“Pa Les To Lame Tonbe”
“Pa les to lame tonbe.”—SEFANIA 3:16.
KANTIK: 81, 32
1, 2. (a) Ki bann problem boukou dimounn pe gagne azordi, ek ki lefe sa ena lor zot? (b) Ki lasirans Izai 41:10, 13 donn nou?
ENN ser ki pionie ek ki marye avek enn ansien, rakonte: “Mem si mo ti ena bann bon labitid spiritiel, mo finn bizin lite pou fer fas ar bann traka pandan boukou lane. Akoz sa, mo pa ti pe kapav dormi, sa ti afekte mo lasante ek fason ki mo ti tret lezot. Parfwa mo ti anvi les tou tonbe.”
2 Eski to konpran seki sa ser-la ti resanti? Malerezman, nou pe viv dan move lemond Satan, ek akoz sa, nou gagn boukou presion. Parey kouma lank enn bato anpes bato-la avanse, bann traka osi kapav paraliz nou ek fer nou dekouraze. (Proverb 12:25) Ki kitsoz kapav fer twa trakase? Kitfwa to sagrin akoz lamor enn kikenn ki to ti kontan ouswa to pe andir enn maladi grav, ouswa persekision. Avek kriz ekonomik, kitfwa to pe bizin lite pou zwenn le-de-bout pou to kapav pran swin to fami. Amezir ki letan pase, bann traka kapav fer twa nepli ena lafors ek mem fer twa perdi to lazwa. Selman, to kapav sir ki Bondie la pou ed twa.—Lir Izai 41:10, 13. *
3, 4. (a) Kouma Labib servi mo “lame”? (b) Ki kitsoz kapav fer nou anvi bes lebra?
3 Labib souvan konpar bann manb enn lekor ar bann kalite ouswa bann aksion enn dimounn. Par exanp, bien souvan Labib koz lor lame. Kan li dir ki enn dimounn so lame inn vinn for, savedir ki dimounn-la inn gagn lankourazman, inn vinn pli for, ek ki li’nn pare pou azir. (1 Samiel 23:16; Ezra 1:6) Kitfwa sa vedir osi ki dimounn-la pozitif ek ki li ena enn lespwar pou lavenir.
4 Dan lezot sitiasion, Labib koz osi lor enn dimounn ki bes lebra, setadir ki les so lame tonbe. Savedir ki dimounn-la dekouraze ek ki li nepli ena lespwar. (2 Kronik 15:7; Ebre 12:12) Kan to strese ouswa to extra fatige, ouswa to santi ki to relasion avek Zeova pe vinn deplizanpli feb, kitfwa to pou anvi bes lebra. Kotsa to kapav gagn lankourazman? Kouma to kapav gagn motivasion ek lafors pou andire ek regagn lazwa?
“LAME ZEOVA ZAME TRO KOURT POU DELIVRE”
5. (a) Ki nou resanti kan nou gagn bann problem, me ki nou bizin rapel? (b) Ki nou pou examine dan sa lartik-la?
5 Lir Sefania 3:16, 17. * Fode pa nou les nou lame tonbe, setadir fode pa nou gagn per ouswa nou dekouraze kan nou gagn bann problem. Zeova, nou Papa ki kontan nou, ankouraz nou pou zet tou nou traka lor Li. (1 Pier 5:7) Zeova gagn nou traka parey kouma Li ti trakase pou bann Izraelit. Li ti dir zot ki So lame “zame tro kourt pou delivre.” Li touletan pre pou delivre so bann serviter ki fidel. (Izai 59:1) Dan sa lartik-la, nou pou examinn trwa lexanp Biblik. Zot pou montre nou kouma Zeova ena dezir ek kapasite pou donn lafors so bann serviter pou fer so volonte malgre bann gran difikilte. Anou gete kouma sa trwa lexanp-la kapav donn twa lafors.
