LARTIK LETID 35
KANTIK 123 Nou Soumet ar Bondie Avek Fidelite
Ansien, Ed Bann Ki Nepli Form Parti dan Lasanble
“Pou ena plis lazwa dan lesiel kan enn dimounn ki ena move lavi repanti ki pou 99 dimounn drwat ki pa bizin repanti.”—LIK 15:7.
PWIN PRINSIPAL
Dan sa lartik-la, nou pou gete kifer bizin tir sertin dan lasanble, ek kouma bann ansien kapav ed zot pou repanti ek pou revinn pros ar Zeova.
1-2. (a) Ki Zeova panse lor bann dimounn ki fer enn pese grav ek ki pa’le repanti? (b) Kan enn kikenn inn fer enn pese, ki Zeova anvi li fer?
ZEOVA pa aksepte bann move konportman; Li deteste pese. (Ps. 5:4-6) Li anvi ki nou obeir bann komannman ki ena dan Labib. Selman, Li kone ki nou inparfe ek ki nou pa kapav obeir Li dan enn fason parfe. (Ps. 130:3, 4) Kanmem sa, Li pa toler ‘bann zom ki pena okenn respe pou Li ek ki servi bonte extraordiner Bondie kouma enn pretext pou ena enn kondwit devergonde.’ (Zid 4) Se akoz sa ki Labib koz lor “destriksion bann dimounn ki pena okenn respe pou Bondie” kan pou ena lager Armagedon.—2 Pier 3:7; Rev. 16:16.
2 Selman, Zeova pa anvi ki personn detrir. Kouma nou’nn trouve dan bann lartik avan, Labib dir ki Zeova “anvi ki tou dimounn repanti.” (2 Pier 3:9) Bann ansien imit Zeova kan avek pasians zot ed enn kikenn pou sanze ek pou revinn pros ar Li. Selman, pa tou dimounn ki’nn fer enn pese ki anvi sanze. (Iza. 6:9) Sertin kontign fer seki pa bon, mem si bann ansien plizir fwa inn esey ed zot pou repanti. Ki bann ansien bizin fer dan sa ka-la?
“TIR SA MOVE DIMOUNN-LA”
3. (a) Dapre Labib, ki bizin fer kan enn kikenn pa’le repanti? (b) Kan enn kikenn pa’le repanti ek ki bizin tir li dan lasanble, kifer nou kapav dir ki se limem ki’nn rod sa?
3 Kan enn kikenn pa’le repanti, bann ansien bizin swiv lord ki ena dan 1 Korintien 5:13, ki dir: “Tir sa move dimounn-la parmi zot.” Alor, kan enn kikenn pa’le repanti, li kone ki bann ansien pou bizin tir li dan lasanble. Dan enn sertenn fason, nou kapav dir ki se limem ki’nn rod sa; li pe rekolte seki li’nn seme. (Gal. 6:7) Mem si bann ansien plizir fwa inn esey ed li pou repanti, li pa’le repanti. (2 Ler. 17:12-15) Par so bann aksion, li’nn montre ki li nepli anvi obeir bann komannman Zeova.—Det. 30:19, 20.
4. Kan enn kikenn pa’le repanti ek ki bizin tir li dan lasanble, kifer bizin fer enn lanons?
4 Kan enn kikenn pa’le repanti ek ki bizin tir li dan lasanble, bizin fer enn lanons dan lasanble pou dir ki li nepli enn Temwin Zeova. a Bann ansien pa fer sa lanons-la pou fer li gagn onte. Zot fer sa pou ki bann frer ek ser kapav swiv lord pou “aret frekant” sa dimounn-la, ek ‘mem pa manz avek’ li. (1 Kor. 5:9-11) Ena enn bon rezon kifer Zeova inn donn sa lord-la. Lapot Pol ti dir: “Enn tigit levin fer lapat-la antie monte.” (1 Kor. 5:6) Si enn kikenn ki kontign fer pese ek ki pa’le repanti, res dan lasanble, lezot kapav panse ki li pa neseser ki zot obeir bann komannman Zeova.—Prov. 13:20; 1 Kor. 15:33.
