LARTIK LETID 37
Soumet ar Zeova Avek Tou Nou Leker—Kifer ek Kouma?
“Eski nou pa bizin ankor plis soumet nou avek nou Papa?”—EBRE 12:9.
KANTIK 9 Zeova Li Nou Lerwa!
REZIME *
1. Kifer nou bizin soumet ar Zeova?
NOU bizin soumet * ar Zeova parski Li nou Kreater. Antan ki nou Kreater, Li ena drwa dir nou seki nou bizin fer. (Rev. 4:11) Me nou ena enn lot bon rezon pou obeir Zeova: Personn pa diriz pli bien ki Li. Toutlong listwar, boukou dirizan imin finn ena enn sertenn lotorite lor lezot. Me kan nou konpar zot fason dirize ar fason ki Zeova dirize, nou trouve ki Zeova Limem Dirizan ki ena plis sazes, lamour, mizerikord, ek konpasion.—Ex. 34:6; Rom. 16:27; 1 Zan 4:8.
2. Dapre Ebre 12:9-11, ki bann rezon nou ena pou soumet ar Zeova?
2 Zeova anvi ki nou obeir Li, pa zis parski nou ena respe pou Li, me parski nou kontan Li ek nou konsider Li kouma nou Papa ki bien kontan nou. Dan let ki Pol ti ekrir bann Ebre, li ti explike ki nou bizin “ankor plis soumet nou avek nou Papa” parski Li form nou “pou nou prop bien.”—Lir Ebre 12:9-11.
3. (a) Kouma nou montre ki nou soumet ar Zeova? (b) Ki bann kestion nou pou reponn dan sa lartik-la?
3 Nou soumet ar Zeova kan nou fer nou maximum pou obeir tou seki Li dir nou ek kan nou lit kont dezir pou swazir par noumem seki bon ek seki pa bon. (Prov. 3:5) Li pli fasil pou soumet ar Zeova kan nou aprann konn bann zoli kalite ki Li ena. Kifer? Parski se sa bann kalite-la ki motiv Li pou fer tou seki Li fer. (Ps. 145:9, NW) Plis nou aprann konn Zeova, plis nou pou kontan Li. Ek kan nou kontan Zeova, nou pa bizin enn long lalis bann lalwa pou dir nou seki nou kapav fer ek seki nou pa kapav fer. Nou rezet seki move ek nou fer zefor pou ena bann panse ek bann santiman ki an-akor avek bann prinsip Zeova. (Ps. 97:10, NW) Selman, parfwa nou kapav trouv sa difisil pou obeir Zeova. Kifer? Ki leson bann ansien, bann papa, ek bann mama kapav aprann ar lexanp Gouverner Neemi, Lerwa David, ek Mari, mama Zezi? Nou pou gagn repons sa bann kestion-la dan sa lartik-la.
KIFER NOU KAPAV TROUV SA DIFISIL POU SOUMET AR ZEOVA?
4-5. Dapre Romin 7:21-23, kifer nou kapav trouv sa difisil pou soumet ar Zeova?
4 Enn rezon kifer nou kapav trouv sa difisil pou soumet ar Zeova se parski nou tou nou finn erit pese ek nou inparfe. Akoz sa, nou ena tandans pou rebel kont Zeova. Kan Adan ek Ev ti dezobeir Bondie ek ti manz frwi pie konesans bon ek move, zot ti deside par zotmem ki kitsoz bon ek ki kitsoz pa bon. (Zen. 3:22) Azordi, parey kouma Adan ek Ev, laplipar dimounn pa kas latet ar Bondie ek zot deside par zotmem ki kitsoz bon ek ki kitsoz pa bon.
5 Me mem bann dimounn ki konn Zeova ek kontan Li kitfwa kapav trouv sa difisil pou soumet ar Li avek tou zot leker. Lapot Pol osi ti gagn sa difikilte-la. (Lir Romin 7:21-23.) Parey kouma Pol, nou anvi fer seki bon devan Zeova. Me nou bizin kontign lit kont nou prop tandans pou fer lemal.
