1. Ki leprev Zozef ti gagne, ek kouma li ti reazir?

 ZOZEF, garson Zakob, ti gagn enn gran leprev. Potifar so madam ti dir li: “Dormi ar mwa.” Me Zozef ti refiz fer sa. Kitfwa enn kikenn kapav demann limem, ‘Me kifer Zozef ti refiz fer sa?’ Potifar pa ti la. Anplis, Zozef ti enn esklav dan sa lakaz-la, ek madam Potifar ti kapav rann so lavi amer. Selman, Zozef ti kontign refiz gagn relasion sexiel avek madam Potifar. Kifer? Li ti dir: “Kouma mo kapav fer enn move kitsoz koumsa ek vremem fer pese kont Bondie?”​—Zen. 39:7-12.

2. Kouma Zozef ti kone ki ladilter enn pese pou Bondie?

² Dan Lalwa Mozaik, ti ena enn lalwa bien kler ki ti dir: “Fode pa to komet ladilter.” (Ex. 20:14) Me Zeova ti donn sa lalwa-la apepre 200 an apre. Alor, kouma Zozef ti kone ki Zeova ti konsider ladilter kouma enn move kitsoz? Zozef ti konn Zeova ase bien pou li konpran seki Zeova panse lor limoralite. Par exanp, Zozef sirman ti kone ki, kan Zeova ti etabli maryaz, sa ti bizin ant enn misie ek enn madam selman. Sirman li ti kone osi kouma Zeova ti protez so aryer-granmer Sara, kan enn kikenn ti pe rod viol li. Zeova ti fer sa pou ki Sara res fidel anver so mari. Li ti kone osi kouma Zeova ti protez Rebeka, Izaak so madam. (Zen. 2:24; 12:14-20; 20:2-7; 26:6-11) Alor, kan Zozef ti reflesi lor sa bann sitiasion-la, sa ti ed li pou konpran seki Bondie konsider kouma bon ek pa bon. Zozef ti bien kontan Zeova, akoz sa li ti bien deside pou swiv bann prinsip Zeova.

3. Ki nou pou examine dan sa lartik-la?

³ Sirman twa osi to bien kontan lazistis! Selman, nou  tou nou inparfe, ek si nou pa fer atansion, nou kapav les nou inflianse ar seki bann dimounn dan sa lemond-la panse lor lazistis. (Iza. 5:20; Rom. 12:2) Alor, anou gete ki ete lazistis, ek ki bienfe nou gagne kan nou kontan lazistis. Nou pou get osi trwa kitsoz ki pou ed nou pou ogmant nou lamour pou bann prinsip Zeova.

4. Ki kitsoz boukou dimounn panse lor lazistis?

⁴ Boukou dimounn panse ki enn kikenn ki zis, se enn kikenn ki fier, ki ziz lezot, ek ki panse ki li pli bon ki lezot. Me Bondie pa kontan sa bann vilin defo-la. Kan Zezi ti lor later, li pa ti dakor ditou ar bann sef relizie ki ti etabli zot prop lalwa lor lazistis. (Ekle. 7:16; Lik 16:15) Enn dimounn ki fer seki drwat devan lizie Zeova, zame li pa pou panse ki li pli bon ki lezot.

5. Dapre Labib, ki ete lazistis? Donn bann lexanp.

⁵ Lazistis se enn zoli kalite. Ki ete lazistis? Lazistis se fer seki drwat devan lizie Zeova. Dan Labib, bann mo ki servi pou dekrir lazistis vedir viv dapre bann prinsip Zeova. Par exanp, Zeova ti dir bann marsan ki zot ti bizin onet ek servi bann “pwa ki exakt.” (Det. 25:15) Mo Ebre ki servi pou “onet” vedir osi “zis.” Alor, si enn Kretien ena enn biznes ek li anvi ki Zeova konsider li kouma enn kikenn ki zis, li bizin onet. Enn kikenn ki kontan lazistis, li pa kontan kan tret enn dimounn dan enn fason inzis. Ek avan ki li pran enn desizion, enn kikenn ki zis pou reflesi lor seki Zeova pou panse lor so desizion. Li pou fer sa parski li anvi fer Zeova plezir.​—Kol. 1:10.

6. Kifer nou kapav ena konfians dan bann prinsip Zeova konsernan seki bon ek seki pa bon? (Izai 55:8, 9)

⁶ Labib dir ki Zeova Lasours lazistis. Li dir osi ki Zeova Li sa Kikenn “kot lazistis” reste la. (Zer. 50:7) Zeova Li nou Kreater, alor se Li tousel ki kapav etabli bann prinsip konsernan seki bon ek seki pa bon. Zeova Li parfe, alor Li kone ki kitsoz ki bon ek ki kitsoz ki move. Parkont, nou nou inparfe. Akoz sa, nou pa konn fer diferans ant seki bon ek seki move. (Prov. 14:12; lir Izai 55:8, 9. *) Selman, parski nou’nn kree dan resanblans Bondie, nou kapav fer bann kitsoz ki Li konsider kouma zis. (Zen. 1:27) Anplis, nou kontan pou fer sa, parski nou telman kontan nou Papa ki sa motiv nou pou fer nou best pou imit Li.​—Efe. 5:1.

