1. Dapre Ebre 12:1, ki nou bizin fer pou ki nou reisi terminn lekours ki pou fer nou gagn lavi eternel?

 LABIB konpar lavi bann kretien ar enn lekours. Bann partisipan ki reisi terminn sa lekours-la, zot gagn lavi eternel. (2 Tim. 4:7, 8) Sa lekours-la pre pou fini, akoz sa nou bizin fer nou maximum pou kontign galoupe. Lapot Pol inn reisi terminn lekours-la, ek li donn nou enn tips ki kapav ed nou pou terminn sa lekours-la. Li’nn dir nou ki nou bizin “debaras nou ar tou pwa ek . . . galoup avek landirans sa lekours ki devan nou la.”​—Lir Ebre 12:1.

2. Ki savedir “debaras nou ar tou pwa”?

² Kan Pol dir ki nou bizin “debaras nou ar tou pwa,” eski li pe rod dir ki bann kretien pena okenn responsabilite pou sarye? Non. Li pe rod dir ki nou bizin debaras bann pwa ki pa inportan. Kifer? Parski sa bann pwa-la kapav ralanti nou ek akoz zot nou kapav fatige. Pou nou reisi terminn nou lekours, nou bizin kapav remark sa bann pwa-la ek debaras zot deswit. Selman, nou bizin fer bien atansion ki nou pa debaras bann responsabilite ki nou bizin sarye. Parski si nou fer sa, nou pa pou reisi res dan lekours pou gagn lavi. (2 Tim. 2:5) Ki bann responsabilite nou bizin sarye?

3. (a) Dapre Galat 6:5, ki kitsoz nou bizin sarye? (b) Ki nou pou examine dan sa lartik-la, ek kifer?

³ Lir Galat 6:5. Pol inn koz lor enn kitsoz ki nou bizin sarye. Li ti dir ki “sakenn pou sarye so prop sarz.” Sa sarz-la se bann responsabilite ki nou ena devan Bondie, bann kitsoz ki personn pa kapav sarye dan nou plas. Dan sa lartik-la, nou pou get sertin parmi sa bann ‘sarz-la’ ek nou pou gete kouma nou kapav sarye zot. Nou pou get  osi sertin kitsoz ki pa inportan ki nou sarye, ek nou pou aprann kouma nou kapav debaras zot. Kan nou sarye nou prop sarz ek ki nou debaras nou ar tou bann pwa ki pa inportan, sa ed nou pou nou terminn lekours pou lavi.

4. Kifer promes ki nou’nn fer Zeova pou nou servi Li se pa enn fardo? (Get zimaz osi.)

⁴ Promes ki nou’nn fer pou servi Zeova pou touletan. Kan nou’nn fer Zeova nou promes ki nou pou servi Li toutlong nou lavi, nou’nn promet Li ki nou pou ador Li ek ki nou pou fer so volonte. Nou bizin tini sa promes-la. Tini sa promes-la se enn gran responsabilite, me se pa enn fardo. Apre tou, Zeova inn kree nou pou ki nou fer so volonte. (Rev. 4:11) Li’nn kree nou avek dezir pou aprann konn Li ek pou ador Li ek Li’nn kree nou dan so resanblans. Gras-a sa, nou kapav vinn pros ar Li ek kan nou fer so volonte, sa rann nou zwaye. (Ps. 40:8) Anplis,  kan nou fer volonte Zeova ek nou swiv lexanp so Garson, nou “regagn lafors.”​—Mat. 11:28-30.