6-7. Sit enn deziem rezon kifer nou kapav trouv sa difisil pou soumet ar Zeova. Donn enn lexanp.
6 Enn lot rezon kifer nou kapav trouv sa difisil pou soumet ar Zeova se parski nou inflianse par nou kiltir ek lanvironnman kot nou’nn grandi. Boukou dimounn dir nou bann kitsoz ki bien diferan ar fason panse Zeova. Alor nou bizin kontign fer zefor pou pa pans kouma sa bann dimounn-la. Anou get enn lexanp.
7 Dan sertin pei, bann dimounn met boukou presion lor bann zenn pou zot gagn boukou larzan. Enn ser ki apel Mary * ti fer sa lexperyans-la. Avan ki li ti aprann konn Zeova, Mary ti al dan enn parmi bann pli gran liniversite dan so pei. So fami ti met presion lor li pou li gagn enn travay ki pey bien ek ki ti pou fer lezot respekte li. Anplis, li osi li ti ena sa dezir-la. Selman, Mary ti sanz so bann lobzektif kan li ti aprann konn Zeova ek ti koumans kontan Li. Kanmem sa, sa pa ti fasil pou Mary. Li dir: “Parfwa, mo trouv bann travay ki kapav fer mwa gagn boukou kas, me mo kone ki sa pou anpes mwa servi Zeova kouma mo pe fer asterla. Akoz lanvironnman kot mo’nn grandi, mo ankor trouv sa difisil pou refiz sa bann travay-la. Mo bizin sipliy Zeova pou ed mwa reziste kont tantasion pou aksepte enn travay ki kapav anpes mwa fer mo best pou servi Li.”—Mat. 6:24, NW.
8. Ki nou pou examine asterla?
8 Kan nou soumet ar Zeova, noumem nou gagn bann bienfe. Me bann dimounn ki ena enn sertenn lotorite, kouma bann ansien, bann papa, ek bann mama, ena enn lot rezon pou soumet ar Bondie. Kan zot soumet ar Zeova, lezot osi gagn bann bienfe. Anou get sertin lexanp dan Labib ki pou montre nou kouma nou kapav servi lotorite dan enn fason ki fer Zeova plezir.
KI LESON BANN ANSIEN KAPAV APRANN AR LEXANP NEEMI?
Bann ansien travay ansam ar bann frer ek ser pou fer mintenans Lasal, parey kouma Neemi ti travay ansam ar lepep pou ranz miray Zerizalem (Get paragraf 9-11) *
9. Ki bann difikilte Neemi ti gagne?
9 Zeova inn donn bann ansien enn responsabilite bien inportan: Pran swin so bann serviter. (1 Pier 5:2) Bann ansien kapav aprann boukou ar fason ki Neemi ti tret pep Zeova. Antan ki gouverner Zida, Neemi ti ena enn gran lotorite. (Ne. 1:11; 2:7, 8; 5:14) Reflesi lor sertin difikilte ki Neemi ti gagne. Li ti aprann ki bann Zwif ti pe fer bann move kitsoz dan tanp, ek zot pa ti pe donn bann Levit bann kontribision ki zot ti bizin done dapre Lalwa. Zot pa ti pe obeir lalwa lor Saba, ek sertin zom ti marye avek bann madam ki pa ti ador Zeova. Gouverner Neemi ti pou bizin okip sa bann sitiasion difisil la.—Ne. 13:4-30.
10. Kouma Neemi ti fer fas ar bann difikilte ki li ti gagne?
10 Neemi pa ti servi so lotorite pou obliz lepep fer seki li li anvi. Okontrer, li ti rod led Zeova atraver bann lapriyer sinser, ek li ti ansegn lepep Lalwa Zeova. (Ne. 1:4-10; 13:1-3) Avek limilite, Neemi ti osi travay ansam avek lepep. Li ti mem ed zot pou ranz miray Zerizalem.—Ne. 4:15.
