1. Kisannla ti ede pou form lasanble ki dan lavil Filip?

KAN lapot Pol, Silas, Lik, ek Timote ti ariv dan lavil Filip, ki ti enn koloni Romin, zot ti zwenn boukou dimounn ki ti anvi konn plis lor bonn nouvel. Sa kat frer bien zele la ti ede pou form enn lasanble laba, ek sa bann nouvo frer ek ser-la ti koumans reini ansam. Kitfwa zot ti reini dan lakaz Lidi, enn ser ki ti montre lospitalite.​—Zist. 16:40.

2. Ki sitiasion difisil sa lasanble-la ti fer fas?

² Me sa nouvo lasanble-la bien vit ti fer fas ar enn sitiasion difisil. Satan ti pous bann dimounn ki ti ena laenn pou laverite pou opoz zot ar predikasion Pol ek so bann konpagnon. Bann dimounn ti aret Pol ek Silas, ti bat zot kout baton, ek ti met zot dan prizon. Me kan zot ti sorti dan prizon, zot ti al get sa bann nouvo frer ek ser-la pou ankouraz zot. Apre sa, Pol, Silas, ek Timote ti kit lavil Filip, me li paret ki Lik ti res laba. Ki kitsoz sa bann nouvo frer ek ser-la ti pou fer asterla? Gras-a led lespri sin zot ti kontign servi Zeova avek zel. (Fil. 2:12) Bann Kretien dan lavil Filip ti rann Pol bien fier!

3. Kouma nou trouve dan Filipien 1:9-11, ki Pol ti demande dan so lapriyer?

³ Anviron di-z-an apre, Pol ti ekrir lasanble ki dan Filip enn let. Kan to lir sa let-la, to trouve ki kantite Pol ti kontan sa bann frer ek ser-la. Li ti ekrir: “Mo bien anvi trouv zot parski mo ena enn gran lafeksion pou zot parey kouma  Zezi Kris ena.” (Fil. 1:8, NW) Li ti dir zot ki li ti priye pou zot. Li ti demann Zeova pou ed zot ogmant zot lamour, verifie bien bann kitsoz ki pli inportan, res san defo, pa fer lezot tonbe, ek kontign raport frwi lazistis. Azordi, nou osi nou kapav gagn boukou bienfe ar bann parol ranpli ar lamour ki Pol ti dir. (Lir Filipien 1:9-11, NW. *) Dan sa lartik-la, nou pou koz lor bann kitsoz ki Pol ti mansione ek nou pou gete kouma nou kapav met zot an pratik.

4. (a) Dapre 1 Zan 4:9, 10, kouma Zeova inn montre nou so lamour? (b) Ki kantite nou bizin kontan Bondie?

⁴ Zeova inn montre ki kantite Li kontan nou kan Li’nn avoy so Garson lor later pou mor pou nou ek pou liber nou ar pese. (Lir 1 Zan 4:9, 10.) Lamour ki Bondie ena pou nou, pous nou pou kontan Li an retour. (Rom. 5:8) Me ki kantite nou bizin kontan Bondie? Zezi ti reponn sa kestion-la kan li ti dir enn Farizien: “To bizin kontan to Segner [“Zeova,” NW], to Bondie avek tou to leker, avek tou to nam e avek tou to lespri.” (Mat. 22:36, 37) Nou anvi kontan Zeova avek tou nou leker. Ek nou anvi ki nou lamour pou Li vinn pli for sak zour. Pol ti dir bann Filipien ki zot lamour bizin “kontign ogmante.” Ki nou kapav fer pou ki nou lamour pou Bondie vinn pli for?

