1. Ki bann Kretien bizin fer pou ki zot fini zot lekours ki pou fer zot gagn lavi?

BANN Kretien pe partisip dan enn lekours ki pou fer zot gagn lavi. Mem si nou fek koumans sa lekours-la ouswa sa fer lontan ki nou pe partisip ladan, nou bizin kontign galoupe ziska lalign larive. Konsey ki lapot Pol ti donn bann Kretien dan Filip kapav ankouraz nou pou fini nou lekours. Kan Pol ti ekrir lasanble Filip, sertin sa bann Kretien-la ti pe servi Zeova pandan plizir lane. Mem si zot ti pe servi Zeova avek fidelite, Pol ti rapel zot linportans pou ena landirans ek pou kontign servi Zeova. Li ti anvi ki zot kontign swiv so lexanp, setadir kontign galoupe “pou resevwar pri.”​—Fil. 3:14.

2. Kifer konsey ki Pol ti donn bann Filipien ti ariv dan enn bon moman?

² Konsey ki Pol ti donn bann Filipien ti ariv dan enn bon moman. Bann Kretien dan Filip ti’nn gagn bann gran persekision depi ki zot lasanble ti forme. Ver lan 50 Nou Lepok, Pol ek Silas ti aksepte linvitasion Bondie pou al “Masedwann.” Alor, zot ti al dan lavil Filip pou pres bonn nouvel. (Zist. 16:9) Laba, zot ti zwenn enn madam ki apel Lidi, ek Zeova “ti prepar so leker pou li ekout” bonn nouvel. (Zist. 16:14) Lidi ek tou bann ki ti res kot li pa finn tarde pou pran batem. Me selman, Satan Lediab pa finn res lebra krwaze. Bann dimounn dan lavil Filip ti trenn Pol ek Silas ek ti amenn zot devan bann mazistra sa lavil-la. Zot ti met bann fos lakizasion lor Pol ek Silas ek ti dir ki bannla ti pe met dezord dan landrwa. Lerla, bann mazistra ti fer bat Pol ek Silas, ti fer met zot dan prizon, ek apre ti demann zot pou kit lavil. (Zist. 16:16-40) Eski Pol ek Silas ti perdi kouraz? Non! Ki nou kapav dir lor bann frer ek ser ki ti dan sa nouvo lasanble-la? Zot osi zot ti andire! Pena dout ki lexanp Pol ek Silas ti bien ankouraz zot.

3. Ki Pol ti kone, ek ki bann kestion nou pou examine?

 ³ Pol ti bien deside pou andire. (2 Kor. 4:16) Me selman, ena enn kitsoz ki Pol ti kone: pou reisi fini sa lekours-la, li ti bizin res konsantre lor so lobzektif. Ki nou aprann ar lexanp Pol? Kouma lexanp bann Kretien fidel dan nou lepok montre ki nou kapav kontign andire malgre bann gran difikilte? Ek kouma nou lesperans kapav ed nou pou pa perdi kouraz?

4. Ki Pol ti fer pou res aktif malgre so sitiasion?

⁴ Reflesi enn kout lor bann gran zefor ki Pol ti pe fer kan li ti ekrir bann Filipien. Li ti anprizone dan enn lakaz dan Rom. Alor, li pa ti kapav sorti pou al prese. Pourtan, li ti res aktif. Li ti pres ar bann ki ti vinn vizit li ek li ti ekrir bann let bann lasanble ki ti bien elwagne. Azordi osi, boukou Kretien pa kapav sorti kot zot, kitfwa parski zot malad ouswa zot aze. Alor, zot profit tou lokazion pou pres bonn nouvel avek bann ki vinn rann zot vizit. Zot osi ekrir bann let bien ankourazan bann dimounn ki nou pa kapav zwenn an personn.

