• “Mo ti ena linpresion ki mo mari ti tronp mwa plizir fwa.”

• “Mo ti santi mwa imilie, mo ti koumans panse ki mo pa zoli, ek ki mo pa vo nanye.”

• “Mo pa ti kapav dir personn. Mo’nn bizin manz mo kou.”

• “Mo ti ena linpresion ki Zeova ti abandonn mwa.”

Sa bann komanter-la montre ki kantite enn fam soufer kan so mari get pornografi. Ek si li’nn fer sa soukou-soukou pandan plizir mwa ouswa plizir lane, so madam kitfwa pou nepli ena konfians an li. Enn madam dir: “Mo ti demann momem, ‘Kisann-la sa zom ki akote ar mwa la? Eski ena ankor lezot kitsoz ki li pe kasiet?’”

Sa lartik-la, li pou bann madam ki zot mari get pornografi. a Dan sa lartik-la, ena bann prinsip Labib ki pou rekonfort zot, ek ki pou rasir zot ki Zeova kontan zot ek ki Li anvi ed zot. Sa bann prinsip-la pou ed zot pou refer lor plan emosionel ek spiritiel. b

To pa kapav konn tou bann kitsoz ki to mari fer. Selman, ena bann kitsoz ki twa to kapav fer pou ki to mwins trakase. Anou get sertin parmi zot.

Pa panse ki se to fot. Enn fam kapav panse ki se so fot si so mari get pornografi. Alice c ti panse ki li pa ti enn ase bon madam pou so mari. Li ti demann limem, ‘Kifer mo mari prefer get bann lezot fam?’ Sertin madam santi zot koupab parski zot panse ki se akoz fason ki zot reazir ki zot sitiasion pa pe ameliore. Danielle dir: “Mo’nn koumans panse ki mo maryaz pa ti pe marse parski mo enn kikenn ki amer ek ankoler.”

Si to ena mem santiman ki sa bann madam-la, rapel ki pou Zeova, se pa to fot si to mari pe azir koumsa. Zak 1:14 dir: “Sak dimounn pas par enn test kan li les  so prop dezir atir li ek antrenn li.” (Rom. 14:12; Fil. 2:12) Zeova zame pa pou panse ki se to fot! Okontrer, to fidelite ena valer pou Li.​—2 Kro. 16:9.

Rapel osi ki si enn mari get pornografi, sa pa vedir ki ena enn problem ar so fam. Bann spesialis dir ki enn kikenn ki get pornografi li vinn telman adik, ki okenn madam pa kapav satisfer so bann plezir.

Pa trakase plis ki bizin. Catherine dir ki li pa ti kapav aret mazinn problem ki so mari ena ar pornografi, ek ki sa ti rann so lavi amer. Frances dir: “Kan mo pa kone kotsa mo mari ete, mo extra trakase. Enn lazourne mo kapav trakase.” Ena lezot madam ki dir ki zot bien anbarase kan zot ar bann frer ek ser ki konn problem zot mari. Ena lezot osi ki dir ki zot santi zot tousel, parski zot panse ki personn pa konpran zot sitiasion.

Li normal ki zot ena sa santiman-la. Selman, si zot pas tou zot letan pou mazinn sa bann kitsoz-la, zot pou plis trakase ankor. Olie sa, esey res konsantre lor zot lamitie avek Zeova. Si zot fer sa, sa pou ed zot pou andire.​—Ps. 62:2; Efe. 6:10.

Zot kapav osi lir ek reflesi lor lexanp bann madam ki ti bien trakase ek ki ti rod led Zeova. Zeova pa’nn touletan rezoud zot bann problem. Selman, Li’nn donn zot So lape. Par exanp, Ann ti vinn bien “amer” akoz sitiasion ki li ti pe viv. Selman, apre ki li ti “priye lontan devan Zeova,” li ti gagn lape, mem si li pa ti kone seki ti pou ariv li apre.​—1 Sam. 1:10, 12, 18; 2 Kor. 1:3, 4.

Zot kapav osi rod led ar bann ansien. Bann ansien, zot “enn plas kot kapav al kasiet kont divan, enn refiz kont gro lapli.” (Iza. 32:2) Bann ansien kapav mem ed twa pou trouv enn ser avek ki to kapav ouver to leker ek gagn rekonfor.​—Prov. 17:17.

Eski to kapav ed to mari pou rezet pornografi? Kitfwa to kapav. Kan bizin rezoud enn problem ouswa fer fas ar enn lennmi, Labib dir  ki “de pli bon ki enn.” (Ekle. 4:9-12) Bann spesialis dir ki, kan enn koup travay ansam, sa kapav ed mari-la pou rezet pornografi, ek sa kapav ed fam-la pou refer so mari konfians.

