1, 2. (a) Kouma nou kone ki li posib ki nou met nouvo personalite lor nou? (b) Ki bann kalite ki form parti dan nouvo personalite nou trouve dan Kolosien 3:10-14?

DAN New World Translation of the Holy Scriptures, nou trouv lexpresion “nouvo personalite” de fwa. (Efezien 4:24, NW; Kolosien 3:10, NW.) Se enn personalite ki’nn “kree dapre volonte Bondie.” Li posib pou nou met sa nouvo personalite-la lor nou. Kifer? Parski Zeova inn kree bann dimounn dan so resanblans, alor nou kapav imit so bann zoli kalite.​—Zenez 1:26, 27; Efezien 5:1.

² Li vre ki parski nou inparfe, parfwa nou tou nou ena bann move dezir. Ek nou lanvironnman osi ena enn linflians lor nou. Me Zeova kapav ed nou pou vinn bann dimounn ki Li anvi nou vini. Ki kapav motiv nou pou vinn sa kalite dimounn-la? Anou examinn plizir bon kalite ki form parti dan nouvo personalite. (Lir Kolosien 3:10-14, NW.)  Apre sa, nou pou gete kouma nou kapav manifeste sa bann kalite-la dan nou minister.

3. Sit enn kalite ki form parti dan nouvo personalite.

³ Fode pa nou fer preferans. Pol ti explike ki se enn kalite inportan ki form parti dan nouvo personalite. Li ti dir: “Pena ni Grek ni Zwif, ni seki sirkonsi ni seki pa sirkonsi, etranze, tribi pa sivilize, esklav, [ouswa zom] lib.” Dan kongregasion, fode pa nou panse ki nou pli bon ki lezot akoz nou ras, nasionalite, ouswa nou kiltir. Kifer? Parski antan ki bann disip Zezi Kris, “nou tou enn sel.”​—Kolosien 3:11; Galat 3:28.

4. (a) Kouma bann serviter Zeova bizin tret lezot? (b) Ki sitiasion kapav fer bann Temwin gagn difikilte pou gard zot linite?

⁴ Kan nou met nouvo personalite lor nou, nou tret tou dimounn avek respe ek dignite, mem si zot enn lot ras, ouswa zot ena enn lot pozision dan lasosiete. (Romin 2:11) Dan sertin pei, parfwa li difisil pou fer sa. Par exanp, lontan, dan l’Afrique du Sud, gouvernman ti separ bann ras ek ti fer sak ras res dan diferan kartie. Laplipar bann dimounn ki res dan sa pei-la, parmi ena osi bann Temwin Zeova, ankor pe viv dan sa bann kartie-la. Komite Santral ti anvi ankouraz nou bann frer laba pou “ouver zot leker,” setadir pou ena plis lamour. Akoz sa, an Oktob 2013, zot ti donn zot lakor pou ki ena enn dispozision spesial ki ti pou ed bann frer ek ser dan diferan ras pou aprann konn zot kamarad pli bien.​—2 Korintien 6:13.

5, 6. (a) Ki dispozision ti pran dan enn pei pou ed pep Bondie vinn pli soude? (Get zimaz dan koumansman lartik.) (b) Ki rezilta sa finn ena?

⁵ Bann frer ti fer laranzman pou ki pandan sertin wikenn, bann Temwin ki dan de kongregasion diferan lang ouswa diferan ras, pas letan ansam. Bann frer ek ser ki ti dan sa de kongregasion-la ti pres ansam, ti al renion ansam, ek ti invit zot bann frer ek ser kot zot. Plizir santenn kongregasion ti partisip dan sa program-la, ek biro nasional ti gagn bann komanter bien pozitif. Sa ti mem inpresionn sertin dimounn ki pa ti Temwin. Par exanp, enn minis relizie ti dir: “Mo pa enn Temwin, me mo pou dir ki zot ena enn travay predikasion ki extra bien organize, ek zot tou zot bien soude mem si zot sorti dan diferan ras.” Ki lefe sa dispozision-la ti ena lor bann frer ek ser?