6, 7. Ki leson nou kapav aprann ar viktwar bann Izraelit lor bann Amalekit?
6 Pa tro lontan apre ki Zeova ti liber bann Izraelit depi Lezip, bann Amalekit ti atak zot. Moiz ti demann Zozie, enn zom ki ena kouraz, pou diriz bann Izraelit dan sa lager-la. Lerla Moiz, ansam avek Aaron ek Our, ti al lor enn kolinn pa tro lwin. Depi sa kolinn-la, zot ti pou kapav get sa lager-la. Eski sa trwa zom-la ti pe sove parski zot ti gagn per? Non, zame!
7 Moiz ti swiv enn plan ki ti permet bann Izraelit gagn viktwar kont bann Amalekit. Li ti pran baton vre Bondie ek li ti lev sa ar so de lame ver lesiel. Kan so lame ti leve, Zeova ti donn bann Izraelit lafors pou lager kont bann Amalekit. Me kan lame Moiz ti pe vinn lour ek kan li ti koumans bes so lame, bann Amalekit ti pe koumans dominn zot. Deswit Aaron ek Our ti ed Moiz. “Zot ti pran enn ros, zot ti met sa anba Moiz ek zot ti fer li asiz lor la. Lerla Aaron ek Our, sakenn enn kote, ti tini so lame, pou ki so lame res lao ziska ki soley kouse.” Wi, gras-a Bondie so lame bien for, bann Izraelit ti gagn laviktwar.—Exod 17:8-13.
8. (a) Ki Aza ti fer kan bann Etiopien ti menas Zida? (b) Kouma nou kapav imit Aza?
8 Dan lepok Lerwa Aza osi, Zeova ti servi So lame bien pwisan pou ed So pep. Ena boukou larme ki mansione dan Labib, me pli gran larme ti dirize par Zera, enn Etiopien. Dan so larme ti ena enn milyon solda bien antrene. Sa larme-la ti preske de fwa pli gran ki larme Aza. Eski Aza ti trakase, ti per ouswa ti dekouraze? Eski li ti bes lebra? Non! Aza deswit ti demann Zeova so led. Lor plan militer, li ti kapav paret inposib pou gagn viktwar lor bann Etiopien. “Me pou Bondie, tou kiksoz posib.” (Matie 19:26) Bondie ti servi so gran pwisans pou “gagn viktwar lor bann Etiopien devan Aza, ” parski Aza so “leker ti konple anver Zeova pandan toutlong so lavi.”—2 Kronik 14:8-13; 1 Lerwa 15:14.
9. (a) Ki kitsoz pa ti anpes Neemia rekonstrir bann miray Zerizalem? (b) Kouma Bondie ti reponn lapriyer Neemia?
9 Kan Neemia ti al Zerizalem, ki li ti trouve? Li ti trouv bann lennmi ki ti sorti dan lezot pei pe menas bann Zwif. Se akoz sa ki bann Zwif ti aret konstrir bann miray Zerizalem. Lavil pa ti ena okenn proteksion, ek bann Zwif ti dekouraze. Ki Neemia ti resanti? Eski li ti dekouraze ek ti bes lebra? Non! Parey kouma Moiz, Aza ek lezot serviter fidel Bondie, Neemia touletan ti kont lor Zeova. Dan sa sitiasion-la osi, Neemia ti priye Zeova pou gagn so led, ek Zeova ti reponn li. Bondie ti servi so “gran pwisans” ek so “lame for” pou donn lafors bann Zwif. (Lir Neemia 1:10 *; 2:17-20 *; 6:9. *) Eski to krwar ki Zeova servi so “gran pwisans” ek so “lame for” pou donn lafors so bann serviter azordi?
ZEOVA POU FORTIFIE TO LAME
10, 11. (a) Kouma eski Satan esey fer nou lame tonbe? (b) Ki Zeova servi pou donn nou lafors? (c) Kouma to finn profit lansegnman ki Zeova done?