Biensir, pou ki sa marse, mari-la bizin vremem sinser ek li bizin bien deside pou rezet pornografi. Eski li’nn sipliy Zeova pou gagn So led, ek eski li’nn rod led bann ansien? (2 Kor. 4:7; Zak 5:14, 15) Eski li’nn reflesi lor bann fason ki kapav ed li pou rezet pornografi? Par exanp, li kapav pas mwins letan lor so bann laparey elektronik ek evit bann sitiasion ki kapav fer li tom dan tantasion. (Prov. 27:12) Eski li anvi ki to ed li, ek eski li vremem onet anver twa? Si li fer sa bann kitsoz-la, kitfwa to pou kapav ed li.

Kouma to kapav ed to mari? Anou get lexanp Felicia. Li marye ar Ethan, ki adik ar pornografi depi ki li zenn. Kan Ethan anvi get pornografi, li kone ki li kapav al koz ar Felicia, ek ki Felicia pou res kalm. Ethan dir: “Mo onet ar mo madam, ek mo kone ki mo kapav koz ar li. Avek boukou lamour, li ed mwa pou mo pa tom dan tantasion, ek souvan li demann mwa si mo korek. Li ed mwa osi pou mo pa al tro souvan lor Internet.” Biensir, Felicia soufer parski so mari kontan pornografi. Selman, li dir: “Si mo ankoler ar li, sa pa pou ed li pou abandonn sa vilin labitid-la. Ek apre ki nou fini koze, sak fwa li ed mwa pou sirmont mo lapenn.”

Kan bann koup gagn bann konversasion lor sa size-la, sa kapav ed mari-la pou rezet pornografi, ek sa kapav ed fam-la osi pou refer so mari konfians. Apre tou, kan enn mari dir so madam seki li resanti, li dir li kotsa li pe ale, ek seki li pe fer, li pli fasil pou so madam refer li konfians parski li kone ki so mari pa pe kasiet li nanye.

Eski to panse ki to kapav ed to mari dan sa fason-la? Si wi, zot kapav lir sa lartik-la ek koz lor la ansam. Lobzektif to mari se pou abandonn pornografi ek pou donn twa bann rezon pou fer li konfians. Alor, olie ki li ankoler parski to pe anvi koz lor sa problem-la, li pou esey konpran kouma sa problem-la pe afekte twa. To lobzektif se pou ed li pou abandonn pornografi, ek pou donn li lokazion pou regagn to konfians. Ansam, zot pou bizin gete kifer bann dimounn tom dan pornografi, ek kouma zot kapav sirmont sa problem-la. d

 Si to panse ki zot pa pou kapav gard zot kalm kan zot pe koz lor sa size-la, zot kapav demann enn ansien ki zot bien apresie, pou la ansam avek zot kan zot pe koze. Mem si to konzwin reisi abandonn pornografi, to bizin konpran ki sa pou pran letan avan ki li regagn to konfians. Alor, pa bes lebra! Apresie tou bann ti zefor ki li fer. Avek letan, ek si zot toule-de ena pasians, zot maryaz kapav revinn solid.​—Ekle. 7:8; 1 Kor. 13:4.

Si apre inpe letan, to mari reget pornografi, eski sa vedir ki li pa’nn repanti, ouswa ki li enn ka dezespere? Pa neseserman. Sa kapav pran boukou letan avan ki li reisi abandonn pornografi, sirtou si li ti adik. Mem apre plizir lane, li kapav arive ki to mari retom dan pornografi. Pou ki sa pa arive, kitfwa li pou bizin fer plis atansion, mem si sa fer lontan ki li pa’nn get pornografi. (Prov. 28:14; Mat. 5:29; 1 Kor. 10:12) Li pou bizin devlop enn nouvo ‘fason panse ek latitid,’ ek li pou bizin aprann “deteste lemal”​—setadir pornografi ek tou bann kitsoz ki ena enn lien ar pornografi, kouma par exanp mastirbasion. (Efe. 4:23; Ps. 97:10; Rom. 12:9) Eski to mari anvi fer sa bann zefor-la? Si wi, alor li kapav sorti dan sa piez-la. e

Me ki to kapav fer si to konzwin pa anvi sorti dan piez pornografi? Li normal ki detanzantan, to pou ena bann santiman kouma desepsion, to pou ankoler, ek to pou ena linpresion ki li’nn trayir twa. Selman, les sa sitiasion-la dan lame Zeova ek priye Li pou gagn so lape. (1 Pier 5:7) Kontign etidie ek reflesi lor seki to pe aprann, pou ki to kapav vinn pli pros ar Zeova. Si to fer sa, to kapav sir ki Li osi Li pou apros ar twa. Izai 57:15 dir ki Zeova avek “bann ki kraze ek ki ena limilite,” ek Li anvi ed zot pou zot regagn zot lazwa. Kontign fer to maximum pou servi Zeova avek fidelite. Rod led bann ansien. Ek gard lespwar ki enn zour kitfwa to mari kapav sanze.​—Rom. 2:4; 2 Pier 3:9.