1-2. (a) Kifer Armagedon li enn bon nouvel pou limanite? (b) Ki bann kestion nou pou examine dan sa lartik-la?

ESKI to finn deza tann bann dimounn dir ki “Armagedon” se enn lager nikleer ouswa enn katastrof natirel? Selman, seki Labib dir lor Armagedon li enn bon nouvel, enn nouvel ki bizin fer nou kontan! (Rev. 1:3) Lager Armagedon pa pou detrir limanite, me li pou sov li! Kouma li pou fer sa?

² Labib montre ki lager Armagedon pou sov limanite kan li pou detrir bann gouvernman imin. Anplis sa lager-la pou sov limanite kan li pou detrir bann move dimounn ek protez bann bon dimounn. Li pou osi sov limanite kan li pou protez nou planet ek fer an-sort ki li pa detrir. (Rev. 11:18) Pou ed nou konpran pli bien sa bann verite-la, anou examinn kat kestion: Ki ete Armagedon? Ki bann levennman pou ena avan Armagedon? Ki nou bizin fer pou ki nou pa detrir pandan Armagedon? Kouma nou kapav res fidel amezir ki Armagedon pe koste?

3. (a) Ki sa mo “Armagedon” la vedir? (b) Dapre Revelasion 16:14, 16, kifer nou kapav dir ki Armagedon li pa enn plas ki vremem existe?

³ Lir Revelasion 16:14, 16, NW. * Sa mo “Armagedon” la paret zis enn sel fwa dan Labib, ek sa mo-la sorti dan enn lexpresion Ebre ki vedir “Montagn Megido.” (Rev. 16:16, NW; not) Megido ti enn lavil ki ti trouv dan ansien Izrael. (Zozwe 17:11) Me Armagedon se pa nom enn landrwa ki vremem existe lor later. Armagedon  fer referans ar enn sitiasion kot “bann lerwa lor later antie” pou rasanble pou opoz zot kont Zeova. (Rev. 16:14, NW) Selman, dan sa lartik-la, nou pou osi servi term “Armagedon” pou fer referans ar lager ki pou ena zis apre rasanbleman bann lerwa lor later. Kouma nou kone ki Armagedon li enn plas sinbolik? Premierman, pena okenn montagn ki apel Megido. Deziemman, sa plas ki trouv otour Megido la li tro tipti pou ki “bann lerwa lor later antie,” zot larme, ek zot bann masinn lager rasanble laba. Trwaziemman, kouma nou pou trouve pli lwin dan sa lartik-la, lager Armagedon pou koumanse kan bann “lerwa” lor later pou atak pep Bondie, ki viv dan plizir landrwa partou lor later.

4. Kifer Bondie fer enn lien ant so gran lager final ek Megido?

⁴ Kifer Bondie fer enn lien ant so gran lager final ek Megido? Dan lepase, ti ena boukou lager dan Megido ek dan vale Zezreel ki ti pre ar Megido. Parfwa, Zeova ti ed so pep pou gagn sertin sa bann lager-la. Par exanp, “pre ar bann delo Megido,” Bondie ti ed Ziz Barak, ki ti enn Izraelit, pou gagn viktwar lor enn larme Kananeen ki ti dirize par Sisera. Barak ek profetes Debora ti remersie Zeova pou sa viktwar ki zot ti gagne par enn mirak la. Zot ti sante: “Depi lesiel bann zetwal ti pe lager . . . kont Sisera. Larivier Kishonn ti balie zot.”​—Ziz 5:19-21.

5. Ki gran diferans pou ena ant lager Armagedon ek lager ki Barak ti fer?

⁵ Barak ek Debora ti terminn zot sante par sa bann parol-la: “Alor, ki tou to bann lennmi disparet, A Zeova, me les bann ki kontan twa vinn parey kouma soley ki pe leve dan so laglwar.” (Ziz 5:31) Pandan lager Armagedon osi, bann lennmi Bondie pou detrir, me bann ki kontan Bondie pou gagn lavi sov. Me ena enn gran diferans ant sa de lager-la. Pep Bondie pa pou partisip dan lager Armagedon. Zot pa pou mem ena bann zarm! Kan zot pou “res kalm” ek zot pou fer Zeova ek so larme ki dan lesiel “konfians, se samem ki pou zot lafors.”​—Iza. 30:15; Rev. 19:11-15.

