LARTIK LETID 31
KANTIK 12 Gran Bondie, Zeova
Seki Zeova Inn Fer pou Liber Nou ar Pese ek Lamor
“Bondie inn telman kontan lemond ki li’nn donn so sel Garson.”—ZAN 3:16.
PWIN PRINSIPAL
Dan sa lartik-la, nou pou trouve seki Zeova inn fer pou ki nou kapav obeir Li ek servi Li mem si nou inparfe. Nou pou trouve osi kouma Li’nn pran bann dispozision pou ki nou viv pou touletan ek pou liber nou ar pese.
1-2. (a) Ki ete pese, me ki lespwar nou ena? (Get osi “Expresion ki’nn Explike.”) (b) Ki nou pou examine dan sa lartik-la ek dan bann lezot lartik sa Latour Degard-la? (Get osi “Enn Linformasion pou Bann Lekter” dan sa Latour Degard-la.)
ESKI to ti pou kontan kone ki kantite Zeova kontan twa? Enn fason to kapav konn sa se kan to etidie seki Zeova inn fer pou liber twa ar pese ek lamor. Pese a se nou lennmi, ek par nou-mem nou pa kapav gagn laviktwar lor li. Tou dimounn fer pese, ek toulezour nou fer pese. Ek se akoz nou fer pese ki nou mor. (Rom. 5:12) Selman, ena enn lespwar! Avek led Zeova, nou sir ki nou kapav libere ar pese ek lamor.
2 Sa fer anviron 6,000 an ki Zeova pe ed bann dimounn pou servi Li, mem si zot inparfe. Li fer sa parski Li kontan nou. Li telman kontan nou ki Li’nn fer boukou kitsoz pou ed nou pou lit kont pese. Zeova kone ki se akoz nou fer pese ki nou mor, ek Li pa anvi ki nou mor. Li anvi ki nou viv pou touletan. (Rom. 6:23) Se seki Li anvi pou twa osi! Dan sa lartik-la, nou pou reponn sa trwa kestion-la: (1) Ki lespwar Zeova inn donn bann dimounn? (2) Dan lepase, kouma bann dimounn inparfe inn reisi gagn faver Zeova? (3) Ki Zezi inn fer pou liber bann dimounn ar pese ek lamor?
KI LESPWAR ZEOVA INN DONN BANN DIMOUNN?
3. Kouma Adan ek Ev inn fer pese?
3 Kan Zeova ti kree premie zom ek premie fam, Li ti anvi ki zot ere. Li ti donn zot enn zoli plas pou reste, Li ti marye zot, ek Li ti donn zot enn responsabilite extraordiner. Zot ti bizin ranpli later ar zot bann desandan, ek fer later vinn enn paradi parey kouma zardin Eden. Me Li ti osi donn zot enn lord, ek Li ti dir zot ki si zot ti dezobeir sa lord-la, zot ti pou mor. Nou kone ki’nn arive apre, pa vre! Enn anz bien move, ki pa ti kontan Bondie ek ki pa ti kontan bann dimounn, ti met enn tantasion devan Adan ek Ev pou ki zot dezobeir Bondie. Malerezman, zot ti tom dan sa piez-la. Mem si zot Papa Zeova ti bien kontan zot, Adan ek Ev pa ti fer Zeova konfians, ek olie ki zot obeir Li, zot ti fer pese. Lerla, seki Zeova ti dir zot ti arive! Akoz zot ti dezobeir Li, zot ti soufer leres zot lavi, zot ti vinn vie, zot ti tom malad, ek alafin zot ti mor.—Zen. 1:28, 29; 2:8, 9, 16-18; 3:1-6, 17-19, 24; 5:5.
