1, 2. (a) Kouma maryaz finn existe? (b) Ki kitsoz premie zom ek fam finn bizin konpran konsernan maryaz? (Get zimaz dan koumansman lartik.)

MARYAZ se enn kitsoz normal. Me kouma maryaz finn existe, ek ki so lobzektif? Repons sa de kestion-la pou permet nou ena enn bon fason panse lor maryaz ek lor so bann bienfe. Bondie ti kree premie zom, Adan, ek ti demann li pou donn nom bann zanimo. Adan ti remarke ki tou zanimo ti ena zot per, “me pou zom, pa ti ena enn led ki ti pou al bien ar li.” Alor Bondie ti fer Adan tom dan enn profon somey, Li ti tir enn kot ar li ek ti form enn fam. Zeova ti amenn li ar Adan, ek li ti vinn so madam. (Lir Zenez 2:20-24. *) Kouma nou trouve isi, maryaz se enn kado ki Zeova inn done.

 ² Boukou lane plitar, Zezi ti redir seki Zeova ti dir dan zardin Edenn: ‘Enn zom pou kit so papa ek so mama, li pou atas li ar so fam e toulede pou vinn enn sel laser.’ (Matie 19:4, 5) Parski Bondie finn pran enn kot ar Adan pou kree premie fam, sa koup-la finn bizin konpran ki zot bizin res atase ar zot kamarad kouma enn sel laser. Zeova zame pa ti anvi ki mari-fam divorse ouswa ki zot ena plis ki enn konzwin.

3. Ki lobzektif inportan maryaz ti ena?

³ Adan ti bien ere avek so fam, li ti apel li Ev. Ev ti enn led ki ti al bien avek Adan. Adan ek Ev toule-de ti pou ere ansam kouma mari ek fam. (Zenez 2:18) Enn lobzektif inportan ki maryaz ti ena, se ki bann dimounn ranpli later. (Zenez 1:28) Bann garson ek bann tifi ti pou kontan zot paran, me apre zot ti pou kit zot paran pou marye ek ena zot prop fami. Bann dimounn ti pou ranpli later ek ti pou fer li vinn enn paradi.

4. Ki finn ariv premie maryaz?

⁴ Premie maryaz finn gate kan Adan ek Ev ti dezobeir Zeova. “Serpan orizinel,” Satan Lediab, ti anbet Ev ek ti dir li ki si li ti manz frwi ki ena lor “pie konesans bon ek move,” li ti pou gagn enn konesans spesial. Satan ti pretann ki si Ev ti manz frwi sa pie-la, sa ti pou permet li deside ki kitsoz bon ek ki kitsoz move. Kan Ev ti desid pou manz sa frwi-la san koz ar Adan avan, li pa ti respekte so mari kouma sef fami. Ek kan Adan ti aksepte frwi ki so fam ti donn li, li ti dezobeir Bondie.​—Revelasion 12:9; Zenez 2:9, 16, 17; 3:1-6.

5. Ki nou kapav aprann ar repons ki Adan ek Ev ti donn Zeova?

⁵ Kan Zeova ti demann zot seki’nn arive, Adan ti zet tor lor so fam. Li ti dir: “Sa fam ki to’nn done pou res avek mwa la, li’nn donn mwa frwi sa pie-la ek lerla mo’nn manze.” Ev li, li’nn zet tor lor serpan ki ti anbet li la. (Zenez 3:12, 13) Adan ek Ev finn donn bann rezon bien bet kifer zot inn dezobeir Zeova, ek Zeova ti konsider zot kouma bann rebel. Zot lexanp se enn lavertisman pou nou! Pou ki enn maryaz reisi, mari ek fam bizin obeir Zeova ek sakenn bizin responsab so prop aksion.

6. Kouma to pou explik Zenez 3:15?

⁶ Malgre seki Satan inn fer dan zardin Edenn, Zeova finn fer sir ki limanite ena enn lespwar pou lavenir. Nou trouv sa lespwar-la dan premie profesi Labib. (Lir Zenez 3:15. *) Sa profesi-la anonse ki “desandans” “fam-la” pou kraz latet Satan. Bann kreatir spiritiel ki pe servi avek lazistis dan lesiel ena enn relasion bien pros avek Bondie. Zeova konsider zot kouma so madam. Zeova pou avoy enn  parmi sa bann kreatir spiritiel la pou “kraz” Satan Lediab. Gras-a li, bann imin obeisan pou kapav profit seki premie koup imin finn perdi. Zot pou gagn posibilite pou viv pou touletan lor later, parey kouma Zeova ti prevwar o-koumansman.​—Zan 3:16.

