1. Ki savedir repanti?

 KAN nou fer enn move kitsoz, li bien inportan ki nou repanti. Dapre Labib, kan enn kikenn repanti savedir ki li regrete parski li’nn fer enn move kitsoz, li aret fer sa move kitsoz-la, ek li bien deside pou pa refer sa ankor.—Get “Repanti” dan Lexplikasion Bann Mo.

2. Kifer nou bizin konpran ki savedir repanti? (Neemi 8:9-11)

² Nou tou nou bizin konpran ki savedir repanti. Kifer? Parski toulezour nou fer pese. Nou bann desandan Adan ek Ev, ek leritaz ki nou’nn gagne avek zot se pese ek lamor. (Rom. 3:23; 5:12) Akoz sa, nou tou nou fer pese ek nou bizin repanti. Mem bann dimounn ki ti ena enn gran lafwa, kouma lapot Pol, ti bizin fer zefor pou lit kont zot bann move dezir. (Rom. 7:21-24) Me parski nou fer pese, eski savedir ki nou bizin touletan tris ek dekouraze? Non. Kifer? Parski Zeova nou Bondie, Li ena mizerikord ek Li anvi ki nou ere. Anou get lexanp bann Zwif dan lepok Neemi. (Lir Neemi 8:9-11.) Zeova pa ti anvi ki zot tris ek dekouraze akoz bann pese ki zot ti fer dan lepase. Li ti anvi ki zot zwaye kan zot ador Li. Zeova kone ki kan nou repanti, sa rann nou ere. Akoz sa, Li anvi ki nou konpran bien ki savedir repanti. Ek si nou repanti, nou kapav sir ki nou Papa ki ena boukou mizerikord pou pardonn nou.

3. Ki nou pou examine dan sa lartik-la?

³ Dan sa lartik-la, nou pou trouve ki savedir repanti. Nou pou examinn trwa kitsoz: (1) Nou pou aprann seki Zeova ti ansegn bann Izraelit lor repantans, (2) nou pou  trouve kouma Zeova ti ed bann dimounn pou repanti, ek (3) nou pou gete seki Zezi ti ansegn so bann disip lor repantans.

SEKI ZEOVA TI ANSEGN BANN IZRAELIT LOR REPANTANS

4. Ki kitsoz Zeova ti ansegn bann Izraelit lor repantans?

⁴ Kan Zeova ti donn bann Izraelit so bann lalwa, zot ti promet ki zot ti pou obeir sa bann lalwa-la. Lerla, Zeova ti dir zot ki si zot obeir so bann lalwa, Li ti pou protez zot ek beni zot. Li ti dir zot: “Sa komannman ki mo pe donn twa zordi la, li pa tro difisil pou to konpran, ek li pa tro difisil pou to obeir.” (Det. 30:11, 16) Parkont, si zot ti dezobeir so lalwa, ouswa si zot ti ador bann lezot bondie, Li ti pou nepli protez zot, ek sa ti pou fer zot soufer. Selman, sa pa vedir ki Zeova ti pou abandonn zot net. Zot ti pou ankor kapav “retourn ar Zeova [zot] Bondie ek ekout li.” (Det. 30:1-3, 17-20) Savedir ki zot ti pou ankor kapav repanti. Ek si zot ti fer sa, Zeova ti pou revinn pros ar zot ek Li ti pou rekoumans beni zot.

5. Kouma Zeova inn montre ki Li pa ti abandonn bann Izraelit? (2 Lerwa 17:13, 14)

⁵ Malerezman, bann Izraelit plizir fwa ti rebel kont Zeova. Zot ti ador bann lezot bondie ek zot ti osi fer bann lezot kitsoz bien degoutan. Akoz sa, zot ti bien soufer. Kanmem sa, Zeova pa ti abandonn so pep. Plizir fwa, Li ti avoy bann profet pou ankouraz zot pou repanti ek pou rekoumans servi Li avek tou zot leker.—Lir 2 Lerwa 17:13, 14.

