LARTIK LETID 33
Zeova Vey lor So Bann Serviter
“LESEGNER vey lor bann ki ena respe pou li.”—PS. 33:18.
KANTIK 4 “Se Zeova Ki Mo Berze”
REZIME *
1. Kifer Zezi ti demann Zeova pou vey lor so bann disip?
LANWIT avan so lamor, Zezi ti demann so Papa enn kitsoz bien inportan. Li ti demann Zeova pou vey lor so bann disip. (Zan 17:15, 20) Biensir, Zeova inn touletan vey ek protez so bann serviter. Selman, Zezi ti kone ki Satan ti pou atak so bann disip. Zezi ti kone osi ki so bann disip ti pou bizin led Zeova, pou ki zot kapav reziste kont bann latak Satan.
2. Dapre Psom 33:18-20, kifer nou pena okenn rezon pou per kan nou gagn bann difikilte?
2 Sa lemond-la li kontrole par Satan. Se akoz sa ki bann Kretien gagn boukou leprev azordi. Nou gagn bann difikilte ki kapav dekouraz nou ek teste nou fidelite anver Zeova. Me kouma nou pou trouve dan sa lartik-la, nou pena okenn rezon pou per. Zeova pe vey lor nou, Li trouv bann difikilte ki nou pe gagne, ek Li anvi ed nou pou sirmont zot. Dan sa lartik-la, nou pou get de lexanp Biblik ki pou montre nou kouma Zeova “vey lor bann ki ena respe pou li.”—Lir Psom 33:18-20.
KAN NOU SANTI NOU TOUSEL
3. Kan eski nou kapav santi nou tousel?
3 Mem si nou form parti enn gran fami bann frer ek ser, parfwa nou kapav santi nou tousel. Par exanp, enn zenn kapav santi li tousel kan li sanz lasanble, ouswa kan li bizin explik so bann krwayans devan so bann kamarad lekol. Ek sertin parmi nou dekouraze, ouswa zot ena bann santiman negatif, ek zot panse ki zot bizin fer fas ar sa bann kitsoz-la zot tousel. Kitfwa zot ezite pou koz sa ar lezot, parski zot panse ki personn pa pou konpran zot. Ek parfwa, nou kapav panse ki personn pa gagn nou traka. Kan enn kikenn santi li tousel, kitfwa li pou bien trakase osi ek li pou abat net. Me Zeova pa anvi ki nou ena sa bann santiman-la. Kifer nou dir sa?
4. Kifer profet Eli ti dir: “Res zis mo tousel”?
4 Anou get lexanp Eli, enn fidel serviter Zeova. Zezabel ti pe rod touy Eli, akoz sa Eli ti bizin sove pandan 40 zour. (1 Ler. 19:1-9) Finalman, kan li ti tousel dan enn kavern, li ti dir Zeova: “Res zis mo tousel [kouma profet].” (1 Ler. 19:10) Selman, ti ankor ena bann lezot profet dan pei. Kan Zezabel ti fer touy bann profet Zeova, Abdias ti reisi sov 100 parmi zot. (1 Ler. 18:7, 13) Me kanmem sa, Eli ti santi li tousel. Eski li ti panse ki sa 100 profet-la ti fini mor? Apre mirak ki Zeova ti fer lor Mont Karmel, personn pa ti koumans servi Li. Eski se akoz sa ki Eli ti santi li tousel? Eski li ti santi li tousel parski personn pa ti kone ki so lavi ti an danze, ouswa parski li ti panse ki personn pa ti gagn so traka? Labib pa dir nanye lor la. Selman, nou kone ki Zeova ti konpran kifer Eli ti pe santi li tousel, ek Zeova ti kone kouma pou ed li.
Kan nou santi nou tousel, kouma fason ki Zeova ti ed Eli kapav rekonfort nou? (Get paragraf 5-6)
