek li ti koumans plore. Selman, li pa ti kone ki Zezi ti pe get li. Zezi ti trouve ki so lamor ti bien afekte Mari ek li ti anvi rekonfort li. Alor, li ti aparet ar Mari ek li ti fer enn kitsoz ki ti bien ankouraz Mari. Li ti donn Mari enn responsabilite bien inportan; li ti dir Mari al dir so bann disip ki li’nn resisite.—Zan 20:17, 18.

8. Kouma nou kapav swiv lexanp Zezi?

⁸ Kouma nou kapav swiv lexanp Zezi? Nou kapav swiv lexanp Zezi kan nou ankouraz nou bann frer ek ser pou zot kontign servi Zeova. Pou nou fer sa, parey kouma Zezi, nou bizin kone par ki difikilte zot pe pase, nou bizin esey konpran zot santiman, ek nou bizin rekonfort zot. Anou gete seki nou kapav aprann ar lexanp enn ser ki apel Jocelyn. Kan so ser ti mor dan enn aksidan, Jocelyn ti abat net. Selman, enn frer ek so madam ti invit li kot zot. Bann-la ti ekout li, ti esey konpran so santiman, ek ti rasir li ki li ena valer pou Zeova. Jocelyn dir: “Mo ti telman abat ki se koumadir mo ti pe nwaye dan lamer. Me Zeova ti servi sa koup-la pou sap mwa. Zot ti ed mwa pou regagn lafors pou mo kontign servi Zeova.” Nou osi, nou kapav ankouraz lezot kan zot ouver zot leker ar nou. Pou nou fer sa, nou bizin ekout zot bien kan zot koze ek esey konpran zot santiman. Lerla, nou pou kapav rekonfort zot ek ed zot pou kontign servi Zeova.—Rom. 12:15.

ED LEZOT POU KONPRAN PAROL BONDIE

9. Ki difikilte bann disip Zezi ti gagne, ek kouma Zezi ti ed zot?

⁹ Bann disip Zezi ti krwar dan Parol Bondie ek zot ti fer zot maximum pou obeir Zeova. (Zan 17:6) Selman, zot ti gagn difikilte pou konpran kifer Zezi ti mor kouma enn kriminel. Zezi ti kone ki so bann disip ti ena lafwa ek ki zot ti kontan Zeova, me li ti kone osi ki zot ti bizin led pou ki zot konpran Parol Bondie pli bien. (Lik 9:44, 45; Zan 20:9) Akoz sa, li ti ed zot pou konpran seki ti ekrir dan bann Lekritir. Anou gete kouma li ti fer sa kan li ti aparet ar sa de disip ki ti pe al Emais la.

10. Kouma Zezi ti fer so bann disip konpran ki li ti Lemesi? (Lik 24:18-27)

¹⁰ Lir Lik 24:18-27. Kan li ti zwenn sa de disip-la, Zezi pa ti dir zot deswit kisann-la li ete. Olie sa, li ti poz zot bann kestion. Kifer li ti fer sa? Kitfwa li ti anvi ki zot ouver zot leker ar li ek ki zot dir li seki ti pe trakas zot. Ek se samem ki zot ti fer! Zot ti dir li ki zot ti panse ki Zezi ti pou vinn lerwa dan Izrael ek ki li ti pou liber zot ar bann Romin. Zezi ti les zot dir seki ti pe trakas zot, ek apre sa, li ti servi bann Lekritir pou explik zot ki so lamor ti realiz boukou profesi. b Plitar sa zour-la, Zezi ti osi zwenn bann lezot disip pou explik zot bann profesi ki ti realize. (Lik 24:33-48) Ki nou kapav aprann ar lexanp Zezi?

11-12. (a) Kouma nou kapav swiv lexanp Zezi kan nou ansegn nou etidian Labib? (Get zimaz osi.) (b) Kouma Nortey so ansegnan Labib ti ed li?

