Dan tanp, sa lantre-la ti zis avan Plas ki Sin. Bann Labib Tradiksion Lemond Nouvo ki ti sorti avan 2023, ti dir ki “lantre devan lakaz-la ti mezir 20 koude larzer, parey kouma larzer lakaz-la, ek so oter ti 120.” (2 Kro. 3:4) Bann lezot tradiksion Labib osi dir ki sa lantre-la ti mezir “120 koude” oter, savedir ki li ti enn latour ki ti fer 53 met oter.

Selman, Labib Tradiksion Lemond Nouvo ki ti sorti an 2023 dir ki lantre tanp Salomon “so oter ti 20 koude,” setadir apepre 9 met oter. a Anou get de-trwa rezon kifer nou’nn fer sa sanzman-la.

Dan 1 Lerwa 6:3, verse-la pa koz lor oter lantre tanp la. Dan sa verse-la, Zeremi koz lor longer ek larzer lantre-la, me li pa koz lor so oter. Dan prosin sapit, Zeremi donn bann detay lor bann kitsoz ki ena dan lakour tanp, kouma par exanp enn gran basin an metal ki ti apel Lamer, dis saret, ek de kolonn an kwiv ki ti devan lantre tanp. (1 Ler. 7:15-37) Si lantre-la ti vremem plis ki 50 met oter ek ki li ti pli ot ki tanp-la, kifer Zeremi pa ti koz lor la? Mem plizir santenn lane apre, bann istorien Zwif ti dir ki lantre tanp Salomon pa ti pli ot ki leres batiman-la.

Dapre bann exper, si latour-la ti mezir 120 koude oter, bann miray tanp pa ti pou kapav tini li. Dan lepase, bann gran latour an ros ek bann konstriksion an brik, kouma par exanp lantre bann tanp dan Lezip, ti larz anba ek pli mins lao. Me tanp Salomon ti diferan. Bann exper panse ki lepeser bann miray tanp Salomon pa ti plis ki sis koude, setadir 2.7 met. Akoz sa, Theodor Busink, enn exper dan listwar bann batiman, dir: ‘Dapre lepeser miray lantre tanp la, lantre-la pa ti kapav 120 koude oter.’

Skrib ki ti rekopie 2 Kronik 3:4 kitfwa ti fer enn erer. Mem si dan sertin maniskri inn ekrir “120” dan sa verse-la, dan bann lezot maniskri ki fiab, kouma par exanp Codex Alexandrinus (5^em siek) ek Codex Ambrosianus (6^em siek), inn ekrir “20 koude.” Kouma enn skrib inn kapav fer enn erer ek ekrir “120”? Dan lang Ebre, bann mo ki servi pou “100” ek “koude” zot resanble. Akoz sa, li posib ki enn skrib ti ekrir “100” dan plas “koude.”

Li bon ki nou fer zefor pou konpran pli bien bann detay lor tanp Salomon, selman nou bizin konsantre nou plis lor seki tanp-la reprezante, setadir gran tanp spiritiel Bondie. Nou bien rekonesan ki Zeova invit tou so bann serviter pou ador Li dan so tanp!—Ebre 9:11-14; Rev. 3:12; 7:9-17.