7. (a) Depi ki Adan ek Ev finn rebele, ki finn ariv bann maryaz? (b) Ki Zeova atann ki bann mari ek bann fam fer?

⁷ Kan Adan ek Ev finn rebele, sa finn ena enn move lefe lor zot maryaz ek lor tou bann maryaz ki finn ena apre. Par exanp, Ev ek tou bann madam ki’nn vini apre ti pou bien soufer kan zot ti pou gagn zanfan. Bann fam ti pou atann ki zot mari donn zot boukou lamour ek latansion, me bann mari ti pou fer dominer ar zot fam, parfwa mem maltret zot, parey kouma nou trouve azordi. (Zenez 3:16) Zeova atann ki bann mari asim zot rol antan ki sef fami avek lamour, ek Li atann ki bann fam soumet ar zot mari. (Efezien 5:33) Kan bann koup Kretien korpere ansam, zot kapav regle boukou problem.

8. Explike ki finn ariv maryaz depi lepok Adan ziska Deliz.

⁸ Avan ki Adan ek Ev mor, zot ti deza ena bann garson ek bann tifi. (Zenez 5:4) Zot premie garson, Kain, ti marye avek enn tifi dan so fami mem. Dapre Labib, premie misie ki ti ena de madam se Lamek, enn desandan Kain. (Zenez 4:17, 19) Depi lepok Adan ziska lepok Noe, ti ena bien tigit dimounn ki ti ador Zeova. Parmi sa bann adorater fidel la ti ena Abel, Enok, ek Noe avek so fami. Labib dir ki dan lepok Noe “bann garson vre Bondie ti koumans remark tifi bann zom ek ti trouve ki zot bien zoli. Alor tou bann tifi ki zot ti swazir, zot ti fer bannla vinn zot madam.” Me sa ti kont natir, ek sa bann anz-la ek zot madam ti gagn bann garson ki ti bann zean bien violan. Ti apel zot bann Nefilim. Pandan sa lepok-la, “bann dimounn ti pe fer boukou move kitsoz lor later ek dan zot leker, touletan zot ti pe pans seki move.”​—Zenez 6:1-5.

9. Ki Zeova ti fer ar bann move dimounn dan lepok Noe, ek ki leson nou bizin aprann ar seki finn arive dan sa lepok-la?

⁹ Zeova ti dir ki Li ti pou amenn enn gran inondasion lor later pou detrir tou bann move dimounn. “Noe, enn predikater lazistis,” ti dir sa bann dimounn-la ki ti pou ena enn gran Deliz. (2 Pier 2:5) Me zot pa finn ekout Noe parski zot ti tro okipe ar zot bann aktivite toulezour, kouma par exanp maryaz. Zezi ti konpar lepok Noe ar nou lepok. (Lir Matie 24:37-39.) Azordi, laplipar dimounn pa ekout nou mesaz konsernan bon nouvel lor Rwayom Bondie. Nou pe pres sa mesaz-la avan ki sa move lemond-la detrir. Ki leson nou kapav aprann konsernan lepok Deliz? Fode pa nou les bann kitsoz kouma maryaz ek gagn bann zanfan vinn telman inportan pou nou, ki nou bliye ki zour Zeova bien pre.

10. (a) Dan boukou kiltir, ki kalite lavi boukou dimounn ti pe amene? (b) Kouma lavi maryaz Abraam ek Sara enn bon lexanp pou bann koup?

¹⁰ Noe ti ena enn sel madam. Sakenn so bann garson osi ti ena enn sel madam.  Selman, apre Deliz, boukou misie ti ena plis ki enn madam. Dan sa lepok-la, limoralite sexiel ti enn kitsoz normal dan boukou kiltir ek sa ti mem form parti dan bann koutim relizie. Kan Abraam ek Sara ti al dan Kanaan, zot ti antoure avek bann dimounn imoral ki pa ti montre okenn respe pou maryaz. Zeova ti detrir lavil Sodom ek Gomor parski bann dimounn laba ti bien imoral. Me Abraam ti diferan ar sa bann dimounn-la. Li ti enn bon sef fami, ek Sara finn les enn bon lexanp kan li finn soumet ar so mari. (Lir 1 Pier 3:3-6.) Abraam ti fer sir ki so Garson Izaak marye avek enn tifi ki ti ador Zeova. Ek Izaak osi ti fer parey pou so garson Zakob. Se bann garson Zakob mem ki plitar ti vinn bann anset 12 tribi Izrael.