11. Dapre 1 Tesalonisien 2:7, 8, kouma bann ansien bizin tret bann frer ek ser?
11 Kitfwa bann ansien pa fer fas ar bann mem difikilte ki Neemi ti gagne, me zot kapav imit Neemi dan plizir fason. Par exanp, zot travay dir pou ed zot bann frer ek ser. Ek zot pa santi zot pli siperyer ki lezot parski zot ena lotorite. Okontrer, zot tret bann frer ek ser avek boukou tandres. (Lir 1 Tesalonisien 2:7b, 8.) Kan bann ansien ena limilite ek boukou lamour pou lezot, sa inflians zot fason koze. Andrew, ki ansien depi plizir lane, dir: “Mo’nn remarke ki, kan enn ansien li zanti ek amikal, sa tous leker bann frer ek ser. Sa bann kalite-la motiv bann frer ek ser pou korper avek bann ansien.” Tony, enn lot frer ki ansien depi plizir lane, dir: “Mo esey met an pratik konsey ki ena dan Filipien 2:3 ek mo touletan fer zefor pou konsider lezot kouma pli siperyer ki mwa. Sa ed mwa pou pa azir kouma enn diktater.”
12. Kifer li inportan ki bann ansien ena limilite?
12 Bann ansien bizin ena limilite, parey kouma Zeova ena limilite. Mem si Zeova Li Souverin liniver, Li “abes Li” pou tir bann “ti-dimounn dan lapousier.” (Ps. 18:35, NW; 113:6, 7, NW) An realite, Zeova deteste bann dimounn ki orgeye ek arogan.—Prov. 16:5.
13. Kifer enn ansien bizin “vey so lalang”?
13 Enn ansien ki soumet ar Zeova bizin “vey so lalang.” Sinon, li riske mal koz ar enn kikenn ki pa’nn respekte li. (Zak 1:26; Gal. 5:14, 15) Andrew, ki nou ti mansione avan, dir: “Ena fwa, mo ti anvi koz brit ar enn frer ouswa enn ser parski mo ti ena linpresion ki li pa ti respekte mwa antan ki ansien. Selman, mo ti reflesi lor lexanp bann fidel serviter Zeova dan lepase, ek sa ti ed mwa pou konpran linportans pou ena limilite ek douser.” Kan bann ansien koz ar bann frer ek ser ek ar bann lezot ansien avek douser ek amour, zot montre ki zot soumet ar Zeova.—Kol. 4:6.
KI LESON BANN PAPA KAPAV APRANN AR LEXANP LERWA DAVID?
14. Ki responsabilite Zeova inn donn bann papa, ek ki Li atann zot fer?
14 Zeova inn etabli bann papa kouma sef zot fami, ek Li atann ki zot ansegn, gid, ek koriz zot zanfan. (1 Kor. 11:3; Efe. 6:4, NW) Me sa pa vedir ki enn papa kapav servi so lotorite pou fer seki li anvi. Se Zeova ki’nn kree lafami, alor bann papa ena bann kont pou rann Zeova konsernan fason ki zot tret zot fami. (Efe. 3:14, 15, NW) Bann papa montre ki zot soumet ar Zeova kan zot servi zot lotorite dan enn fason ki fer Bondie plezir. Zot kapav aprann boukou ar lexanp Lerwa David.