5. Kouma nou kapav fer nou lamour pou Bondie vinn pli for?

⁵ Pou nou kontan Bondie, nou bizin konn Li. Labib dir: “Bondie limem lamour, dimoun ki pa kontan . . . li pa konn Bondie.” (1 Zan 4:8) Lapot Pol ti explike ki nou lamour pou Bondie pou vinn pli for amezir ki nou konn laverite lor Li ek ki nou konpran so fason panse. (Fil. 1:9, NW) Kan nou ti koumans etidie Labib, nou ti koumans kontan Zeova mem si nou ti konn bien tigit kitsoz lor Li. Me plis nou’nn aprann konn Zeova, plis nou lamour pou Li inn vinn pli for. Se pou sa rezon-la ki li bien inportan ki nou etidie Labib regilierman ek ki nou medit lor seki nou lir.​—Fil. 2:16.

6. Dapre 1 Zan 4:11, 20, 21, pou ki nou lamour kontign ogmante, kisannla ankor nou bizin kontan?

⁶ Gran lamour ki Bondie ena pou nou pous nou pou kontan nou bann frer ek ser. (Lir 1 Zan 4:11, 20, 21.) Kitfwa nou panse ki li fasil pou kontan nou bann frer ek ser. Apre tou, nou ador Zeova ek nou fer zefor pou imit so bann zoli kalite. Ek nou swiv lexanp Zezi, ki finn telman kontan nou ki li’nn donn so lavi pou nou. Selman, parfwa nou kapav trouv sa difisil pou obeir komannman ki nou’nn gagne pou kontan lezot. Anou gete seki ti arive dan lasanble ki ti dan Filip.

7. Ki nou aprann ar konsey ki Pol ti donn Evodi ek Sintish?

⁷ Evodi ek Sintish ti de ser bien zele ki ti travay “ansam” avek lapot Pol. Selman, li posib ki zot ti gagn enn dezakor ek akoz sa zot ti nepli kamarad. Dan let ki Pol ti ekrir lasanble kot sa de ser-la ti ete, Pol ti sit zot nom ek ti donn zot bann konsey bien kler lor linite. (Fil. 4:2, 3) Pol ti osi panse ki li ti inportan pou dir sa lasanble-la pou “fer tou san okenn konplint ou rezistans.” (Fil. 2:14) Pena dout ki konsey bien kler ki Pol ti done ti bien itil. Sa ti ed nou de ser fidel ek osi tou bann frer ek ser dan sa  lasanble-la pou fer zot lamour pou zot kamarad vinn pli for.

8. Kifer parfwa nou trouv sa bien difisil pou kontan nou bann frer ek ser, ek kouma nou kapav sirmont sa?

⁸ Parfwa nou kapav trouv sa bien difisil pou kontan nou bann frer ek ser parski nou fer parey kouma Evodi ek Sintish, setadir nou konsantre nou lor erer lezot. Selman, nou tou nou fer erer toulezour. Si nou res konsantre lor bann erer lezot, nou lamour pou zot pou diminie. Par exanp, kitfwa sa pou agas nou si enn frer bliye vinn donn nou koudme pou netway Lasal. Ek si nou koumans dres enn lalis tou bann lezot erer ki li’nn fer, nou pou plis agase ek nou lamour pou li pou diminie. Si to dan enn sitiasion koumsa, pran letan pou reflesi lor la: Zeova konn nou bann erer, parey kouma Li konn nou frer so bann erer. Me malgre nou bann erer, Zeova ankor touzour kontan nou tou. Akoz sa, nou bizin imit lamour ki Zeova ena pou nou ek kontign res konsantre lor bann kalite ki nou bann frer ena. Kan nou fer zefor pou kontan nou bann frer, nou ede pou ki ena linite parmi nou.​—Fil. 2:1, 2, NW.

9. Sit sertin parmi “bann kitsoz ki pli inportan” ki Pol mansione dan so let pou bann Filipien.

⁹ Zeova ti fer Pol ekrir bann Filipien ek tou bann lezot Kretien, ki zot bizin “verifie bien bann kitsoz ki pli inportan.” (Fil. 1:10, NW) Parmi sa bann kitsoz inportan la ena sanktifikasion nom Zeova, realizasion so proze, ek lape ek linite dan lasanble. (Mat. 6:9, 10; Zan 13:35) Kan nou fer sa bann kitsoz inportan la pas an premie dan nou lavi, nou montre ki nou kontan Zeova.

