LAMIZIK ti form parti dan kiltir bann Izraelit. Labib koz lor boukou dimounn ki ti zwe bann linstriman lamizik ek ki ti sant bann sante. Avredir, dis poursan Labib se bann sante, kouma par exanp liv Psom, Kantik Salomon, ek Lamantasion. Liv Music in Biblical Life, enn liv ki explike kouma lavi ti ete dan lepok Biblik, dir ki ti ena lamizik dan plizir aktivite ki bann Izraelit ti fer.

Lamizik dan zot lavi toulezour. Bann Izraelit ti zwe bann linstriman lamizik ek sant bann sante pou exprim zot santiman. (Iza. 30:29) Bann madam ti tap bann ti ravann, ti sant bann sante, ek ti danse kan ti ena enn nouvo lerwa, kan bann solda ti gagn enn lager, ek kan ti ena bann fet pou ador Zeova. (Ziz 11:34; 1 Sam. 18:6, 7; 1 Ler. 1:39, 40) Bann Izraelit ti sante osi pou exprim zot santiman kan enn kikenn ti mor. (2 Kro. 35:25) Enn ansiklopedi dir ki li kler ki bann Izraelit ti bien kontan lamizik.

Lamizik dan lakour rwayal. Dan Izrael, bann lerwa ti bien kontan lamizik. Lerwa Sail ti fer David vinn kot li pou zwe laarp pou li. (1 Sam. 16:18, 23) Apre sa, kan David ti vinn lerwa, li ti invant bann linstriman lamizik, li ti ekrir bann zoli sante, ek li ti organize pou ki enn lorkes zwe lamizik dan tanp Zeova. (2 Kro. 7:6; Amos 6:5) Dan so pale, Lerwa Salomon ti ena bann zom ek bann fam ki ti sante.—Ekle. 2:8.

Lamizik dan zot ladorasion. Pou bann Izraelit, lamizik ti bien inportan dan zot ladorasion pou Zeova. Par exanp, 4,000 zom ti zwe bann linstriman lamizik dan tanp Zerizalem. (1 Kro. 23:5) Zot ti zwe bann sinbal, bann laarp, bann tronpet, ek bann linstriman ki ena lakord. (2 Kro. 5:12) Me se pa zis bann mizisien profesionel ki ti servi lamizik pou ador Zeova. Boukou Izraelit ti sante kan zot ti al Zerizalem pou selebre bann fet. Ti apel sa bann sante-la Sante Pelrinaz. (Ps. 120-134) Bann liv zwif montre ki bann Izraelit ti osi sant bann Alel a pandan repa Pak.

Azordi, lamizik ankor bien inportan pou bann serviter Bondie. (Zak 5:13) Sa form parti nou ladorasion pou Zeova. (Efe. 5:19) Kan nou sant bann sante ansam ar nou bann frer ek ser, nou santi nou pros avek zot. (Kol. 3:16) Anplis, lamizik kapav donn nou lafors pou andir nou bann difikilte. (Zist. 16:25) Gras-a lamizik, nou kapav montre Zeova ki nou ena lafwa dan Li ek ki nou kontan Li.