1. Kifer bann Babilonien ti inpresione par Daniel?

 DANIEL ti enn zenn zom kan bann Babilonien ti amenn li kouma prizonie dan Babilonn, enn lavil ki ti bien lwin ar Zerizalem. Mem si Daniel ti zenn, bann Babilonien ti inpresione par li. Zot ti trouv “seki paret devan [zot] lizie,” setadir ki Daniel ti enn zenn ki ti “san okenn defo, zoli,” ek ki ti sorti dan enn gran fami. (1 Sam. 16:7) Se pou sa bann rezon-la ki bann Babilonien ti form Daniel pou ki li servi dan pale lerwa.​—Dan. 1:3, 4, 6.

2. Ki Zeova ti resanti pou Daniel? (Ezekiel 14:14)

² Zeova ti kontan Daniel, pa parski li ti enn zoli garson ouswa parski li ti ena bann privilez dan pale lerwa, me parski Daniel ti swazir pou vinn enn kikenn ki fer Zeova plezir. Daniel kitfwa ti ena anviron 20 an kan Zeova ti konpar li ar Noe ek Zob. Sa montre ki, mem si Daniel ti zenn, Zeova ti konsider li kouma enn kikenn ki zis, parey kouma Noe ek Zob, ki ti servi Zeova avek fidelite pandan plizir dizenn lane. (Zen. 5:32; 6:9, 10; Zob 42:16, 17; lir Ezekiel 14:14.) Zeova ti kontign kontan Daniel toutlong so lavi.​—Dan. 10:11, 19.

3. Ki nou pou examine dan sa lartik-la?

³ Dan sa lartik-la, nou pou examinn de kalite ki Daniel ti ena, ki’nn fer li gagn faver Zeova. Pou koumanse, nou pou get bann sitiasion kot Daniel ti montre ki li ti ena sa bann kalite-la. Apre sa, nou pou gete seki ti ed Daniel pou devlop sa bann kalite-la. Ek an dernie, nou pou gete kouma nou kapav swiv so lexanp. Mem si sa lartik-la li plis pou bann zenn, nou tou nou kapav gagn bann bienfe ar lexanp Daniel.

4. Kouma Daniel ti montre ki li ena kouraz? Donn enn lexanp.

⁴ Bann dimounn ki ena kouraz kapav gagn per, selman zot pa les sa anpes zot pou fer seki drwat. Daniel ti enn zenn zom ki ti ena boukou kouraz. Anou get de sitiasion kot li ti ena kouraz. Premie sitiasion-la kitfwa ti arive anviron de-z-an apre ki bann Babilonien ti detrir Zerizalem. Lerwa Babilonn, Naboukodonozor, ti fer enn rev ki ti fer li gagn per. Dan so rev, ti ena enn gran stati. Li ti fer apel tou bann zom ki ena sazes dan so rwayom, ek parmi ti ena Daniel. Li ti demann zot ki rev li’nn fer, ek li ti osi demann zot pou explik rev-la. Si zot pa ti reisi fer sa, li ti pou touy zot tou. (Dan. 2:3-5) Daniel ti bizin azir vit, sinon boukou dimounn ti pou mor. Li “ti al get lerwa ek ti demann li pou donn li inpe letan pou ki li kapav explik lerwa so rev.” (Dan. 2:16) Pou fer sa, Daniel ti bizin ena kouraz ek lafwa. Anplis, okenn par dan Labib pa dir ki Daniel ti deza explik bann rev. Daniel ti al get so bann kamarad, Shadrak, Meshak, ek Abed-Nego, ek li ti demann zot “pou priye Bondie ki dan lesiel pou ki li montre mizerikord anver zot ek ki li fer zot konn sa sekre-la.” (Dan. 2:18) Zeova ti reponn zot lapriyer. Avek led Zeova, Daniel ti explik Naboukodonozor so rev. Daniel ek so bann kamarad ti reisi sap zot lavi.

5. Sit enn lot sitiasion kot Daniel ti bizin ena kouraz.

⁵ Inpe letan apre ki Daniel ti explik lerwa so rev, enn lot sitiasion ti arive kot li ti bizin ena kouraz. Naboukodonozor ti fer enn lot rev ki ti fer li gagn per. Dan so rev, ti ena enn gran pie. Avek kouraz, Daniel ti explik lerwa so rev, mem si li ti bizin dir lerwa ki li ti pou vinn fou ek ki li ti pou nepli lerwa pandan inpe letan. (Dan. 4:25) Lerwa ti kapav panse ki Daniel ti pe rebel kont li, ek li ti kapav fer touy Daniel. Me kanmem sa, Daniel ti ena kouraz ek li ti explik lerwa so rev.

