LARTIK LETID 34
To Ena To Plas dan Lasanble Zeova!
“Parey kouma ena enn sel lekor me ena plizir manb, ek tou bann manb sa lekor-la, mem si zot boukou, zot enn sel lekor, li parey pou Lekris osi.”—1 KOR. 12:12, NW.
KANTIK 101 Travay Ansam dan Linite
REZIME *
1. Ki privilez nou ena?
SE VREMEM enn gran privilez pou form parti dan lasanble Zeova! Nou dan enn paradi spiritiel kot ena bann dimounn ki anpe ek zwaye. Me ki plas to ena dan lasanble Zeova?
2. Ki lexanp lapot Pol ti servi dan plizir let ki li ti ekrir?
2 Pou nou kone ki plas nou ena dan lasanble Zeova, anou examinn enn lexanp ki lapot Pol ti servi dan plizir let ki li ti ekrir. Dan sa bann let-la, Pol ti konpar lasanble ar enn lekor. Li ti osi konpar sak dimounn dan lasanble ar bann manb enn lekor.—Rom. 12:4-8; 1 Kor. 12:12-27; Efe. 4:16.
3. Ki trwa leson nou pou examine dan sa lartik-la?
3 Dan sa lartik-la, nou pou examinn trwa leson inportan ki nou kapav aprann ar lexanp ki Pol ti servi. Premierman, nou pou aprann ki sakenn parmi nou ena so plas * dan lasanble. Deziemman, nou pou gete seki nou kapav fer si nou pa kone ki plas nou ena dan lasanble. Ek trwaziemman, nou pou gete kifer nou bizin res bien okipe dan travay ki Zeova inn donn nou dan lasanble.
NOU TOU NOU ENA NOU PLAS DAN LASANBLE ZEOVA
4. Ki Romin 12:4, 5 ansegn nou?
4 Premie leson ki nou aprann dan lexanp ki lapot Pol ti servi, se ki sakenn parmi nou ena enn plas inportan dan fami Zeova. Pol explike: “Nou lekor ena plizir parti e sakenn ena so prop fonksion. Dan mem fason, nou ki plizir, nou form enn sel lekor dan linion avek Lekris e sakenn apartenir ar lezot.” (Rom. 12:4, 5) Ki Pol ti pe rod dir? Pol ti pe rod dir ki sakenn ena diferan rol dan lasanble, me nou tou nou ena valer.
Nou ena diferan responsabilite dan lasanble, me nou tou nou ena valer pou Zeova (Get paragraf 5-12) *
5. Ki “don” Zeova inn donn bann lasanble?
5 Kan to pans bann ki ena enn plas dan lasanble, sirman deswit to mazinn bann ki “diriz” nou. (1 Tes. 5:12; Ebre 13:17, NW) Gras-a Zezi Kris, Zeova finn donn “bann zom kouma bann don” pou bann lasanble. (Efe. 4:8, NW) Parmi sa bann ‘don-la’ ena bann manb Komite Santral, bann asistan Komite Santral, bann manb Komite Biro Nasional, bann responsab sirkonskripsion, bann instrikter pou bann lekol Biblik, bann ansien, ek bann asistan ministeryel. Tou sa bann frer-la inn etabli par lespri sin pou pran swin pep Zeova ek pou fortifie lasanble.—1 Pier 5: 2, 3.
6. Dapre 1 Tesalonisien 2:6-8, bann frer ki etabli par lespri sin fer zefor pou fer ki kitsoz?
6 Lespri sin etabli bann frer pou asim plizir responsabilite. Parey kouma diferan manb enn lekor travay ansam pou ki lekor-la fonksione, bann frer ki etabli par lespri sin travay dir pou ki bann lasanble gagn bann bienfe. Zot pa rod zot prop laglwar. Okontrer, zot fer boukou zefor pou ankouraz ek fortifie zot bann frer ek ser. (Lir 1 Tesalonisien 2:6-8.) Nou bien rekonesan anver Zeova parski Li’nn donn nou bann zom ki spiritiel ek ki ena lespri sakrifis!
7. Ki benediksion bann serviter aplintan gagne?
7 Dan lasanble, sertin servi kouma misioner, pionie spesial, ouswa pionie permanan. An realite, dan lemond antie, boukou frer ek ser finn desid pou prese ek ansegn bann dimounn aplintan. Kan zot inn fer sa, zot inn ed boukou dimounn pou vinn bann disip Zezi. Mem si sa bann serviter aplintan la pena boukou kitsoz materyel, Zeova donn zot boukou benediksion. (Mark 10:29, 30) Nou bien kontan sa bann frer ek ser-la, ek nou bien rekonesan ki zot form parti dan lasanble!