10. Ki nou bizin fer pou ki Zeova konsider nou kouma bann dimounn ki san defo?

¹⁰ Pol ti dir osi ki nou bizin “res san defo.” Sa pa vedir ki nou bizin parfe. Nou pa kapav res san defo dan mem fason ki Zeova. Me Zeova pou konsider nou kouma bann dimounn ki san defo si nou fer nou maximum pou ogmant nou lamour pou Li, pou nou bann frer ek ser ek osi si nou kontign verifie bien bann kitsoz ki pli inportan. Enn fason ki nou kapav montre nou lamour se kan nou fer nou maximum pou pa fer lezot tonbe.

11. Kifer fode pa nou fer lezot tonbe?

¹¹ Pol ti donn osi enn lavertisman bien ferm kan li ti dir ki fode pa fer lezot tonbe. Kouma nou kapav fer enn kikenn tonbe? Par exanp, par bann swa ki nou fer dan domenn divertisman, labiyman, ek travay. Kitfwa nou pa pe fer enn kitsoz ki Zeova kondane. Me si bann swa ki nou fer sok konsians enn kikenn ek fer li tonbe, sa li bien grav. Zezi ti explike ki si nou fer enn frer tonbe, sa li pli pir ki si nou atas enn ros bien lour ar nou likou ek nou zet nou dan lamer!​—Mat. 18:6.

12. Ki nou aprann ar lexanp enn koup pionie?

¹² Anou gete kouma enn koup pionie inn met an pratik sa lavertisman Zezi la. Dan zot lasanble ti ena enn koup ki ti fek pran batem. Sa koup-la ti grandi dan bann fami bien strik ki ti anpes zot fer boukou kitsoz. Sa koup-la ti panse ki bann Kretien pa gagn drwa al get fim sinema, mem si pena nanye demal dan fim-la. Zot ti gagn sok kan zot ti aprann ki sa koup pionie la ti al get enn fim sinema. Apre sa sitiasion-la, koup pionie la ti aret al sinema ziska ki sa lot koup-la form zot konsians ek konpran pli bien ki kitsoz bon ek ki kitsoz pa bon. (Ebre 5:14) Sa koup pionie la ti montre ki zot ti kontan sa koup ki ti fek batize la pa zis an parol, me osi an aksion.​—Rom. 14:19-21; 1 Zan 3:18.

13. Kouma nou kapav inflians enn kikenn pou fer pese?

 ¹³ Enn lot fason ki nou kapav fer enn kikenn tonbe se kan nou inflians li pou fer enn pese. Kouma eski sa kapav arive? Reflesi lor sa sitiasion-la. Apre enn long lalit, enn etidian Labib inn reisi sorti dan labwason. Li kone ki li bizin pa tous enn gout labwason ankor. Li progrese bien vit ek li pran batem. Plitar, enn frer invit li dan enn ti program ek insiste pou ki li bwar enn labwason. Frer-la dir li: “To enn Kretien asterla; to ena lespri sin Zeova. Enn bann kalite ki form parti frwi lespri sin se metriz lor noumem. Si to ena metriz, to bizin kapav bwar enn tigit.” Li pou bien tris si nou frer ekout sa move konsey-la ek re-tom dan labwason ankor!

14. Kouma nou bann renion ed nou pou aplik bann instriksion ki ena dan Filipien 1:10?

¹⁴ Nou bann renion ed nou pou aplik bann instriksion ki ena dan Filipien 1:10 dan plizir fason. Premierman, bann lansegnman ki nou gagne dan renion montre nou seki pli inportan pou Zeova. Deziemman, nou aprann pou met an pratik sa bann lansegnman-la pou ki nou res san defo. Ek trwaziemman, nou bann renion ankouraz nou pou kontan nou kamarad ek pou fer seki bon. (Ebre 10:24, 25) Plis nou bann frer ek ser ankouraz nou, plis nou lamour pou zot ek pou Bondie pou ogmante. Kan nou kontan Bondie ek nou bann frer ek ser ar tou nou leker, nou pou fer nou maximum pou pa fer nou bann frer tonbe.