11. Kouma Lalwa Mozaik ti protez bann Izraelit?

¹¹ Plitar, Zeova ti fer enn lalians avek nasion Izrael. Li ti donn zot Lalwa Mozaik. Si zot ti obeir sa Lalwa-la, bann mari ek bann fam ti pou protez zot kont bann kitsoz ki ti kapav elwagn zot ar Zeova. Par exanp, ti ena bann lalwa konsernan bann tradision kouma poligami, ek bann Izraelit pa ti gagn drwa marye avek bann dimounn ki ti ador bann fos bondie. (Lir Deteronom 7:3, 4. *) Kan ti ena bann problem grav dan enn koup, bann ansien ti ed zot. Ti ena osi bann lalwa pou ziz bann dimounn ki pa ti fidel, ki ti zalou ek ki ti soupsonn zot konzwin. Mem si ti gagn drwa divorse, ti ena bann lalwa pou protez sak konzwin. Par exanp, enn misie ti kapav divors ar so fam si “li ti dekouver enn kitsoz degoutan lor li.” (Deteronom 24:1) Labib pa explike ki ete sa “kitsoz degoutan” la, me enn mari pa ti sipoze servi tou ti erer ki so fam fer kouma enn exkiz pou divors ar li.​—Levitik 19:18.

12, 13. (a) Dan lepok Malaki, kouma sertin misie ti pe tret zot madam? (b) Azordi, si enn kikenn batize pran konzwin so prosin, ki konsekans sa kapav ena?

¹² Dan lepok profet Malaki, boukou Zwif ti servi tou sort kalite pretex pou divors ar zot madam. Zot ti divors ar zot fam pou ki zot kapav marye avek bann ki ti pli zenn ouswa avek bann ki pa ti servi Zeova. Dan lepok Zezi, bann Zwif ti ankor pe divorse pou “ninport ki rezon.” (Matie 19:3, NW.) Zeova ti ayir sa bann divors ki ti kont lalwa la.​—Lir Malaki 2:13-16. *

¹³ Azordi, pou bann Temwin Zeova, li pa akseptab ki enn kikenn trayir so konzwin, ek sa, se enn kitsoz ki pa arive souvan. Me sipoze enn frer ouswa enn ser ki marye komet ladilter ek divorse zis pou ki li marye avek enn lot dimounn. Si li pa’nn repanti, pou bizin exkli li pou ki kongregasion  res prop ek pir. (1 Korintien 5:11-13) Sa dimounn-la pou bizin ‘prodwir bon fri ki montre ki li finn repanti’ avan ki li re-integre dan kongregasion. (Lik 3:8; 2 Korintien 2:5-10) Pena enn kantite letan presi ki bizin pase avan ki sa dimounn-la re-integre. Ofet, enn exkli kapav pran enn an ouswa plis pou prouve ki li’nn vremem repanti ek pou ki li re-integre dan kongregasion. Kanmem sa, dimounn-la pou bizin “prezant . . . devan tribinal Bondie.”​—Romin 14:10-12; get Latour Degard 15 Fevriye 1980 an Franse, paz 31-32.

14. Dan ki diferan fason Lalwa ti ed bann Izraelit?

¹⁴ Bann Izraelit ti anba Lalwa Mozaik pandan plis ki 1,500 an. Lalwa ti ed pep Bondie dan diferan fason. Par exanp, Lalwa ti donn zot bann prinsip pou rezoud zot bann problem familial, ek ti gid zot ver Lemesi. (Galat 3:23, 24) Kan Zezi ti mor, pep Bondie ti nepli anba Lalwa Mozaik ek Bondie ti pran enn nouvo dispozision. (Ebre 8:6) Selman, ena sertin kitsoz ki Lalwa Mozaik ti permet, me ki asterla nepli akseptab pou bann Kretien.

15. (a) Ki bann prinsip bann Kretien ti pou bizin swiv konsernan maryaz? (b) Lor ki bann kitsoz enn Kretien bizin reflesi si li pe pans pou divorse?