⁶ O-koumansman, Noma, enn ser ki koz Kosa ti ezite pou invit bann Temwin ki sorti dan kongregasion Angle kot li parski so lakaz ti bien sinp. Me apre ki li ti pres avek bann Temwin blan ek li ti al kot zot, li ti santi li pli alez. Li ti dir: “Zot bann dimounn normal parey kouma nou!” Alor, kan bann frer ek ser dan kongregasion Angle ti vinn pres avek  bann ki dan kongregasion Kosa, Noma ti invit sertin pou vinn manze kot li. Li ti inpresione kan li ti remarke ki enn so bann invite, enn ansien ki ti blan, ti bien kontan pou asiz lor enn kes an plastik. Zordi bann frer ek ser ankor pe swiv sa program-la ek gras-a sa, boukou frer ek ser inn fer bann nouvo kamarad ek pe kontign aprann konn bann frer ek ser ki diferan ar zot.

7. Kifer nou bizin kontign ena konpasion?

⁷ Tanki lemond Satan pou la, bann serviter Zeova pou gagn bann difikilte. Nou tou nou kapav konn bann problem somaz, bann maladi bien grav, persekision, katastrof natirel, perdi bann dibien materyel akoz laviolans, ouswa pas par lezot difikilte. Alor, pou ed sakenn nou kamarad dan bann moman difisil, nou bizin vremem ena konpasion. Si nou ena enn gran konpasion, sa pou pous nou pou tret lezot avek bonte. (Efezien 4:32, NW.) Sa bann kalite-la form parti dan nouvo personalite. Zot pou ed nou pou imit Bondie ek pou rekonfort lezot.​—2 Korintien 1:3, 4.

8. Ki bann bon rezilta sa kapav ena kan nou manifeste konpasion ek bonte anver zot tou dan kongregasion? Donn enn lexanp.

⁸ Si dan nou kongregasion ena bann etranze ouswa sertin ki defavorize, kouma nou kapav manifeste ankor plis bonte anver zot? Nou bizin bien akeyir zot, fer kamarad ar zot, ek ed zot pou trouve ki nou bizin zot dan kongregasion. (1 Korintien 12:22, 25) Par exanp, Dannykarl ti kit Philippines pou al res Japon. Parski li ti enn etranze, dan so travay, bann dimounn ti tret li mwin bien ki lezot travayer. Me, enn zour li ti asiste renion bann Temwin Zeova. Dannykarl ti dir: “Laplipar dan lasistans ti bann Zapone, pourtan zot ti bien akeyir mwa. Koumadir depi lontan nou ti konn nou kamarad.” Bann frer ek ser ti kontign manifeste bonte anver li ek sa ti ed li pou vinn pros ar Zeova. Avek letan, Dannykarl inn pran batem, ek zordi li pe servi kouma enn ansien. Bann lezot ansien bien kontan ki Dannykarl ek so madam form parti dan zot kongregasion. Zot dir: “Zot pionie ek zot amenn enn lavi bien sinp. Zot enn bon lexanp parski zot fer Rwayom Bondie pas avan tou kitsoz dan zot lavi.”​—Lik 12:31.

9, 10. Ki bann bon rezilta nou gagne kan nou montre konpasion dan nou minister? Donn bann lexanp.

⁹ Nou ena posibilite pou “fer dibien anver tou dimounn” kan nou pres bon nouvel lor Rwayom Bondie. (Galat 6:10, NW.) Boukou Temwin ena enn gran konpasion pou bann imigran ek esey aprann zot lang. (1 Korintien 9:23, NW.) Gras-a zot bann zefor, zot finn gagn bann bon rezilta. Par exanp, enn ser pionie dan l’Australie, ki apel Tiffany, ti aprann Swahili pou ki li kapav al ede dan enn kongregasion Swahili dan lavil Brisbane. Mem si li ti difisil pou aprann sa lang-la, azordi so lavi ena plis sans. Tiffany dir: “Si zot anvi ena enn minister extra interesan, al servi dan enn kongregasion ki koz enn lot lang. Sa inn fer pou zot! Se koumadir zot pe fer enn vwayaz san ki zot bizin kit zot lavil. Sa donn zot lokazion pou frekant nou fami  internasional pli bien ek pou gout linite extraordiner ki ena ant nou.”

