1. Sit sertin kitsoz ki Zezi inn fer pou nou.

 PENA personn lor later ki’nn ed lezot plis ki Zezi! Kan li ti lor later, li ti fer bann mirak pou ed bann dimounn. (Lik 9:12-17) Pli gran kado ki li’nn fer nou se li’nn donn so lavi pou nou. (Zan 15:13) Ek depi ki li’nn resisite, li pe kontign ed nou. Par exanp, li’nn demann so Papa pou avoy lespri sin pou ansegn nou ek rekonfort nou. (Zan 14:16, 17, not; 16:13) Ek gras-a nou bann renion, Zezi pe kontign donn nou seki nou bizin pou ki nou kapav kontign ansegn bann dimounn ek fer bann disip.—Mat. 28:18-20.

2. Dapre Efezien 4:7, 8, kisann-la form parti “bann don” ki Zezi inn donn lasanble?

² Anou get enn lot kitsoz ki Zezi inn fer pou nou. Lapot Pol dir ki, apre ki Zezi inn mont dan lesiel, “li’nn donn bann zom kouma bann don.” (Lir Efezien 4:7, 8.) Pol explike ki Zezi inn donn sa bann zom-la pou ki zot ed lasanble dan diferan fason. (Efe. 1:22, 23; 4:11-13) Azordi, parmi sa bann zom-la ena bann serviter lasanble, bann ansien, ek bann responsab sirkonskripsion. a Sa bann zom-la, zot inparfe ek zot fer bann erer. (Zak 3:2) Selman, zot “bann don” ki Zezi inn donn lasanble, ek li servi zot pou ed nou.

3. Servi enn lexanp pou explike kouma nou tou nou kapav soutenir bann serviter lasanble, bann ansien, ek bann responsab sirkonskripsion.

³ Zezi inn donn sa bann zom-la enn responsabilite bien inportan: Zot bizin ankouraz lasanble. (Efe. 4:12) Selman, nou tou nou kapav ed zot pou zot asim bien sa  responsabilite-la. Anou pran enn lexanp pou explik sa: Kan pe aranz enn Lasal Renion, pa tou dimounn ki kapav ede lor santie konstriksion. Selman, nou tou nou kapav soutenir sa travay-la. Par exanp, nou kapav ede kan nou amenn enn manze, enn bwar, ouswa kan nou fer lezot kitsoz. Dan mem fason, nou tou nou kapav soutenir bann serviter lasanble, bann ansien, ek bann responsab sirkonskripsion, par nou bann parol ek nou bann aksion. Dan sa lartik-la, nou pou trouve kouma travay sa bann frer-la fer nou gagn bann bienfe, ek nou pou trouve kouma nou kapav montre nou rekonesans anver zot ek anver Zezi.

BANN SERVITER LASANBLE “ED LEZOT”

4. Dan premie siek, kouma bann serviter lasanble ti “ed lezot”?

⁴ Dan premie siek, sertin frer ti pe servi kouma serviter lasanble. (1 Tim. 3:8) Dan 1 Korintien 12:28, se kitfwa lor zotmem ki Pol ti pe koze kan li ti dir ki zot ti pe “ed lezot.” Sa bann serviter lasanble la ti pe fer bann travay bien inportan pou ki bann ansien kapav res konsantre lor lansegnman ek pran swin bann frer ek ser lor plan spiritiel. Par exanp, bann serviter lasanble kitfwa ti pe fer bann kopi bann Lekritir, ouswa zot ti aste bann kitsoz pou fer sa bann kopi-la.

5. Ki kitsoz inportan bann serviter lasanble fer azordi?

⁵ Ki kitsoz inportan bann serviter lasanble fer azordi? (1 Pier 4:10) Sertin okip kont ek teritwar lasanble. Zot pas komann bann piblikasion, zot servi dan sono, dan servis lakey, ouswa zot ede pou fer mintenans Lasal. Tou seki zot fer bien inportan pou ki lasanble fonksionn bien. (1 Kor. 14:40) Anplis, sertin serviter lasanble fer bann size dan renion lasemenn ek zot osi fer bann diskour piblik. Enn serviter lasanble kapav osi servi kouma adzwin dan enn group. Ek parfwa, kan enn serviter lasanble ranpli bann kondision ki bizin, li kapav akonpagn enn ansien dan bann vizit pastoral.

