1. Kifer to pena okenn dout ki Parol Bondie li pwisan? (Get zimaz dan koumansman lartik.)

PEP Zeova pena okenn dout ki parol Zeova, setadir so mesaz pou bann dimounn, “li vivan ek li pwisan.” (Ebre 4:12, NW.) Nou finn trouve ki Labib finn ena enn gran pouvwar dan nou lavi ek dan lavi lezot. Avan ki sertin vinn Temwin Zeova, zot ti voler, droge, ouswa zot ti imoral. Ena ki ti seleb ouswa ti ena enn ta kas, me kanmem sa zot ti santi ki mank enn kitsoz dan zot lavi. (Ekleziast 2:3-11) Me erezman, boukou ki pa ti ena okenn lespwar ek ki ti santi zot perdi, asterla ena enn direksion ek enn lespwar. Dan Latour Degard, nou finn kontan pou lir bann lexperyans koumsa dan seri lartik “Labib Sanz Bann Dimounn.” Mem apre ki enn dimounn inn vinn Kretien, li bizin kontign fer so relasion avek Bondie vinn pli for avek led Labib.

2. Kouma pwisans Parol Bondie ti ena lefe lor bann dimounn dan premie siek?

² Sa pa etonn nou ki boukou dimounn fer bann gran  sanzman kan zot konn laverite. Nou bann frer ek ser dan premie siek ki ti ena lesperans pou al viv dan lesiel ti fer sa bann sanzman-la. (Lir 1 Korintien 6:9-11.) Apre ki Pol ti explike ki kalite dimounn ki pa pou erit Rwayom Bondie, li ti dir: “Ala kouma sertin parmi zot ti ete.” Bondie so Parol ek so lespri sin ti ed sa bann dimounn-la pou sanze. Me mem apre ki zot ti vinn bann Kretien, sertin parmi zot ti fer bann erer bien grav ki ti afekte zot relasion avek Zeova. Par exanp, Labib koz lor enn frer ki ti ena lesperans pou al viv dan lesiel, ki ti exkli. Plitar, li ti fer bann sanzman pou ki li kapav re-form parti dan kongregasion. (1 Korintien 5:1-5; 2 Korintien 2:5-8) Li vremem ankourazan ki nou bann frer ek ser ti reisi fer sa kantite sanzman-la gras-a pwisans ki Parol Bondie ena.

3. Ki nou pou examine dan sa lartik-la?

³ Parol Bondie li bien pwisan ek se Bondie ki finn donn nou sa. Akoz sa, nou anvi servi li bien. (2 Timote 2:15) Dan sa lartik-la nou pou gete kouma pwisans ki Labib ena kapav azir (1) dan nou lavi, (2) dan nou minister, ek (3) kan nou ansegne lor lestrad. Seki nou aprann pou ed nou pou montre nou lamour ek nou rekonesans pou nou Papa ki dan lesiel, ki ansegn nou pou nou profi.​—Izai 48:17.

4. (a) Ki nou kapav fer pou ki Parol Bondie ena enn lefe lor nou? (b) Kouma to trouv letan pou fer to lektir Labib?

⁴ Pou ki Parol Bondie ena enn lefe lor nou, nou bizin lir li regilierman. Nou bizin esey lir li toulezour. (Zozwe 1:8) Laplipar parmi nou ena enn lavi bien ranpli, me fode pa nou les nanye, mem nou bann responsabilite, anpes nou lir Labib. (Lir Efezien 5:15, 16.) Nou kapav fer sa boner gramatin, dan lazourne, ouswa tar aswar. Nou ena mem santiman ki enn ekrivin psom ki ti dir: “O komie mo kontan to lalwa! Lanwit-lizour mo medit lor to lalwa.”​—Psom 119:97.

5, 6. (a) Kifer nou bizin medite? (b) Ki nou bizin fer pou ki nou meditasion vinn efikas? (c) Kan to’nn lir Labib ek to’nn medit lor la, kouma sa finn ed twa?