5. Ki kitsoz kapav ed twa pou tini promes ki to’nn fer Zeova? (1 Zan 5:3)

⁵ Kouma to kapav sarye sa sarz-la? Ena de kitsoz ki kapav ed twa. Premierman, kontign ogmant to lamour pou Zeova. To kapav fer sa kan to reflesi lor tou bann bon kitsoz ki Li’nn fer pou twa ek lor bann benediksion ki Li pou donn twa dan lavenir. Ek amezir ki to lamour grandi pou Zeova, to pou trouv sa pli fasil pou to obeir Li. (Lir 1 Zan 5:3.) Deziemman, imit Zezi. Zezi ti reisi fer volonte so Papa parski li ti priye Li pou gagn so led ek li ti res konsantre lor rekonpans ki li ti pou gagne. (Ebre 5:7; 12:2) Parey kouma Zezi, priye Zeova pou gagn lafors ek kontign res konsantre lor to lesperans pou gagn lavi eternel. Plis to lamour pou Zeova grandi ek plis to imit so Garson, plis to pou kapav tini promes ki to’nn fer pou servi Li pou touletan.

6. Kifer nou bizin asim nou bann responsabilite familial? (Get zimaz osi.)

⁶ Nou bann responsabilite familial. Dan nou lekours pou gagn lavi eternel nou bizin kontan Zeova ek Zezi plis ki nou fami. (Mat. 10:37) Me sa pa vedir ki nou bizin negliz nou bann responsabilite familial. Okontrer si nou anvi fer Zeova ek Zezi plezir nou bizin asim bann responsabilite ki nou ena dan lafami. (1 Tim. 5:4, 8) Anplis, kan nou fer sa, nou-mem nou pou ere. Kifer? Parski Zeova kone ki bann fami pou ere kan mari ek fam tret zot kamarad avek lamour ek respe, kan bann paran kontan zot zanfan, ek kan bann zanfan obeir zot paran.​—Efe. 5:33; 6:1, 4.

7. Kouma to kapav asim bien responsabilite ki to ena dan lafami?

⁷ Kouma to kapav sarye sa sarz-la? Si to enn mari, enn fam, ouswa enn zanfan, swiv bann konsey ki ena dan Labib olie ki to fer kouma twa to anvi, ki to fer kouma lezot inn montre twa, ouswa ki to swiv konsey bann exper ki ena dan sa lemond-la. (Prov. 24:3, 4) Swiv bann konsey ki ena dan nou bann piblikasion parski zot pou montre twa kouma to kapav met an pratik bann prinsip ki ena dan Labib. Par exanp, lor nou sit jw.org ena bann konsey bien presi ki kapav ed bann koup, bann paran, ek bann zenn, pou sirmont bann difikilte ki zot kapav gagne azordi. b Fer to maximum pou swiv bann konsey ki ena dan Labib, mem si bann lezot manb to fami pa fer sa. Kan to fer sa, to fami pou gagn bann bienfe ek Zeova pou beni twa.​—1 Pier 3:1, 2.

8. Ki responsabilite nou ena kan nou pran bann desizion?

⁸ Asim responsabilite bann desizion ki nou pran. Zeova inn donn nou liberte pou pran nou prop desizion, ek Li anvi ki nou ere kan nou pran bann bon desizion. Selman, si nou pran bann move desizion, Li pou les nou pey konsekans nou bann move desizion. (Gal. 6:7, 8) Alor, kan nou pran bann move desizion, ouswa kan nou koze ek azir san reflesi,  nou bizin asim nou responsabilite ek aksepte bann difikilte ki nou kapav gagne akoz sa. Par exanp, souvan nou santi nou koupab kan nou fer enn move kitsoz. Kan nou kone ki nou bizin asim responsabilite bann desizion ki nou pran, sa motiv nou pou konfes nou bann pese, pou koriz nou bann erer, ek pou pa refer mem erer. Kan nou fer sa bann kitsoz-la, sa kapav ed nou pou kontign galoup lekours pou gagn lavi.