6. Kouma Zeova ti servi so bann profet pou fer bann Izraelit konpran ki zot ti bizin repanti? (Get zimaz osi.)

⁶ Zeova souvan ti servi so bann profet pou averti ek pou koriz so pep. Par exanp, Li ti servi Zeremi pou dir zot: “A Izrael, twa ki’nn vir to ledo ar mwa, retourne. . . . Mo pa pou ankoler ar twa, parski mo fidel. . . . Mo pa pou gard twa dan leker touletan. Zis aksepte ki to  koupab, parski to’nn rebel kont Zeova.” (Zer. 3:12, 13) Li ti servi profet Zoel pou dir zot: “Retourn ar mwa ar tou zot leker.” (Zoel 2:12, 13) Li ti fer profet Izai dir: “Pirifie zot; tir devan mo lizie zot move fason azir; aret fer seki pa bon.” (Iza. 1:16-19) Ek Li ti servi profet Ezekiel pou demann zot: “Eski mo kontan kan enn move dimounn mor? . . . Eski mo pa prefere ki li sanz so kondwit ek ki li kontign viv? Mo pa anvi ki personn mor. . . . Alor, retourne ek zot pou viv.” (Eze. 18:23, 32) Zeova bien kontan kan bann dimounn repanti parski Li anvi ki zot viv pou touletan. Anplis, Li pa atann ki zot sanze pou ki Li ed zot. Anou get bann lezot lexanp ki montre sa.

7. Ki kitsoz Zeova ti ansegn bann Izraelit gras-a lexanp profet Oze ek so madam, Gomer?

⁷ Anou gete seki Zeova ti ansegn bann Izraelit gras-a lexanp profet Oze ek so madam, Gomer. Apre ki Gomer ti tronp Oze, li ti kit Oze ek li ti al ar plizir zom. Me eski savedir ki Gomer pa ti kapav sanze? Zeova kapav lir dan leker bann dimounn, ek Li ti dir Oze: “Ankor enn fwa, kontan sa fam ki enn lot zom kontan la ek ki pe viv dan ladilter, parey kouma lamour ki Zeova ena pou pep Izrael, alor ki zot pe tourn zot ver lezot bondie.” (Oze 3:1; Prov. 16:2) Sa lepok-la, Gomer ti ankor pe viv dan ladilter, ki enn pese bien grav. Kanmem sa, Zeova ti dir Oze al koz ar li, pardonn li, ek rekonsilie avek li. a Par sa lexanp-la, Zeova ti anvi ansegn bann Izraelit seki Li ti resanti pou zot. Mem si zot ti ankor pe fer bann pese bien grav, Li ti ankor kontan zot. Li ti kontign avoy so bann profet pou ed zot pou repanti ek pou sanz zot lavi. Sa lexanp-la montre nou ki Zeova konn leker enn kikenn, ek mem si sa dimounn-la ankor pe fer enn pese grav, Li pou esey ed li pou repanti. (Prov. 17:3) Anou gete kouma Zeova fer sa.

KOUMA ZEOVA ED BANN DIMOUNN POU REPANTI?

8. Kouma Zeova ti esey ed Kain pou repanti? (Zenez 4:3-7) (Get zimaz osi.)

⁸ Kain ti premie garson Adan ek Ev, ek parey kouma tou zot bann lezot zanfan li ti gagn mem leritaz, setadir pese. Anplis, kan Labib koz lor Kain, li dir: “So bann prop aksion ti move.” (1 Zan 3:12) Kitfwa se akoz sa ki “Kain ek so lofrand pa ti fer [Zeova] plezir.” Me olie ki li sanze, “Kain ti bwi ar koler ek so figir ti vinn long.” Ki Zeova ti fer? Li ti koz ar Kain. (Lir Zenez 4:3-7.) Avek boukou zantiyes, Li ti dir Kain ki Li ti pou beni li si li ti fer seki bon. Li ti osi dir Kain ki, si li pa sanze, li riske fer enn kitsoz bien grav. Malerezman, Kain pa ti ekout Zeova. Li pa ti les Zeova ed li pou repanti. Me mem si Kain pa ti ekout Zeova, eski Li ti aret ed bann lezot dimounn pou repanti? Non!

