LAFWA kapav ena enn gran pouvwar lor nou. Par exanp, mem si Satan anvi elwagn nou ar Zeova, lafwa ed nou “pou tegn tou fles anflame ki diab avoye.” (Efe. 6:16) Si nou ena lafwa, nou pou kapav andir bann problem ki kouma bann montagn. Zezi ti dir so bann disip: “Si zot ena lafwa groser enn lagrin moutard e ki zot dir montagn, ‘Bouze al laba,’ li pou bouze.” (Mat. 17:20) Lafwa kapav fer nou relasion avek Zeova vinn pli for, alor li bon ki nou reflesi lor sa bann kestion-la: Ki ete lafwa? Kouma kondision nou leker kapav ena enn lefe lor nou lafwa? Kouma eski nou kapav fer nou lafwa vinn pli for? Ek dan kisannla nou bizin ena lafwa?​—Rom. 4:3.

Lafwa se pa zis krwar ek aksepte seki ena dan Labib, parski “mem bann demon osi krwar [ki Bondie existe] e zot tranble avek laper.” (Zak 2:19) Alor, ki ete lafwa?

Labib explike ki lafwa anglob de kitsoz. Premierman, “lafwa vedir enn lasirans dan bann kitsoz ki to pe atann.” (Ebre 11:1a) Si to ena lafwa, to vremem krwar ki tou seki Zeova dir vre ek pou realize. Par exanp, Zeova ti dir bann Izraelit: “Eski zot kapav kas mo lalians konsernan lizour ek mo lalians konsernan lanwit, pou anpes lizour ek lanwit vinn dan ler kot zot bizin vini? Non! Li parey, nanye pa pou kapav kas lalians ki mo’nn fer ar mo serviter David.” (Zer. 33:20, 21) Eski parfwa to per tansion enn zour soley aret leve ek aret kouse, ek ki nepli ena lanwit ek lizour? Non! Si to pena okenn dout lor bann lalwa fizik konsernan letour ki later fer lor limem ek otour soley, alor to kapav sir ki Kreater sa bann lalwa-la kapav tini so bann promes!​—Iza. 55:10, 11; Mat. 5:18.

Deziemman, lafwa se “enn konviksion dan kitsoz ki to pa trouve.” Labib dir ki lafwa se “enn konviksion dan kitsoz,” ouswa enn prev sir ki bann kitsoz ki nou pa trouve, zot vremem existe. (Ebre 11:1b) Anou pran enn lexanp pou explik sa lide-la. Fer koumadir enn zanfan demann twa: ‘Kouma to kone ki ler vremem existe?’ Mem si zame to pa finn trouv ler, kitfwa to pou explik zanfan-la bann kitsoz ki prouve ki ler existe, kouma par exanp lefe ki divan ena lor bann kitsoz, respirasion, ek bann lezot kitsoz ankor. Kan sa bann prev-la inn konvink zanfan-la, zanfan-la pou aksepte lide ki bann kitsoz invizib vremem existe. Dan mem fason, lafwa li baze lor bann prev solid.​—Rom. 1:20.

Lafwa li baze lor bann prev solid. Alor, pou enn kikenn ena lafwa, avan tou li bizin ena “enn konesans exakt lor laverite.” (1 Tim. 2:4, NW) Me sa konesans-la pa ase. Lapot Pol ti ekrir ki enn kikenn montre lafwa “avek so leker.” (Rom. 10:10, NW) Alor li bizin pa zis krwar dan sa bann verite-la, me sa bizin osi ena enn gran valer pou li. Se zis koumsa ki li pou motive pou manifeste lafwa, setadir pou viv dan enn fason ki fer Bondie  plezir. (Zak 2:20, NW) Enn kikenn ki pena enn rekonesans sinser pou laverite, kapav mem rezet bann prev konvinkan si li refiz sanz so bann krwayans ouswa si li anvi fer seki li anvi. (2 Pier 3:3, 4, NW; Zid 18) Se pou sa rezon-la ki dan lepok Biblik, pa tou dimounn ki ti trouv bann mirak ki ti devlop lafwa. (Nonb 14:11; Zan 12:37) Se zis bann dimounn ki vremem kontan laverite ki reisi devlop lafwa gras-a lespri sin Bondie.​—Gal. 5:22, NW; 2 Tes. 2:10, 11, NW.

Lerwa David ti enn parmi bann dimounn ki ti ena enn lafwa bien for. (Ebre 11:32, 33) Selman, pa tou dimounn dan fami David ki ti ena enn lafwa koumsa. Reflesi lor lexanp Eliab, gran frer David. Kan Goliat ti defie bann Izraelit, sa sitiasion-la ti bien trakas David. Me Eliab ti repros David ek ti dir ki David ti ena bann move lintansion. Kan li ti fer sa, Eliab ti montre ki li pa ti ena lafwa an Zeova. (1 Sam. 17:26-28) Personn pa ne ar lafwa ek personn pa erit lafwa ar so bann paran. Alor, si David ti ena lafwa se gras-a so prop relasion avek Bondie.