9. Ki to kapav fer si to’nn pran enn move desizion? (Get zimaz osi.)

⁹ Kouma to kapav sarye sa sarz-la? Si to’nn pran enn move desizion, ki to kapav fer? Aksepte to sitiasion. To pa kapav sanz lepase. Pa perdi to letan ek to lenerzi pou esey montre ki to ti ena rezon ek pa met tor lor lezot pou erer ki to’nn fer. Olie sa, aksepte to erer ek kontign fer to maximum pou al delavan. Si to santi twa koupab, priye Zeova avek limilite, rekonet to erer, ek demann Li pou pardonn twa. (Ps. 25:11; 51:3, 4) Si to’nn fer lezot ditor, demann zot pardon, ek si bizin rod led bann ansien. (Zak 5:14, 15) Tir leson ar to bann erer, ek evit fer mem erer ankor. Si to fer sa, to kapav sir ki Zeova pou pardonn twa ek ki Li pou donn twa led ki to bizin.​—Ps. 103:8-13.

10. Kifer fode pa nou fors natir? (Galat 6:4)

¹⁰ Pa fors natir. Nou met presion lor nou-mem kan nou konpar nou ar lezot. (Lir Galat 6:4.) Si nou touletan konpar nou-mem ar lezot, nou pou zalou lezot ek nou pou ena lespri konpetision. (Gal. 5:26) Si nou rod fer parey kouma lezot, nou riske fors nou natir ek fer nou-mem ditor. Labib dir: “Kan seki enn dimounn pe atann pe tarde pou realize, sa fer so leker malad.” (Prov. 13:12) Aster-la mazine ki kantite nou pou dekouraze si nou rod fer bann kitsoz ki nou pena kapasite pou fer! Si nou fer sa, kitfwa nou pou telman fatige, ki sa pou ralanti nou dan nou lekours pou lavi.​—Prov. 24:10.

11. Ki nou bizin fer pou nou pa fors nou natir?

¹¹ Kouma to kapav debaras sa pwa-la? Fode pa to met presion lor twa pou to donn plis ki seki to kapav. Zeova kone ki kantite to kapav done ek zame Li pa pou atann ki to donn plis ki sa. (2 Kor. 8:12) Zeova zame pa pou konpar twa osi ar lezot. (Mat. 25:20-23) Li kone ki to pe servi Li ar tou to leker, ek Li bien apresie to fidelite, ek to landirans. Ena modesti ek aksepte ki akoz to laz, to lasante, ouswa to sitiasion, kitfwa to pa kapav fer seki to anvi. Parey kouma Barzilay, si to ena bann problem lasante, kitfwa to pou bizin refiz enn privilez. (2 Sam. 19:35, 36) Parey kouma Moiz, aksepte led lezot ek deleg bann responsabilite. (Ex. 18:21, 22) Kan nou ena modesti, nou pa pou fors nou natir ek lerla nou pou ena lenerzi pou nou kontign galoup nou lekours pou lavi.

12. Eski nou bizin santi nou responsab pou bann move desizion ki lezot pran? Explike.

¹² Nou santi nou responsab pou bann move desizion ki lezot pran. Nou pa kapav pran desizion dan plas lezot, ek nou pa kapav anpes zot pey konsekans bann move desizion ki zot pran. For exanp, avek letan li kapav arive ki enn zenn aret servi Zeova. Ek akoz sa, so paran kapav  bien soufer. Selman, fode pa bann paran santi zot koupab pou move desizion ki zot zanfan pran. Zeova pa atann ki zot sarye sa pwa-la.​—Rom. 14:12.

13. Ki kitsoz enn paran kapav fer kan so zanfan pran enn move desizion?

¹³ Kouma to kapav debaras sa pwa-la? Pa bliye ki Zeova inn donn sakenn parmi nou liberte pou pran so prop desizion. Li les sak dimounn fer so prop swa. Li les sakenn deside si zot pou servi Li ouswa non. Zeova kone ki to pa enn paran parfe, Li zis anvi ki to fer to maximum. Si to zanfan desid pou aret servi Zeova, se so responsabilite, se pa to responsabilite. (Prov. 20:11) Selman, kitfwa to pe kontign reflesi lor bann erer ki to’nn fer antan-ki paran. Si to dan sa sitiasion-la, dir Zeova seki to resanti ek demann Li so pardon. Li kone ki to pa kapav sanz lepase ek Li pa atann ki to kontign protez to zanfan pou ki li pa rekolte seki li finn seme. Pa bliye osi ki, si to zanfan fer zefor pou retourn ar Zeova, Zeova so lebra pou gran ouver pou akeyir li.​—Lik 15:18-20.