5. Kouma Zeova ti montre Eli ki li pa ti tousel?
5 Zeova ti ed Eli dan plizir fason. Par exanp, Li ti ankouraz Eli pou koze. De fwa Li ti demann Eli: “Kifer to’nn vinn isi?” (1 Ler. 19:9, 13) Ek sak fwa, Zeova ti ekout Eli kan Eli ti devid so leker ar Li. Kan Zeova ti reponn Eli, Li ti montre Eli So pwisans, pou ki Eli konpran ki Zeova ti avek li. Zeova ti osi rasir Eli. Li ti dir Eli ki ti ankor ena boukou fidel serviter Bondie ki ti ankor vivan. (1 Ler. 19:11, 12, 18) Sirman Eli ti soulaze kan li ti devid so leker ar Zeova ek kan Zeova ti reponn li. Zeova ti osi donn Eli plizir responsabilite bien inportan. Par exanp, Li ti demann li pou fer Azael vinn lerwa lor Siri, pou fer Zeu vinn lerwa lor Izrael, ek pou fer Elize vinn profet. (1 Ler. 19:15, 16) Kan Zeova ti donn Eli sa bann responsabilite-la, Zeova ti pe ed Eli pou ki li res konsantre lor bann kitsoz ki pozitif. Zeova ti osi donn Eli enn bon kamarad, setadir Elize. Kouma Zeova kapav ed twa kan to santi twa tousel?
6. Kan to santi twa tousel, pou ki kitsoz to kapav priye? (Psom 62:8)
6 Zeova anvi ki to priye Li. Li trouv to bann difikilte, ek Li promet twa ki Li pou ekout to bann lapriyer, ninport kan to priye Li. (1 Tes. 5:17) Li bien kontan ekout lapriyer so bann serviter. (Prov. 15:8) Pou ki kitsoz to kapav priye kan to santi twa tousel? Devid to leker ar Zeova, parey kouma Eli ti fer. (Lir Psom 62:8.) Dir Li seki pe trakas twa ek seki to resanti. Demann Zeova pou ed twa pou kone seki to bizin fer kan to ena sa bann santiman-la. Par exanp, si to santi twa tousel ek ki to per kan to bann kamarad lekol poz twa bann kestion lor to bann krwayans, demann Zeova pou donn twa kouraz pou to explik to bann krwayans. To kapav mem demann Zeova pou donn twa sazes, pou ki to fer sa avek respe. (Lik 21:14, 15) Si to ena bann santiman negatif, demann Zeova pou ed twa pou ki to kapav koz sa avek enn Kretien ki ena lexperyans. To kapav osi demann Zeova pou ed sa dimounn ki pou ekout twa la, pou ki li konpran to bann santiman. Devid to leker ar Zeova, gete kouma Li reponn to bann lapriyer, ek aksepte led lezot. Si to fer sa, to pa pou santi twa tousel.
Eski to rod bann fason pou fer plis dan to minister ek pou pres ansam ar lezot? (Get paragraf 7)
7. Ki nou kapav aprann ar lexanp Mauricio?
7 Zeova inn donn nou tou enn travay bien inportan pou fer. To kapav sir ki Li remark tou seki to pe fer dan lasanble ek dan predikasion. Li vremem apresie tou seki to fer! (Ps. 110:3, NW) Kan to res bien okipe dan travay ki Zeova inn donn twa, kouma sa kapav ed twa pou to pa santi twa tousel? Anou get lexanp enn zenn frer ki apel Mauricio. * Inpe letan apre so batem, enn parmi so bann bon kamarad ti pe koumans kit laverite. Mauricio dir: “Kan mo ti trouv li abandonn Zeova, mo ti santi mwa perdi. Mo ti pe demann momem si mo ti pou kapav res fidel anver Zeova. Mo ti santi mwa tousel, ek mo ti panse ki personn pa ti pou konpran mwa.” Ki kitsoz ti ed Mauricio? Li dir: “Mo ti prese pli souvan. Sa ti ed mwa pou mo pa mazinn mo bann santiman negatif. Kan mo ti pres ansam avek lezot, sa ti rann mwa ere, ek mo pa ti santi mwa tousel.” Mem kan nou pa pe kapav prese lakaz-lakaz avek nou bann frer ek ser, kan nou pres par let ek par telefonn ansam avek zot, sa ranforsi nou lafwa. Ki kitsoz ankor ti ed Mauricio? Li dir: “Mo ti res bien okipe dan lasanble, ek mo ti prepar bien bann devwar ki mo ti gagne dan renion. Sa ti ed mwa pou santi ki mo ena valer pou Zeova ek pou mo bann frer ek ser.”
KAN NOU DEKOURAZE AKOZ BANN LEPREV
8. Ki nou kapav resanti kan nou gagn bann leprev?
8 Nou pe viv dan bann dernie zour, alor nou kone ki nou pou gagn bann leprev. (2 Tim. 3:1) Selman, enn kout koumsa, nou kapav gagn bann leprev ki nou pa atann. Par exanp, nou kapav gagn bann problem finans, bann problem lasante, ouswa enn kikenn ki nou kontan kapav mor. Dan sa ler-la, kitfwa nou kapav santi nou abat net, sirtou si nou pe gagn sa bann problem-la enn deryer lot, ouswa si zot tou inn arive enn sel kout. Selman, pa bliye ki Zeova pe vey lor twa, ek Li pou ed twa pou sirmont sa bann leprev-la.