¹⁰ Anou get osi lexanp enn fami dan Japon. Zot tifi ki apel Sakiko, dir: “Souvan nou ti zwenn bann imigran Brezilien kan nou ti pe prese. Kan nou ti montre zot bann verse kouma Revelasion 21:3, 4 ouswa Psom 37:10, 11, 29, dan zot Labib an Portige, zot ti ekout bien ek parfwa zot ti mem plore.” Sa fami-la ti ena boukou konpasion pou sa bann imigran-la ek zot ti anvi ed zot pou konn laverite, alor zot ti koumans aprann lang Portige an fami. Plitar, sa fami-la ti ede pou form enn kongregasion an lang Portige. Pandan plizir lane, zot finn ed boukou imigran pou vinn bann serviter Zeova. Sakiko dir: “Sa finn demann nou boukou zefor pou aprann Portige, me bann benediksion ki nou’nn gagne zot boukou pli gran ki bann zefor ki nou’nn fer. Nou ena enn gran rekonesans anver Zeova.”​—Lir Zistwar Bann Apot 10:34, 35.

11, 12. (a) Kan nou met nouvo personalite lor nou, kifer nou bizin fer sa avek bann bon mobil? (b) Ki pou ed nou pou gard nou limilite?

¹¹ Enn rezon kifer nou met nouvo personalite lor nou se parski nou anvi donn Zeova loner, pa pou ki lezot donn nou laglwar. Pa bliye ki mem enn anz parfe ti vinn fier ek ti fer pese. (Konpar avek Ezekiel 28:17.) Nou inparfe, alor li bien pli fasil pou nou vinn fier. Kanmem sa, nou kapav ena limilite. Ki pou ed nou pou fer sa?

¹² Enn kitsoz ki pou ed nou ena limilite se kan nou lir Parol Bondie toulezour ek nou medit lor seki nou lir. (Deteronom 17:18-20) Nou bizin sirtou medit lor seki Zezi finn ansegn nou ek lor so limilite. (Matie 20:28) Zezi ti telman ena limilite ki li ti lav lipie so bann zapot. (Zan 13:12-17) Enn lot kitsoz ki nou kapav fer se priye Zeova pou gagn so lespri sin. Si nou ena kit tandans pou santi nou pli siperyer ki lezot, so lespri sin kapav ed nou pou lit kont sa.​—Galat 6:3, 4; Filipien 2:3.

13. Ki benediksion nou gagne kan nou ena limilite?

¹³ Lir Proverb 22:4. * Zeova demann  nou pou ena limilite. Limilite fer nou gagn boukou benediksion. Kan nou ena limilite, pou ena plis lape ek linite dan kongregasion. Anplis, Zeova pou donn nou so faver ki nou pa merite. Lapot Pier ti dir: “Zot tou bizin met lor zot enn tabliye ki apel limilite pou zot servi zot kamarad, parski Lekritir dir: ‘Bondie li kont bann ki ena lorgey, me li donn so lagras [“faver ki nou pa merite,” NW] bann ki viv dan imilite.’”​—1 Pier 5:5.

14. Kisannla ki’nn donn meyer lexanp ki ena konsernan douser ek pasians?

¹⁴ Dan lemond azordi, si enn dimounn ena douser ek pasians, lezot souvan panse ki li feb. Me sa pa vre. Sa bann zoli kalite-la sorti kot Zeova, Personaz pli pwisan dan liniver. Li’nn donn meyer lexanp ki ena konsernan douser ek pasians. (2 Pier 3:9) Par exanp, mazine ki kantite pasians Zeova ti ena kan Li ti reponn Abraam ek Lot atraver So bann anz. (Zenez 18:22-33; 19:18-21) Ek Li ti osi montre pasians kan nasion Izrael ti dezobeir Li pandan plis ki 1,500 an.​—Ezekiel 33:11.

15. Kouma Zezi inn montre ki li ena douser ek pasians?

¹⁵ Zezi ti ena enn “karakter . . . dou.” (Matie 11:29) Li ti ena enn gran pasians anver so bann disip malgre zot bann febles. Pandan so minister lor later, souvan bann dimounn ti kritik li ek ti akiz li dan enn fason inzis. Me Zezi ti kontign ena douser ek pasians ziska so lamor. Kan Zezi ti pe extra soufer lor poto soufrans, li ti demann so Papa pou pardonn bann dimounn ki ti pe touy li. Li ti dir: “Zot pa kone ki zot pe fer.” (Lik 23:34) Mem kan ti ena enn gran presion lor li ouswa li ti pe soufer, Zezi ti gard so douser ek so pasians.​—Lir 1 Pier 2:21-23.