6. Kifer nou bien rekonesan pou travay ki bann serviter lasanble fer?

⁶ Ki bienfe nou gagne gras-a travay bann serviter lasanble? Beberly, b enn ser ki res Bolivi, dir: “Gras-a tou seki bann serviter lasanble fer, mo reisi profit bien mo bann renion. Gras-a zot bon travay, mo kapav sant bann kantik, donn bann repons, ekout bann diskour, ek tir bann leson ar bann video ek bann zimaz ki pase dan renion. Kan nou Lasal, zot vey lor nou sekirite, ek kan nou pa kapav vinn Lasal, zot ede pou ki nou kapav swiv nou renion par video-konferans. Apre renion, zot ede pou netway Lasal, zot fer bann kont, ek zot donn nou bann piblikasion ki nou bizin. Mo ena boukou rekonesans pou zot!” Leslie, ki res Kolonbi ek ki madam enn ansien, dir: “Mo misie depann boukou lor bann serviter lasanble pou ki li kapav asim so bann responsabilite. Si pa ti ena zot, li ti pou ena pli boukou travay pou fer. Akoz sa, mo bien rekonesan anver zot, parski zot bien devwe ek zot touletan pre pou ede.” Sirman nou osi nou bien rekonesan pou tou seki nou bann serviter lasanble fer, pa vre!—1 Tim. 3:13.

7. Kouma nou kapav montre nou rekonesans pou nou bann serviter lasanble? (Get zimaz osi.)

⁷ Mem si nou ena rekonesans pou nou bann serviter lasanble, Labib ankouraz nou pou “montre rekonesans.” (Kol. 3:15) Krzysztof, enn ansien ki res Finland, explike kouma li montre so rekonesans. Li dir: “Mo avoy zot enn ti kart ouswa enn ti mesaz. Ladan, mo met enn verse Labib ek  mo dir zot kouma zot inn ankouraz mwa, ouswa kifer mo bien rekonesan pou travay ki zot fer.” Pascal ek Jael, ki res Nouvel-Kaledoni, priye pou bann serviter lasanble. Pascal dir: “Se dernie tan, nou’nn priye boukou pou nou bann serviter lasanble. Nou’nn remersie Zeova pou zot, ek nou’nn demann Li pou soutenir zot ek pou donn zot lafors.” Zeova ekout sa kalite lapriyer-la, ek gras-a sa, lasanble gagn bann bienfe.—2 Kor. 1:11.

BANN ANSIEN “PE TRAVAY DIR PARMI ZOT”

8. Kifer Pol ti dir ki bann ansien dan premie siek ti “travay dir”? (1 Tesalonisien 5:12, 13)

⁸ Dan premie siek, bann ansien ti travay dir dan lasanble. (Lir 1 Tesalonisien 5:12, 13; 1 Tim. 5:17) Zot ti “diriz” lasanble, setadir zot ti organiz bann renion, ek zot ti pran bann desizion ansam, kouma enn komite bann ansien. Zot ti osi “konsey” zot bann frer ek ser avek boukou lamour. Koumsa, bann-la ti kapav kontign ena enn lafwa for. (1 Tes. 2:11, 12; 2 Tim. 4:2) Biensir, sa bann zom-la ti bizin osi travay dir pou okip zot fami lor plan materyel ek spiritiel.—1 Tim. 3:2, 4; Tit 1:6-9.

9. Sit sertin responsabilite ki bann ansien ena azordi.

⁹ Azordi osi, nou bann ansien travay bien dir. Par exanp, zot “fer travay enn predikater.” (2 Tim. 4:5) Zot organiz bann teritwar, zot bien aktif dan predikasion, ek zot montre nou kouma pou prese ek ansegne dan enn fason ki efikas. Zot osi servi kouma bann ziz, ek kan zot fer sa, zot montre mizerikord ek zot pa get de lizie. Par exanp, kan enn Kretien fer enn pese grav, bann ansien ed li pou regagn enn bon lamitie ar Zeova. Me anmemtan, zot veye pou ki lasanble kontign res prop. (1 Kor. 5:12, 13; Gal. 6:1) Me travay pli inportan ki bann ansien fer azordi, se ki zot servi kouma bann berze. (1 Pier 5:1-3) Zot prepar bien zot bann diskour Biblik, zot fer zefor pou konn tou dimounn dan lasanble, ek zot fer bann vizit pastoral. Sertin ansien ede lor konstriksion ouswa mintenans bann Lasal Renion, ouswa pou organiz bann lasanble. Ena lezot ki servi dan Komite Liezon Ospitalie, ouswa dan Group Vizit Malad. Ek ena lezot ankor ki ena bann lezot responsabilite. Nou bann ansien travay bien dir pou nou, pa vre!

