1. Ki kitsoz nou tou nou anvi pou nou fami?

ENN ser ki apel Pauline * dir: “Depi ki mo finn konn laverite, mo ti anvi trouv tou mo fami avek mwa dan Paradi. Mo ti sirtou anvi ki mo misie, Wayne, ek mo garson servi Zeova ansam avek mwa.” Eski to ena bann fami ki pankor aprann konn Zeova ek kontan Li? Kitfwa twa osi parey kouma Pauline to anvi ki to fami servi Zeova ansam avek twa.

2. Ki bann kestion nou pou examine dan sa lartik-la?

² Nou pa kapav fors nou fami pou aksepte bonn nouvel. Me nou kapav ed zot pou ki zot pli dispoze pou aksepte mesaz ki ena dan Labib. (2 Tim. 3:14, 15, NW) Kifer nou bizin koz lor laverite avek nou fami? Kifer nou bizin ena konsiderasion pou zot, setadir esey konpran seki zot resanti? Ki nou kapav fer pou ed nou fami aprann kontan Zeova parey kouma nou? Ek kouma tou bann frer ek ser dan nou lasanble kapav ed nou?

3. Dapre 2 Pier 3:9, kifer nou bizin koz lor laverite avek nou fami?

³ Biento, Zeova pou detrir sa move lemond-la. Zis bann ki “ena enn bon kondision leker pou gagn lavi eternel” ki pou sape. (Zist. 13:48, NW) Nou pas boukou letan ek depans boukou lenerzi pou pres ar bann dimounn ki nou pa kone dan nou teritwar. Alor, li normal ki nou anvi ki nou fami osi servi Zeova ansam avek nou. Zeova, nou Papa ki ena lamour  “pa anvi ki personn mor, me Li anvi ki tou dimounn repanti.”​—Lir 2 Pier 3:9, NW. *

4. Ki erer kitfwa nou fer kan nou koz lor laverite avek nou fami?

⁴ Nou bizin touletan rapel ki ena enn bon fason ek enn move fason pou koz lor bonn nouvel. Par exanp, kitfwa nou ena takt kan nou pres avek enn dimounn ki nou pa kone, alor ki avek nou fami nou kapav tro direk.

5. Ki kitsoz nou bizin rapel avan ki nou koz lor laverite avek nou fami?

⁵ Kan nou mazinn premie fwa ki nou ti koz lor laverite avek nou fami, kitfwa boukou parmi nou regrete akoz fason ki nou ti koze. Nou ti pou kontan si nou ti fer sa dan enn lot fason. Lapot Pol ti donn bann Kretien sa konsey-la: “Ki zot parol touzour bienveyan, enn koze ki ena gou pou ekoute, e ki zot konn reponn sakenn kouma bizin.” (Kol. 4:5, 6) Li bon ki nou rapel sa konsey-la kan nou koz lor laverite avek nou fami. Sinon nou riske ofans zot olie ki nou donn zot lanvi pou ekout nou.

6-7. Donn enn lexanp pou montre kifer li inportan ki bann Kretien ena konsiderasion anver zot konzwin ki pa Temwin.

⁶ Ena konsiderasion. Pauline, ki nou ti mansione avan, dir: “O-koumansman, mo ti koz zis lor Bondie ek Labib ar mo misie. Nou pa ti ena lezot konversasion.” Selman, Pauline so misie, Wayne, pa ti tro konn bann lansegnman Labib ek li pa ti konpran seki Pauline ti pe koze. Pou li se koumadir Pauline pa ti konn nanye apart so relizion. Li ti per tansion so madam ti pe rant dan enn sekt danzere ek ki bann dimounn ti pe anbet li.

 ⁷ Pauline rekonet ki pandan enn tan li ti pas laplipar so bann sware ek so bann wikenn ar bann frer ek ser so lasanble, dan renion, dan predikasion, ek dan bann ti program. Pauline dir: “Parfwa kan Wayne ti retourn lakaz pa ti ena personn ek li ti santi li tousel.” Biensir, Wayne ti pou kontan ki so madam ek so garson avek li. Li pa ti konn bann dimounn avek ki so madam ek so zanfan ti ete, ek Wayne ti ena linpresion ki so madam ti plis kontan so bann nouvo kamarad ki li. Alor Wayne ti menas Pauline ki li pou divors ar li. Dapre twa, dan ki fason eski Pauline ti kapav montre ki li ena konsiderasion pou so misie?