6. Ki bann mwayin kitfwa Zeova pou servi pou gagn viktwar lor so bann lennmi pandan Armagedon?

⁶ Kouma eski Zeova pou gagn viktwar lor so bann lennmi pandan lager Armagedon? Li kapav servi diferan mwayin, kouma par exanp, bann tranbleman-de-ter, lagrel, ouswa loraz ek zekler. (Zob 38:22, 23; Eze. 38:19-22) Li kapav osi fer so bann lennmi lager ant zotmem. (2 Kro. 20:17, 22, 23) Ouswa, Li kapav servi bann anz pou touy bann move dimounn. (Iza. 37:36) Nou pa kone ki mwayin Zeova pou servi, me seki nou sir, se ki Li pou gagn viktwar. Tou so bann lennmi pou detrir. Ek tou bann bon dimounn pou gagn lavi sov.​—Prov. 3:25, 26.

7-8. (a) Dapre 1 Tesalonisien 5:1-6, ki lanons bann dirizan sa lemond-la pou fer? (b) Kifer sa lanons-la pou fos ek danzere?

⁷ Avan ki “zour Zeova” vini, pou ena enn deklarasion lor “lape ek sekirite.” (Lir 1 Tesalonisien 5:1-6, NW. *) Dan 1 Tesalonisien 5:2, “zour Zeova” fer referans ar “gran detres.” (Rev. 7:14, NW) Kouma nou pou kone ki gran detres pre pou koumanse? Labib dir ki bann dirizan sa lemond-la pou fer enn lanons ki nou pa abitie tande. Sa pou enn sign ki gran detres pe al koumanse.

⁸ Bann dirizan lemond pou anonse ki ena “lape ek sekirite,” parey kouma ti predir. Me kifer zot pou fer sa lanons-la? Nou pa kone. Eski pou ena bann sef relizie ansam avek zot? Li posib. Nou pa  kone kan eski sa bann dirizan-la pou anonse ki ena “lape ek sekirite,” me nou kone ki sa mesaz-la pou enn foste ki sorti kot bann demon. Sa lanons-la pou bien danzere. Kifer? Parski sa pou fer bann dimounn krwar ki zot an sekirite, alor ki zis apre pou ena pli gran detres ki zame pa finn ena dan listwar. “Enn sel kou enn destriksion pou vinn lor zot, san ki zot atann, parey kouma bann douler enn fam ansint.” Ki pou ariv bann fidel serviter Zeova? Kitfwa zot pou gagn enn sok parski zour Zeova pou vinn enn kout koumsa, me selman zot pou’nn pare pou sa levennman-la.

9. Eski Zeova pou detrir lemond Satan enn sel kout? Explike.

⁹ Zeova pa pou detrir lemond Satan enn sel kout, parey kouma dan lepok Noe. Okontrer, Li pou fer sa an de fwa. Premierman, Li pou detrir Gran Babilonn, lanpir mondial fos relizion. Ek apre, pandan lager Armagedon, Li pou detrir bann lezot eleman ki form parti dan lemond Satan, parmi ena sistem politik, militer, ek komersial. Anou examinn an detay sa de levennman bien inportan la.

10. Dapre Revelasion 17:1, 6, ek 18:24, kifer Zeova pou detrir Gran Babilonn?

¹⁰ ‘Zizman sa gran prostitie-la.’ (Lir Revelasion 17:1, 6, NW; * 18:24.) Akoz Gran Babilonn, boukou dimounn nepli respekte nom Bondie. Gran Babilonn finn fann bann foste lor Bondie. Parey kouma enn fam imoral, fos relizion pa finn res fidel anver Zeova kan li finn soutenir bann dirizan sa lemond-la. Li finn servi so pouvwar ek so linflians pou fer dominer ar so bann manb ek pou pran zot larzan. Fos relizion finn osi touy boukou dimounn, parmi ena bann serviter Bondie. (Rev. 19:2) Kouma Zeova pou detrir Gran Babilonn?