5. Kan enn kikenn nepli form parti dan lasanble, ki nou bizin panse lor li, ek kifer?
5 Kan enn kikenn nepli form parti dan lasanble, ki nou bizin panse lor li? Mem si nou pa pou frekant li, fode pa nou panse ki pena okenn lespwar pou li. Li zis enn mouton ki’nn perdi. Kan enn mouton kit so troupo, li ankor kapav retourne. Fode pa nou bliye ki sa mouton ki’nn perdi la, ti donn so lavi Zeova. Me malerezman, li pa’nn reisi gard so promes pou res fidel ar Zeova, ek akoz sa li an danze. (Eze. 18:31) Selman, tanki ankor ena letan ek tanki Zeova ankor montre mizerikord anver li, li ankor kapav retourne. Alor, kouma bann ansien kapav ed enn kikenn ki nepli form parti dan lasanble?
KOUMA BANN ANSIEN KAPAV ED BANN KI NEPLI FORM PARTI DAN LASANBLE?
6. Ki bann ansien bizin fer pou ed enn kikenn ki nepli form parti dan lasanble?
6 Kan enn kikenn nepli form parti dan lasanble, eski bann ansien aret ed li pou retourn ar Zeova? Non! Kan bann ansien dir enn kikenn ki li nepli pou form parti dan lasanble, zot osi dir li seki li bizin fer pou ki li kapav retourne. Me bann ansien pa fer zis sa! Bien souvan, zot pou osi dir li ki zot ti pou kontan zwenn li apre de-trwa mwa pou gete si so latitid inn sanze. Si apre de-trwa mwa dimounn-la aksepte pou zwenn bann ansien, zot pou ankouraz li pou repanti ek pou retourn ar Zeova. Ek mem si li pankor repanti, bann ansien detanzantan pou esey zwenn li pou ankouraz li pou repanti.
7. Kouma bann ansien kapav imit konpasion Zeova kan enn kikenn nepli form parti dan lasanble? (Zeremi 3:12)
7 Kan enn kikenn nepli form parti dan lasanble, bann ansien fer zefor pou imit Zeova ek pou montre konpasion anver li. Par exanp, kan bann Izraelit ti abandonn Zeova, Li pa ti atann ki bann-la repanti pou ki Li ed zot. Okontrer, Li ti avoy so bann profet pou ed zot, mem si zot pa ti ankor sanze ek repanti. Ek kouma nou ti trouve dan deziem lartik sa Latour Degard-la, Zeova ti dir profet Oze pou pardonn so madam ek pou repran li kot li, mem si li ti ankor pe fer enn pese bien grav. Zeova ti servi sa lexanp-la pou montre so pep ki Li ena boukou konpasion. (Oze 3:1; Mal. 3:7) Dan mem fason, bann ansien bizin imit konpasion Zeova. Kan enn kikenn fer enn pese, zot bizin vremem anvi ki li repanti ek ki li retourn ar Zeova. Anplis, fode pa ki akoz zot, sa dimounn-la trouv sa difisil pou retourn ar Zeova.—Lir Zeremi 3:12.
8. Kouma lexanp “Garson Ki Ti Perdi” ed nou pou konpran pli bien santiman ki Zeova ena pou bann ki nepli form parti dan lasanble? (Lik 15:7)
8 Dan lexanp “Garson Ki Ti Perdi,” nou rapel osi kouma sa papa-la ti reazir kan li ti trouv so garson pe retourn lakaz. Li “ti galoupe, ti may li ek ti anbras li avek boukou lafeksion.” (Lik 15:20) Papa-la pa ti atann ki so garson rant lakaz pou demann li pardon. Se li ki ti galoupe pou al zwenn so garson, parey kouma ninport ki papa ki ranpli ar lamour ti pou fer. Se sa kalite santiman-la ki Zeova ena pou bann ki nepli form parti dan lasanble. Ek bann ansien bizin fer zot maximum pou imit Zeova. Zot bizin montre ki zot vremem kontan ki sa mouton ki’nn perdi-la “inn retourn lakaz.” (Lik 15:22-24, 32) Kan enn kikenn retourn ar Zeova, ena boukou lazwa dan lesiel, ek ena boukou lazwa lor later osi!—Lir Lik 15:7.
