DAN to lasanble, eski ena enn responsabilite ki to ti pou kontan gagne, me ki to pa kapav gagne asterla? Kitfwa se enn responsabilite ki enn lot dimounn ena. Ouswa kitfwa se enn responsabilite ki to ti ena avan. Selman, akoz laz, problem lasante, problem ekonomik, ouswa bann responsabilite dan lafami, asterla to nepli kapav fer kouma avan. Ouswa kitfwa to ti ena enn responsabilite depi lontan, me akoz bann sanzman ki finn ena dan lorganizasion to nepli ena sa responsabilite-la. Dan ninport ki sitiasion to ete, kitfwa to ena linpresion ki to pa pe reisi fer tou seki to ti pou anvi pou Zeova. Dan bann sitiasion koumsa, li normal ki parfwa to santi twa dekouraze. Kanmem sa, kouma to kapav anpes bann santiman negatif kouma dekourazman, rankinn, ouswa lakoler pran rasinn dan to leker? Kouma to kapav gard to lazwa?

Nou kapav aprann kouma pou gard nou lazwa kan nou examinn lexanp Zan Batis. Zan ti ena bann gran privilez dan servis Zeova. Me kitfwa li pa ti atann ki so lavi ti pou pran enn lot direksion. Sirman li pa ti mazine ki li ti pou pas plis letan dan prizon ki dan so minister. Pourtan, Zan ti kontign gard so lazwa, ek li ti gard sa bon latitid-la toutlong so lavi. Ki kitsoz ti ed li? Ek kouma nou kapav gard nou lazwa mem kan nou fer fas ar dekourazman?

Ver Avril lan 29 Nou Lepok, Zan ti koumans travay ki Zeova ti donn li, setadir prepar bann dimounn pou larive Lemesi. Zan ti dir: “Sanz zot leker [“repanti,” NW], Rwayom Bondie finn aprose.” (Mat. 3:2; Lik 1:12-17) Boukou dimounn ti reazir dan enn bon fason. Avredir, bann lafoul dimounn ti sorti depi bien lwin pou ekout so mesaz, ek boukou ti repanti ek ti pran batem. Avek kouraz, Zan ti osi averti bann sef relizie, ki ti panse zot pli bon ki lezot, konsernan zizman ki ti pe atann zot si zot pa sanze. (Mat. 3:5-12, NW) Ver Oktob lan 29 Nou Lepok, Zan ti viv moman pli inportan dan so minister kan li ti batiz Zezi. Depi sa moman-la, Zan ti ankouraz bann dimounn pou swiv Zezi, Lemesi ki Bondie ti promet pou vini.​—Zan 1:32-37.

 Konsernan responsabilite bien inportan ki Zan ti ena, Zezi ti dir: “Parmi tou dimoun ki finn ne lor later, pena enn pli gran ki Zan Batis.” (Mat. 11:11) Pena dout ki Zan ti vremem extra kontan akoz bann benediksion ki li ti gagne. Parey kouma Zan, azordi osi boukou inn gagn bann gran benediksion. Anou pran lexanp enn frer ki apel Terry. Li ek so madam, Sandra, inn pas plis ki 50 an dan servis aplintan. Terry dir: “Mo finn gagn bann gran privilez. Mo’nn servi antan ki pionie, Betelit, pionie spesial, responsab sirkonskripsion, responsab distrik, ek asterla ankor enn fwa mo pionie spesial.” Sa donn nou boukou lazwa kan nou gagn bann responsabilite dan lorganizasion Zeova. Me lexanp Zan pou montre nou ki sa demann bann zefor pou gard nou lazwa kan nou sitiasion sanze.

Zan Batis ti reisi gard so lazwa parski li ti ena rekonesans pou bann privilez ki li ti ena. Anou get enn lexanp. Apre batem Zezi, Zan so minister ti koumans diminie alor ki Zezi so minister ti koumans ogmante. Akoz sa, bann disip Zan ti gagn traka. Zot ti dir Zan: “Li osi li pe batize e tou dimoun pe al ar li.” (Zan 3:26) Zan ti reponn: “Nouvo marye, limem ki ena lamarye; kamarad nouvo marye nek zis debout pre ar li e ekout li; kamarad la dan lazwa letan li tann lavwa nouvo marye. Akoz samem aster, mo lazwa li bien-bien gran.” (Zan 3:29) Zan pa ti pe fer konpetision ar Zezi. Li pa ti panse osi ki so travay pena valer parski travay Zezi ti pli inportan. Olie sa, Zan ti gard so lazwa parski li ti kontan rol ki li ti ena antan ki “kamarad nouvo marye.”

Latitid Zan ti ed li pou gard so lazwa mem si so servis pa ti fasil. Par exanp, Zan ti enn Nazireen depi ki li’nn ne ek akoz sa li pa ti gagn drwa bwar divin. (Lik 1:15) Konsernan lavi sinp ki Zan ti ena, Zezi ti dir: “Zan finn vini, li pa finn manze ni bwar.” Parkont, Zezi ek so bann disip ti ena enn lavi normal ek pa ti viv dapre sa bann restriksion-la. (Mat. 11:18, 19) Anplis, Zan pa ti kapav fer okenn mirak. Me li ti kone ki bann disip Zezi ti gagn pouvwar pou fer bann mirak. Ek sertin parmi zot ti mem so bann disip avan. (Mat. 10:1; Zan 10:41) Olie ki Zan ti les sa bann kitsoz-la fatig li, avek zel li ti kontign fer travay ki Zeova ti donn li.