6. Ki kitsoz kitfwa ti ed Daniel pou ena kouraz?

⁶ Ki kitsoz kitfwa ti ed Daniel pou ena kouraz toutlong so lavi? Nou kapav sir ki kan Daniel ti zenn, li ti aprann ar lexanp  so mama ek so papa. Bann paran Daniel ti swiv bann instriksion ki Zeova ti donn bann paran Izraelit, ek zot ti ansegn zot zanfan lalwa Bondie. (Det. 6:6-9) Daniel pa ti zis konn bann kitsoz inportan dan Lalwa, kouma par exanp bann Dis Komannman, me li ti osi konn bann detay, kouma par exanp seki enn Izraelit ti kapav ouswa pa ti kapav manze. b (Lev. 11:4-8; Dan. 1:8, 11-13) Daniel ti osi aprann listwar pep Bondie, ek li ti kone osi seki ti ariv zot kan zot pa ti obeir Bondie. (Dan. 9:10, 11) Ek bann sitiasion ki Daniel ti viv, ti ed li pou konpran ki Zeova ek so bann anz pwisan ti pou touletan soutenir li.​—Dan. 2:19-24; 10:12, 18, 19.

7. Ki kitsoz ankor ti ed Daniel pou ena kouraz? (Get zimaz osi.)

⁷ Daniel ti etidie bann roulo bann profet Zeova, ek parmi zot ti ena bann profesi Zeremi. Sa ti ed Daniel pou konpran ki biento bann Zwif ti pou libere depi Babilonn. (Dan. 9:2) Kan Daniel ti trouv bann profesi Zeova realize, sa ti fer li ena plis konfians an Zeova. Ek bann dimounn ki ena enn gran konfians dan Bondie, zot ena enn gran kouraz. (Konpar ar Romin 8:31, 32, 37-39.) Me pli inportan, Daniel ti priye so Papa Zeova souvan. (Dan. 6:10) Li ti dir Zeova seki li ti resanti, li ti konfes so bann pese, ek li ti osi rod led ar Zeova. (Dan. 9:4, 5, 19) Daniel ti enn dimounn parey kouma nou, alor li pa ti ne ar kouraz. Selman, li ti reisi devlop sa kalite-la parski li ti etidie regilierman, li ti priye Zeova, ek li ti ena konfians an Li.

8. Ki nou bizin fer pou ena plis kouraz?

⁸ Ki nou bizin fer pou nou ena plis kouraz? Nou bann paran kapav ankouraz nou pou devlop sa kalite-la. Selman, mem si zot zot ena kouraz, sa pa vedir ki nou osi nou pou ena kouraz. Nou kapav konpar kouraz ar enn travay ki nou pe aprann fer. Pou nou aprann fer bien travay-la, nou kapav get bien dimounn ki pe montre nou kouma pou fer travay-la, ek fer parey kouma li. Dan mem fason, nou pou aprann kouma pou ena plis kouraz, kan nou get bien kouma lezot inn ena sa kalite-la ek ki nou swiv zot lexanp. Alor, ki nou’nn aprann ar lexanp Daniel? Nou bizin konn bien Parol Bondie, nou bizin ena enn bon lamitie ar Zeova, ek nou bizin priye Li souvan. Nou bizin ena konfians an Zeova, ek nou bizin sir ki Li pou soutenir nou. Lerla, parey kouma Daniel, kan nou gagn bann leprev nou pou ena kouraz.

9. Ki bienfe nou gagne kan nou ena kouraz?

⁹ Nou gagn boukou bienfe kan nou ena kouraz. Anou get lexanp Ben. Dan so lekol dan Lalmagn, tou dimounn ti krwar dan levolision. Zot ti panse ki seki Labib dir lor kreasion ti zis enn zistwar. Enn zour, Ben ti gagn lokazion pou fer enn devwar devan klas, pou explike kifer li krwar dan kreasion. Avek kouraz, li ti koz lor so bann krwayans. Ki rezilta sa finn ena? Ben dir: “Mo profeser ti ekout mwa bien, li ti fer bann fotokopi bann resers ki mo ti fer, ek li ti donn sak zelev enn kopi.” Kouma bann kamarad Ben ti reazir? Ben dir: “Boukou parmi zot ti ekout mwa bien, ek zot ti dir mwa ki zot  ena respe pou mwa.” Lexanp Ben montre nou ki, kan nou ena kouraz, lezot ena respe pou nou. Nou kouraz kapav osi motiv bann dimounn ki sinser pou aprann konn Zeova. Wi, nou ena boukou rezon pou ena kouraz.