10. Kifer to bien apresie travay ki bann ansien fer dan lasanble?

¹⁰ Zeova ti predir ki bann ansien ti pou pran nou swin ek ki nou ti pou “nepli per.” (Zer. 23:4) Se seki Johanna, enn ser ki res Finland, ti resanti kan so mama ti tom bien malad. Johanna dir: “Mo ti gagn difikilte pou dir lezot seki mo ti resanti. Selman, kan mo ti santi mwa pre pou ouver mo leker, enn ansien ki mo pa ti tro kone ti ekout mwa avek pasians, li ti priye avek mwa, ek li ti rasir mwa ki Zeova kontan mwa. Mo pa tro rapel seki li ti dir mwa, me mo rapel ki kan mo ti fini koz avek li, mo ti nepli per. Mo kone ki se Zeova ki’nn avoy li dan bon moman pou ed mwa.” Eski twa osi bann ansien dan to lasanble inn deza ed twa?

11. Kouma nou kapav montre nou rekonesans anver bann ansien? (Get zimaz osi.)

¹¹ Zeova anvi ki nou montre enn gran rekonesans anver bann ansien “akoz travay ki zot pe fer.” (1 Tes. 5:12, 13) Henrietta, ki res Finland, dir: “Mem si bann ansien touletan pre pou ed lezot, sa pa vedir ki zot ena plis letan ouswa plis lenerzi ki nou, ouswa ki zot pena zot bann problem. Parfwa, mo zis dir zot: ‘Mo kapav dir twa enn kitsoz? To kone, to enn bon ansien. Mo espere to konn sa!’” Sera, enn ser ki res Tirki, dir: “Bann ansien osi bizin  lankourazman pou ki zot kapav kontign fer zot travay. Alor, nou kapav ekrir zot enn kart, invit zot pou manze, ouswa pres ansam avek zot.” Eski ena enn ansien ki to bien apresie parski to kone ki li pe travay bien dir dan lasanble? Alor, rod bann fason pou to montre to rekonesans anver li.—1 Kor. 16:18.

BANN RESPONSAB SIRKONSKRIPSION ANKOURAZ NOU

12. Dan premie siek, ki dispozision Zezi ti pran pou ankouraz bann lasanble? (1 Tesalonisien 2:7, 8)

¹² Zezi inn osi donn sertin zom responsabilite pou ed lasanble dan enn lot fason. Dan premie siek, li ti fer bann ansien dan Zerizalem avoy Pol, Barnabas, ek bann lezot frer vizit bann lasanble. (Zist. 11:22) Kifer? Pou fer mem travay ki bann serviter lasanble ek bann ansien, setadir pou ankouraz lasanble. (Zist. 15:40, 41) Sa bann zom-la ti fer boukou sakrifis pou zot kapav asim sa responsabilite-la. Parfwa, zot ti mem riske zot lavi pou zot kapav ansegn ek ankouraz zot bann frer ek ser.—Lir 1 Tesalonisien 2:7, 8.

13. Sit sertin responsabilite ki bann responsab sirkonskripsion ena.

¹³ Toule semenn, bann responsab sirkonskripsion bizin vizit bann lasanble. Pou fer sa, sertin kitfwa bizin mem vwayaz plizir santenn kilomet. Sak semenn, zot bizin fer plizir diskour, fer bann vizit pastoral, fer renion pionie, renion ansien ek bann renion predikasion. Zot bizin osi organiz bann lasanble sirkonskripsion ek rezional, ek prepar bann diskour ki zot gagne pou sa bann lasanble-la. Zot organiz osi bann renion spesial avek bann pionie ki ena dan sirkonskripsion, ek zot osi servi  kouma instrikter pou lekol pionie. Anplis bann lezot responsabilite ki zot ena, parfwa zot bizin osi fer bann kitsoz irzan ki biro nasional demann zot pou fer.