9. Kouma Zeova ti ed David pou repanti?

⁹ Zeova ti bien kontan Lerwa David. Li ti mem dir ki David ti “enn zom ki fer [so] leker plezir.” (Zist. 13:22) Selman, David ti fer bann pese bien grav, par exanp li ti komet ladilter ek li ti fer touy enn dimounn. Dapre Lalwa Moiz, David ti bizin mor. (Lev. 20:10; Nonb 35:31)  Me Zeova ti anvi ed David pou repanti. b Alor, Li ti avoy profet Natan pou al get David, mem si David pa ti ankor montre okenn sign repantans. Natan ti servi enn lexanp pou tous leker David. Ek kan David ti konpran ki li ti kas leker Zeova, li ti repanti. (2 Sam. 12:1-14) Apre sa, li ti ekrir enn psom pou explike kouma li ti bien sagrin akoz bann pese ki li ti fer. (Ps. 51, not ki ena lao) Sa psom-la inn ed boukou dimounn ki’nn fer pese pou repanti. Eski sa pa tous nou kan nou trouve kouma avek boukou lamour Zeova inn ed bann dimounn pou repanti?

10. Ki to resanti kan to reflesi lor Zeova so pasians ek so pardon?

¹⁰ Zeova deteste tou sort kalite pese. (Ps. 5:4, 5) Selman, Li kone ki nou inparfe, ek kan nou fer pese, Li anvi ed nou. Li fer sa parski Li kontan nou. Mem kan enn kikenn fer enn pese bien-bien grav, Zeova ed li pou repanti pou ki li kapav revinn pros avek Li. Kan nou kone ki Zeova vremem anvi pardonn nou, sa bien rekonfort nou, pa vre! Alor, kan nou reflesi lor Zeova so pasians ek so pardon, sa bizin motiv nou pou res fidel anver Li ek pou pa tarde pou repanti kan nou fer enn pese. Aster-la, anou gete seki Zezi ti ansegn so bann disip lor repantans.

SEKI ZEZI TI ANSEGN SO BANN DISIP LOR REPANTANS

11-12. Ki lexanp Zezi inn servi pou montre ki Zeova ena enn gran dezir pou pardonn bann dimounn? (Get lor kouvertir.)

¹¹ Lemesi ti vini dan premie siek nou lepok, ek kouma nou ti trouve dan lartik avan, Zeova ti servi Zan Batis ek Zezi toule-de pou ansegn bann dimounn kifer zot ti bizin repanti.—Mat. 3:1, 2; 4:17.

¹² Kan Zezi ti lor later, li ti ansegn bann dimounn ki so Papa ena enn gran dezir pou pardonn bann dimounn. Enn fason ki li ti fer sa se kan li ti servi lexanp “Garson Ki Ti Perdi.” Sa garson-la ti kit so  lakaz ek li ti al fer bann move kitsoz. Me apre inpe letan, li “ti regagn so lespri” ek li ti retourn kot li. Kouma so papa ti reazir? Zezi dir ki, alor ki garson-la “ti ankor bien lwin, so papa ti trouv li ek ti gagn enn gran pitie pou li. Lerla, papa-la ti galoupe, ti may li ek ti anbras li avek boukou lafeksion.” Garson-la ti panse ki so papa pa ti pou pardonn li. Akoz sa, li ti demann so papa si li kapav travay kouma serviter dan so lakaz. Me papa-la ti vremem anvi pardonn li. Papa-la ti dir: “Mo garson . . . ti perdi ek li’nn retourne,” ek li ti re-akeyir li kot li. (Lik 15:11-32) Avan ki li vinn lor later, sirman plizir fwa Zezi inn trouve kouma so Papa ena konpasion ek kouma Li ti pre pou pardonn bann dimounn ki repanti. Zistwar “Garson Ki Ti Perdi,” li vremem rekonfort nou, ek li montre nou ki kantite mizerikord nou Papa Zeova ena!