8. Dapre 1 Pier 3:1, 2, ki kitsoz kapav ena enn pli bon lefe lor nou fami?

⁸ Donn enn bon lexanp. Souvan nou bann fami remark plis seki nou fer ki seki nou dir. (Lir 1 Pier 3:1, 2, NW. *) Avek letan Pauline ti realiz sa. Li dir: “Mo ti kone ki Wayne ti kontan nou ek li pa ti vremem anvi divorse. Me sa menas-la ti fer mwa realize ki mo ti bizin koumans fer bann kitsoz dan fason ki Zeova anvi. Olie ki mo koz boukou, mo ti bizin donn enn bon lexanp atraver mo kondwit.” Pauline ti aret fors Wayne pou gagn bann konversasion lor Labib, ek li ti koumans koz lor bann lezot kitsoz avek li. Wayne ti trouve ki so madam ti vinn pli zanti, ek zot garson ti ena bann bon manier ek ti plis obeir. (Prov. 31:18, 27, 28) Kan Wayne ti remark bon lefe ki Parol Bondie ti ena lor so fami, li ti pli dispoze  pou ekout Parol Bondie.​—1 Kor. 7:12-14, 16.

9. Kifer nou bizin kontign esey ed nou fami?

⁹ Kontign esey ed to fami. Zeova finn donn nou enn bon lexanp. Li donn bann dimounn lokazion “ankor ek ankor” pou aksepte bonn nouvel ek gagn lavi pou touletan. (Zer. 44:4) Ek lapot Pol ti dir Timote kontign fer zefor pou ed lezot. Kifer? Parski kan li ti pou fer sa, li ti pou sov limem ek bann dimounn ki ti pou ekout li. (1 Tim. 4:16) Nou kontan nou fami, alor nou anvi ki zot konn bann verite ki ena dan Parol Bondie. Finalman Pauline so bann parol ek so bann aksion ti ena enn bon linflians lor so fami. Asterla li kontan parski li pe servi Zeova ansam avek so misie. Zot toulede pionie ek Wayne pe servi kouma ansien.

10. Kifer nou bizin ena pasians?

¹⁰ Ena pasians. Asterla ki nou’nn swazir pou obeir Bondie, nou fami kitfwa trouv sa difisil pou aksepte nou krwayans ek bann sanzman ki nou’nn fer dan nou lavi. Souvan, premie kitsoz ki zot remarke se ki nou nepli selebre bann fet relizie avek zot ek partisip dan bann zafer politik. O-koumansman, kitfwa sertin fami pou ankoler avek nou. (Mat. 10:35, 36) Me fode pa nou panse ki zame zot pa pou sanze. Si nou aret ed zot pou konpran nou bann krwayans, se koumadir nou’nn fini zize ki zot pa ase bon pou gagn lavi eternel. Zeova pa finn demann nou pou ziz lezot, se Zezi ki finn gagn sa responsabilite-la. (Zan 5:22) Si nou ena pasians, avek letan kitfwa nou fami pou dispoze pou ekout nou mesaz.​—Get lankadre “ Servi Nou Sit pou Ansegne.”

11-13. Ki to aprann ar fason ki Alice ti azir anver so bann paran?

¹¹ To bizin ferm, me to bizin ena takt. (Prov. 15:2) Anou get lexanp Alice. Li ti gagn laverite kan li ti pe viv bien lwin ar so fami. So fami pa ti krwar dan Bondie ek zot ti bien inplike dan bann zafer politik. Li ti rann li kont ki li ti bizin partaz avek so bann paran bann bon kitsoz ki li ti pe aprann ek ki li ti bizin fer sa pli vit posib. Alice dir: “Plis to atann lontan pou koz lor to bann krwayans ar to fami, plis zot pou gagn sok.” Li ti esey rod bann size ki ti kapav interes so bann paran, kouma lamour. Apre sa, li ti ekrir zot bann let ek li ti explik zot seki Labib dir lor sa bann size-la ek li ti demann zot seki zot panse. (1 Kor. 13:1-13) Li ti remersie so bann paran parski zot finn elve li ek pran li swin, ek li ti avoy zot bann kado. Kan li ti vizit so bann paran, li ti fer zefor pou ed so mama fer louvraz. O-koumansman, bann paran Alice pa ti kontan kan li ti koz ar zot lor so bann nouvo krwayans.

¹² Kan Alice ti kot so bann paran, li ti kontign respekte so program lektir Labib. Alice dir: “Sa finn ed mo mama pou trouve ki kantite Labib inportan pou mwa.” Antretan, papa Alice ti desid pou fer inpe resers lor Labib pou trouv bann kitsoz pou kritike ek osi pou konpran kifer so tifi inn sanze. Alice dir: “Mo ti donn li enn Labib ek mo ti met enn ti not ladan pou tous so leker.” Ki rezilta sa finn ena? Papa Alice pa ti trouv nanye pou kritike dan Parol Bondie. Okontrer, seki li ti lir ti bien tous li.