4. Kifer Zeova deteste pese, ek kifer Li ed nou pou vinn pros ar Li? (Romin 8:20, 21)
4 Zeova inn fer ekrir sa zistwar-la dan Labib pou ki nou konpran enn kitsoz bien inportan. Li anvi nou konpran kifer Li deteste pese. Pese fer nou al lwin ar nou Papa Zeova, ek akoz pese nou mor. (Iza. 59:2) Parkont, Satan li, li deteste Zeova ek li deteste bann dimounn. Se pou sa rezon-la ki li ti met enn tantasion devan Adan ek Ev pou ki zot fer pese, ek li ankor pe fer parey azordi. Dan zardin Eden, Satan kitfwa ti panse ki li ti reisi gat proze ki Zeova ena pou bann dimounn. Selman, li pa ti kone ki kantite lamour Zeova ena pou nou. Zeova pa ti sanz proze ki Li ti ena pou bann desandan Adan ek Ev. Li telman kontan bann dimounn ki deswit Li ti pran bann dispozision pou ki nou kapav ena enn lespwar. (Lir Romin 8:20, 21.) Zeova ti kone ki sertin desandan Adan ek Ev ti pou kontan Li ek obeir Li. Akoz sa, Li ti trouv enn fason pou ki zot kapav vinn pros ar Li ek ki zot libere ar pese ek lamor. Kouma Li ti fer sa?
5. Kan eski Zeova ti donn enn lespwar bann dimounn? Explike. (Zenez 3:15)
5 Lir Zenez 3:15. Zeova deswit ti dir ki Li ti pou detrir Satan ek donn enn lespwar tou bann dimounn. Li ti predir ki enn “desandans” ti pou sov bann dimounn. Sa desandans-la ti pou ‘kraz latet’ Satan, setadir detrir Satan, ek regle tou bann problem ki finn ena akoz li. (1 Zan 3:8) Selman, sa desandans-la ti pou soufer li osi, parski Satan ti pou atak li ek ti pou touy li. Sa ti pou fer leker Zeova bien fermal. Selman, sa soufrans-la ti pou vo lapenn, parski alafin bann milyon dimounn ti pou kapav libere ar pese ek lamor!
DAN LEPASE, KOUMA BANN DIMOUNN INPARFE TI GAGN FAVER ZEOVA?
6. Ki kitsoz Abel, Noe, ek bann lezot dimounn ki ti fidel, ti fer pou zot kapav vinn pros ar Zeova?
6 Tigit-tigit, Zeova inn montre kouma bann dimounn inparfe kapav vinn pros ar Li. Par exanp, premie dimounn ki’nn ena lafwa dan Zeova apre rebelion dan zardin Eden se Abel, deziem garson Adan ek Ev. Abel ti bien kontan Zeova, li ti anvi fer Li plezir, ek li ti anvi vinn pros ar Li. Akoz sa, li ti ofer Zeova enn sakrifis. Abel ti enn berze, alor li ti pran sertin parmi so bann zenn mouton, li ti touy zot, ek li ti ofer sa Zeova. Kouma Zeova ti reazir? Labib dir ki “Abel ek so lofrand ti fer Zeova plezir.” (Zen. 4:4) Zeova ti bien kontan osi bann sakrifis ki bann lezot dimounn ti fer parski zot ti kontan Li ek zot ti fer Li konfians, kouma par exanp Noe. (Zen. 8:20, 21) Kan Li ti aksepte sa bann sakrifis-la, Zeova ti montre ki bann imin inparfe kapav gagn so faver ek vinn pros ar Li. b
7. Abraam ti pre pou sakrifie so garson. Ki sa aprann nou?
7 Zeova ti demann Abraam, enn zom ki ti ena enn gran lafwa, pou fer enn kitsoz ki ti bien difisil. Li ti demann Abraam pou ofer so garson Izaak kouma enn sakrifis. Sirman Abraam so leker ti bien fermal kan Zeova ti demann li fer sa! Selman, li ti obeir Zeova. Me zis kouma Abraam ti pe al touy so garson, Zeova ti aret li. Sa lexanp-la ansegn nou seki Zeova ti pou fer dan lavenir: Li ti pou donn lavi so Garson ki Li bien kontan kouma enn sakrifis. Zeova ti pou fer sa parski Li kontan bann dimounn.—Zen. 22:1-18.