Fason ki enn papa fer lapriyer montre so fami ki li ena limilite (Get paragraf 15-16) *
15. Kifer eski Lerwa David enn bon lexanp pou bann papa?
15 Zeova pa ti zis etabli David kouma sef lor so fami, me Li ti osi etabli David kouma sef lor nasion Izrael. Antan ki lerwa, David ti ena enn gran lotorite. Parfwa, li ti mal servi so lotorite ek li ti fer bann gran erer. (2 Sam. 11:14, 15) Selman, David ti soumet ar Zeova kan li ti aksepte ki Zeova disiplinn li. Li ti ouver so leker ar Zeova, ek ti dir Li seki li ti resanti. Ek li ti fer so maximum pou obeir bann konsey Zeova. (Ps. 51:1-4) Anplis, li ti ena ase limilite pou aksepte konsey ki bann zom ek mem bann fam ti donn li. (1 Sam. 19:11, 12; 25:32, 33) David ti tir leson ar so bann erer ek ti fer so servis pou Zeova vinn kitsoz pli inportan dan so lavi.
16. Ki leson bann papa kapav aprann ar David?
16 Ki leson bann papa kapav aprann ar Lerwa David? Fode pa ki bann papa servi lotorite ki Zeova inn donn zot dan enn move fason. Zot bizin rekonet zot bann erer ek aksepte bann konsey Biblik ki lezot donn zot. Si zot fer sa, zot fami pou respekte zot parski zot ena limilite. Kan zot priye avek zot fami, pa ezite pou ouver zot leker ar Zeova. Koumsa, zot fami pou tande ki kantite zot anvi ki Zeova ed zot ek gid zot. Me pli inportan, fer servis Zeova pas an premie dan zot lavi. (Det. 6:6-9) Zot bon lexanp, samem pli zoli kado ki zot kapav donn zot fami.
KI LESON BANN MAMA KAPAV APRANN AR LEXANP MARI?
17. Ki responsabilite Zeova inn donn bann mama?
17 Zeova inn donn bann mama enn responsabilite bien inportan dan lafami. Li’nn donn zot enn sertenn lotorite lor zot bann zanfan. (Prov. 6:20) Avredir, seki enn mama dir ek fer kapav inflians so bann zanfan toutlong zot lavi. (Prov. 22:6) Anou gete ki kitsoz bann mama kapav aprann ar lexanp Mari, mama Zezi.
18-19. Ki kitsoz bann mama kapav aprann ar lexanp Mari?
18 Mari ti konn bien bann Lekritir. Li ti ena enn gran respe pou Zeova ek li ti ena enn bon relasion avek Li. Mari ti aksepte pou soumet ar Zeova, mem si sa ti pou sanz so lavi net.—Lik 1:35-38, 46-55.
Si enn mama fatige ouswa agase, kitfwa li pou bizin fer plis zefor pou donn lafeksion so fami (Get paragraf 19) *
19 Bann mama kapav imit lexanp Mari dan plizir fason. Kouma? Premierman, zot bizin kontign ena enn bon relasion avek Zeova kan zot ena enn letid Labib personel ek kan zot fer bann lapriyer personel. Deziemman, zot bizin aksepte fer bann sanzman dan zot lavi pou fer Zeova plezir. Par exanp, kitfwa zot bann paran ti sap lor kal vit ek ti koz brit ar zot. Alor, kitfwa zot panse ki li normal pou elve bann zanfan dan sa fason-la. Mem si zot kone kouma Zeova anvi ki zot tret zot bann zanfan, kitfwa zot ankor trouv sa difisil pou ena pasians ek gard zot kalm, sirtou kan zot bien fatige ek ki zot zanfan inn fer enn betiz. (Efe. 4:31) Dan sa bann moman-la, li bien inportan ki zot priye pou rod led Zeova. Enn mama ki apel Lydia dir: “Parfwa, kan mo garson ti fer move, mo ti bizin fer boukou lapriyer pou pa koz brit ar li. Mo ti mem arete omilie mo fraz ek mo ti priye Zeova dan mo leker pou rod so led. Lapriyer ed mwa pou gard mo kalm.”—Ps. 37:5.