⁵ Selman, li pa ase ki nou zis lir Labib. Nou bizin medit lor seki nou’nn lir, setadir reflesi an profonder lor la. (Psom 1:1-3) Se zis lerla ki nou pou kapav aplik sazes ki ena dan Labib dan nou lavi. Alor, ki nou lir Labib lor papie ouswa lor enn laparey elektronik, nou anvi les Parol Bondie sanz nou ek motiv nou.

⁶ Ki nou bizin fer pou ki nou meditasion vinn efikas? Kan nou lir Labib, nou bizin fer enn poz ek demann noumem: ‘Ki sa aprann mwa  lor Zeova? Kouma mo pe deza aplik seki mo pe lir dan mo lavi? Ki bann sanzman mo ankor bizin fer?’ Kan nou medit lor Parol Bondie ek nou priye lor seki nou lir, nou pou anvi met sa an pratik. Lerla nou pou trouv Labib azir dan nou lavi.​—2 Korintien 10:4, 5.

7. Kouma nou kapav bien servi Labib dan nou minister?

⁷ Li inportan ki nou servi Parol Bondie regilierman kan nou prese ek ansegne. Enn frer ti dir: “Si to ti pe prese lakaz-lakaz avek Zeova, eski to ti pou koz tou tomem ouswa to ti pou les Li koze?” Kan nou lir Labib avek enn dimounn, nou pe les Zeova koz avek li. Enn verse ki’nn bien swazir, li pli pwisan ki ninport ki kitsoz nou kapav dir. (1 Tesalonisien 2:13) Kan to dan predikasion, eski to fer zefor pou lir Labib pli souvan ki to kapav?

8. Kifer li pa ase ki nou zis lir bann verse kan nou prese?

⁸ Selman, li pa ase ki nou zis lir enn verse Labib avek bann dimounn ki nou prese. Laplipar dimounn pa tro konpran Labib. Dan premie siek li ti koumsa ek azordi osi li parey. (Romin 10:2) Alor fode pa nou panse ki kan nou lir enn verse, dimounn-la inn fini konpran verse-la. Nou kapav repet bann lide ouswa bann mo prinsipal dan sa verse-la ek explik li seki sa vedir. Dan sa fason-la, Parol Bondie kapav tous leker ek lespri sa dimounn-la.​—Lir Lik 24:32.

9. Kouma seki nou dir avan nou lir enn verse kapav ed bann dimounn pou respekte Labib? Donn enn lexanp.

⁹ Seki nou dir avan ki nou lir enn verse, kapav osi ed dimounn-la pou respekte Labib. Par exanp, nou kapav dir: “Anou gete seki nou Kreater dir lor la.” Ouswa si nou pe koz avek enn dimounn ki pa Kretien, nou kapav dir: “Anou get seki Liv Sakre dir.” Si nou zwenn enn dimounn ki pa interese ar larelizion, nou kapav demann li: “Eski ou’nn deza tann sa vie proverb-la?” Si nou rapel ki sak dimounn ena so kiltir ek krwayans, nou pou fer tou seki nou kapav pou fer enn introdiksion ki kapte latansion bann dimounn.​—1 Korintien 9:22, 23, NW.

10. (a) Rakonte seki’nn ariv enn frer dan predikasion. (b) Kouma to finn trouv pwisans ki Parol Bondie ena dan to minister?

¹⁰ Boukou proklamater finn remarke ki kan zot servi Labib dan predikasion, sa ena enn gran lefe lor bann dimounn. Par exanp, enn frer ti vizit enn misie aze ki ti abitie lir nou bann magazinn depi plizir lane. Enn zour, olie ki li zis donn misie-la bann dernie Latour Degard, frer-la ti desid pou lir enn text avek misie-la. Li ti lir  2 Korintien 1:3, 4, ki dir: “Papa ki ena mizerikord ek toultan konsol nou . . . rekonfort nou dan nou detres.” Sa bann parol-la ti telman tous sa misie-la ki li ti demann frer-la pou re-lir sa bann verse-la. Apre sa, misie-la ti dir ki li ek so madam ti bien bizin rekonfor. Sa verse-la ti fer li anvi konn plis lor Labib. Kan nou servi Parol Bondie dan nou minister sa ena enn gran pwisans!​—Zistwar Bann Apot 19:20.