15. Ki savedir “ranpli ar frwi lazistis”?

¹⁵ Dan enn lapriyer bien profon, Pol ti demande ki bann Filipien “ranpli ar frwi lazistis.” (Fil. 1:11, NW) Pena dout ki zot lamour pou Zeova ek pou so pep ti form parti dan sa “frwi lazistis” la. Sa frwi-la inplik osi koz ar lezot lor zot lafwa dan Zezi ek lor zot zoli lesperans. Filipien 2:15 (NW) servi enn lot lexpresion: “Lalimier ki pe briye dan lemond.” Sa lexpresion-la bien apropriye parski Zezi ti dir ki so bann disip zot “lalimier pou lemonn.” (Mat. 5:14-16) Li ti osi donn zot lord pou fer “bann disip,” ek li ti dir ki zot pou so bann “temwin . . . partou lor later.” (Mat. 28:18-20; Zist. 1:8) Nou raport “frwi lazistis” kan nou fer nou maximum dan sa laktivite inportan la.

16. Kouma Filipien 1:12-14 montre ki nou kapav briye kouma bann lalimier mem kan nou pe fer fas ar bann sitiasion difisil? (Get zimaz lor kouvertir.)

¹⁶ Dan ninport ki sitiasion nou ete, nou kapav briye kouma bann lalimier pou lemond. Dan sertin sitiasion, bann kitsoz ki kapav paret kouma enn obstak pou predikasion kapav donn nou lokazion pou prese. Par exanp, kan lapot Pol ti ekrir bann Filipien, li ti anprizone dan enn lakaz dan Rom. Me mem si Pol ti anprizone, sa pa ti anpes li pou pres ar bann gardien ek ar bann dimounn ki ti vinn vizit li. Malgre so sitiasion, Pol ti pres avek zel, ek sa ti ankouraz bann frer “pou anons Parol Bondie san okenn laper.”​—Lir Filipien 1:12-14; 4:22, NW.

17. Kouma sertin frer ek ser fer zefor pou kontign prese mem kan sa li difisil?

¹⁷ Boukou frer ek ser ena kouraz parey kouma Pol. Zot res dan bann pei kot nou  laktivite predikasion interdi. Alor, zot pres dan lezot fason. (Mat. 10:16-20) Dan enn parmi sa bann pei-la, enn responsab sirkonskripsion ti ankouraz sak proklamater pou ena so prop “teritwar personel.” Dan sa teritwar-la ti bizin ena so fami, vwazin, kamarad lekol, koleg travay, ek bann dimounn ki li kone. Dan lespas de-z-an, kantite lasanble dan sa sirkonskripsion-la ti bien ogmante. Kitfwa nou res dan enn pei kot nou kapav prese san okenn problem. Me ki leson inportan nou kapav aprann ar lexanp bann frer ek ser ki res dan bann pei kot nou laktivite interdi? Si nou fer tou seki nou kapav pou prese, nou kapav sir ki Zeova pou donn nou kapasite pou kontign prese mem kan sa li difisil.​—Fil. 2:13, NW.

18. Ki nou bizin bien determine pou fer?

¹⁸ Azordi plis ki avan, nou bizin bien determine pou swiv bann konsey ki Pol ti donn bann Filipien. Anou kontign verifie bien bann kitsoz ki pli inportan, res san defo, pa fer lezot tonbe, ek raport frwi lazistis. Lerla, nou lamour pou kontign ogmante ek nou pou donn loner Zeova, nou Papa ki bien kontan nou.