20. Ki difikilte bann mama kapav gagne, ek kouma zot kapav sirmont sa difikilte-la?
Tit 2:3, 4, NW) Dan sertin fami, bann paran pa donn zot zanfan lafeksion. Si to’nn grandi dan enn fami koumsa, to pa oblize fer mem erer ki to bann paran. Enn mama ki soumet ar Zeova kitfwa pou bizin aprann kouma pou donn lafeksion so bann zanfan. Kitfwa to kapav trouv sa difisil pou sanz to fason panse, to fason azir, ek to bann santiman. Me to kapav fer li, ek sa bann sanzman-la pou fer twa ek to fami gagn bann bienfe.
20 Anou get enn lot difikilte ki bann mama kapav gagne. Kitfwa sertin parmi zot trouv sa difisil pou montre zot zanfan ki zot kontan zot. (KONTIGN SOUMET AR ZEOVA
21-22. Dapre Izai 65:13, 14, ki bienfe nou gagne kan nou soumet ar Zeova?
21 Lerwa David ti kone ki kan enn kikenn soumet ar Zeova sa fer li gagn bann bienfe. Li ti ekrir: “Instriksion LESEGNER [“Zeova,” NW] li drwat ek zis, li ranpli leker ar lazwa. Komandman LESEGNER [“Zeova,” NW] bien kler li ouver nou lizie. Zot donn mwa, to serviter, gran konesans e kan mo obeyir zot mo gagn rekonpans.” (Ps. 19:8, 11) Azordi, nou kapav trouv diferans ki ena ant bann dimounn ki soumet ar Zeova ek bann dimounn ki pa aksepte so bann bon konsey. Bann ki soumet ar Zeova ‘kriye dan lazwa parski zot leker kontan.’—Lir Izai 65:13, 14. *
22 Kan bann ansien, bann papa, ek bann mama soumet ar Zeova avek tou zot leker, zot lavi ameliore, zot fami pli ere, ek ena plis linite dan lasanble. Me pli inportan, zot fer leker Zeova kontan. (Prov. 27:11) Eski ena enn pli gran rekonpans ki sa?
KANTIK 123 Nou Soumet ar Bondie Avek Fidelite
^ par. 5 Dan sa lartik-la nou pou trouve kifer nou bizin soumet ar Zeova. Nou pou trouve osi seki bann dimounn ki ena enn sertenn lotorite, kouma bann ansien, bann papa, ek bann mama, kapav aprann ar lexanp Gouverner Neemi, Lerwa David, ek Mari, mama Zezi.
^ par. 1 EXPRESION KI’NN EXPLIKE: Bann mo soumet ek soumision ena enn sans negatif pou bann dimounn ki oblize obeir enn lot dimounn. Parkont, bann serviter Bondie swazir pou obeir Zeova. Alor, kan zot soumet ar Bondie, zot pa panse ki se enn kitsoz negatif.
^ par. 7 Finn sanz sertin nom dan sa lartik-la.
^ par. 21 Izai 65:13, 14: “13 Akoz sa, ala seki Souverin Segner Zeova dir: ‘Gete! Mo bann serviter pou manze, me zot, zot pou fin. Gete! Mo bann serviter pou bwar, me zot, zot pou swaf. Gete! Mo bann serviter pou dan lazwa, me zot, zot pou onte. 14 Gete! Mo bann serviter pou kriye dan lazwa parski zot leker pou kontan, me zot, zot pou kriye parski zot leker pou dan lapenn, ek zot pou plore for-for, parski zot lespri pou trouble.’”
^ par. 63 DESKRIPSION ZIMAZ: Enn ansien pe fer bann travay mintenans dan Lasal ansam ar so garson, parey kouma Neemi ti travay ansam ar lepep pou ranz miray Zerizalem.
^ par. 65 DESKRIPSION ZIMAZ: Enn papa pe priye Zeova ar tou so leker ansam avek so fami.
^ par. 67 DESKRIPSION ZIMAZ: Enn garson inn pas plizir lertan zwe video game ek li pankor fini fer so bann louvraz lakaz ek so bann devwar lekol. So mama, ki fatige apre travay, koriz li san ki li sap lor kal ek san ki li koz brit.