10 Ena enn kitsoz ki nou kapav sir: Satan zame pa pou bes lebra. Li pou kontign atak nou pou esey aret bann aktivite ki nou fer antan ki Kretien. Li servi bann gouvernman, bann sef relizie ek bann aposta pou fann bann foste ek pou menas nou. Ki so lobzektif? Li anvi ki nou aret pres bon nouvel lor Rwayom Bondie. Me Zeova ena dezir ek kapasite pou ed nou, ek Li pou donn nou so lespri sin pou ki nou gagn lafors. (1 Kronik 29:12) Li bien inportan ki nou demann Bondie so lespri pou ki nou kapav lit kont Satan ek so move lemond. (Psom 18:39; 1 Korintien 10:13) Nou bien rekonesan osi pou led ki nou gagne gras-a Parol Bondie. Reflesi osi lor ki kantite kitsoz nou aprann dan nou bann piblikasion sak mwa. Bann parol ki trouv dan Zekaria 8:9, 13 * (lir) ti prononse dan lepok ki ti pe rekonstrir tanp Zerizalem. Me sa bann parol-la ankor touzour kapav ed nou azordi.
Li bien inportan ki nou demann Bondie so lespri pou ki nou kapav lit kont Satan ek so move lemond
11 Zeova donn nou lafors osi par lansegnman ki nou gagne dan bann renion, bann lasanble ek bann lekol Biblik. Sa lansegnman-la kapav ed nou pou servi Bondie avek bann bon mobil, pou fixe bann lobzektif, ek pou asim tou bann responsabilite ki nou ena antan ki Kretien. (Psom 119:32) Eski to anvi gagn lafors gras-a lansegnman ki Zeova done?
12. Ki nou bizin fer pou res for?
12 Zeova ti ed so pep pou gagn viktwar lor bann Amalekit ek bann Etiopien, ek Li ti donn Neemia ek bann Zwif lafors pou terminn konstriksion bann miray Zerizalem. Dan mem fason, Bondie pou donn nou lafors pou kontign prese malgre nou bann traka, bann lopozision, ek mem si lezot pa interese ar nou mesaz. (1 Pier 5:10) Zeova pa pou fer nou bann problem disparet par mirak. Okontrer, nou bizin fer nou par. Kouma? Nou bizin lir Parol Bondie toulezour, prepar ek asiste nou bann renion sak semenn, kontign fer nou letid personel ek nou ladorasion an fami, ek kont lor Zeova dan lapriyer. Fode zame nou les nanye distrer nou ek anpes nou profit bann kitsoz ki Zeova servi pou donn nou lafors ek pou ankouraz nou. Si to ena linpresion ki to lame pe tonbe dan enn sa bann domenn-la, demann Bondie so led. Lerla to pou trouve kouma lespri Bondie ‘pou donn twa lafors, pou ki to ena dezir ek kapasite pou azir.’ (Filipien 2:13, NW.) Asterla twa, eski to kapav fortifie lame lezot Kretien?
FORTIFIE BANN LAME KI PE TONBE
13, 14. (a) Kouma enn frer ti regagn lafors apre lamor so madam? (b) Kouma nou kapav ed lezot pou vinn pli for?
13 Zeova donn nou enn fami internasional bann frer ek ser ki kontan nou ek ki ankouraz nou. Lapot Pol ti dir: “Fortifie bann lame ki pe tonbe ek bann zenou ki fatige, ek kontign fer bann semin drwat pou zot lipie.” (Ebre 12:12, 13) Boukou parmi bann premie Kretien ti gagn sa kalite led-la ar zot bann frer ek ser. Azordi osi li parey. Anou get enn lexanp. Enn frer ti bien soufer kan so madam ti mor, ek li ti andir lezot sitiasion bien difisil. Li dir: “Mo’nn aprann ki nou pa kapav swazir nou bann leprev, ni kan ek komie fwa nou pou pas ladan. Lapriyer ek letid personel ti kouma enn zile sovtaz ki finn ed mwa pou gard mo latet andeor delo. Ek mo ti gagn soutien mo bann frer ek ser ki’nn bien rekonfort mwa. Mo’nn konpran linportans pou devlop enn bon relasion avek Zeova avan mem ki bann sitiasion difisil arive.”