Si nou osi nou kontan travay ki nou pe fer pou Zeova, nou pou reisi gard nou lazwa. Terry, ki nou ti mansione avan, dir: “Sak responsabilite ki mo ti gagne, mo ti fer li ar tou mo leker.” Kan li reflesi lor so lavi dan servis aplintan, li dir: “Mo pena okenn regre. Mo ena zis bann zoli souvenir.”

Seki donn enn afektasion ouswa enn responsabilite so vre valer, se privilez pou “travay ansam avek Bondie.” (1 Kor. 3:9) Kan nou medit lor sa privilez-la, sa donn nou plis lazwa pou servi Zeova. Par exanp, si nou touletan pran swin enn kitsoz ki ena valer, sa kitsoz-la pou res zoli. Dan mem fason, si nou touletan panse ki se enn gran loner pou travay ansam avek Zeova, nou pou gard nou lazwa. Nou pa pou konpar bann zefor ki nou pe fer pou servi Zeova ar zefor ki lezot pe fer. Ek nou pa pou panse ki nou servis ena mwins valer parski lezot pe gagn bann privilez.​—Gal. 6:4.

Zan kitfwa ti kone ki so minister pa ti pou dir lontan, me sirman li pa ti atann ki sa ti pou arete enn kout koumsa. (Zan 3:30) Lan 30 Nou Lepok, zis sis mwa apre ki Zan ti batiz Zezi, Lerwa Erod ti anprizonn Zan. Mem sa, Zan ti fer tou seki li kapav pou kontign rann temwaniaz. (Mark 6:17-20) Ki kitsoz ti ed li pou gard so lazwa malgre sa bann sanzman-la? Li ti res konsantre lor bann kitsoz ki inportan pou Zeova.

Kan Zan ti dan prizon, li ti aprann ki Zezi ti pe gagn bann bon rezilta dan so minister. (Mat. 11:2; Lik 7:18) Zan ti sir ki Zezi ti Lemesi. Me kitfwa Zan ti pe demann limem kouma Zezi ti pou realiz tou seki bann Lekritir ti dir konsernan Lemesi. Zan ti kone ki Lemesi ti pou  vinn lerwa, alor kitfwa li ti pe demann limem si Zezi ti pre pou koumans regne. Kitfwa li ti anvi kone osi si Zezi ti pou liber li. Zan ti vremem anvi konn plis lor seki Zezi ti pou fer. Alor, li ti avoy de parmi so bann disip poz Zezi sa kestion-la: “Tomem ki sipoze vini la, oubien nou bizin atann enn lot?” (Lik 7:19) Lerla, Zezi ti dir zot: “Al dir Zan seki zot finn trouve ek seki zot finn tande: aveg trouv kler, paralize marse, bann lepre geri, bann sourd tande, bann mor leve, bann pov resevwar Bonn Nouvel.” (Lik 7:20-22) Kan sa de disip-la ti retourne, sirman Zan ti bien ekout zot kan zot ti pe explike ki Zezi ti pe geri bann dimounn.

Pena dout ki seki sa de disip-la ti dir ti bien ankouraz Zan. Sa ti konfirme ki Zezi ti pe akonpli bann profesi lor Lemesi. Mem si larive Zezi pa ti pou fer Zan sorti dan prizon, Zan ti kone ki so servis pa ti dan vid. Malgre so sitiasion, li ti ena bann bon rezon pou gard so lazwa.

Parey kouma Zan, si nou res konsantre lor bann kitsoz ki inportan pou Zeova, nou pou kapav andire avek lazwa ek pasians. (Kol. 1:9-11) Nou kapav fer sa kan nou lir Labib ek medit lor la. Sa pou rapel nou ki nou travay pou Zeova zame pa dan vid. (1 Kor. 15:58) Sandra dir: “Mo lir enn sapit Labib sak zour ek sa ed mwa pou vinn pli pros ar Zeova. Sa ed mwa pou res konsantre lor Li ek pa lor momem.” Nou kapav osi medit lor bann bon rezilta ki pe gagne gras-a predikasion ki pe fer dan lemond antie. Sa pou ed nou pou aret konsantre zis lor noumem me pou konsantre lor seki Zeova pe akonpli. Sandra dir osi: “Bann emision ki ena sak mwa lor Program Televizion JW ed nou pou santi nou pli pros ar lorganizasion ek pou gard nou lazwa dan nou afektasion.”

Pandan sa tigit letan ki Zan Batis ti prese la, li ti pres avek “lafors ek lespri profet Eli.” Ek parey kouma Eli, li ti enn dimounn avek bann santiman “parey kouma nou.” (Lik 1:17; Zak 5:17) Anou imit lexanp Zan ki ti ena rekonesans ek ki ti res konsantre lor so servis pou Zeova. Lerla, nou osi nou pou kapav gard nou lazwa dan nou servis malgre ninport ki kitsoz ki kapav arive dan nou lavi.