11. Ki responsabilite bann frer ki ansegne lor lestrad ena?

¹¹ Nou kontan asiste nou bann renion ek nou bann lasanble. Rezon prinsipal kifer nou fer sa, se pou ador Zeova. Nou osi tir profi ar seki nou aprann. Akoz sa, bann frer ki ansegne lor lestrad ena enn gran privilez ek enn gran responsabilite. (Zak 3:1, NW.) Zot bizin fer sir ki zot lansegnman baze lor Parol Bondie. Si to ena sa privilez-la, kouma to kapav servi pwisans ki Labib ena pou tous leker bann ki dan lasistans?

12. Kouma enn orater kapav fer sir ki so diskour baze lor Labib?

¹² Bann Lekritir bizin parti pli inportan ki ena dan ninport ki diskour. (Zan 7:16) Alor, fer atansion ar fason ki to fer to diskour. Fode pa ki bann lexperyans ek bann lexanp ki to servi atir plis  latansion ki Labib. Anplis, rapel bien ki ena enn diferans ant lir Labib ek servi Labib pou ansegne. Si to lir tro boukou verse, laplipar dimounn pa pou rapel sa bann verse-la. Alor, swazir bien bann verse ki to anvi servi. Apre sa, pran letan pou lir, explike, servi bann lexanp pou explike, ek fer bann aplikasion. (Neemia 8:8) Si enn diskour baze lor enn shema, etidie shema-la bien ek so bann verse. Esey trouve ki lien ena ant shema-la ek so bann verse. Apre sa, servi sertin verse ladan pou ansegn bann lide ki ena dan shema-la. (To kapav trouv bann bon sigzesion dan liv Tirez profit de l’École du ministère théocratique dan leson 21 ziska 23.) Ek pli inportan, demann Zeova pou ed twa partaz so bann panse ki ena boukou valer, ki sorti dan Labib.​—Lir Ezra 7:10 *; Proverb 3:13, 14. *

13. (a) Kouma enn verse ki enn ser ti tande dan enn renion ti ena enn lefe lor li? (b) Kouma fason ki servi Labib dan bann renion ena lefe lor twa?

¹³ Enn ser dan l’Australie, ti pas par bann sitiasion bien orib kan li ti enn  zanfan. Mem si plitar li finn konn Zeova, li pa ti arive krwar ki Zeova kontan li. Me dan enn renion li ti tann enn verse ki ti ena enn gran lefe lor li. Li ti medit lor la, li ti fer bann resers, ek sa ti amenn li ver lezot verse dan Labib. Sa ti konvink li ki Zeova kontan li. * (Get not.) Eski to’nn deza tann enn verse dan enn renion ouswa dan enn lasanble ki’nn ena sa lefe-la lor twa?​—Neemia 8:12.

14. Kouma nou kapav montre ki nou kontan Parol Zeova ek ki sa ena enn gran valer pou nou?

¹⁴ Eski nou pa rekonesan ki Bondie finn donn nou so Parol Labib? Li ti promet ki li pou dire, ek Li’nn gard so promes. (1 Pier 1:24, 25) Alor nou anvi lir li regilierman, aplik li dan nou lavi, ek servi li pou ed lezot. Kan nou fer sa, nou montre ki nou vremem kontan ek apresie sa trezor-la. Ek pli inportan, nou montre ki nou kontan ek apresie sa Kikenn ki’nn fer ekrir Labib-la, Zeova.