11. Ki sa “bebet rouz” dan Revelasion la reprezante, ek kouma Bondie pou servi li pou atak Gran Babilonn?

¹¹ Zeova pou servi “dis korn” enn “bebet rouz” pou detrir ‘sa gran prostitie-la.’ Sa bebet-la reprezant l’Organisation des Nations unies. Sa bann dis korn-la reprezant bann gouvernman ki pe dirize  dan nou lepok ek ki pe soutenir sa lorganizasion-la. Dan moman ki Bondie inn fixe, sa bann gouvernman-la ek l’Organisation des Nations unies pou atak Gran Babilonn. Zot pou “pran tou seki li ena” ek zot pou “met li touni,” setadir zot pou pran tou so bann rises ek zot pou montre tou dimounn ki kantite li move. (Rev. 17:3, 16) Sa destriksion-la pou pas bien vit, koumadir dan enn sel zour. Alor tou bann ki ti soutenir sa prostitie-la pou gagn enn gran sok, sirtou ki sa prostitie-la ti abitie fer vantar ek dir: “[Momem] larenn, [mo] pa enn vev, e zame [mo] pa pou konn soufrans dey.”​—Rev. 18:7, 8.

12. Ki Zeova pa pou permet bann nasion fer, ek kifer?

¹² Bondie pa pou permet bann nasion detrir so pep. Kifer? Parski so pep pe port so nom avek fierte, ek zot finn obeir komannman ki Li’nn donn zot pou kit Gran Babilonn. (Zist. 15:16, 17, NW; Rev. 18:4) Zot finn osi fer bann gran zefor pou ed lezot sorti dan Gran Babilonn. Alor, bann serviter Zeova pa pou gagn enn par dan “bann fleo ki [Gran Babilonn] pou sibir.” Me malgre sa, zot lafwa pou pas par bann test.

13. (a) Kisannla Gog? (b) Dapre Ezekiel 38:2, 8, 9, kan eski Gog pou ariv dan plas sinbolik ki apel Armagedon?

¹³ Gog atak pep Bondie. (Lir Ezekiel 38:2, 8, 9. *) Apre destriksion tou bann fos relizion, pou ena zis enn sel relizion lor later: bann serviter Zeova. Zot pou koumadir enn dernie pie ki’nn reisi sape apre enn gro siklonn. Alor, Satan pou bien ankoler. Li pou montre so koler kan li pou servi “bann parol inspire ki inpir,” setadir bann fos linformasion ki sorti kot bann demon, pou fer plizir nasion zwenn ansam pou atak pep Zeova. (Rev. 16:13, 14, NW) Apel sa group nasion-la “Gog ki sorti pei Magog.” Kan sa bann nasion-la pou atak pep Bondie, zot pou ariv dan plas sinbolik ki apel Armagedon.​—Rev. 16:16, NW.

14. Ki kitsoz Gog pou rann li kont?

 ¹⁴ Gog pou met so konfians dan so “lebra laser,” setadir dan so bann larme. (2 Kro. 32:8) Nou, nou pou met nou konfians dan Zeova nou Bondie, akoz sa bann nasion pou panse ki nou bet. Apre tou, Gran Babilonn ti bien pwisan, me so bann bondie pa finn reisi protez li kont “bebet” sovaz ek so bann “dis korn”! (Rev. 17:16) Alor Gog pou panse ki so viktwar kont pep Bondie pou bien fasil. “Parey kouma bann niaz ki kouver enn pei,” li pou atak pep Zeova. (Eze. 38:16) Me Gog bien vit pou rann li kont ki li’nn rant dan enn piez. Parey kouma Faraon kot Lamer Rouz, Gog pou realize ki li pe lager kont Zeova.​—Ex. 14:1-4; Eze. 38:3, 4, 18, 21-23.

15. Ki Zezi pou fer pandan lager Armagedon?

¹⁵ Pandan lager Armagedon, Kris ek so larme ki dan lesiel pou defann bann serviter Bondie ek pou detrir net Gog ek so larme. (Rev. 19:11, 14, 15) Me ki pou ariv pli gran lennmi Zeova, setadir Satan, ki’nn fann bann foste pou ki bann nasion atak pep Zeova? Zezi pou zet li ek so bann demon dan labim, ek li pou ferm zot ladan pandan mil an.​—Rev. 20:1-3, NW.

