Dan sa lartik-la, nou ti aprann ki ena enn size bien inportan ki konsern tou bann dimounn ek tou bann anz: sanktifikasion nom Zeova. Kestion lor souverennte Zeova setadir, ‘Eski Zeova Limem meyer Dirizan ki ena?’ ena enn lien ar sanktifikasion so nom. Li parey osi pou kestion, ‘Eski bann imin pou res fidel anver Zeova?’ Sa osi ena enn lien ar sanktifikasion nom Zeova.

Kifer azordi nou dir ki sanktifikasion nom Zeova, samem size pli inportan ki ena? Anou get trwa rezon.

Premierman, dan zardin Edenn, Satan ti sali nom Zeova ek ti atak So repitasion. Dan kestion ki Satan ti poz Ev, li ti pe rod fer Ev konpran ki Zeova Li egois ek ki bann instriksion ki Li’nn donn bann imin, zot tro dir. Apre sa, Satan ti dir Ev ki Zeova ena tor; li ti anvi ki Ev krwar ki Zeova inn koz manti. Se koumsa ki Satan inn gat repitasion nom Zeova. Li’nn vinn “Lediab,” ki vedir “kalomniater.” (Zan 8:44) Ev ti krwar bann mansonz Satan. Akoz sa, li ti dezobeir Zeova ek li ti rebel kont So souverennte. (Zen. 3:1-6) Ziska zordi, Satan ankor pe koz manti lor Zeova. Bann dimounn ki krwar sa bann mansonz-la, zot osi zot pa obeir Zeova. Pou bann serviter Zeova, pli gran linzistis ki ena, se kan Satan inn sali nom Zeova ek inn gat So repitasion. Se rezon prinsipal pou kifer ena otan soufrans ek lemal dan lemond.

Deziemman, pou ki tou so kreasion gagn bann bienfe, Zeova pou sanktifie so nom, setadir tir dezoner ki’nn sali so nom. Sa bien inportan pou Zeova. Se akoz sa ki Li’nn dir: “Vremem, mo pou sanktifie mo gran nom.” (Eze. 36:23) Kan Zezi ti montre so bann disip kouma pou priye, li ti explik zot seki pli inportan pou tou bann serviter Zeova, kan li ti dir: “Ki to nom sanktifie.” (Mat. 6:9) Labib souvan koz lor linportans pou donn laglwar nom Zeova. Par exanp, li dir: “Donn Zeova laglwar ki so nom merite.” (1 Kro. 16:29; Ps. 96:8, NW) “Sant laglwar so nom.” (Ps. 66:2) “Mo pou glorifie to nom pou touzour.” (Ps. 86:12) Enn fwa, kan Zezi ti dan tanp dan Zerizalem, li ti dir: “Papa, glorifie to nom.” Ek Zeova ti reponn li: “Mo’nn glorifie li ek mo pou glorifie li ankor.”​—Zan 12:28. a

Trwaziemman, proze Zeova ena enn lien avek so nom, ouswa so repitasion. Reflesi lor seki pou arive apre leprev final. Sa lepok-la, ki kitsoz tou bann anz ek tou bann imin pou panse lor nom Zeova? Pou ed nou reponn sa kestion-la, anou reflesi lor sa de size inportan ki form parti dan sanktifikasion nom Zeova, setadir so souverennte ek  fidelite bann imin anver Li. Eski bann imin ki fidel pou kontign gagn difikilte pou res fidel ar Zeova? Non. Sa lepok-la, zot pou fini vinn parfe ek zot pou fini montre ki zot anvi res fidel ar Zeova. Zot pou fini gagn lavi eternel. Eski bann imin ek bann anz pou kontign poz zot bann kestion lor souverennte Zeova ek eski sa pou kree divizion? Non. Tou bann imin ek tou bann anz pou dakor ki Zeova Limem meyer Dirizan ki ena. Zot tou pou dan linite, ek zot tou pou aksepte Zeova kouma zot Dirizan. Me dan sa lepok-la, eski nom Zeova pou ankor size pli inportan pou tou so bann serviter?

Sa lepok-la, tou dimounn pou fini konn laverite lor Zeova ek so nom pou fini sanktifie. Selman, nom Zeova pou kontigne res kitsoz pli inportan pou tou so bann serviter dan lesiel ek lor later. Kifer? Parski zot pou kontign trouv Zeova fer bann kitsoz extraordiner. Apre ki Zezi pou soumet tou kitsoz ar Bondie, Zeova pou “vinn tou kitsoz pou tou dimounn.” (1 Kor. 15:28) Lerla, bann imin lor later pou kapav gagn “liberte extraordiner bann zanfan Bondie.” (Rom. 8:21) Ek Zeova pou realiz net so proze, setadir ena enn sel gran fami avek so bann zanfan ki dan lesiel ek lor later, ek zot tou pou dan linite.​—Efe. 1:10.

Apre ki tou sa bann kitsoz-la inn arive, ki kitsoz gran fami Zeova pou resanti? Sirman nou pou ena enn gran dezir pou loue Zeova so nom. Dan enn psom, David ti ekrir: “Ki Zeova Bondie . . . beni. . . . Ek ki so gran nom beni pou touletan.” (Ps. 72:18, 19, NW) Wi, nou pou ena leternite pou kontign rod bann rezon pou loue nom Zeova!

Dan Zeova so nom, nou retrouv tou seki Li ete. So nom rapel nou sirtou so lamour. (1 Zan 4:8) Nou pou touletan rapel ki Zeova inn kree nou parski Li kontan nou, Li’nn donn laranson parski Li kontan nou, ek Li’nn montre ki Limem meyer Dirizan ki ena, parski Li kontan nou. Nou pou ena leternite pou kontign resanti lamour ki Zeova ena pou nou, ek sa pou motiv nou pou vinn pli pros ar nou Papa ek pou donn so nom laglwar.​—Ps. 73:28.