5. Dapre seki Pol ti dir dan Filipien 3:12-14, ki ti ed li pou gard so lizie fixe lor so lobzektif?

⁵ Pol pa ti les bann bon ouswa bann move kitsoz ki li ti fer dan lepase anpes li res konsantre dan so servis. Avredir, li ti dir ki li bien inportan ki li “bliye tou seki deryer” ek ki li fer zefor “pou gagn seki devan,” setadir, fini so lekours. (Lir Filipien 3:12-14.) Ki kitsoz ti kapav anpes Pol res konsantre dan so servis? Premierman, avan ki li vinn Kretien, Pol ti enn Zwif bien zele ek li ti fer boukou kitsoz pou defann larelizion Zwif. Pourtan, li ti konsider tousala kouma “enn ta salte.” (Fil. 3:3-8, NW) Deziemman, mem si kitfwa li ti ena bann remor parski dan lepase li ti persekit bann Kretien, li pa ti les sa santiman-la anpes li servi Zeova. Ek trwaziemman, mem si li ti fer boukou bon kitsoz pou Zeova, li pa ti panse ki li’nn ase fer ek ki li bizin aret lamem. Pol ti fer boukou dan so minister mem si li ti andir plizir difikilte, kouma al dan prizon, gagn kout baton, gagn kout ros, fer nofraz, ek osi mank manze ek linz. (2 Kor. 11:23-27) Selman, malgre tou seki li ti fer ek tou seki li ti andire, Pol ti kone ki li ti bizin kontign servi Zeova. Li parey pou nou osi.

6. Sit sertin kitsoz ki nou’nn kit “deryer” ek ki nou bizin bliye.

⁶ Kouma nou kapav imit lexanp Pol ek “bliye tou seki deryer”? Sertin parmi nou kitfwa ena bann remor akoz bann pese ki zot inn fer dan lepase. Si nou dan sa sitiasion-la, dan nou letid personel nou kapav etidie an profonder lor laranson. Si nou priye, etidie, ek medit lor sa size bien ankourazan la, sa kapav ed nou pou ena mwins remor. Kitfwa nou pou mem aret pini noumem pou bann pese ki Zeova inn fini pardone. Anou get enn lot leson ki nou aprann ar lexanp Pol. Pou fer plis pou Zeova, kitfwa sertin finn abandonn enn travay ki ti kapav fer zot vinn bien ris. Si nou dan sa sitiasion-la, pou nou reisi bliye bann kitsoz ki nou’nn kit deryer, fode pa nou kontign pans lor bann kitsoz materyel ki nou ti kapav gagne. (Nonb 11:4-6; Ekle. 7:10) Parmi bann kitsoz ki nou’nn kit “deryer” ena osi bann bon kitsoz ki nou’nn fer dan servis Zeova ouswa bann difikilte ki nou’nn andire dan lepase. Pena dout ki sa rapros nou ar Zeova kan nou mazine kouma Li finn ed nou dan lepase. Selman, fode zame nou panse ki nou’nn ase fer pou Zeova.​—1 Kor. 15:58.

7. Dapre 1 Korintien 9:24-27, ki li inportan nou fer pou nou gagn lekours pou lavi? Donn enn lexanp.

⁷ Zezi ti dir so bann disip ki zot bizin “fer tou zot posib.” (Lik 13:23, 24) Pol ti  konpran seki Zezi ti pe rod dir. Li ti kone ki, parey kouma Zezi, li ti bizin kontign fer bann gran zefor toutlong so lavi. Akoz sa, li ti konpar lavi enn Kretien ar enn lekours. (Lir 1 Korintien 9:24-27, NW. *) Dan enn lekours, enn kourer gard so lizie fixe lor lalign larive ek li pa les nanye dekonsantre li. Par exanp, kan bann kourer galoup dan enn lavil ena plizir kitsoz ki kapav dekonsantre zot, kouma bann magazin ek lezot kitsoz. Eski to kapav imazinn enn kourer pe aret devan enn magazin pou get seki ena andan? Antouka, si li anvi gagn sa lekours-la, li pa pou fer sa! Li parey pou nou osi, fode pa nou les nou dekonsantre dan nou lekours pou gagn lavi. Si nou res konsantre lor nou lobzektif ek fer bann gran zefor parey kouma Pol, nou pou gagn nou rekonpans!

8. Ki trwa difikilte nou pou examine?

⁸ Anou get trwa difikilte ki kapav fer nou perdi kouraz. Premierman, kan bann kitsoz pa ariv dan moman ki nou pe atann. Deziemman, kan nou koumans afebli fizikman akoz nou laz ouswa enn maladi. Ek trwaziemman, kan nou pe andir bann problem ki pe kontign dire. Kan nou kone kouma lezot inn fer fas ar sa bann sitiasion-la, sa kapav ed nou pou kontign servi Zeova.​—Fil. 3:17.