8. Bann sakrifis zanimo ki bann Izraelit ti fer, ki zot ti reprezante? (Levitik 4:27-29; 17:11)
8 Kan Zeova ti donn Lalwa bann Izraelit, Li ti demann zot fer sakrifis bann zanimo pou ki zot kapav gagn pardon zot bann pese. (Lir Levitik 4:27-29; 17:11.) Sa bann sakrifis-la ti reprezant enn pli gran sakrifis ki Zeova ti pou done, enn sakrifis ki ti pou liber bann dimounn ar pese ek lamor. Zeova ti fer bann profet ekrir lor sa desandans ki li ti promet la. Bann-la ti explike ki sa desandans-la ti pou enn Garson Bondie ek ki li ti pou bizin soufer ek mor. Ti pou sakrifie li parey kouma sakrifie enn mouton. (Iza. 53:1-12) Wi, Zeova ti promet ki Li ti pou donn so Garson ki Li bien kontan kouma enn sakrifis, pou ki bann dimounn kapav libere ar pese ek lamor. Se enn kitsoz extraordiner ki Zeova inn fer, ek Li’nn fer sa pou twa osi!
KI ZEZI INN FER POU LIBER BANN DIMOUNN?
9. Ki Zan Batis ti dir konsernan Zezi? (Ebre 9:22; 10:1-4, 12)
9 Lane 29 Nou Lepok, kan Zan Batis ti trouv Zezi, li ti dir: “Gete, ala Lagno Bondie ki tir pese lemond!” (Zan 1:29) Sa bann parol-la ti montre ki Zezi ti sa desandans ki Bondie ti promet la. Zezi ti pou donn so lavi an sakrifis. Sa desandans ki Zeova ti promet la, ti lor later, ek li ti pou liber bann dimounn ar pese ek lamor.—Lir Ebre 9:22; 10:1-4, 12.
10. Kouma Zezi ti montre ki li ti ‘vini pou bann dimounn ki ena enn move lavi’?
10 Zezi ti ed sirtou bann dimounn ki ti santi zot koupab akoz zot bann pese, ek li ti invit zot pou vinn so bann disip. Li ti kone ki pese se lasours tou bann problem ki bann dimounn gagne. Li ti dir: “Se pa bann dimounn ki ena enn bon lasante ki bizin dokter, me bann ki malad. . . . Mo pa’nn vini pou bann dimounn ki drwat me pou bann dimounn ki ena enn move lavi.” (Mat. 9:12, 13) Akoz sa, Zezi ti fer zefor pou ed bann dimounn ki ti pe soufer akoz bann pese ki zot ti fer. Par exanp, kan enn madam ti lav lipie Zezi ar so bann larm, Zezi ti bien zanti avek li ek li ti pardonn so bann pese. (Lik 7:37-50) Li ti osi ansegn enn Samaritenn, mem si li ti kone ki Samaritenn-la ti ena enn move lavi. (Zan 4:7, 17-19, 25, 26) Li vre ki lamor se pli pir konsekans pese. Me Zeova ti mem donn Zezi pouvwar pou resisit bann zom, bann fam, ek bann zanfan ki ti mor!—Mat. 11:5.
11. Kifer bann dimounn ki ti ena enn move lavi ti santi zot alez ar Zezi?
11 Zezi ti konpran santiman bann dimounn ek li ti zanti avek zot. Alor, nou konpran kifer bann dimounn ki ti ena enn move lavi ti santi zot alez ar li. Zot pa ti per pou koz ar li. (Lik 15:1, 2) Anplis, Zezi ti felisit zot ek li ti rekonpans zot parski zot ti ena lafwa dan li. (Lik 19:1-10) Zezi ena mizerikord parey kouma so Papa. (Zan 14:9) Par fason ki li ti koz ar bann dimounn ek ti tret zot, nou konpran ki Zeova ena boukou mizerikord, Li kontan bann dimounn, ek Li anvi ed zot. Kan enn kikenn ti anvi sanz so lavi, Zezi ti ed li pou ki li kapav vinn so disip.—Lik 5:27, 28.