8. Kifer sak proklamater ena valer pou Zeova?
8 Eski se zis bann frer ki ena bann responsabilite ouswa bann frer ek ser ki pe servi aplintan ki ena enn plas dan lasanble? Non! Sak proklamater ena valer pou Zeova ek pou lasanble. (Rom. 10:15; 1 Kor. 3:6-9) Kifer? Parski enn parmi bann lobzektif prinsipal ki bann lasanble ena se pou fer bann disip Zezi. (Mat. 28:19, 20; 1 Tim. 2:4) Tou bann ki prese, ki zot bann proklamater batize ouswa non, pe fer zot maximum pou fer sa travay-la.—Mat. 24:14.
9. Kifer nou bien kontan nou bann ser?
9 Zeova onor bann ser kan Li donn zot enn plas inportan dan lasanble. Bann mama, bann vev, bann madam, ek bann ser selibater ki servi Zeova avek fidelite, ena enn gran valer pou Li. Labib koz lor plizir madam ki ti fer Zeova plezir. Zot finn les enn bon lexanp parski zot ti ena sazes, lafwa, zel, kouraz, zenerozite, ek parski zot ti fer bann bon travay. (Lik 8:2, 3; Zist. 16:14, 15; Rom. 16:3, 6; Fil. 4:3; Ebre 11:11, 31, 35) Nou bien rekonesan anver Zeova pou bann ser ki nou ena dan nou bann lasanble, bann ser ki ena sa bann zoli kalite-la!
10. Kifer nou bann frer ek ser aze ena valer?
10 Nou bien kontan osi ki nou ena bann frer ek ser aze dan nou bann lasanble. Dan sertin lasanble, ena bann frer ek ser aze ki’nn servi Zeova avek fidelite toutlong zot lavi, ek ena lezot osi ki fek konn laverite. Boukou parmi sa bann frer ek ser-la ena bann problem lasante parski zot pe vinn vie. Akoz zot lasante, zot nepli kapav fer boukou dan lasanble ek dan predikasion. Pourtan, zot fer tou seki zot kapav dan predikasion, ek zot servi tou zot lenerzi pou ankouraz ek form lezot! Anplis, nou kapav profit zot lexperyans. Nou bann frer ek ser aze vremem zoli devan lizie Zeova, ek nou osi nou trouv zot zoli!—Prov. 16:31.
11-12. Kouma bann zenn dan to lasanble finn ankouraz twa?
11 Mazinn osi nou bann zenn. Dan sa lemond ki dirize par Satan ek ki inflianse par so fason panse, nou bann zenn pe bizin fer fas ar boukou problem. (1 Zan 5:19) Sa bien ankouraz nou kan nou trouv zot prese, reponn dan renion, ek defann zot lafwa avek kouraz. Alor zenn, twa osi to ena enn plas bien inportan dan lasanble Zeova!—Ps. 8:2.
12 Selman, sertin frer ek ser kitfwa trouv sa difisil pou krwar ki zot ena zot plas dan lasanble. Ki kapav ed sakenn parmi nou pou trouv so plas dan lasanble? Se seki nou pou gete asterla.
TO ENA TO PLAS DAN LASANBLE
13-14. Kifer sertin panse ki zot pena zot plas dan lasanble?
13 Anou get deziem leson ki nou kapav aprann ar lexanp ki Pol ti servi. Pol koz lor enn problem ki boukou ena azordi: Zot trouv sa difisil pou krwar ki zot ena zot plas dan lasanble. Pol ti ekrir: “Si lipie dir, ‘Parski mo pa enn lame, mo pa fer parti dan lekor,’ pa pou otan ki li pa fer parti lekor la. Si zorey dir, ‘Akoz mo pa enn lizie, mo pa fer parti lekor,’ pa pou otan ki li pa fer parti lekor la.” (1 Kor. 12:15, 16) Ki Pol ti pe rod dir?
14 Si to konpar tomem ar lezot dan lasanble, to kapav koumans panse ki to pena valer dan lasanble. Sertin dan lasanble kitfwa ena bann kapasite pou ansegne, pou organize, ouswa pou ankouraz lezot. Kitfwa to panse ki to pena sa bann kapasite-la. Sa montre ki to ena limilite ek modesti. (Fil. 2:3) Me to bizin fer atansion. Si to kontign konpar tomem ar lezot, to pou dekouraze. Kitfwa to pou mem panse ki to pena to plas dan lasanble. Ki kapav ed twa pou sirmont sa santiman-la?