9. Ki kitsoz Zeova ankouraz bann ki nepli form parti dan lasanble pou fer?
9 Ziska ler, nou’nn trouve ki Zeova pa les bann dimounn ki pa’le repanti, res dan lasanble. Selman, Li pa vir so ledo ar zot. Li anvi ki zot retourne. Ek kan zot repanti, Oze 14:4 montre seki Li resanti pou zot. Sa verse-la dir: “Mo pou geri zot infidelite. Mo pou kontan zot parski mo anvi, parski mo nepli ankoler.” Kan bann ansien kone seki Zeova resanti kan enn kikenn repanti, sa ankouraz zot pou rod tou ti sign ki montre ki enn dimounn pe koumans repanti. Anplis, sa verse-la montre bann ki’nn abandonn Zeova ki Li ankor kontan zot ek ki Li anvi ki zot retourne.
10-11. Kouma bann ansien kapav ed bann ki nepli form parti dan lasanble depi lontan?
10 Kouma bann ansien kapav ed bann ki nepli form parti dan lasanble depi lontan, kitfwa mem depi plizir dizenn lane? Sa bann dimounn-la kitfwa inn aret fer sa pese ki zot ti pe fer avan la. Ouswa, kitfwa zot nepli rapel pou ki rezon ti tir zot dan lasanble. Mem si sa fer bien-bien lontan ki zot nepli form parti dan lasanble, bann ansien pou fer zefor pou rod zot ek pou vizit zot. Pandan sa bann vizit-la, bann ansien pou ankouraz zot pou retourn dan lasanble. Zot kapav mem priye ar sa bann dimounn-la. Si sa fer lontan ki enn kikenn nepli form parti dan lasanble, sirman li bien feb lor plan spiritiel. Me si sa dimounn-la dir ki li anvi retourn ar Zeova, bann ansien kapav organize pou ki enn kikenn fer so letid, mem si li pankor reintegre. Biensir, se bann ansien ki pou deside kisann-la pou fer letid sa dimounn-la.
11 Bann ansien bizin imit lamour ek konpasion ki Zeova ena pou bann dimounn. Akoz sa, zot bizin fer zefor pou rod tou bann ki’nn kit Zeova ek ankouraz zot pou retourn ver Li. Ek kan enn kikenn repanti ek ki li’nn fer bann sanzman ki bizin, fode pa zot tarde pou reintegre li.—2 Kor. 2:6-8.
12. (a) Ar ki sitiasion bann ansien bizin fer bien atansion? (b) Kifer fode pa nou panse ki sertin zame pa pou gagn mizerikord Zeova? (Get not osi.)
12 Parkont, dan sertin sitiasion, bann ansien pou fer bien atansion avan ki zot reintegre enn kikenn. Par exanp, si enn kikenn inn abiz enn zanfan, ouswa li’nn vinn enn aposta, ouswa li’nn maniganse pou kas so maryaz, bann ansien pou fer sir ki sa dimounn-la inn vremem repanti. (Mal. 2:14; 2 Tim. 3:6) Kifer? Parski zot bizin protez lasanble. Selman, nou bizin konpran ki, kan enn kikenn vremem repanti ek ki li aret fer seki move, Zeova aksepte ki li retourn dan lasanble. Alor, mem si bann ansien bizin fer sir ki sa kalite dimounn-la inn repanti, fode pa zot panse ki sa kalite dimounn-la zame pa pou gagn mizerikord Zeova. b—1 Pier 2:10.
SEKI LASANBLE KAPAV FER
13. Ki diferans ena kan enn kikenn gagn enn blam ek kan tir enn kikenn dan lasanble?
13 Kouma nou ti trouve dan lartik avan, parfwa dan lasanble anonse ki enn kikenn inn gagn enn blam. Dan sa ka-la, nou kapav kontign frekant sa dimounn-la parski nou kone ki li’nn repanti ek ki li’nn aret fer seki pa bon. (1 Tim. 5:20) Li touzour form parti dan lasanble ek li bizin lankourazman so bann frer ek ser. (Ebre 10:24, 25) Selman, kan tir enn kikenn dan lasanble, sa bien diferan. Nou bizin “aret frekant” sa dimounn-la, ek “fode mem pa ki [nou] manz avek enn dimounn koumsa.”—1 Kor. 5:11.