16. Kouma nou kapav montre ki nou ena douser ek pasians?

¹⁶ Pol ti mansionn enn fason kouma nou kapav montre ki nou ena douser ek pasians. Li ti ekrir: “Siport zot kamarad, e si zot ena kit repros, donn zot pardon; kouma Lesegner [“Zeova,” NW] finn pardonn zot, zot ousi pardone.” (Kolosien 3:13) Pou ki nou kapav pardonn lezot, nou bizin ena douser ek pasians. Sa pou favoriz linite dan kongregasion ek pou prezerv sa linite-la.

17. Kifer li inportan ki nou ena douser ek pasians?

¹⁷ Se Zeova ki demann nou pou manifeste douser ek pasians anver lezot. Li inportan ki nou ena sa bann kalite-la si nou anvi viv dan lemond nouvo. (Matie 5:5; Zak 1:21, NW.) Kan nou ena douser ek pasians, nou donn Zeova loner ek nou ed lezot pou fer parey.​—Galat 6:1; 2 Timote 2:24, 25.

18. Kan nou pa fer diskriminasion, kouma sa ena enn lien avek lamour?

¹⁸ Tou bann kalite ki nou’nn fek  examine ena enn lien avek lamour. Par exanp, disip Zak ti bizin donn konsey so bann konpagnon Kretien parski zot ti tret bann dimounn ris pli bien ki bann dimounn pov. Li ti dir zot ki sa li kont komannman Bondie ki dir: “Kontan to prosin kouma tomem.” Apre sa li ti dir: “Si zot montre diskriminasion, zot komet enn pese.” (Zak 2:8, 9) Si nou kontan bann dimounn, nou pa pou fer diskriminasion anver personn mem si zot pena mem ledikasion ki nou, zot enn lot ras ouswa zot ena enn lot pozision dan lasosiete. Nou pa kapav zis fer sanblan ki nou pa fer preferans. Sa bizin vremem form parti dan nou personalite.

19. Kifer li inportan ki nou ena lamour?

¹⁹ Lamour li osi ‘pasian ek bon’ ek li “pa fer fier.” (1 Korintien 13:4) Nou bizin ena pasians, bonte ek limilite pou nou kapav kontign pres bonn nouvel avek bann dimounn. (Matie 28:19) Sa bann kalite-la ed nou osi pou viv bien avek tou nou bann frer ek ser dan kongregasion. Kan nou tou nou montre sa kalite lamour-la, ena linite dan kongregasion ek sa donn Zeova loner. Lezot pou trouv sa linite-la ek pou atire ar laverite. Akoz sa, Labib fer sa konklizion-la lor nouvo personalite: “Me, anplis, abiy zot ar lamour, parski li enn kitsoz parfe ki soud nou tou ansam.”​—Kolosien 3:14, NW.

20. (a) Ki bann kestion nou bizin poz noumem? Kifer? (b) Kifer nou pe atann lavenir avek inpasians?

²⁰ Nou tou nou bizin demann noumem: ‘Ki bann sanzman mo ankor bizin fer pou ki mo tir net vie personalite lor mwa?’ Nou bizin priye Zeova ek sipliy Li pou ed nou. Nou bizin fer bann gran zefor pou aret ena bann move panse ek bann move aksion pou ki nou kapav “erit Rwayom Bondie.” (Galat 5:19-21) Nou bizin osi demann noumem: ‘Eski mo pe kontign fer zefor pou sanz mo fason panse pou ki sa fer Zeova plezir?’ (Efezien 4:23, 24, NW.) Nou inparfe, alor nou bizin kontign fer bann gran zefor pou met nouvo personalite lor nou ek pou gard li. Touletan nou bizin kontign fer sa. Dan lavenir, eski lavi pa pou extra zoli kan tou dimounn pou ena nouvo personalite lor zot ek pou imit dan enn fason parfe bann zoli kalite ki Zeova ena?