15. Dapre 1 Korintien 12:4-11, ki kitsoz nou bizin rekonet si nou ena enn talan?
15 Reflesi lor la: Dan premie siek, Zeova ti servi so lespri sin pou donn sertin Kretien kapasite pou fer bann kitsoz extraordiner. Me zot tou pa ti gagn mem kapasite. (Lir 1 Korintien 12:4-11, NW. *) Zeova ti donn zot diferan kapasite, me zot tou ti ena valer pou Li. Azordi, lespri sin pa donn nou kapasite pou fer bann mirak. Me mem si nou ena diferan talan, nou tou nou ena valer pou Zeova.
16. Ki konsey nou bizin swiv?
16 Olie ki nou konpar noumem ar lezot, nou bizin swiv konsey ki lapot Pol ti done: “Sakenn bizin examinn so prop travay, e si li bizin fer vantar, fode pa li fer li ankonparezon avek so prosin me par rapor avek limem.”—Gal. 6:4.
17. Ki bienfe nou gagne kan nou swiv konsey lapot Pol?
17 Si nou swiv konsey ki lapot Pol ti done ek ki nou examinn nou bann aksion, kitfwa nou pou trouve ki nou ena bann kapasite ki lezot pena. Par exanp, kitfwa enn ansien pa enn bon ansegnan lor lestrad, me kitfwa li enn bon ansegnan dan predikasion. Ouswa, kitfwa li pa osi bien organize ki lezot ansien dan so lasanble, me kitfwa li enn ansien ki ena boukou bonte ek lamour, ek bann frer ek ser santi zot alez pou rod bann konsey avek li. Ouswa, kitfwa li kontan montre lospitalite. (Ebre 13:2, 16) Kan nou kone ki kapasite nou ena, nou pou kontan ar seki nou pe kapav fer dan nou lasanble. Ek nou pa pou zalou nou bann frer ek ser ki ena bann kapasite ki nou nou pena.
18. Kouma nou kapav vinn bann pli bon ansegnan?
18 Ninport ki plas nou ena dan lasanble, nou tou nou bizin ena dezir pou devlop nou bann kapasite pou ki nou vinn bann pli bon ansegnan. Pou ed nou fer sa, Zeova donn nou bann formasion atraver so lorganizasion. Par exanp, dan nou renion lasemenn, nou gagn bann instriksion pou vinn pli efikas dan nou minister. Eski to pe profit bien sa bann formasion-la?
19. Ki kitsoz kapav ed twa pou asiste Lekol pou Bann Evanzelizater Rwayom Bondie?
19 Enn lot formasion extraordiner ki Zeova done se atraver Lekol pou Bann Evanzelizater Rwayom Bondie. Bann frer ek ser ki ena ant 23 ek 65 an ek ki dan servis aplintan kapav asiste sa lekol-la. Kitfwa to panse ki zame to pa pou kapav fer sa lekol-la. Me olie ki to pans bann rezon kifer to pa kapav asiste sa lekol-la, fer enn lalis bann rezon kifer to anvi gagn sa formasion-la. Apre sa, fixe twa bann lobzektif ki pou ed twa ranpli bann kondision pou to asiste sa lekol-la. Avek led Zeova ek bann zefor ki to fer, kitfwa to pou reisi fer bann kitsoz ki to ti panse inposib.
SERVI TO BANN KAPASITE POU FORTIFIE LASANBLE
20. Ki nou aprann dan Romin 12:6-8?
20 Trwaziem leson ki nou kapav aprann ar lexanp ki Pol ti servi, nou trouv sa dan Romin 12:6-8. (Lir.) Dan sa bann verse-la, ankor enn fwa, Pol pe montre ki sak dimounn dan lasanble ena diferan kapasite. Me asterla, Pol pe explike ki nou bizin servi nou bann kapasite pou ankouraz ek fortifie lasanble.
21-22. Ki leson nou kapav aprann ar lexanp Robert ek Felice?
21 Anou examinn lexanp enn frer ki nou pou apel Robert. Li ti pe servi dan enn pei etranze, ek plitar li ti retourn dan so pei pou li al servi dan Betel. Mem si bann frer ti rasir li ki li pa ti fer nanye demal, li ti dir: “Pandan plizir mwa, mo pa ti ere parski mo ti panse ki mo pa ti fer enn bon travay dan mo ansien afektasion. Ena fwa, mo ti anvi kit Betel.” Kouma Robert ti regagn so lazwa? Enn lot ansien ti rapel li ki Zeova form so bann serviter dan zot ansien afektasion, pou ki zot kapav fer enn bon travay dan zot nouvo afektasion. Robert ti realize ki li ti bizin aret pans lor lepase ek konsantre li lor seki li ti pe fer asterla.