Sak dimounn dan kongregasion kapav ankouraz lezot (Get paragraf 14)
14 Aaron ek Our ti fortifie lame Moiz kan zot ti tini so lame pandan lager kont bann Amalekit. Zordi, nou osi nou kapav rod bann mwayin pou soutenir ek ed lezot. Sertin parmi nou bann frer pe soufer akoz vieyes, problem lasante, persekision dan zot fami, zot santi zot tousel, ouswa akoz lamor enn kikenn ki zot ti bien kontan. Nou kapav osi fortifie bann zenn, ki souvan gagn presion pou fer seki move ouswa pou vinn enn gran dimounn dan sa lemond-la. (1 Tesalonisien 3:1-3; 5:11, 14) Rod bann fason pou manifeste enn lintere sinser pou lezot kan to dan Lasal, dan predikasion, pandan enn repa, ouswa kan to koz ar zot lor telefonn.
15. Ki lefe bann parol pozitif kapav ena lor nou bann frer ek ser?
15 Apre ki Aza ti gagn enn gran viktwar kont larme bann Etiopien, profet Azaria ti ankouraz li ek so pep. Li ti dir: “Me twa, vinn for ek pa les to lame tonbe, parski to pou gagn rekonpans pou seki to fer.” (2 Kronik 15:7) Sa ti motiv Aza pou fer bann sanzman pou retabli vre ladorasion. Dan mem fason, to bann parol pozitif kapav ankouraz lezot ek ed zot pou kontign servi Zeova. (Proverb 15:23) Ek fode zame to bliye ki kantite sa donn to bann frer ek ser lafors kan to fer bann komanter bien ankourazan dan renion.
Neemia pa ti zis get lezot travay. Li osi li ti donn koudme pou rekonstrir miray Zerizalem
16. Kouma eski bann ansien kapav imit Neemia? Donn bann lexanp kouma bann frer ek ser finn ed twa personelman.
16 Gras-a led Zeova, Neemia ek bann Zwif finn fer zot lame vinn pli for. Zot ti terminn konstriksion miray Zerizalem dan zis 52 zour! (Neemia 2:18; 6:15, 16) Neemia pa ti zis get lezot travay. Li osi li ti donn koudme pou rekonstrir miray Zerizalem. (Neemia 5:16) Dan mem fason azordi, boukou ansien imit Neemia kan zot partisip dan bann konstriksion, ouswa dan netwayaz ek lantretien zot Lasal. Sa bann frer ki ena lamour la rann vizit ek pres avek bann frer ek ser ki ena boukou “traka dan zot leker” pou redonn zot lafors.—Lir Izai 35:3, 4. *
“PA LES TO LAME TONBE”
17, 18. Kan nou gagn bann problem ouswa kan nou trakase, ki kitsoz nou kapav sir?
17 Kan nou travay ansam avek nou bann frer ek ser, sa fer nou linite vinn pli for. Sa ed nou pou kree bann lamitie bien solid ek sa fer nou ena plis konfians dan bann benediksion ki nou pou gagne biento gras-a Rwayom Bondie. Kan nou fortifie lame lezot, nou ed zot pou andir bann sitiasion difisil ek pou kontign gard lespwar ki pou ena enn pli bon lavenir. Anplis, kan nou ed lezot, sa fer nou lame vinn pli for ek sa ed nou pou res konsantre lor lavenir.