12. Ki Zezi ti dir konsernan so lamor?
12 Zezi ti kone ki li ti bizin donn so lavi an sakrifis. Plizir fwa, li ti dir so bann disip ki enn kikenn ti pou trayir li ek ki bann dimounn ti pou koulout li lor enn poto. (Mat. 17:22; 20:18, 19) Selman, li ti kone ki so sakrifis ti pou liber bann dimounn ar pese, parey kouma Zan Batis ek bann profet ti anonse. Zezi ti dir osi ki apre so lamor, li ti pou “atir tou sort kalite dimounn” ver li. (Zan 12:32) Bann dimounn ki inparfe kapav fer Zeova plezir kan zot aksepte Zezi kouma zot Segner ek kan zot swiv so lexanp. Si zot fer sa, avek letan zot pou ‘libere ar pese’. (Rom. 6:14, 18, 22; Zan 8:32) Alor, pou ki bann dimounn kapav gagn lavi sov, avek kouraz Zezi ti aksepte soufer ek gagn enn vilin lamor.—Zan 10:17, 18.
13. Kouma Zezi inn mor, ek ki kitsoz so lamor aprann nou lor Zeova? (Get zimaz osi.)
13 Enn parmi bann bon kamarad Zezi ti trayir li. Lerla, bann dimounn ti aret Zezi, ti maltret li, ek ti met bann fos sarz lor li. Zot ti kondann li amor, ek zot ti tortir li. Alafin, bann solda ti koulout Zezi lor enn poto pou ki li mor. Selman, Zezi ti res fidel ar Zeova ek li ti andir tou sa soufrans-la. Me dan sa ler-la, ti ena enn kikenn ki ti pe plis soufer ki Zezi! Se nou Bondie Zeova. Mem si Li ti ena pouvwar pou sov so Garson ki Li bien kontan, Li pa’nn fer li. Kifer? Parski Li kontan nou. Zezi ti dir: “Bondie inn telman kontan lemond ki li’nn donn so sel Garson, pou ki tou dimounn ki ena lafwa dan li pa detrir me gagn lavi pou touletan.”—Zan 3:16.
Kan Li ti les bann dimounn touy so Garson pou ki nou kapav libere ar pese ek lamor, Zeova ti bien soufer (Get paragraf 13)
14. Ki kitsoz sakrifis Zezi montre twa?
14 Sakrifis Zezi se pli gran prev ki Zeova kontan bann desandan Adan ek Ev. Sa montre ki kantite Zeova kontan twa. Li’nn aksepte soufer ek Li’nn donn seki ti ena plis valer pou Li, pou ki to kapav libere ar pese ek lamor. (1 Zan 4:9, 10) Sa montre osi ki Zeova anvi ed sakenn parmi nou pou nou servi Li ek nou vinn pros avek Li, mem si nou inparfe. Li pou fer sa ziska ki dan lavenir Li liber nou net ar pese ek lamor.
15. Ki nou bizin fer pou ki nou kapav gagn bann bienfe gras-a sakrifis Zezi?
15 Gras-a kado ki Zeova inn donn nou, setadir sakrifis so sel Garson, nou kapav gagn pardon nou bann pese. Me ki nou bizin fer pou ki Zeova pardonn nou bann pese? Zan Batis ek Zezi ti reponn sa kestion-la. Zot ti dir: “Repanti, parski Rwayom ki dan lesiel inn koste.” (Mat. 3:1, 2; 4:17) Alor, si nou anvi vinn pros ar Zeova ek gagn pardon nou bann pese, li bien inportan ki nou repanti. Me ki savedir repanti? Ek kouma nou fer Zeova plezir kan nou repanti? Dan prosin lartik, nou pou reponn sa bann kestion-la.
KANTIK 18 Rekonesans pou Laranson
a EXPRESION KI’NN EXPLIKE: Dan Labib, mo “pese” vedir fer bann kitsoz ki Zeova deteste, ouswa pa fer bann kitsoz ki Zeova kontan. Labib servi osi mo “pese” pou koz lor nou natir inparfe, enn leritaz ki Adan inn donn so bann desandan parski li’nn fer pese. Se akoz pese ki Adan inn fer ki nou tou nou mor.