22 Frer Felice Episcopo ti konn enn sitiasion inpe parey. An 1956, li ek so madam ti fer Lekol Galaad ek apre zot ti al Bolivi pou servi dan sirkonskripsion. An 1964, zot ti gagn enn zanfan. Felice dir: “Nou ti trouv sa bien difisil pou kit nou lafektasion ki nou ti bien kontan. Mo rekonet ki pandan enn an, mo ti bien dekouraze. Me avek led Zeova, mo ti sanz mo fason panse ek mo ti konsantre mwa lor mo nouvo responsabilite antan ki paran.” Eski to ena mem santiman ki Robert ek Felice? Eski twa osi to dekouraze parski to pena bann mem responsabilite ki avan? Si to dan sa sitasion-la, to pou pli ere si to aret pans lor lepase ek to konsantre twa lor seki to pe fer asterla pou servi Zeova ek to bann frer ek ser. Res bien okipe ek servi to bann kapasite pou ed lezot. Lerla, to pou zwaye kan to pou fortifie lasanble.
23. Ki nou bizin pran letan pou fer, ek ki nou pou examine dan prosin lartik?
23 Sakenn parmi nou ena valer devan lizie Zeova. Li anvi ki nou form parti so fami. Si nou pran letan pou reflesi lor seki nou kapav fer pou ankouraz nou bann frer ek ser ek nou fer zefor pou fer sa, nou pou trouve ki nou ena nou plas dan lasanble. Me kouma eski nou konsider lezot dan lasanble? Kouma nou kapav montre ki nou kontan zot ek respekte zot? Se seki nou pou examine dan prosin lartik.
KANTIK 24 Anou Mont lor Montagn Zeova
^ par. 5 Nou tou nou anvi santi ki nou ena valer devan lizie Zeova. Me parfwa, nou kapav demann noumem si nou vremem itil pou Li. Dan sa lartik-la, nou pou trouve ki sakenn parmi nou ena enn plas bien inportan dan lasanble.
^ par. 3 EXPRESION KI’NN EXPLIKE: Plas ki nou ena dan lasanble Zeova se tou bann kitsoz ki nou kapav fer personelman pou ankouraz ek fortifie lasanble. Seki nou kapav fer pou fortifie lasanble pa depann lor nou ras, kantite kas ki nou ena, nou ran sosial, nou kiltir, ek nou ledikasion.
^ par. 15 1 Korintien 12:4-11: “4 Asterla, ena diferan don, me ena mem lespri; 5 ena diferan fason pou servi lezot, me pourtan ena mem Segner; 6 ek ena diferan laktivite, ek pourtan se mem Bondie ki fer tou sa bann aktivite-la dan tou dimounn. 7 Me lespri sin azir lor sakenn pou ki tou dimounn tir profi. 8 Alor, gras-a lespri, enn gagn kapasite pou koz avek sazes, ek gras-a mem lespri, enn lot gagn kapasite pou koz avek konesans. 9 Gras-a mem lespri, enn gagn lafwa ek enn lot gagn kapasite pou fer bann gerizon, 10 enn lot gagn kapasite pou fer bann mirak, enn lot gagn kapasite pou profetize, enn lot gagn kapasite pou kone si enn parol li inspire, enn lot gagn kapasite pou koz diferan lang, ek enn lot gagn kapasite pou interpret bann lang. 11 Se mem lespri ki donn kapasite pou fer sa bann kitsoz-la, ek li donn sak dimounn sa bann kapasite-la kouma li anvi.”
^ par. 63 DESKRIPSION ZIMAZ: Sa trwa zimaz-la montre nou seki pe pase avan, pandan, ek apre renion. Zimaz 1: Enn ansien pe akeyir enn misie ki’nn vinn renion pou premie fwa, enn zenn frer pe prepar bann mikro, ek enn ser pe koz ar enn ser aze. Zimaz 2: Bann zanfan ek bann adilt pe lev zot lame pou reponn pandan letid Latour Degard. Zimaz 3: Enn koup pe donn enn koudme pou netway Lasal. Enn mama pe montre so zanfan kouma pou met larzan dan bwat kontribision. Enn zenn frer pe okip piblikasion, ek enn frer pe ankouraz enn ser aze.