¹⁵ Enn zour, bann Farizien ti poz Zezi enn kestion lor maryaz. Zezi ti dir zot ki Bondie ti permet ki bann Izraelit divorse dapre Lalwa Mozaik, mem si se pa sa ki Li ti anvi o-koumansman. (Matie 19:6-8) Seki Zezi ti dir ti montre ki asterla, bann Kretien ti pou bizin viv dan fason ki Bondie ti anvi ki bann koup viv o-koumansman dan zardin Edenn. (1 Timote 3:2, 12) Bann ki’nn marye zot “enn sel laser,” alor zot ti bizin res ansam. Zot lamour pou Bondie ek pou sakenn zot kamarad ti pou fer zot res ini. Bann konzwin ki divorse san ki ena limoralite sexiel pa lib pou remarye. (Matie 19:9) Enn kikenn kapav desid pou pardonn so konzwin ki’nn komet limoralite me ki’nn repanti. Si li fer sa, li pou imit Osea, ki ti pardonn so fam Gomer, ki ti komet limoralite. Li pou osi imit Zeova ki ti pardonn bann Izraelit ki ti repanti. (Osea 3:1-5) Anplis, si enn kikenn kone ki so konzwin finn komet ladilter, me kanmem li desid pou rekoumans gagn bann relasion sexiel avek li, savedir ki li’nn pardonn so konzwin. Dan sa ka-la, pena okenn baz Biblik pou divorse.

16. Ki Zezi ti dir konsernan bann selibater?

¹⁶ Zezi ti dir ki limoralite sexiel se sel rezon ki bann vre Kretien ena pou divorse. Apre sa, li ti mansionn “bann ki ena don” pou res selibater. Zezi ti dir: “Si enn kikenn kapav aksepte sa, ki li aksepte sa.” (Matie 19:10-12, NW.) Boukou desid pou res selibater parski zot anvi servi Zeova san okenn distraksion, ek zot merit bann felisitasion pou sa desizion-la!

17. Ki kapav ed enn Kretien pou deside si li pou marye ouswa res selibater?

¹⁷ Ki kapav ed enn dimounn pou deside si li pou marye ouswa res selibater? Enn dimounn bizin deside si li kapav kiltiv sa don pou res selibater la. Lapot Pol ti ankouraz bann Kretien pou res selibater. Me li’nn osi dir: “Parski limoralite sexiel finn bien fane partou, ki sak zom  ena so prop fam, ek sak fam ena so prop mari.” Pol ti azoute: “Si zot pa kapav kontrol zot, ki zot marye, parski li pli bon zot marye ki zot anflame avek dezir.” Alor enn kikenn kapav desid pou marye pou evite ki so bann dezir sexiel bien for amenn li komet limoralite ouswa mastirbe. Selman, bann selibater bizin reflesi bien si zot ena laz pou marye. Pol ti dir: “Si kikenn panse ki li pe mal azir si li pa marye, ek si li’nn fini pas sa peryod dan lavi enn zenn kot so bann dezir sexiel bien for, alor se seki bizin arive: Les li fer seki li anvi; li pa pe fer pese. Ki zot marye.” (1 Korintien 7:2, 9, 36, NW; 1 Timote 4:1-3) Fode pa nou ankouraz enn kikenn pou marye zis parski li ena enn gran dezir sexiel ki laplipar zenn ena kan zot ariv dan enn sertin laz. Sa dimounn-la kitfwa pena ase matirite pou asim bann responsabilite ki maryaz inplike.

18, 19. (a) Ki ete enn maryaz Kretien? (b) Ki nou pou examine dan prosin lartik?

¹⁸ Enn maryaz Kretien, se enn maryaz ant enn misie ek enn madam ki batize ek ki kontan Zeova avek tou zot leker. Zot bizin osi telman kontan zot kamarad ki zot anvi viv ansam pou touletan. Zeova pou beni zot parski zot inn obeir konsey pou marye zis “avek enn Kretien” ki dan laverite. (1 Korintien 7:39) Ek zot pou reisi zot lavi maryaz si zot kontign obeir bann konsey ki ena dan Labib.

¹⁹ Azordi, nou pe viv “dan bann dernie zour,” ek boukou dimounn pena bann kalite ki bizin pou reisi zot lavi maryaz. (2 Timote 3:1-5, NW.) Dan prosin lartik, nou pou examinn bann prinsip Labib bien inportan ki kapav ed bann koup Kretien pou viv ere ek pou reisi zot lavi maryaz, malgre bann difikilte. Sa pou ed zot pou kontign mars lor semin ki amenn ver lavi pou touletan.​—Matie 7:13, 14.