13-14. Ki kitsoz lapot Pier ti aprann lor repantans, ek ki li ti ansegn lezot lor repantans ek pardon? (Get zimaz osi.)

¹³ Lapot Pier ti aprann boukou kitsoz ar Zezi lor repantans ek pardon. Pier ti fer boukou erer, me sak fwa Zezi ti pardonn li. Par exanp, apre ki Pier trwa fwa ti dir ki li pa ti konn Zezi, li ti bien dekouraze. (Mat. 26:34, 35, 69-75) Me kan Zezi ti resisite, li ti aparet ar Pier, ek kitfwa zot ti zis zot de tousel. (Lik 24:33, 34; 1 Kor. 15:3-5) Zezi ti kone ki Pier ti repanti, alor nou kapav sir ki Zezi avek boukou lamour ti rasir li ek ti fer li konpran ki li ti vremem pardonn li.—Get Mark 16:7.

¹⁴ Avredir, Pier ti kapav ansegn lezot seki vedir repantans ek pardon parski limem li ti viv sa. Inpe apre Lapantkot lane 33, Pier ti fer enn diskour devan enn lafoul Zwif ek li ti explik zot ki zot ti touy  Lemesi. Selman, avek boukou lamour li ti dir zot: “Alor repanti, ek retourn ar Bondie pou ki li efas zot bann pese ek ki Zeova limem donn zot bann lepok soulazman.” (Zist. 3:14, 15, 17, 19) Pier ti explik zot ki, kan enn kikenn repanti, li bizin retourn ar Bondie, setadir li sanz so fason panse, li aret fer bann move kitsoz ki li ti pe fer, ek li koumans fer bann kitsoz ki fer Bondie plezir. Pier ti fer zot konpran osi ki Zeova ti pou pardonn zot net. Li ti pou efas zot bann pese; se koumadir zot pa ti fer okenn pese. Plizir lane apre, Pier ti rasir bann Kretien kan li ti dir: “Zeova . . . ena pasians avek zot parski li pa anvi ki personn detrir, me li anvi ki tou dimounn repanti.” (2 Pier 3:9) Si nou repanti, mem si nou’nn fer bann pese bien grav, nou kapav sir ki Zeova pou pardonn nou net. Sa vremem rekonfort nou, pa vre!

15-16. (a) Kouma Pol ti aprann seki savedir pardon? (1 Timote 1:12-15) (b) Ki nou pou examine dan prosin lartik?

¹⁵ Enn parmi bann dimounn ki ti bien bizin repanti ek gagn pardon Zeova se Sol ki ti sorti Tars. Kifer? Parski li ti bien persekit bann disip Zezi. Laplipar bann Kretien kitfwa ti panse ki zame li ti pou sanze. Me Zezi ti kone ki Sol ti kapav sanze ek repanti. So Papa ek li ti trouv bann zoli kalite ki Sol ti ena. Zezi ti dir: “Sa zom-la limem linstriman ki mo’nn swazir.” (Zist. 9:15) Zezi ti mem fer enn mirak ki ti ed Sol pou repanti. (Zist. 7:58–8:3; 9:1-9, 17-20) Apre ki li ti vinn Kretien, Sol, ki plitar ti vinn lapot Pol, souvan ti explike ki kantite li ti rekonesan pou bonte ek mizerikord ki Zeova ek Zezi ti montre anver li. (Lir 1 Timote 1:12-15.) Akoz sa, li ti dir so bann frer ek ser: “Bondie, dan so zantiyes, pe esey ed [zot] pou repanti.”—Rom. 2:4.

¹⁶ Enn fwa, Pol ti tann dir ki enn zom dan lasanble Korint ti pe viv enn lavi imoral. Ki kitsoz Pol ti dir zot fer? Seki li ti dir zot ansegn nou boukou kitsoz lor lamour, disiplinn, ek mizerikord Zeova. Nou pou koz plis lor la dan prosin lartik.