9. Dekrir bann leprev ki Zob ti gagne.
9 Anou gete kouma Zeova ti ed so serviter Zob. Zob ti gagn plizir leprev enn deryer lot. Dan enn sel zour, li ti aprann ki li ti perdi tou so troupo, tou so bann serviter ti mor, ek tou so bann zanfan osi ti mor. (Zob 1:13-19) Apre sa, mem si li ti ankor pe fer so dey, Zob ti gagn enn maladi ki ti fer li bien soufer. (Zob 2:7) Zob ti telman dan pins, ki li ti dir: “Mo’nn degout mo lavi; mo pa anvi kontign viv.”—Zob 7:16.
Pou montre Zob ki Li kontan li, Zeova explik Zob kouma Li pran swin bann kitsoz ki Li’nn kree (Get paragraf 10)
10. Kouma Zeova ti ed Zob pou andir so bann leprev? (Get zimaz lor kouvertir.)
10 Zeova ti pe vey lor Zob. Li ti kontan Zob, ek Li ti ed li pou ki li andir so bann leprev, pou ki li res fidel anver Li. Zeova ti rapel Zob ki So sazes bien gran, ek ki Li kontan tou So bann Kreatir. Zeova ti koz lor sertin zanimo ki Li’nn kree. (Zob 38:1, 2; 39:9, 13, 19, 27; 40:15; 41:1, 2) Li ti osi servi enn zenn zom ki apel Eliou, pou ankouraz ek rekonfort Zob. Eliou ti rasir Zob ki Zeova touletan rekonpans So bann serviter pou zot landirans. Me Zeova ti osi servi Eliou pou donn Zob bann konsey. Eliou ti ed Zob pou aret mazinn zis li tousel. Li ti rapel Zob ki li bien tipti konpare ar Zeova, Kreater liniver. (Zob 37:14) Zeova ti osi donn Zob enn responsabilite. Li ti dir Zob priye pou so trwa konpagnon ki ti fer pese. (Zob 42:8-10) Kouma Zeova soutenir nou azordi kan nou gagn bann leprev?
11. Kouma Labib kapav ed nou kan nou gagn bann leprev?
11 Azordi, Zeova pa koz ar nou direk, parey kouma Li ti fer ar Zob. Li koz ar nou atraver so Parol, Labib. (Rom. 15:4) Zeova rekonfort nou kan Li donn nou enn lespwar pou lavenir. Anou get de-trwa verse Labib ki kapav rekonfort nou kan nou gagn bann leprev. Dan Labib, Zeova dir nou ki nanye pa “kapav separ nou ar lamour ki Bondie ena pou nou,” pa mem bann leprev ki nou gagne. (Rom. 8:38, 39) Li dir nou osi ki Li “pre pou ed dimoun ki apel li e ki dimann so led.” (Ps. 145:18) Zeova dir nou ki, si nou kont lor Li, nou pou kapav andir ninport ki leprev. Ek mem si nou pe soufer, nou kapav ere. (1 Kor. 10:13; Zak 1:2, 12) Labib rapel nou osi ki, konpare ar lavi eternel ki nou pou gagne biento, nou bann leprev zot tanporer. (2 Kor. 4:16-18) Zeova promet nou ki Li pou detrir tou bann ki fer nou soufer, setadir Satan ek tou bann ki azir parey kouma Li. (Ps. 37:10) Eski to mazinn sertin verse Labib ki kapav ed twa pou andir bann leprev ki to pou gagne dan lavenir?
12. Pou ki nou gagn bann bienfe gras-a Labib, ki Zeova anvi nou fer?
12 Zeova anvi ki nou etidie Labib regilierman, ek ki nou reflesi lor seki nou etidie. Kan nou met an pratik seki nou aprann, nou lafwa pou vinn pli for ek nou pou vinn pli pros ar nou Papa. Lerla, nou pou kapav andir nou bann leprev. Kan nou etidie Labib, Zeova donn nou so lespri sin. Ek so lespri sin kapav donn nou enn “pwisans extraordiner,” pou ki nou andir ninport ki leprev.—2 Kor. 4:7-10.
