Se zis enn parmi plizir kitsoz kifer bann lennmi Zezi ti kritik li ek so bann disip. Lalwa Mozaik ti explike ki bann kitsoz ki ti fer enn dimounn vinn inpir, par exanp, ekoulman (kan likid sorti dan organn sexiel), lalep, ouswa kan tous bann dimounn ouswa bann zanimo mor. Lalwa ti donn osi bann instriksion kouma enn dimounn ti kapav revinn pir. Enn dimounn ti kapav revinn pir kan li ti fer enn sakrifis, kan li ti bengne, ouswa kan ti vers delo lor li.​—Levitik, sapit 11-15; Nonb, sapit 19.

Bann ansegnan Zwif, ki bann dimounn apel osi bann rabin, ti azout zot bann prop lalwa dan sa bann lalwa-la. Enn liv referans dir ki bann rabin ti met bann lezot lalwa ouswa bann lalwa pli detaye lor bann kitsoz ki ti kapav fer enn dimounn vinn inpir ek kouma sa dimounn-la ti kapav fer lezot vinn inpir. Bann rabin ti azout osi bann lezot lalwa konsernan bann resipian ek lezot kitsoz ki ti res pir ouswa ki ti kapav vinn inpir. Anplis, zot ti kree osi bann koutim ki bann dimounn ti bizin swiv pou revinn pir.

Bann lennmi Zezi ti demann li: “Pou ki rezon to bann disip pa mars dapre tradision nou bann gran dimounn? Pou kifer zot manz dipin ar lame sal?” (Mark 7:5) Sa bann Farizien-la pa ti pe fer referans ar enn bon lizienn, setadir, lav lame avan enn repa. Bann Farizien ti fer koutim vers delo lor lame enn dimounn avan li manze vinn enn lalwa. Sa liv referans-la dir osi ki bann rabin “ti fer bann gran deba pou kone ki resipian ti bizin servi pou vers delo, ki kalite delo ti bizin servi, kisannla ti bizin vers delo-la, ek ziska kotsa ti bizin vers delo lor lame.”

Kouma Zezi ti reazir ar tou sa bann lalwa ki bann zom ti etabli la? Li ti dir bann sef relizie Zwif: “Izai ti ena rezon kan li ti profetiz lor zot, bann ipokrit, kan li ti ekrir dan so liv, ‘Sa lepep la ador mwa zis ar so labous me so leker bien-bien lwin ar mwa [Zeova]. Pou nanye zot [kontign, NW] ador mwa parski zot fer zot lalwa pas pou lalwa Bondie.’ Zot met lalwa Bondie dan enn kwin me zot gard tradision bann imin.”​—Mark 7:6-8.