¹³ Nou bizin ferm me ena takt, mem si nou bizin andir bann sitiasion difisil. (1 Kor. 4:12b) Par exanp, Alice so mama ti bien persekit li. Alice dir: “Kan mo ti pran batem, mo mama ti dir ki mo enn ‘move tifi.’” Ki Alice ti fer? Li dir: “Olie ki mo ti evit koz lor la, mo ti explik mo mama avek respe ki mo ti fini deside pou vinn enn Temwin Zeova ek ki mo pa ti pou sanz mo desizion. Mo ti esey rasir mo mama ki mo  vremem kontan li. Nou toulede ti plore, ek mo ti kwi enn bon manze pou li. Depi sa moman-la, mo mama ti koumans aksepte ki Labib ti pe fer mwa vinn enn pli bon dimounn.”

14. Kifer fode zame nou les nou fami fer nou sanz nou desizion pou servi Zeova?

¹⁴ Kitfwa sa kapav pran letan avan ki nou fami konpran bien ki pou nou li bien inportan ki nou servi Zeova. Par exanp, kan Alice ti desid pou fer pionie olie ki fer sa karyer ki so bann paran ti swazir pou li la, ankor enn fwa so mama ti plore. Me Alice ti res ferm. Li dir: “Si to les to fami fer twa sanz to desizion pou enn kitsoz, zot kapav esey fer sa pou lezot kitsoz osi. Me si to zanti anmemtan ki to ferm avek to fami, sertin kapav ekout twa.” Se seki ti ariv Alice. Azordi so bann paran pionie, ek so papa enn ansien.

15. Dapre Matie 5:14-16 ek 1 Pier 2:12, kouma bann “bon travay” lezot kapav ed nou fami?

¹⁵ Zeova servi bann “bon travay” ki so bann serviter fer pou fer bann dimounn vinn pros ar Li. (Lir Matie 5:14-16, NW; * 1 Pier 2:12, NW. *) Si to konzwin pa enn Temwin Zeova, eski li finn zwenn bann manb to lasanble? Pauline, ki nou ti mansione  avan, ti invit bann frer ek ser kot li pou ki so misie, Wayne, aprann konn zot. Wayne rapel ki enn frer ti ed li pou konpran kouma bann Temwin Zeova ete vremem. Wayne dir: “Li ti pran enn zour konze pou vinn get enn match avek mwa. Mo ti dir momem: ‘Li enn dimounn normal!’”

16. Kifer nou bizin invit nou fami pou asiste renion?

¹⁶ Enn bon fason pou ed nou fami, se kan nou invit zot pou asiste renion avek nou. (1 Kor. 14:24, 25) Wayne ti asiste so premie renion zour Memoryal. Li ti kapav al sa renion-la parski sa ti apre travay ek program-la ti kourt. Li dir: “Mo pa rapel seki ti dir dan sa diskour-la me mo rapel bann dimounn-la. Zot ti vinn akeyir mwa ek zot ti ser mo lame bien for. Mo ti trouve ki zot sinser.” Ti ena enn koup ki ti bien zanti anver Pauline, ek ki ti abitie ed li avek so garson dan renion ek dan predikasion. Alor kan Wayne ti desid pou aprann plis lor bann nouvo krwayans Pauline, li ti demann frer-la pou etidie Labib avek li.

17. Kifer fode pa nou santi nou koupab pou desizion ki nou fami pran, ek kifer fode pa nou panse ki zame nou fami pou sanze?

¹⁷ Nou espere ki enn zour tou nou fami servi Zeova ansam avek nou. Selman, malgre tou bann zefor ki nou fer pou ed nou fami servi Zeova, kitfwa zot pa pou vinn dan laverite. Si nou dan sa ka-la, fode pa nou santi nou koupab pou desizion ki zot pran. Apre tou, nou pa kapav fors personn pou aksepte nou bann krwayans. Kanmem sa, pa souzestim lefe ki sa kapav ena lor to fami kan zot trouve ki kantite to zwaye kan to pe servi Zeova. Priye pou zot. Koz ar zot avek takt. Kontign ed zot! (Zist. 20:20) Ena konfians ki Zeova pou beni to bann zefor. Ek si to fami desid pou ekout twa, zot pou sape!