¹¹ Kouma nou kapav swiv lexanp Zezi? Kan nou pe etidie Labib ar enn kikenn, pou koumanse nou kapav poz li bann kestion pou ki li dir nou seki li panse ek seki li resanti. (Prov. 20:5) Kan nou’nn konpran so santiman, nou kapav montre li kouma pou trouv bann verse dan Labib ki  kapav ed li dan so sitiasion. Fode pa nou dir li seki li bizin fer. Okontrer, nou bizin ed li pou reflesi lor bann prinsip Labib, ek ed li pou trouve kouma li kapav met zot an pratik dan so lavi. Anou get lexanp enn frer ki res Ghana ek ki apel Nortey.

¹² Nortey ti koumans etidie Labib kan li ti ena 16 an. Selman, so fami pa ti kontan ditou ek zot ti koumans persekit li. Ki kitsoz ti ed Nortey pou kontign etidie Labib? Dan so letid, so ansegnan Labib ti servi Matie sapit 10 pou explik li ki bann vre Kretien pou gagn persekision. Nortey dir: “Alor, kan mo ti koumans gagn persekision, mo ti sir ki mo ti dan laverite.” So ansegnan Labib ti fer li reflesi lor Matie 10:16, pou montre li ki li bizin pridan ek ki li bizin ena respe kan li koz lor so bann krwayans ar so fami. Apre so batem, Nortey ti anvi fer pionie, me so papa ti anvi ki li al liniversite. Olie ki li ti dir Nortey seki li bizin fer, so ansegnan Labib ti poz li bann kestion ek ti fer li reflesi lor bann prinsip Labib. Gras-a sa, Nortey ti desid pou servi Zeova aplintan. Me akoz sa, so papa ti met li deor dan lakaz. Eski Nortey regret seki li’nn fer? Li dir: “Mo sir ki mo’nn pran enn bon desizion.” Nou osi, kan nou pran letan pou ed lezot pou reflesi lor bann prinsip Labib, sa kapav ed zot pou vinn bann Kretien ki ena matirite.—Efe. 3:16-19.

FORM BANN FRER POU ZOT ASIM PLIS RESPONSABILITE

13. Avan ki Zezi mont dan lesiel, ki li ti fer pou ki travay predikasion kontigne? (Efezien 4:8, 11)

¹³ Kan li ti lor later, Zezi ti fer exakteman seki so Papa ti demann li pou fer. (Zan 17:4) Selman, li pa ti panse ki se zis li tousel ki ti pou kapav fer travay Zeova. Pandan sa trwa-z-an edmi ki li ti prese la, Zezi ti osi form lezot pou zot fer travay Zeova. Ek avan ki li retourn dan lesiel, li ti donn so bann disip responsabilite pou pran swin bann mouton Zeova ek pou diriz travay predikasion ek lansegnman. (Lir Efezien 4:8, 11.) Sertin parmi sa bann disip-la kitfwa ti ena anviron 20 an. Sa bann zom-la ti travay bien dir ansam ar Zezi ek zot ti fidel anver li. Kouma Zezi ti servi sa 40 dernie zour ki li ti lor later la pou form sa bann zom-la?

14. Pandan sa 40 dernie zour ki li ti lor later la, kouma Zezi ti ed so bann disip pou zot progrese? (Get zimaz osi.)

 ¹⁴ Zezi pa ti ezite pou donn so bann disip bann konsey ki fran, selman li ti fer sa avek boukou lamour. Par exanp, kan li ti remarke ki sertin parmi zot pa ti krwar ki li ti mor ek ki li ti resisite, li ti ed zot pou ki zot kapav konpran laverite. (Lik 24:25-27; Zan 20:27) Li ti osi dir zot ki, olie ki zot fer zot travay vinn zot priorite, se bann mouton Zeova ki ti bizin zot priorite. (Zan 21:15) Ek li ti rapel zot ki fode pa zot konpar seki zot pe fer pou Zeova ar seki lezot pe fer. (Zan 21:20-22) Li ti koriz bann fos lide ki zot ti ena konsernan Rwayom Bondie, ek li ti ed zot pou res konsantre lor travay predikasion. (Zist. 1:6-8) Kouma bann ansien kapav swiv lexanp Zezi?