Dan Psom 27, David explike kouma li’nn devlop enn lafwa for koumsa. (Verse 1) David ti medit lor bann sitiasion ki li ti viv dan lepase ek lor fason ki Zeova ti protez li kont so bann lennmi. (Verse 2, 3) Li ti bien kontan bann dispozision ki Zeova ti pran konsernan vre ladorasion. (Verse 4) David ti ador Bondie dan tabernak ansam avek bann lezot serviter Bondie. (Verse 6) Li ti fer bann lapriyer sinser pou rod led Zeova. (Verse 7, 8) Ek David ti anvi ki Bondie ansegn li semin ki li bizin pran. (Verse 11) Lafwa ti enn kalite telman inportan pou David ki li ti dir: “Si mo pa ti ena lafwa . . . kot mo ti pou ete?”​—Verse 13, NW.

To kapav ena enn lafwa for parey kouma David si to imit so latitid ek so bann labitid ki dekrir dan Psom 27. Lafwa li baze lor enn konesans exakt, alor plis to etidie Labib ek bann piblikasion Biblik, plis li pou fasil pou to devlop sa kalite ki form parti dan lespri sin Bondie la. (Ps. 1:2, 3) Kan to etidie, pran letan pou medite. Si to medit lor seki to etidie, to pou ena plis rekonesans pou Zeova. Plis to ena rekonesans pou Zeova, plis to pou anvi montre to lafwa kan to ador Li dan renion ek kan to partaz to lesperans ar lezot. (Ebre 10:23-25) Enn lot fason pou manifeste lafwa se kan to kontign “priye” ek to pa “dekouraze.” (Lik 18:1-8) Alor, “priye toultan” ek ena konfians ki Zeova pou “pran [twa] swin.” (1 Tes. 5:17; 1 Pier 5:7) Lafwa pous nou pou azir, ek nou bann aksion fer nou lafwa vinn pli for.​—Zak 2:22.

Lanwit avan so lamor, Zezi ti dir so bann disip: “Ena lafwa an Bondie; ena lafwa osi an mwa.” (Zan 14:1, NW) Alor nou bizin ena lafwa pa zis an  Zeova me an Zezi osi. Kouma to kapav ena lafwa an Zezi? Anou get trwa fason.

Premierman, konsider laranson kouma enn kado ki Bondie inn donn twa personelman. Lapot Pol ti dir: “Mo viv . . . par lafwa dan Garson Bondie, ki kontan mwa e finn donn so lavi pou mwa.” (Gal. 2:20) Kan to ena lafwa an Zezi, to sir ki laranson kapav ed twa. To sir ki gras-a laranson, to gagn pardon to bann pese ek to ena lespwar pou viv pou touletan. Ek to sir osi ki laranson se pli gran prev ki Bondie kontan twa. (Rom. 8:32, 38, 39; Efe. 1:7) Si to vremem krwar ki laranson kapav ed twa, to nepli pou santi twa koupab ek to pa pou ena bann santiman negatif.​—2 Tes. 2:16, 17.

Deziemman, vinn pros ar Zeova atraver lapriyer, ek sa li posib gras-a sakrifis Zezi. Laranson permet nou priye Zeova “avek liberte pou koze ar enn konsians kler, pou ki nou kapav gagn mizerikord ek trouv faver ki personn pa merite pou ki nou gagn led dan ler ki bizin.” (Ebre 4:15, 16, NW; 10:19-22, NW) Lapriyer pou donn nou lafors pou reziste kont tantasion pou fer pese.​—Lik 22:40.

Trwaziemman, obeir Zezi. Lapot Zan ti ekrir: “Dimounn ki krwar [“ena lafwa,” NW] dan so Garson pou gagn lavi eternel, seki pa ekout so Garson, pa pou trouv lavi me lakoler Bondie pou res lor li.” (Zan 3:36) Remarke ki Zan ti explike ki ena enn diferans ant pa ekout Zezi ek ena lafwa. Alor, to montre ki to ena lafwa an Zezi kan to obeir li. To obeir Zezi kan to swiv “lalwa Lekris,” setadir, tou seki li’nn ansegne ek seki li’nn donn lord pou fer. (Gal. 6:2) To osi obeir Zezi kan to swiv direksion ki “lesklav fidel ek saz” done. (Mat. 24:45, NW) Kan to obeir Zezi, to pou ena lafors pou andir bann gran difikilte.​—Lik 6:47, 48.

Enn zour, enn misie ti dir Zezi: “Mo ena lafwa! Ed mwa kot mo bizin lafwa!” (Mark 9:24, NW) Sa misie-la ti ena enn tigit lafwa, me li ti modes ek li ti rekonet ki li ti bizin plis lafwa. Parey kouma sa misie-la, nou tou nou pou fer fas ar bann sitiasion kot nou pou bizin ena plis lafwa. Ek nou tou nou kapav fortifie nou lafwa depi asterla mem. Kouma nou finn trouve, nou fortifie nou lafwa kan nou etidie ek medit lor Parol Bondie. Lerla, sa pou fer nou ena plis rekonesans pou Zeova. Nou lafwa pou vinn pli for osi kan nou ador Zeova ansam avek nou bann frer ek ser, kan nou partaz nou lesperans ar lezot, ek kan nou priye regilierman. Anplis, kan nou fortifie nou lafwa, nou gagn pli gran rekonpans ki kapav ena. Labib dir nou: “Mo bann frer ki mo bien kontan, kontign fortifie zotmem dan zot lafwa ki bien sin . . . pou ki zot res dan lamour Bondie.”​—Zid 20, 21, NW.