14. Kifer fode pa nou touletan santi nou koupab?

¹⁴ Nou touletan santi nou koupab. Kan nou fer pese, li normal ki nou santi nou koupab. Me Zeova pa anvi ki nou kontign santi nou koupab. Si nou dan sa sitiasion-la, se enn pwa ki nou bizin debarase. Kouma nou pou kone si nou pe sarye sa pwa-la? Si nou’nn konfes nou pese, nou’nn repanti, ek nou’nn fer tou seki nou kapav pou pa refer mem pese, nou kapav sir ki Zeova inn pardonn nou. (Zist. 3:19) Apre ki nou’nn fer tousala, Zeova pa anvi ki nou kontign santi nou koupab. Parski Li kone ki nou pou fer nou-mem ditor si sa arive. (Ps. 31:10) Si nou touletan santi nou koupab, nou kapav abandonn nou lekours pou lavi.​—2 Kor. 2:7.

15. Ki to kapav fer si to touletan santi twa koupab? (1 Zan 3:19, 20) (Get zimaz osi.)

 ¹⁵ Kouma to kapav debaras sa pwa-la? Si to touletan santi twa koupab, reflesi lor “vre pardon” ki Bondie done. (Ps. 130:4, NW) Kan Zeova pardonn bann dimounn ki vremem repanti, Li fer zot sa promes-la: “Mo pou nepli rapel zot pese.” (Zer. 31:34) Savedir ki, kan Zeova pardonn enn kikenn, Li pa repans bann pese ki sa dimounn-la inn fer. Alor, si to ankor pe pey bann konsekans pese ki to’nn fer, fode pa to panse ki Zeova pa’nn pardonn twa. Ek pa dekouraze si akoz bann erer ki to’nn fer, to nepli ena bann responsabilite dan lasanble. Zeova pa kontign pans bann pese ki to’nn fer ek fode pa ki twa osi to pans lor la.​—Lir 1 Zan 3:19, 20.

16. Pou nou kapav kontign galoup lekours pou gagn lavi, ant ki kitsoz nou bizin konn fer diferans?

¹⁶ Dan nou lekours pou lavi, nou bizin “galoup dan enn fason ki [nou] kapav gagn pri-la.” (1 Kor. 9:24) Nou pou reisi fer sa si nou konn fer diferans ant bann sarz ki nou bizin sarye ek bann pwa ki nou bizin debarase. Dan sa lartik-la, nou’nn get zis de-trwa lexanp bann sarz ki nou bizin sarye ek bann pwa ki nou bizin debarase. Me ena lezot ankor. Zezi ti dir ki nou kapav “vinn lour parski [nou] manze ek bwar plis ki bizin ek akoz bann traka ki ena dan lavi.” (Lik 21:34) Sa verse-la ek bann lezot verse kapav ed twa pou trouve ki bann sanzman to bizin fer, pou to kapav kontign galoup lekours pou gagn lavi.

17. Kifer nou sir ki nou kapav gagn lekours pou lavi?

¹⁷ Nou sir ki nou kapav gagn lekours pou lavi. Kifer? Parski Zeova pou donn nou lafors ki nou bizin. (Iza. 40:29-31) Alor, fode pa to ralanti! Swiv lexanp lapot Pol, ki ti fer tou seki li kapav pou gagn pri ki ti devan li. (Fil. 3:13, 14) Personn pa kapav galoup sa lekours-la pou twa. Me avek led Zeova, to pou reisi fer li. Zeova kapav ed twa pou to sarye to bann sarz ek pou to debaras bann pwa ki pa inportan. (Ps. 68:19) Avek led Zeova, to pou kapav kontign galoup to lekours ek to pou kapav terminn li!