9. Kouma sa kapav afekte nou kan bann kitsoz pa ariv dan moman ki nou pe atann?

⁹ Bann kitsoz pa ariv dan moman ki nou pe atann. Li normal ki nou anvi ki bann promes Zeova realize pli vit posib. Par exanp, Abakuk ti bien anvi ki Zeova tir tou bann move kitsoz ki ti ena dan Zida. Me Zeova ti demann li pou “kontign atann.” (Abak. 2:3) Selman, kan seki nou pe atann paret pe tarde  pou arive, nou kapav perdi nou zel. Nou kapav mem dekouraze. (Prov. 13:12) Se seki ti ariv sertin frer ver lane 1914. Sa lepok-la, boukou Kretien ki ti ena lesperans pou al dan lesiel ti panse ki zot ti pou gagn zot rekonpans an 1914. Me kan sa pa ti arive, kouma bann Kretien fidel sa lepok-la ti sirmont sa dekourazman-la?

10. Ki enn koup ti fer kan seki zot ti pe atann pa finn ariv dan moman ki zot ti panse?

¹⁰ Anou get lexanp de Kretien fidel ki ti bizin sirmont sa dekourazman-la. Frer Royal Spatz ti batize an 1908 kan li ti ena 20 an. Li ti sir ki dan enn tigit letan li ti pou al dan lesiel. An 1911, kan Frer Royal ti demann enn ser ki apel Pearl pou marye ar li, li ti dir Pearl: “To kone ki pou arive an 1914. Si nou anvi marye, vomie nou fer li pli vit posib!” Me an 1914, sa koup-la pa ti gagn zot rekonpans pou al dan lesiel. Eski sa ti fer zot abandonn zot lekours pou gagn lavi? Non, parski se pa zot rekonpans ki ti pli inportan pou zot, me servi Zeova avek fidelite. Zot ti bien deside pou galoup zot lekours avek landirans. Royal ek Pearl ti res bien aktif ek fidel pandan plizir dizenn lane ziska ki zot terminn zot lavi lor later. Pena dout ki to pe atann avek inpasians ki Zeova tir tou dezoner ki finn fane lor so nom, ki Li montre ki so fason dirize pli bon ek ki Li realiz tou so bann promes. To kapav sir ki sa bann kitsoz-la pou arive dan ler ki Zeova inn fixe. Me an-atandan, anou res bien aktif dan nou servis pou Bondie. Fode zame nou dekouraze ouswa bes lebra kan bann kitsoz pa ariv dan moman ki nou pe atann.

11-12. Kifer nou kapav kontign servi Zeova mem si nou’nn afebli fizikman? Donn enn lexanp.

¹¹ Nou afebli fizikman. Enn kourer ki pe partisip dan enn lekours bizin for fizikman. Me pou ki nou ena enn lafwa for an Zeova ek enn gran zel dan so servis, li pa neseser ki nou ena sa kalite lafors fizik la. Okontrer, boukou frer ek ser ki nepli ena mem lafors ki avan ankor anvi donn Zeova zot maximum. (2 Kor. 4:16) Anou get lexanp Frer Arthur Secord. * Li ti ena 88 an ek li pa ti ena enn bon lasante. Li ti servi dan Betel pandan 55 an. Enn zour, enn ners ti vinn kot so lili pou okip li. Ners-la ti get Frer Secord ek avek boukou lafeksion ti dir li: “Frer Secord, to finn fer boukou dan servis Zeova.” Me Arthur pa ti aret li lor seki li’nn fer dan lepase. Li ti get ners-la, li ti fer enn sourir, ek li ti dir li: “Wi, se vre. Me se pa seki nou’nn fer dan lepase ki inportan. Seki pli inportan se res fidel azordi.”

¹² Kitfwa sa fer plizir lane ki to pe servi Zeova. Me azordi, parski to ena enn lasante frazil, kitfwa li difisil pou twa pou fer parey  kouma avan. Si to dan sa sitiasion-la, pa dekouraze. To kapav sir ki Zeova pa bliye to servis fidel ek ki Li ena rekonesans pou tou seki to’nn fer dan lepase. (Ebre 6:10, NW) Anou rapel osi ki se pa kantite ki nou fer pou Zeova ki pou montre komie nou kontan Li. Okontrer, nou montre Zeova ki kantite nou kontan Li kan nou ena enn bon latitid ek kan nou fer nou maximum. (Kol. 3:23) Zeova konn nou bann limit ek Li pa demann nou pou fer plis ki seki nou kapav.​—Mark 12:43, 44.