14. Kan enn kikenn nepli form parti dan lasanble, ki desizion sak Kretien bizin pran? (Get zimaz osi.)
14 Eski sa vedir ki nou bizin inior net enn kikenn ki nepli form parti dan lasanble? Non. Li vre ki nou pa pou frekant li. Selman, nou kapav servi nou konsians pou deside si nou pou invit sa dimounn-la, ki kitfwa enn manb nou fami ouswa ki ti enn bon kamarad avan, pou asiste enn renion. Me ki nou pou fer si li vinn renion? Dan lepase, nou pa ti dir bonzour enn kikenn ki nepli form parti dan lasanble. Me aster-la, kan enn kikenn ki nepli form parti dan lasanble asiste enn renion, sak Kretien bizin servi so konsians pou deside si li pou akeyir sa dimounn-la ek dir li enn sinp bonzour. Selman, nou pa pou gagn bann gran konversasion avek li ek nou pa pou pas letan avek li.
Kan enn kikenn nepli form parti dan lasanble, sak Kretien bizin servi so konsians pou deside si li pou invit li pou asiste renion ouswa si li pou dir li bonzour (Get paragraf 14)
15. Lor ki kalite dimounn 2 Zan 9-11 pe koze? (Get osi lankadre “ Eski Zan ek Pol Ti Pe Koz lor Mem Kalite Pese?”)
15 Me sertin kapav demann zotmem, ‘Eski Labib pa dir ki, kan enn Kretien dir bonzour sa kalite dimounn-la, li “pe partisip dan so bann move aksion”?’ (Lir 2 Zan 9-11.) Kontex sa verse-la montre ki sa instriksion-la ti konsern zis bann aposta ek bann ki ankouraz lezot pou fer bann move kitsoz. (Rev. 2:20) Alor, si enn kikenn li enn aposta, ouswa si li pe ankouraz lezot pou fer bann move kitsoz, bann ansien pa pou vizit li. Kanmem sa, li posib ki sa dimounn-la repanti. Me ziska ki sa arive, nou pa pou dir li bonzour ek nou pa pou invit li pou asiste renion.
IMIT MIZERIKORD EK KONPASION ZEOVA
16-17. (a) Kan enn kikenn fer enn pese, ki Zeova anvi li fer? (Ezekiel 18:32) (b) Kouma bann ansien kapav montre ki zot travay ansam ar Zeova?
16 Ki nou’nn aprann dan sa sink lartik-la? Zeova pa anvi ki personn detrir! (Lir Ezekiel 18:32.) Kan enn kikenn fer enn pese, Li anvi ki sa dimounn-la ‘rekonsilie ar Li.’ (2 Kor. 5:20) Se akoz sa ki Li’nn touletan ankouraz so bann serviter ki’nn kit Li, pou repanti ek pou retourn ver Li. Bann ansien ena privilez pou travay ansam ar Zeova kan zot kontign fer zefor pou ed bann ki’nn fer pese pou repanti.—Rom. 2:4; 1 Kor. 3:9.
17 Ena boukou lazwa dan lesiel kan enn kikenn repanti! Sak fwa ki enn parmi so bann mouton ki’nn perdi retourn dan lasanble, nou Papa Zeova extra kontan! Alor, anou kontign reflesi lor konpasion, mizerikord, ek bonte extraordiner Zeova. Lerla, nou lamour pou Li pou kontign grandi.—Lik 1:78.
KANTIK 111 Rezon pou Nou Zwaye
a Kan enn kikenn nepli form parti dan lasanble, nou pou nepli dir ki li’nn exkli. An-akor ar 1 Korintien 5:13, aster-la nou pou dir ki’nn tir li dan lasanble.
b Labib koz lor enn kalite pese ki pa kapav pardone. Se bann ki touletan swazir pou opoz zot ar Bondie ki fer sa kalite pese-la. Se zis Zeova ek Zezi ki kapav dir kisann-la inn fer sa kalite pese-la.—Mark 3:29; Ebre 10:26, 27.