10. Ki ete fidelite? (2 Samiel 22:26)

¹⁰ Labib souvan servi mo “fidelite,” ouswa “lamour fidel,” pou dekrir lamour ki Bondie ena pou so bann kamarad. Labib koz osi lor fidelite ki bann serviter Zeova montre anver zot kamarad. (2 Sam. 9:6, 7) Plis letan pase, plis nou kapav ranforsi nou fidelite anver enn kikenn. Anou gete kouma Daniel ti ranforsi so fidelite anver Zeova.

11. Mem si Daniel ti bien vie, ki leprev ti teste so fidelite? (Get zimaz lor kouvertir.)

¹¹ Dan so lavi, Daniel ti gagn plizir leprev ki ti teste so fidelite anver Zeova. Li ti ena anviron 90 an kan li ti gagn enn parmi bann pli gran leprev ki ti teste so fidelite. Sa lepok-la, Babilonn ti pou lanpir Medo-Pers ek se Darius ki ti lerwa. Bann fonksioner lakour rwayal pa ti kontan Daniel ditou ek zot pa ti ena respe pou Zeova. Alor, zot ti fer enn konplo pou touy Daniel. Zot ti fer pas enn lalwa kot Daniel ti pou bizin swazir ant so fidelite anver lerwa ouswa so fidelite anver Zeova. Pou ki Daniel montre so fidelite anver lerwa, ek pou ki li pa mor, li ti bizin aret priye Zeova pandan 30 zour. Me Daniel ti res fidel ar Zeova. Akoz sa, bann-la ti zet li dan enn lakav kot ti ena bann lion. Me Zeova ti rekonpans fidelite Daniel kan Li ti sap li dan lagel bann lion. (Dan. 6:12-15, 20-22) Kouma nou kapav res fidel ar Zeova parey kouma Daniel?

12. Kouma Daniel ti reisi res fidel ar Zeova?

¹² Pou nou res fidel ar Zeova, nou bizin ena enn lamour bien for pou Li. Daniel ti reisi res fidel ar Zeova parski li ti ena boukou lamour pou so Papa ki dan lesiel. Daniel ti ena sa kalite lamour-la, parski li ti pas boukou letan pou reflesi lor bann kalite ki Zeova ena ek lor fason ki Zeova montre sa bann  kalite-la. (Dan. 9:4) Daniel ti osi pran letan pou reflesi lor tou bann bon kitsoz ki Zeova ti fer pou li ek pou So pep.​—Dan. 2:20-23; 9:15, 16.

13. (a) Ki kitsoz kapav teste fidelite nou bann zenn? Donn enn lexanp. (Get zimaz osi.) (b) Kouma nou’nn trouve dan sa video-la, ki nou kapav dir kan bann dimounn demann nou si bann Temwin Zeova dakor ar lomosexialite?

¹³ Parey kouma Daniel, nou bann zenn antoure ar bann dimounn ki pa respekte Zeova ek so bann prinsip. Sa bann dimounn-la kitfwa pa kontan bann serviter Zeova. Sertin parmi zot kapav mem met presion lor nou bann zenn pou ki zot pa res fidel ar Zeova. Anou gete seki ti ariv enn zenn ki apel Graeme, ek ki res Lostrali. Li ti viv enn sitiasion bien difisil kan li ti al kolez. So profeser ti demann bann zelev dan so klas kouma zot ti pou reazir si enn zot kamarad ti dir zot ki li enn omosexiel. Profeser-la ti demann tou bann ki ti dakor ar lomosexialite pou vinn enn kote dan klas, ek tou bann ki pa ti dakor ti bizin al lot kote. Graeme dir: “Dan klas-la, ti ena zis mwa ek enn lot Temwin ki ti al lot kote, parski nou pa ti dakor ar lomosexialite.” Seki ti arive apre ti vremem teste fidelite Graeme. Li dir: “Ziska ki sa klas-la fini, tou bann lezot zelev, ek mem nou profeser, ti boufonn nou ek ti maltret nou. Mo ti fer mo maximum pou res kalm ek pou defann mo lafwa, me zot pa ti anvi ekout mwa.” Ki lefe sa leprev-la finn ena lor fidelite Graeme? Li dir: “Mo pa ti kontan ki bann-la ti pe boufonn mwa. Selman, mo ti ere parski mo ti reisi res fidel ar Zeova ek mo ti defann mo lafwa.” c