7. Kifer nou bizin swiv bann prinsip ki bien etabli ek ki fiab? Explike.

⁷ Nou gagn bann bienfe kan nou swiv bann prinsip Zeova konsernan seki bon ek seki pa bon. Kifer? Anou pran bann lexanp pou konpran sa. Esey mazine seki ti pou arive si sak labank ti fixe valer ki enn lamone ena, ouswa si sak konpagni konstriksion ti ena so prop mezir konsernan distans, pwa, ouswa volim enn kitsoz. Sa ti pou fer boukou dezord, pa vre! Si bann dokter, ouswa bann infirmie, pa ti swiv bann mem prinsip konsernan lasante, kitfwa boukou dimounn ti pou mor. Alor, kan bann dimounn swiv bann prinsip ki bien etabli ek ki fiab, se enn proteksion pou zotmem. Dan mem fason, bann prinsip Zeova konsernan  seki bon ek seki pa bon, zot enn proteksion pou nou.

8. Si nou fer seki zis, ki benediksion nou pou gagne?

⁸ Zeova beni bann dimounn ki swiv so bann prinsip. Li fer sa promes-la: “Bann ki swiv bon sime pou posed later e viv lor la pou toultan.” (Ps. 37:29) Kouma lavi ti pou ete si tou dimounn ti swiv bann prinsip Zeova? Bann dimounn ti pou viv dan linite, zot ti pou anpe, ek zot ti pou ere, ek se samem ki Zeova anvi pou nou. Alor, nou ena bann bon rezon pou kontan lazistis. Kouma nou kapav ogmant nou lamour pou sa kalite-la? Anou get trwa kitsoz ki nou kapav fer.

9. Ki kitsoz pou ed nou pou kontan lazistis?

⁹ 1. Kontan sa Kikenn ki’nn etabli sa bann prinsip-la. Pou ki nou kontan lazistis, nou bizin ogmant nou lamour pou sa Kikenn ki’nn etabli bann prinsip konsernan seki bon ek seki pa bon la. Plis nou kontan Zeova, plis nou pou anvi swiv so bann prinsip lor lazistis. Par exanp, si Adan ek Ev ti kontan Zeova, zame zot pa ti pou dezobeir so bann lalwa.​—Zen. 3:1-6, 16-19.

10. Ki Abraam ti fer pou li konpran fason panse Zeova pli bien?

¹⁰ Nou pa anvi fer mem erer ki Adan ek Ev. Alor, nou bizin kontign aprann konn Zeova, aprann kontan so bann kalite, ek esey konpran so fason panse. Kan nou fer sa, nou lamour pou Zeova pou grandi. Anou pran lexanp Abraam. Li ti vremem kontan Zeova. Mem kan li ti gagn difikilte pou konpran bann desizion ki Zeova ti pran, Abraam pa ti rebel kont Zeova. Okontrer, li ti esey konn Zeova pli bien. Par exanp, kan li ti aprann ki Zeova ti desid pou detrir Sodom ek Gomor, o-koumansman, Abraam ti per tansion “sa Ziz lor later antie la” detrir bann bon dimounn ansam ar bann move dimounn. Pou Abraam, Zeova pa kapav fer enn kitsoz koumsa. Akoz sa, avek limilite, li ti poz Zeova plizir kestion. Avek pasians, Zeova ti reponn so bann kestion. Alafin, Abraam ti konpran ki Zeova konn leker sak dimounn ek ki zame Li pa pou pini enn kikenn ki inosan ansam ar enn kikenn ki koupab.​—Zen. 18:20-32.