13. Kouma bann manze spiritiel ki nou gagne ar “lesklav fidel ek saz” ed nou pou andir nou bann leprev?
13 Gras-a Zeova, “lesklav fidel ek saz” donn nou enn kantite manze lor plan spiritiel. Zot fer bann piblikasion, bann video, ek bann lamizik ki ed nou pou ena enn lafwa for ek pou res pros ar Zeova. (Mat. 24:45, NW) Nou bizin servi bien tou seki Zeova donn nou. Enn ser ki res Letazini, ti dir ki kantite li rekonesan pou tou bann manze spiritiel ki Zeova donn li. Li dir: “Sa fer 40 an ki mo pe servi Zeova, ek plizir fwa mo’nn gagn bann leprev ki’nn teste mo fidelite.” Ser-la de fwa ti gagn kanser, so bann paran ti mor akoz enn maladi, ek enn sofer ki ti sou, ti touy so granper. Ki kitsoz ti ed nou ser pou andir so bann leprev? Li dir: “Zeova inn touletan pran mwa swin. Bann manze spiritiel ki li’nn donn mwa atraver lesklav fidel ek saz, inn ed mwa pou andire. Azordi, mo kapav dir parey kouma Zob: ‘Ziska mo mor, mo pou kontign res fidel ar Bondie!’”—Zob 27:5.
Kouma nou kapav ed lezot dan lasanble? (Get paragraf 14)
14. Kan nou gagn bann leprev, kouma Zeova servi nou bann frer ek ser pou soutenir nou? (1 Tesalonisien 4:9)
14 Zeova inn form so bann serviter pou ki zot rekonfort sakenn zot kamarad kan zot gagn bann leprev. (2 Kor. 1:3, 4; lir 1 Tesalonisien 4:9.) Parey kouma Eliou, nou bann frer ek ser anvi ed nou pou res fidel anver Zeova kan nou gagn bann leprev. (Zist. 14:22) Anou get lexanp Diane. Kan so mari ti bien malad, bann frer ek ser so lasanble ti ankouraz li ek ti ed li pou res pros ar Zeova. Diane dir: “Sa ti bien difisil. Me pandan tou sa bann mwa-la, nou ti santi lame Zeova dan nou lavi. Nou bann frer ek ser ti bien soutenir nou. Zot ti vizit nou, zot ti telefonn nou, zot ti may nou, ek sa ti ed nou pou andire. Mo pa ti konn kondir, alor bann frer ek ser ti fer bann laranzman pou ki mo asiste mo bann renion ek pou mo sorti predikasion kan mo kapav.” Nou vremem kontan ki nou ena enn gran fami spiritiel ki kontan nou!
NOU BIEN REKONESAN KI ZEOVA PRAN NOU SWIN
15. Kifer nou kapav sir ki nou pou reisi andir nou bann leprev?
15 Nou tou nou gagn bann leprev. Selman, kouma nou’nn trouve dan sa lartik-la, nou pena pou fer fas ar nou bann leprev nou tousel. Parey kouma enn bon Papa, Zeova touletan vey lor nou. Zame Li lwin ar nou. Kan nou rod so led, Li ekout nou lapriyer, ek Li anvi soutenir nou. (Iza. 43:2) Nou sir ki nou pou reisi andir nou bann leprev, parski Li’nn donn nou tou seki nou bizin pou nou fer sa. Par exanp, Li’nn donn nou Labib, lapriyer, enn kantite manze spiritiel, ek bann frer ek ser ki kontan nou ek ki pre pou ed nou kan nou bizin.
16. Kouma nou kapav montre ki nou rekonesan anver Zeova parski Li pran nou swin?
16 Nou bien rekonesan ki nou Papa Zeova vey lor nou! Labib dir: “Limem ki donn lazwa ki dan nou leker.” (Ps. 33:21) Zeova vremem pran nou swin. Ek nou montre ki nou rekonesan anver Li, kan nou profit tou bann dispozision ki Li pran pou ed nou. Si nou kontign fer nou best pou obeir Zeova ek ki nou fer seki drwat devan so lizie, Li pou kontign vey lor nou pou touletan!—1 Pier 3:12.
KANTIK 30 Mo Bondie, Mo Kamarad, ek Mo Papa
^ Nou bizin led Zeova pou nou kapav fer fas ar bann difikilte ki nou gagne toulezour. Dan sa lartik-la, nou pou trouve kouma Zeova pran swin so bann serviter. Li trouv bann difikilte ki sakenn parmi nou gagne, ek Li donn nou seki nou bizin pou nou kapav fer fas ar sa bann difikilte-la.
^ Finn sanz sertin nom dan sa lartik-la.