14. Sit enn fason kouma nou kapav ranforsi nou fidelite anver Zeova.

¹⁴ Parey kouma Daniel, plis nou kontan Zeova, plis nou pou bien deside pou res fidel anver Li. Plis nou reflesi lor bann kalite ki Zeova ena, plis nou lamour pou Li pou ogmante. Par exanp, nou kapav reflesi ek etidie lor bann kitsoz ki Li’nn kree. (Rom. 1:20) Si to anvi ogmant to lamour ek to respe pou Zeova, to kapav get bann video, ouswa lir seri lartik “Eski Inn Kree Sa Ouswa Non?” To kapav osi etidie brosir La vie a-t-elle été créée ? ek brosir Cinq questions à se poser sur l’origine de la vie. Konsernan sa bann piblikasion-la, Esther, enn zenn ser ki res Dennmark, dir: “Bann rezonnman ki ena dan sa bann brosir-la extra interesan. Brosir-la pa dir twa seki to bizin krwar; li donn twa bann prev ek li les twa pran to desizion.” Ben, ki nou ti mansione taler-la, dir: “Sa bann piblikasion-la inn fer mo lafwa vinn pli for. Zot inn donn mwa bann prev ki vremem ena enn Kreater.” Apre ki to’nn etidie sa bann piblikasion-la, sirman to pou dakor ar sa bann parol-la: “To dign, Zeova nou Bondie, pou gagn laglwar, loner ek pwisans, parski to finn kree tou kitsoz.”​—Rev. 4:11. d

15. Kouma nou kapav ogmant nou lamour pou Zeova?

¹⁵ Enn lot kitsoz ki nou kapav fer pou ogmant nou lamour pou Zeova, se etidie lor lavi so Garson, Zezi. Se seki Samira, enn zenn ser ki res Lalmagn, ti fer. Li dir: “Gras-a Zezi, mo’nn aprann konn Zeova pli bien.” Kan li ti tipti, Samira  pa ti tro konpran kouma Zeova kapav ena bann santiman. Selman, li ti konpran seki Zezi ti resanti. Samira dir: “Mo ti bien kontan Zezi parski li ti amikal, ek li ti bien kontan bann zanfan.” Plis li ti aprann konn Zezi, plis sa ti ed li pou aprann konn Zeova ek pou kontan Li. Samira dir: “Tigit-tigit, mo’nn koumans konpran ki Zezi imit so Papa dan enn fason parfe. Zot bien resanble, ek se enn parmi bann rezon kifer Zeova inn avoy Zezi lor later. Bann dimounn ti pou kapav aprann konn Zeova pli bien gras-a Zezi.” (Zan 14:9) Si to anvi ogmant to lamour pou Zeova, fer to maximum pou aprann konn Zezi pli bien. Si to fer sa, to lamour pou Zeova pou grandi, ek to pou bien deside pou res fidel anver Li.

16. Ki bienfe nou gagne kan nou fidel? (Psom 18:25; Mishe 6:8)

¹⁶ Kan nou fidel anver lezot, souvan nou gagn bann bon kamarad ki fidel anver nou. (Rit 1:14-17) Ek si nou res fidel anver Zeova, nou pou santi nou anpe. Kifer? Parski Zeova promet ki Li pou fidel ar bann ki fidel anver Li. (Lir Psom 18:25; Mishe 6:8.) Reflesi lor la: Mem si nou bien tipti konpare ar nou Kreater Tou-Pwisan, Li promet ki Li pou touletan kontan nou. Kan nou ena sa kalite lamitie-la ar Zeova, okenn leprev, okenn lennmi, mem lamor pa kapav kas sa lamitie-la. (Dan. 12:13; Lik 20:37, 38; Rom. 8:38, 39) Akoz sa, li bien inportan ki nou kontign swiv lexanp Daniel ek ki nou res fidel ar Zeova.

17-18. Ki kitsoz ankor nou kapav aprann ar lexanp Daniel?

¹⁷ Dan sa lartik-la, nou’nn examinn zis de kalite ki Daniel ti ena. Me ena ankor boukou lezot kitsoz ki nou kapav aprann ar Daniel. Par exanp, Zeova ti fer Daniel gagn bann vizion ek bann rev, ek Li ti osi donn li kapasite pou explik bann profesi. Boukou parmi sa bann profesi-la inn fini realize. Me ena lezot ki donn bann detay lor seki pou arive dan lavenir, ek sa pou ena enn lefe lor sak dimounn ki lor later.

¹⁸ Dan prosin lartik, nou pou examinn de profesi ki ena dan liv Daniel. Sa bann profesi-la pou ed nou pou pran bann bon desizion depi aster-la mem, ek pou nou prepar nou pou seki pou arive biento. Zot pou osi ed nou pou nou bien deside pou res fidel ar Zeova ek pou nou ena plis kouraz.