16. (a) Kouma nou montre ki nou “konn Bondie”? (b) Pandan lager Armagedon, ki pou ariv bann dimounn ki konn Zeova?

¹⁶ Ki nou nouvo ouswa lontan dan laverite, pou ki nou pa detrir pandan Armagedon, nou bizin montre ki nou “konn Bondie” ek ki nou pe “obeir Bonn Nouvel nou Segner Zezi Kris.” (2 Tes. 1:7-9) Nou montre ki nou “konn Bondie” kan nou konn seki Li kontan, seki Li pa kontan, ek kan nou konn so bann prinsip. Nou montre osi ki nou konn Bondie kan nou kontan Li, obeir Li, ek ador zis Li tousel. (1 Zan 2:3-5; 5:3) Kan nou konn Bondie, Bondie osi konn nou. Sa li enn gran loner ek sa pou permet nou gagn lavi sov pandan Armagedon! (1 Kor. 8:3, NW) Kifer nou dir sa? Parski kan Bondie konn nou savedir ki nou ena so faver.

17. Ki savedir “obeir Bonn Nouvel nou Segner Zezi Kris”?

¹⁷ “Bonn Nouvel nou Segner Zezi Kris” anglob tou bann verite ki Zezi ti ansegne, ki ena dan Parol Bondie. Nou obeir bonn nouvel kan nou aplik sa bann verite-la dan nou lavi. Obeir bonn nouvel  inplik osi fer Rwayom Bondie pas an premie dan nou lavi, viv an akor avek bann prinsip Zeova, ek pres Rwayom Bondie. (Mat. 6:33; 24:14) Nou bizin osi soutenir bann frer Zezi Kris, ki ena lesperans pou al dan lesiel. Sa bann Kretien-la pe fer bann travay inportan ki Zezi inn donn zot.​—Mat. 25:31-40.

18. Dan ki sans bann Kretien ki ena lesperans pou al dan lesiel pou kapav rekonpans bann lezot mouton?

¹⁸ Bann serviter Bondie ki ena lesperans pou al dan lesiel biento pou rekonpans bann “lezot mouton” pou zot soutien. (Zan 10:16) Kouma? Avan ki lager Armagedon koumanse, tou bann 144,000 pou’nn fini mont dan lesiel. Zot pou bann garson spiritiel Bondie ek zot pou gagn enn lavi imortel. Apre sa, zot pou form parti dan larme ki dan lesiel ki pou detrir Gog ek protez “enn gran lafoul” bann serviter Zeova. (Rev. 2:26, 27; 7:9, 10) Pena dout ki gran lafoul pou bien kontan ki zot finn soutenir bann Kretien ki ena lesperans pou al dan lesiel kan sa bann Kretien-la ti ankor lor later!

19-20. Malgre nou bann difikilte, kouma nou kapav res fidel amezir ki Armagedon pe koste?

¹⁹ Pandan sa bann dernie zour difisil la, boukou serviter Zeova pe pas par bann gran difikilte. Malgre sa, nou kapav kontign andire avek lazwa. (Zak 1:2-4) Enn kitsoz ki pou ed nou andire se bann lapriyer sinser. (Lik 21:36) Anplis, nou bizin etidie ek medit lor Parol Bondie toulezour, parmi ena osi bann zoli profesi ki konsern nou lepok. (Ps. 77:12) Si nou fer sa bann kitsoz-la ek nou fer nou maximum dan nou minister, nou pou kontign ena enn lafwa for ek nou lesperans pou res kler dan nou lespri!

²⁰ Esey mazine ki kantite to pou kontan kan Gran Babilonn pou’nn fini detrir ek lager Armagedon pou’nn fini! Me pli inportan, esey mazine ki kantite to pou kontan kan tou dimounn pou respekte nom Bondie ek so drwa pou dirize! (Eze. 38:23) Pena dout ki Armagedon li enn bon nouvel pou bann ki konn Bondie, ki obeir so Garson, ek ki andire ziska lafin!​—Mat. 24:13.