13. Kouma lexanp Anatoly ek Lidiya ankouraz nou pou kontign servi Zeova mem si nou pe pas par boukou difikilte?

¹³ Bann problem ki pe kontign dire. Sertin serviter Zeova finn andir bann persekision ek bann difikilte pandan plizir dizenn lane. Par exanp, Anatoly Melnik * ki ti viv dan Moldavie, ti ena 12 an kan lapolis ti aret so papa. Zot ti met so papa dan prizon ek ti avoy li an exil dan Sibérie, ki ti trouv plis ki 7,000 kilomet lwin ar so fami. Enn an plitar, Anatoly, so mama, ek so bann gran-paran ti al an exil dan Sibérie zot osi. Avek letan, zot ti reisi al asiste renion dan enn lot vilaz, me selman zot ti bizin mars 30 kilomet dan lanez, ek tanperatir ti mwins ki zero degre. Plitar, Frer Melnik ti anprizone pandan trwa-z-an, lwin ar so madam Lidiya, ek zot tifi ki ti ena enn an. Mem si zot inn pas par boukou difikilte pandan plizir lane, Anatoly ek so fami ti kontign servi Zeova avek fidelite. Azordi, Anatoly ena 82 an ek li enn manb biro nasional l’Asie centrale. Parey kouma Anatoly ek Lidiya, anou fer tou seki nou kapav dan servis Zeova, ek anou kontign andire parey kouma nou’nn fer dan lepase.​—Gal. 6:9.

14. Ki kitsoz Pol ti konpran li bizin fer pou realiz so lobzektif?

¹⁴ Pol ti sir ki li ti pou fini so lekours ek realiz so lobzektif. Li ti enn Kretien ki ti ena lesperans pou al dan lesiel, alor li ti pe atann pou “resevwar pri ki Bondie ofer [li] dan lesiel.” Selman, pou gagn so rekonpans, li ti konpran ki li bizin kontign “galoup” dan lekours pou gagn lavi. (Fil. 3:14) Pol ti servi enn zoli lexanp ar bann Filipien pou ed zot res konsantre lor zot rekonpans.

15. Ki konparezon Pol ti servi pou ankouraz bann Filipien pou kontign galoup zot lekours pou gagn lavi?

¹⁵ Pol ti rapel bann Filipien ki se dan lesiel ki zot ti pou al viv. (Fil. 3:20) Kifer zot ti bizin rapel sa? Sa lepok-la, bann dimounn ti bien anvi vinn bann sitwayen Romin parski  sa ti permet zot gagn boukou lavantaz. * Me bann Kretien ki ti ena lesperans pou al dan lesiel ti sitwayen enn gouvernman dan lesiel. Sa gouvernman-la ti pou donn zot bann pli gran benediksion. Vinn enn sitwayen Rwayom Bondie ti ena bien plis valer ki vinn enn sitwayen Romin! Pou sa rezon-la, Pol ti ankouraz bann Filipien pou “azir kouma bann sitwayen ki montre ki zot pe respekte bonn nouvel lor Zezi Kris.” (Fil. 1:27, NW, not) Azordi osi, bann Kretien ki ena lesperans pou al dan lesiel donn enn bon lexanp kan zot kontign galoup zot lekours pou gagn zot rekonpans.

16. Dapre Filipien 4:6, 7, ki nou bizin kontign fer?

¹⁶ Ki nou ena lesperans pou viv dan lesiel ouswa lor later, nou bizin kontign galoupe avek lobzektif pou gagn nou rekonpans. Malgre nou sitiasion, fode pa nou get bann kitsoz ki nou’nn kit deryer ek fode pa nou les nanye anpes nou servi Zeova. (Fil. 3:16) Kitfwa sa fer lontan ki nou pe atann ki Zeova realiz so bann promes, ouswa kitfwa nou nepli ena lafors ki nou ti ena avan. Li posib ki nou finn andir bann difikilte ek bann persekision pandan plizir lane. Me fode pa nou “trakase pou okenn kitsoz.” Okontrer, par lapriyer ek siplikasion anou demann Bondie seki nou bizin. Lerla, Li pou donn nou enn lape ki depas tou seki nou kapav mazine.​—Lir Filipien 4:6, 7, NW. *

17. Ki nou pou examine dan prosin lartik?

¹⁷ Parey kouma enn kourer ki fer bann gran zefor kan li ariv pre ar lalign larive, nou osi anou res konsantre lor nou lobzektif, setadir fer tou pou ki nou fini nou lekours pou gagn lavi. Dapre nou kapasite fizik ek nou sitiasion, anou fer bann gran zefor pou res konsantre lor bann zoli kitsoz ki pe atann nou devan. Kouma nou kapav kontign andire? Prosin lartik pou montre nou seki nou bizin met an premie dan nou lavi ek kouma nou kapav “verifie bien bann kitsoz ki pli inportan.”​—Fil. 1:9, 10, NW.