14. Kifer to bien kontan kan bann responsab sirkonskripsion vizit to lasanble?

¹⁴ Ki bienfe lasanble gagne gras-a vizit bann responsab sirkonskripsion? Enn frer ki res Tirki, dir: “Sak vizit responsab sirkonskripsion motiv mwa pou pas plis letan pou ed mo bann frer ek ser. Mo’nn zwenn plizir responsab sirkonskripsion, selman zame mo pa’nn santi ki zot pa ti anvi koz ar mwa ouswa ki zot ti tro okipe.” Johanna, ki nou ti mansione avan, ti pres ansam avek enn responsab sirkonskripsion, selman zot pa ti zwenn personn. Li dir: “Mem si nou pa ti zwenn personn, mo pa pou bliye sa zour-la. Mo de ser ti fek demenaze ek zot ti bien mank mwa. Me responsab sirkonskripsion la ti bien ankouraz mwa. Li ti ed mwa pou konpran ki, mem si aster-la nou lwin ar nou fami ek nou bann kamarad, dan lemond nouvo kan nou pou viv pou touletan, nou pou ena boukou lokazion pou pas bann bon moman avek zot.” Eski twa osi to’nn fer bann zoli lexperyans koumsa avek enn responsab sirkonskripsion?—Zist. 20:37–21:1.

15. (a) Dapre 3 Zan 5-8, kouma nou kapav montre nou rekonesans pou bann responsab sirkonskripsion? (Get zimaz osi.) (b) Kifer nou bizin montre ki nou apresie madam bann frer ki travay dir pou lasanble, ek kouma nou kapav fer sa? (Get lankadre “ Pa Bliye Zot Bann Madam Osi.”)

¹⁵ Lapot Zan ti ankouraz Gayis pou montre lospitalite anver bann frer ki ti pe vizit li ek pou “ed zot dan enn fason ki fer plezir Bondie.” (Lir 3 Zan 5-8.) Enn fason ki nou nou kapav fer sa, se kan nou invit responsab sirkonskripsion pou vinn manze kot nou. Enn lot fason ki nou fer sa, se kan nou asiste bann renion predikasion ki ena  pandan so vizit. Leslie, ki nou ti mansione avan, montre so rekonesans dan lezot fason osi. Li dir: “Mo priye Zeova pou ki Li donn zot seki zot bizin. Mo misie ek mwa, nou ekrir zot bann let pou dir zot ki kantite zot vizit inn ed nou.” Pa bliye ki enn responsab sirkonskripsion, li enn dimounn parey kouma nou. Parfwa li tom malad, li trakase, ek li mem dekouraze. Alor, kan to dir li enn bon parol ouswa to donn li enn ti kado, kitfwa Zeova pe servi twa pou reponn so lapriyer!—Prov. 12:25.

NOU BIZIN ‘BANN ZOM KI KOUMA BANN DON’

16. Ki kestion bann frer kapav poz zotmem? (Proverb 3:27)

¹⁶ Partou dan lemond, nou bizin plis frer pou servi dan bann lasanble. Si to enn frer ki batize, eski to kapav ‘ede’? (Lir Proverb 3:27.) Eski to kapav ranpli bann kondision ki bizin pou vinn enn serviter lasanble? Si to deza enn serviter lasanble, eski to ena dezir pou servi to bann frer ek ser kouma ansien? c Eski to kapav fer bann sanzman dan to lavi pou to ranpli form Lekol pou Bann Evanzelizater Rwayom Bondie? Gras-a formasion ki to pou gagne dan sa lekol-la, Zezi pou kapav servi twa pli bien. Si to panse ki to pa kapav fer sa bann kitsoz-la, priye Zeova. Demann Li so lespri sin pou ki to kapav asim bien tou responsabilite ki to gagne.—Lik 11:13; Zist. 20:28.

17. Ki prev nou ena ki se Zezi ki pe diriz nou azordi?

¹⁷ Bann zom ki Zezi inn etabli pou okip lasanble, zot pe travay bien dir. Sa se enn prev ki Zezi pe diriz nou pandan bann dernie zour. (Mat. 28:20) Nou bien rekonesan ki nou ena enn Lerwa kouma Zezi, pa vre! Li bien kontan nou, li zenere, li kone seki nou bizin, ek li donn nou bann zom ki pran nou swin. Alor, rod bann lokazion pou montre to rekonesans pou sa bann zom ki pe travay bien dir la. Ek kontign remersie Zeova parski se Limem ki donn nou “tou zoli don ek tou kado parfe.”—Zak 1:17.