18 Kan nou reflesi kouma Zeova ti ed ek protez so bann serviter fidel dan lepase, nou lafwa ek nou konfians an Li vinn pli for. Alor, kan to gagn bann problem ek kan to trakase, “pa les to lame tonbe”! To kapav sir ki si to priye Zeova pou gagn so led, Li pou fortifie twa ar so lame pwisan ek Li pou gid twa ver bann benediksion ki to pou gagne biento anba direksion Rwayom Bondie.—Psom 73:23, 24.
^ par. 2 Izai 41:10, 13: “10 Pa per, parski mo avek twa. Pa trakase, parski mo to Bondie. Mo pou fortifie twa, wi, mo pou ed twa, mo pou vremem trap twa for avek mo lame drwat lazistis.” “13 Parski mwa, Zeova to Bondie, mo pe trap to lame drwat bien for, mo dir twa: ‘Pa per. Mo pou ed twa.’”
^ par. 5 Sefania 3:16, 17: “16 Sa zour-la kikenn pou dir Zerizalem: ‘Pa per, O Sion! Pa les to lame tonbe. 17 Zeova to Bondie ar twa. Antan ki enn Bondie ki for, Li pou sov twa. Li pou ena lazwa pou twa. Li pou res trankil dan so lamour. Li pou kriye dan lazwa parski Li kontan pou twa.’”
^ par. 9 Neemia 1:10: “Zot to bann serviter ek to pep ki to finn re-aste par to gran pwisans ek par to lame for.”
^ par. 9 Neemia 2:17-20: “17 Finalman mo’nn dir zot: ‘Zot trouve dan ki move sitiasion nou ete, kouma Zerizalem inn vinn enn rwinn ek so laport inn brile ar dife. Vini, anou rekonstrir miray Zerizalem, pou ki sa laont-la disparet.’ 18 Lerla mo’nn dir zot kouma bon lame mo Bondie ti lor mwa ek osi bann parol ki lerwa finn dir mwa. Lerla zot ti dir: ‘Anou leve, ek anou konstrir.’ Alor, zot ti pran lafors pou sa bon travay-la. 19 Me kan Sannbalat, enn Oronit, Tobia, enn Amonit ki osi enn serviter, ek Geshem, enn Arab, ti tann sa, zot ti koumans boufonn nou ek get nou traver, ek zot ti dir: ‘Ki zot pe fer la? Eski zot pe rebel kont lerwa?’ 20 Selman, mo’nn reponn: ‘Bondie ki’nn fer lesiel, Limem ki pou fer nou reisi, ek nou, so bann serviter, nou pou leve, ek nou pou konstrir; me zot, zot pena ni par, ni drwa, ni okenn tit dan Zerizalem.’”
^ par. 9 Neemia 6:9: “Parski zot tou ti pe rod fer nou gagn per, zot ti dir: ‘Zot lame pou fatige ar sa travay-la, ek travay-la pa pou fini.’ Asterla, mo demann twa, fortifie mo lame.”
^ par. 10 Zekaria 8:9, 13: “9 Ala seki Zeova sef bann larme dir: ‘Ki zot lame vinn for, zot ki azordi pe tann sa bann parol ki sorti dan labous bann profet la, bann mem parol ki ti prononse zour ki ti poz fondasion pou lakaz Zeova, sef bann larme, kan ti konstrir tanp.’” “13 Ek parey kouma zot ti vinn enn malediksion parmi bann nasion, A lakaz Zida ek lakaz Izrael, parey, mo pou sap zot ek zot pou vinn enn benediksion. Pa per! Ki zot lame vinn for.”
^ par. 16 Izai 35:3, 4: “3 Fortifie bann lame ki feb, ek fer bann zenou ki pe tranble tini ferm. 4 Dir bann ki ena traka dan zot leker: ‘Vinn for. Pa per. Gete! To Bondie mem ki pou tir vanzans, se Bondie ki pou donn pinision. Li pou vini ek Li pou sov twa.’”