11. Kouma Abraam ti montre ki li ti kontan Zeova ek ki li ti ena konfians an Li?

¹¹ Konversasion ki li ti gagne ar Zeova konsernan lavil Sodom ek Gomor, ti bien tous Abraam. Sa ti ogmant so lamour ek so respe pou so Papa Zeova. Me plizir lane apre, Abraam ti pas par enn sitiasion ki ti teste so konfians an Zeova. Zeova ti demann li pou sakrifie so sel garson, Izaak. Me sa’nn fwa-la, Abraam ti bien konn so Bondie, ek li pa ti poz Li okenn kestion. Li ti zis fer seki Zeova ti demann li pou fer. Selman, sey mazine ki kantite li ti pe soufer kan li ti pe prepar li pou sakrifie Izaak! Sirman Abraam ti pe reflesi lor tou seki li ti aprann lor Zeova. Li ti kone ki Zeova zame pa ti pou fer enn kitsoz ki inzis. Dapre lapot Pol, Abraam ti mem panse ki Zeova ti pou kapav resisit so garson Izaak. (Ebre 11:17-19) Anplis, Zeova ti promet ki Izaak ti pou ena boukou desandan. Me sa lepok-la, Izaak pa ti ena okenn zanfan. Abraam ti kontan Zeova, ek li ti ena konfians ki Zeova ti pou azir avek lazistis. Li ti ena  lafwa an Zeova ek li ti obeir Li, mem si sa ti bien difisil.​—Zen. 22:1-12.

12. Kouma nou kapav swiv lexanp Abraam? (Psom 73:28)

¹² Kouma nou kapav swiv lexanp Abraam? Parey kouma Abraam, nou bizin kontign aprann konn Zeova. Kan nou fer sa, nou pou vinn pli pros avek Li ek nou pou plis kontan Li. (Lir Psom 73:28.) Nou pou ena mem fason panse ki Zeova ek sa pou form nou konsians. (Ebre 5:14) Lerla, kan enn kikenn esey tant nou pou fer enn move kitsoz, nou pou reziste tantasion-la. Nou pa pou mem pans pou fer enn kitsoz ki kapav gat nou lamitie avek Zeova ek fer so leker fermal. Ki kitsoz ankor nou kapav fer pou montre ki nou kontan lazistis?

13. Kouma nou kapav rod lazistis? (Proverb 15:9)

¹³ 2. Fer zefor pou ogmant to lamour pou lazistis sak zour. Si nou anvi ranforsi enn misk, nou bizin fer boukou zefor ek fer lexersis toulezour. Dan mem fason, si nou anvi ogmant nou lamour pou bann prinsip Zeova lor lazistis, nou bizin fer boukou zefor. Se enn kitsoz ki pa difisil pou fer ek ki nou kapav fer toulezour. Zeova Li rezonab, ek zame Li pa pou demann nou pou fer plis ki seki nou kapav fer. (Ps. 103:14) Zeova dir nou ki “Li kontan sa kikenn ki rod lazistis la.” (Lir Proverb 15:9. *) Kan nou ena enn lobzektif dan nou servis pou Zeova, nou pou fer zefor pou realiz li, pa vre! Dan mem fason, nou bizin fer zefor pou rod lazistis. Lerla, avek led Zeova, tigit-tigit nou pou ogmant nou lamour pou lazistis.​—Ps. 84:5, 7.

14. Ki kitsoz nou “zile proteksion” reprezante, ek kifer nou bizin li?

¹⁴ Avek boukou lamour, Zeova rapel nou ki se pa enn fardo pou fer seki drwat. (1 Zan 5:3) Okontrer, se enn proteksion pou nou, ek nou bizin sa proteksion-la toulezour. Reflesi lor larmir  spiritiel lor ki lapot Pol ti koze. (Efe. 6:14-18) Ki parti sa larmir-la protez leker enn solda? Se “ladrwatir” ki kouma enn “zile proteksion,” ek sa reprezant bann prinsip Zeova lor lazistis. Parey kouma enn zile proteksion protez leker enn solda, bann prinsip Zeova lor lazistis kapav protez nou leker sinbolik, setadir seki nou ete dan pli profon noumem. Se pou sa rezon-la ki li inportan ki dan nou larmir spiritiel, ena nou zile proteksion!​—Prov. 4:23.

15. Kouma nou met “ladrwatir kouma enn zile proteksion” lor nou?

¹⁵ Kouma nou met “ladrwatir kouma enn zile proteksion” lor nou? Toulezour, kan nou ena bann desizion pou pran, nou bizin reflesi lor seki Zeova ti pou anvi nou fer. Par exanp, kan nou bizin deside lor ki kitsoz nou pou koze, ki lamizik nou pou ekoute, ki fim nou pou gete, ouswa ki liv nou pou lir, nou kapav demann noumem: ‘Ki kitsoz mo pou met dan mo leker ek mo lespri? Eski sa bann kitsoz-la fer Zeova plezir? Ouswa eski sa bann kitsoz-la pou ankouraz mwa pou vinn imoral, violan, egois, ouswa materyalis, bann kitsoz ki inzis devan lizie Zeova?’ (Fil. 4:8) Kan nou fer bann kitsoz ki fer Zeova plezir, nou pe les bann prinsip Zeova protez nou leker.

16-17. Kouma Izai 48:18 montre nou ki nou kapav swiv bann prinsip Zeova toulezour?