15-16. (a) Kouma bann ansien kapav swiv lexanp Zezi? (b) Ki bienfe Patrick inn gagne parski li’nn swiv konsey enn ansien?

¹⁵ Kouma bann ansien kapav swiv lexanp Zezi? Zot bizin form ek ed bann frer, mem bann ki bien zenn, pou ki zot kapav ranpli bann kondision ki bizin pou ki zot asim plis responsabilite. c Ansien, kan to form lezot, fode pa ki to atann ki zot vinn parfe. Kan to konsey bann zenn frer, fer sa ar boukou lamour, pou ki zot kapav aprann ar to lexperyans. Lerla, bann-la pou konpran ki zot bizin fidel, zot bizin ena limilite, ek zot bizin dispoze pou servi lezot.—1 Tim. 3:1; 2 Tim. 2:2; 1 Pier 5:5.

¹⁶ Anou gete kouma enn frer ki apel Patrick inn gagn bann bienfe gras-a konsey enn ansien. Kan li ti zenn, parfwa Patrick pa ti zanti ek li ti koz brit ar lezot, mem ar bann ser. Enn ansien ki ena matirite ti remarke ki Patrick ena sa defo-la. Alor, avek boukou lamour, li ti donn li bann konsey ki fran. Patrick dir: “Mo bien kontan ki li’nn fer sa. Parfwa, mo ti dekouraze kan mo ti trouv lezot frer dan lasanble gagn bann privilez ki mwa mo ti anvi gagne. Me konsey ki sa frer-la ti donn  mwa, ti ed mwa pou konpran ki mo ti bizin ena limilite ek dezir pou servi mo bann frer ek ser, olie ki mo ena dezir pou gagn bann privilez dan lasanble.” Patrick ti swiv konsey sa ansien-la. Gras-a sa, li ti nome kouma ansien kan li ti ena 23 an.—Prov. 27:9.

17. Kouma Zezi ti montre ki li ti fer so bann disip konfians?

¹⁷ Zezi pa ti zis donn so bann disip responsabilite pou prese, me li ti osi donn zot responsabilite pou ansegn bann dimounn. Bann disip kitfwa pa ti santi zot kalifie pou asim sa responsabilite-la. Selman, Zezi ti sir ki zot ti pou reisi fer sa travay-la. Akoz sa, li ti dir zot: “Parey kouma mo Papa finn avoy mwa, mwa osi mo pe avoy zot.” (Zan 20:21) Par sa bann parol-la, Zezi ti montre ki li ti fer so bann disip konfians.

18. Kouma bann ansien kapav swiv lexanp Zezi?

¹⁸ Kouma bann ansien kapav swiv lexanp Zezi? Bann ansien ki ena sazes, zot form lezot ek zot les lezot asim bann responsabilite. (Fil. 2:19-22) Par exanp, bann ansien kapav demann bann zenn pou donn enn koudme kan ena netwayaz ek mintenans Lasal Renion. Ek kan zot donn bann-la enn travay pou fer, form zot ek fer zot konfians ki zot pou fer travay-la bien. Enn zenn ansien ki apel Matthew ena boukou rekonesans anver bann ansien ki’nn form li pou asim bann responsabilite dan lasanble. Bann-la ti ena konfians ki li ti pou fer travay-la bien ek zot pa ti res lor so ledo. Matthew dir: “Mem kan mo ti fer bann erer, zot ti fer mwa konpran ki sa ti form parti mo formasion ek zot ti ed mwa pou mo kontign amelior momem.” d

19. Ki nou bien deside pou fer?

¹⁹ Zezi ti servi sa 40 dernie zour ki li ti lor later la pou ankouraz lezot, pou ansegn zot, ek pou form zot. Anou bien deside pou swiv so lexanp. (1 Pier 2:21) Anplis, li pou ed nou pou fer sa, parski li’nn fer nou sa promes-la: “Mo avek zot toulezour ziska peryod lafin sa lemond-la.”—Mat. 28:20.