¹⁶ Eski parfwa to trakase tansion to pa reisi swiv bann prinsip Zeova toulezour? Anou get enn lexanp ki Zeova servi ek ki mansione dan Izai 48:18. (Lir. *) Zeova promet ki nou lazistis kapav vinn “parey kouma bann vag lamer.” Mazine ki to pe deboute lor laplaz ek ki to pe get bann vag vini enn deryer lot. Eski to pou trakase ki enn zour pou nepli ena okenn vag lor lamer? Non! To kone ki sa fer plizir milye lane ki ena bann vag lor lamer, ek to kone osi ki sa pou kontigne.

¹⁷ Kouma to lazistis kapav vinn parey kouma bann vag lamer? Kan to ena enn desizion pou pran, reflesi lor seki Zeova ti pou anvi to fer, ek apre sa, fer li. Mem si to ena enn desizion ki difisil pou pran, to Papa Zeova pou donn twa lafors ek pou ed twa pou to kontign fer seki drwat toulezour.​—Iza. 40:29-31.

18. Kifer fode pa nou ziz lezot?

¹⁸ 3. Les Zeova deside si lezot pe fer seki bon ouswa seki pa bon. Kan nou fer zefor pou swiv bann prinsip Zeova lor lazistis, nou pou evit ziz lezot ek nou pa pou panse ki nou pli bon ki lezot. Nou pena drwa deside si lezot pe fer seki bon devan lizie Zeova. Nou bizin rapel ki Zeova, Li “Ziz lor later antie.” (Zen. 18:25) Li pa’nn donn nou drwa pou ziz lezot. Zezi ti dir: “Pa ziz lezot e Bondie pa pou ziz zot.”​—Mat. 7:1. *

19. Kouma Zozef ti montre ki li ti ena konfians dan lazistis Zeova?

¹⁹ Anou reget lexanp Zozef, enn zom ki ti drwat devan lizie Zeova. Li pa ti ziz lezot, mem si zot ti tret li dan enn move fason. So bann frer ti maltret li, ti vann li kouma enn esklav, ek zot ti fer zot papa krwar ki li ti mor. Plizir lane apre, Zozef  ti retrouv so fami. Asterla, li ti enn zom bien pwisan, alor li ti kapav tir vanzans kont so bann frer. Mem si zot ti vremem regret seki zot ti fer, bann frer Zozef ti per tansion Zozef tir vanzans kont zot. Me Zozef ti rasir zot, ek li ti dir zot: “Pa per. Eski mo dan plas Bondie?” (Zen. 37:18-20, 27, 28, 31-35; 50:15-21) Zozef ti ena limilite, ek li ti kone ki zis Zeova ena drwa pou ziz so bann frer.

20-21. Kifer fode pa nou panse ki nou pli bon ki lezot?

²⁰ Parey kouma Zozef, nou les Zeova ziz lezot. Par exanp, nou pa pou fer koumadir nou kone kifer nou bann frer ek ser pe azir dan enn sertenn fason. Nou pa kapav lir dan zot leker. Labib dir ki “se Zeova ki examinn lintansion” bann dimounn. (Prov. 16:2) Zeova kontan tou kalite dimounn, ki sorti dan diferan ras ek kiltir. Anplis, Li ankouraz nou pou “ouver [nou] leker” bien gran. (2 Kor. 6:13) Alor, nou bizin fer zefor pou kontan tou nou bann frer ek ser, ek pou pa ziz zot.

²¹ Fode pa nou ziz bann dimounn ki pa form parti dan lasanble osi. (1 Tim. 2:3, 4) Si enn kikenn dan to fami pa Temwin, eski to pou dir: “Sa zame li pa pou vinn dan laverite sa!” Si to dir enn kitsoz koumsa, to montre ki to orgeye ek ki to panse ki to pli bon ki li. Zeova ankor pe donn “tou dimoun” lokazion pou repanti. (Zist. 17:30) Fode zame nou bliye ki, pou Zeova, enn kikenn ki panse ki li pli bon ki lezot, se enn kikenn ki inzis.

22. Kifer nou bizin kontign kontan bann prinsip Zeova lor lazistis?

²² Nou lamour pou bann prinsip Zeova lor lazistis pou rann nou ere, ek sa pou ed nou pou vinn enn bon lexanp pou lezot. Lerla, zot pou vinn pli pros ar nou ek ar nou Bondie Zeova. Alor, anou kontign “fin ek swaf lazistis.” (Mat. 5:6) Nou kapav sir ki Zeova trouv tou bann zefor ki nou fer ek sa fer Li plezir. Mem si sa lemond-la pe vinn deplizanpli inzis, fode pa nou dekouraze! Nou bizin touletan rapel ki Zeova “kontan dimoun ki swiv bon sime.”​—Ps. 146:8.